Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NOVEMBER 2012

Xana Hi Fanele Hi Vutisa Xikwembu?

Xana Hi Fanele Hi Vutisa Xikwembu?

VAN’WANA va vula leswaku swi hoxile ku vutisa Xikwembu. Va nga ha anakanya leswaku a swi kombisi xichavo ku vutisa leswaku ha yini Xikwembu xi pfumelela kumbe xi nga pfumeleli swilo swo karhi leswaku swi humelela. Xana rero i vonelo leri u nga na rona?

Loko u anakanya leswaku swi hoxile kumbe a swi kombisi xichavo ku vutisa Xikwembu, u nga ha hlamala ku tiva leswaku vanhu vo tala vo lulama va xi vutisile Xikwembu. Xiya swikombiso leswi landzelaka swa swivutiso leswi va xi vutiseke swona:

Wanuna wo tshembeka Yobo u vutise a ku: “Hikwalaho ka yini lavo homboloka va hambeta va hanya, va dyuhala, va tlhela va va ni rifuwo ro tala?”Yobo 21:7.

Muprofeta wo tshembeka Habakuku u vutise a ku: “Ha yini u languta lava va xengaka, u miyela loko munhu wo homboloka a mita loyi a lulameke ku n’wi tlula?”Habakuku 1:13.

Yesu Kreste u vutise a ku: “Xikwembu xanga, Xikwembu xanga, u ndzi tshikele yini?”Matewu 27:46.

Loko u hlaya Matsalwa lama nga ekusuhi ni tindzimana teto, u ta swi xiya leswaku a ku na laha ku kombisaka leswaku Yehovha * Xikwembu u khunguvanyekile loko a vutisiwa swivutiso sweswo leswi humaka embilwini. Hakunene a swi hlamarisi leswi a nga khunguvanyekiki. Hi xikombiso, Xikwembu a xi khunguvanyeki loko hi xi kombela leswaku xi enerisa swilaveko swa hina swa xisekelo leswi endlaka leswaku mimiri ya hina yi tshama yi hanye kahle. Hi ntsako, xi hi nyika leswi hi swi lavaka. (Matewu 6:11, 33) Hilaha ku fanaka, hi ku swi rhandza xi hi nyika rungula leri nga ta endla leswaku hi tshama hi hanye kahle emianakanyweni ni le mintlhavekweni. (Vafilipiya 4:6, 7) Entiyisweni, Yesu u byele vadyondzisiwa vakwe a ku: “Hambetani mi kombela, kutani mi ta nyikiwa.” (Matewu 7:7) Marito ya xitshembiso xa Yesu ma komba leswaku a a nga vulavuli ntsena hi ku kuma swilo swa nyama kambe a a vulavula ni hi ku kuma tinhlamulo ta swivutiso swa nkoka.

Loko a wu ri ni lunghelo ro vutisa, hi xihi xivutiso lexi a wu ta lava ku xi vutisa Xikwembu eka leswi landzelaka?

  • Xana vutomi bya mina byi ni xikongomelo?

  • Xana ku ta humelela yini loko ndzi fa?

  • Ha yini u pfumelela leswaku ndzi xaniseka?

Tanihi leswi “Matsalwa hinkwawo ma [huhuteriweke] hi Xikwembu,” u ta kuma tinhlamulo leti Xikwembu xi ti nyikelaka eRitweni ra xona, ku nga Bibele. (2 Timotiya 3:16) Anakanya hileswi endleke leswaku van’wana va vutisa swivutiso leswi xaxametiweke laha henhla ni tinhlamulo leti Bibele yi ti nyikelaka.

^ ndzim. 7 Yehovha i vito ra Xikwembu hilaha swi hlamuseriweke hakona eBibeleni.