Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA OCTOBER 2012

Vukanganyisi Byi Ta Hela!

Vukanganyisi Byi Ta Hela!

“Tshemba Yehovha u hlayisa ndlela yakwe . . . U ta swi vona loko lavo homboloka va herisiwa.”—PISALEMA 37:34.

XANA u fana ni vanhu vo tala lava chavaka leswaku vukanganyisi a byi papalateki naswona a byi nge pfuki byi herisiwe hi ku helela? Loko swi ri tano, ku chava koloko ka twisiseka. Ematin’wini hinkwawo, vanhu va ringete mixaka hinkwayo ya tihulumendhe. Kambe a va si tshama va swi kota ku herisa vukanganyisi hilaha ku heleleke. Xana ku ni ntshembo wa leswaku ku ta fika nkarhi lowu eka wona vanhu hinkwavo va nga ta tirhisana hi ku tshembeka?

Lexi tsakisaka, Bibele yi vula leswaku wu ta fika! Yi hi byela leswaku ku nga ri khale Xikwembu xi ta teka goza ro herisa vukanganyisi lebyi nga emisaveni. Xana xi ta swi endlisa ku yini sweswo? Hi ku tirhisa Mfumo wa xona, ku nga hulumendhe ya le tilweni leyi nga ta vuyetela misava hi ku helela. Lowu i Mfumo lowu fanaka ni lowu Yesu a dyondziseke valandzeri vakwe leswaku va wu khongelela. Eka Xikhongelo xa Hosi, Yesu u te: “Mfumo wa wena a wu te. Ku rhandza ka wena a ku endleke emisaveni.”—Matewu 6:10.

Malunghana ni Hosi ya Mfumo wolowo, ku nga Yesu Kreste,  Bibele yi vule ka ha ri emahlweni yi ku: “Yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. Yi ta va ni nsovo eka loyi a pfumalaka ni loyi a nga xisiwana, yi ta ponisa moya-xiviri wa swisiwana. Yi ta kutsula moya-xiviri wa vona eku tshikileriweni ni le madzolongeni.” (Pisalema 72:12-14) Xiya leswaku Yesu u va twela vusiwana vanhu lava kanganyisiwaka naswona u ta teka goza! Hakunene leswi swa chavelela!

Hi ku tirhisa Hosi yoleyo leyi nga ni matimba naswona yi nga ni ntwela-vusiwana, Mfumo wa Xikwembu wu ta herisa misava leyi nga ni vukanganyisi. Njhani? Hi ku herisa swilo swinharhu leswi vangaka vukanganyisi.

Nkucetelo Wa Xidyoho

Sweswi, hinkwerhu hi fanele hi lwisana ni mimboyamelo ya xidyoho, leyi hi kucetelaka leswaku hi endla swiendlo swa vutianakanyi. (Varhoma 7:21-23) Hambiswiritano, ku ni vanhu vo lulama lava lavaka ku endla leswinene. Va kombisa ripfumelo eka xitlhavelo xa nkoka xa ngati ya Yesu leyi halatiweke naswona va ta rivaleriwa swidyoho swa vona. * (1 Yohane 1:7, 9) Vanhu volavo va ta va ni lunghelo ro vuyeriwa hi rirhandzu lerikulu ra Xikwembu, hilaha hi hlayaka hakona eka Yohane 3:16, leyi nge: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”

Xikwembu xi ta endlela vanhu vo tshembeka nchumu lowu hlamarisaka hakunene. Emisaveni leyintshwa leyi taka, eku heteleleni xi ta susa xidyoho, hakatsongo-tsongo xi endla vanhu vo tshembeka va va lava hetisekeke ni lava lulameke. (Esaya 26:9; 2 Petro 3:13) Nkucetelo wa xidyoho a wu nge he tlheli wu endla leswaku munhu a va ni vukanganyisi. Ehansi ka vulawuri bya Mfumo wa Xikwembu, vanhu vo tshembeka va “ta ntshunxiwa evuhlongeni bya ku onhaka.”—Varhoma 8:20-22.

Nkucetelo Wa Misava Yo Homboloka Leyi Hi Hanyaka Eka Yona

Khombo ra kona, namuntlha vanhu vo tala va xanisa van’wana hi vomu. Va xanisa vanhu lava titsongahataka ni lava nga swisiwana naswona va kucetela van’wana leswaku na vona va endla vukanganyisi. Bibele yi tsundzuxa vanhu volavo yi ku: “Lowo homboloka a a siye ndlela yakwe, ni munhu wo biha a siya miehleketo yakwe.” Loko vanhu vo tano lava endlaka vukanganyisi va hundzuka, Bibele yi tshembisa leswaku Xikwembu “xi ta rivalela hi ndlela leyikulu.”—Esaya 55:7.

Hambiswiritano, loko vanhu va sihalala va ala ku cinca, Xikwembu xi ta va herisa. Hi ku tirhisa Mfumo wa Xikwembu, ku ta hetiseka xitshembiso xa Bibele lexi nge: “Tshemba Yehovha u hlayisa ndlela yakwe . . . U ta swi vona loko lavo homboloka va herisiwa.” * (Pisalema 37:34) Loko lavo homboloka va herisiwile, vagandzeri va Xikwembu vo tshembeka a va nge he kanganyisiwi.

Nkucetelo Wa Sathana Diyavulosi

Sathana Diyavulosi i mudyohi lonkulu eka hinkwavo. Hakunene swa tsakisa ku tiva leswaku ku nga ri khale Yehovha u ta sivela Sathana leswaku a nga ha kuceteli vanhu. Eku heteleleni, Xikwembu xi ta lovisa Sathana hilaha ku heleleke. Sathana a nge he pfuki a swi kotile ku kucetela vanhu leswaku va endla vukanganyisi.

Kambe mhaka ya leswaku Xikwembu xi ta herisa swilo hinkwaswo leswi vangaka vukanganyisi yi nga ha tikomba yi ri norho. U nga ha tivutisa u ku: ‘Xana hakunene Xikwembu xi ni tindlela to tisa ku cinca koloko? Loko swi ri tano, ha yini xi nga si swi endla ni sweswi?’ Sweswo i swivutiso leswinene naswona Bibele yi nyikela tinhlamulo leti enerisaka. * Ha ku rhamba leswaku u tikambisisela hi wexe leswi Bibele yi swi dyondzisaka malunghana ni vumundzuku lebyi nga kwala nyongeni, laha vukanganyisi hinkwabyo byi nga ta va byi heriseriwe makumu.

^ ndzim. 8 Leswaku u kuma rungula leri engetelekeke malunghana ni xitlhavelo xa nkoka xa rifu ra Yesu, hi kombela u hlaya ndzima 5 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

^ ndzim. 12 Yehovha i vito ra Xikwembu hilaha ri hlavuteriweke hakona eBibeleni.