Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA OCTOBER 2012

Bibele Yi Hundzula Vutomi Bya Vanhu

Bibele Yi Hundzula Vutomi Bya Vanhu

SWI tise ku yini leswaku wanuna loyi a kurisiweke hi ndlela yo vava a va nuna tlhelo tatana loyi a tsakeke ni loyi a humelelaka? I yini lexi susumeteleke wansati la nga ni mikhuva yo tala yo biha leswaku a cinca ndlela leyi a a hanya ha yona? Hlaya leswi vanhu lava va swi vulaka.

“A Ndzi Titwa Ndzi Ri Xikangalafula.”—VÍCTOR HUGO HERRERA

  • LEMBE RO VELEKIWA: 1974

  • TIKO: CHILE

  • MATIMU YAKWE: A A GODZOMBERIWE HI XIHOKO

VUTOMI BYA MINA:

Ndzi velekiwe edorobeni ra Angol edzongeni wo saseka wa Chile. A ndzi n’wi tivi tata wa mina. Loko ndzi ri ni malembe manharhu, Manana u rhurhe na mina ni ndzisana ya mina hi ya entsindza wa Santiago. Hi hetelele hi tshama ekamareni leritsongo ematendeni lama a ma endleriwe vanhu lava nga riki na makaya swa nkarhinyana. A hi tirhisa xihambukelo xa mani na mani naswona mati a hi ma kuma eka phayiphi ya mati lama tirhisiwaka ku tima ndzilo.

Endzhaku ka malembe ya kwalomu ka mambirhi, hulumendhe yi hi nyike yindlu leyitsongo. Khombo ra kona, ndhawu leyintshwa leyi a hi tshama eka yona a yi tele hi vanhu lava tirhisaka swidzidziharisi ni byala hi ndlela yo biha, vugevenga ni vunghwavava.

Siku rin’wana Manana u hlangane ni wanuna un’wana loyi eku heteleleni va tekaneke. Tata wa mina wa vumbirhi a a ri xindzendzele. A a pfa a hi ba mina na Manana. Hakanyingi loko ndzi ri ndzexe a ndzi rila, ndzi navela onge loko a ndzi ri na tatana a ta ndzi sirhelela.

Hambileswi Manana a kulula a n’watseka leswaku a ta hi wundla, a hi dya rikoko ra xilondza. Loko hi twa ndlala, minkarhi yin’wana a hi boheka ku nwa masi ya mapa ni chukele. Mina ni ndzisana ya mina a hi tihungasa hi ku ya hlometela hi fasitere ra muakelani wa hina leswaku hi vona thelevhixini. Kambe siku rin’wana muakelani wa hina u hi jumile hiloko hi namba hi ku swi thya!

Loko tata wa mina wa vumbirhi a nga nwanga, ku nga mhaka leyi a yi nga tolovelekanga ku endleka, a a xavela mina ni ndzisana ya mina swakudya. Siku rin’wana u hi xavele thelevhixini leyitsongo. Wolowo i wun’wana wa minkarhi leyi ndzi titweke ndzi tsakile.

Loko ndzi ri ni malembe ya 12, ndzi dyondze ku hlaya. Endzhaku ka lembe, ndzi tshike xikolo kutani ndzi sungula ku ya entirhweni siku ni siku. Loko ndzi chayisa a ndzi ya eswinkhubyanini ni vatirhi-kulorhi lava ndzi hundzaka hi malembe laha a hi nwa hi dakwa ni ku tirhisa swidzidziharisi. A swi tekanga nkarhi leswaku swi ndzi godzombela.

Loko ndzi ri ni malembe ya 20, ndzi hlangane na Cati loyi eku heteleleni hi tekaneke. Eku sunguleni swilo hinkwaswo a swi famba kahle, hiloko ndzi tlhelela eka vutomi lebyi a ndzi byi hanya. Mahanyelo ya mina ma nyanye ku biha. Eku heteleleni ndzi xiye leswaku mahanyelo ya mina a ma ta endla leswaku ndzi khomiwa kumbe ndzi fa. Kambe xo  biha no tlurisa, a ndzi endla leswaku n’wana wa mina Víctor a xaniseka ku fana na mina loko ndza ha ri ntsongo. A ndzi titwa ndzi ri ni gome, ndzi hlundzukile naswona ndzi ri xikangalafula.

Hi va-2001, Timbhoni ta Yehovha timbirhi ti endzele ekaya ka hina naswona Cati u sungule ku dyondza na tona Bibele. U ndzi byele leswi a a swi dyondza. Leswi a ndzi lava ku tiva, ndzi sungule ku dyondza Bibele. Hi 2003, Cati u khuvuriwile a va Mbhoni ya Yehovha.

