Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XIHONDZO XO RINDZA DECEMBER 2012

Ku Tsundzuka Yesu Kreste

Ku Tsundzuka Yesu Kreste

“Tshamani mi ri karhi mi endla leswi leswaku mi ndzi tsundzuka.”—LUKA 22:19.

Lexi endlaka van’wana va tlangela Khisimusi.

Vanhu van’wana va vula leswaku “va tlangela Khisimusi hikwalaho ka Yesu.” Va tlangela Khisimusi leswaku va tsundzuka siku ra ku velekiwa ka yena.

Ha yini ku ri xiphiqo?

Vuyimbeleri lebyi dumeke bya Khisimusi ni mindhavuko yo tala ya Khisimusi a swi n’wi khumbi helo Yesu Kreste. Vanhu va timiliyoni lava tlangelaka Khisimusi a va na ripfumelo eka yena; van’wana a va kholwi leswaku u tshame a va kona. Eka tikhampani leti xavisaka swilo, Khisimusi yi hundzuke holideyi yo navetisa swilo ematshan’weni yo va nkarhi wo tsundzuka Yesu.

Hi yihi milawu ya Bibele leyi nga pfunaka?

‘N’wana wa munhu u tele ku nyikela moya-xiviri wakwe wu va nkutsulo wa lavo tala.’ (Marka 10:45) Swi le rivaleni leswaku Yesu u vule marito lama tshahiweke eku sunguleni ka xihloko lexi hi vusiku bya le mahlweni ka ku fa ka yena, ku nga ri hi siku ra ku velekiwa kakwe. Hi madyambu wolawo, u simeke nkhuvo wo tsundzuka rifu rakwe. Kambe, ha yini Yesu a a lava leswaku valandzeri vakwe va tsundzuka rifu rakwe ematshan’weni ya ku velekiwa kakwe? Hikuva gandzelo ra nkutsulo ra Yesu ri nyika vanhu lava yingisaka lunghelo ro kuma vutomi lebyi nga heriki. Bibele yi ri: “Hakelo leyi tisiwaka hi xidyoho i rifu, kambe nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” (Varhoma 6:23) Xisweswo, lembe ni lembe, hi siku ro tlangela ku fa kakwe, valandzeri va Yesu va tsundzuka Yesu Kreste tanihi “muponisi wa misava,” ku nga ri ricece leri nga kotiki ku tipfuna.—Yohane 4:42.

“Kreste u xanisekele n’wina, a mi siyela ntila leswaku mi landzelerisisa mikondzo yakwe.” (1 Petro 2:21) Leswaku u dzunisa Yesu ni ku n’wi tsundzuka, u fanele u kambisisa xikombiso xakwe tanihi wanuna la hetisekeke ni la tlhariheke. Nakambe, anakanyisisa hi ndlela leyi Yesu a kombiseke ntwela-vusiwana, ku lehisa mbilu ni xivindzi leswaku a endla leswi nga swinene kutani u lava minkarhi yo n’wi tekelela evuton’wini bya wena.

“Mfumo wa misava se i mfumo wa Hosi ya hina ni wa Kreste wa yona, kutani u ta va hosi hi masiku ni masiku.” (Nhlavutelo 11:15) Loko u tsundzuka Yesu Kreste, anakanyisisa hileswi a nga eku swi endleni sweswi. Yesu u fuma tanihi Hosi etilweni. Rito ra Xikwembu ri profete leswi malunghana na Yesu: “U ta avanyisa swisiwana hi ku tshembeka, naswona u ta tshinya hi vunene ku pfuna lavo rhula emisaveni.” (Esaya 11:4) Timfanelo teto leti tsakisaka a ti humi eka n’wana loyi a ha ku velekiwaka kambe eka Mufumi wa matimba.