NDLELA LEYI BIBELE YI HUNDZULEKE VUTOMI BYA MINA HA YONA:

Siku rin’wana ndzi hlaye Rhuti 2:12 leyi vulaka leswaku Yehovha u hakela lava kombisaka ripfumelo ni ku lava vutumbelo eka yena. Ndzi xiye leswaku loko ndzi hundzuka, a ndzi ta tsakisa Xikwembu ni ku hakeriwa ha xona. Ndzi xiye ndlela leyi Bibele yi yirisaka vudakwa ha yona. Marito ya 2 Vakorinto 7:1 ma ndzi khumbile. Ndzimana yoleyo yi hi khutaza leswaku hi “[tibasisa] eka swilo hinkwaswo leswi nyamisaka.” Kutani ndzi sungule ku tshika mikhuva ya mina yo biha. Eku sunguleni a ndzi tsandzeka ku tikhoma, kambe Cati a nga tshikanga ku ndzi seketela.

Eku heteleleni ndzi tshike ntirho hikuva ntshikilelo wo dzaha ni ku nwa a wu ri wukulu. Hambileswi a hi ri ni mali yitsongo hileswi a ndzi tshike ntirho, sweswo swi ndzi nyike nkarhi wo tala wo dyondza Bibele. Hi nkarhi wolowo ndzi sungule ku endla nhluvuko tanihi Mukreste. Cati a a nga lavi swilo leswi vonakaka leswi a ndzi nga ta swi fikelela naswona a a nga sola-soli vutomi byo olova lebyi a hi hanya byona. Entiyisweni ndza wu tlangela nseketelo wakwe wa rirhandzu.

Hakatsongo-tsongo ndzi sungule ku tihlanganisa swinene ni Timbhoni. Ti ndzi pfune ku twisisa leswaku hambileswi ndzi nga dyondzekangiki, Yehovha u swi teka swi ri swa nkoka leswi ndzi swi navelaka hi mbilu hinkwayo ku n’wi tirhela. Rirhandzu ni vun’we lebyi hi byi voneke evandlheni ra Vukreste swi wu khumbe swinene ndyangu wa hina. Ku hava ndhawu yin’wana leyi eka yona hi kumeke ku rhula ko tano. Hi December 2004, na mina ndzi khuvuriwile.

NDLELA LEYI NDZI VUYERIWEKE HA YONA:

Ndzi vone ntiyiso wa marito ya Yehovha lama tsariweke eka Esaya 48:17 lama nge: “Mina Yehovha, ndzi Xikwembu xa wena, Loyi a ku dyondziselaka ku ku pfuna.” Manana ni ndzisana ya mina va tsakisiwe swinene hi ku cinca ka mina lerova sweswi va dyondza Bibele. Hambi ku ri vaakelani va mina va tsaka ku vona ku cinca loku ndzi ku endleke ni ndyangu wa hina lowu nga ni ntsako.

Ndzi ni nsati loyi a rhandzaka Xikwembu loyi a ndzi tekaka tanihi munghana wakwe loyi a tshembekaka. Hambileswi ndzi nga n’wi tiviki Tatana, Bibele yi ndzi dyondzise ndlela yo kurisa vana va mina vanharhu va majaha. Va ndzi xixima. Xa nkoka swinene, va teka Yehovha tanihi Munhu wa xiviri naswona va n’wi rhandza.

“Hambileswi ndzi nga n’wi tiviki Tatana, Bibele yi ndzi dyondzise ndlela yo kurisa vana va mina vanharhu va majaha”

Ndzi swi tlangela swinene leswi Yehovha a ndzi nyikeke nkarhi wo va wanuna la tsakeke hambileswi ndzi kurisiweke hi ndlela leyi nga tsakisiki.

 “Ndzi Sungule Ku Va Nhwanyana Loyi A A Tshama A Hlundzukile Ni Ku Va Ni Madzolonga.”—NABIHA LAZAROVA

  • LEMBE RO VELEKIWA: 1974

  • TIKO: BULGARIA

  • MATIMU YAKWE: MUNGUNGUMERISI WA SWIDZIDZIHARISI

VUTOMI BYA MINA:

Ndzi velekiwe eSofia, le Bulgaria, endyangwini lowu nga fuwangiki naswona wu nga riki swisiwana. Tatana u fambe a hi siya loko ndzi ri ni malembe ya tsevu. Sweswo swi ndzi tseme nhlana ni ku endla leswaku ndzi tshikileleka swinene. A ndzi tivona ndzi fularheriwile naswona ndzi nga faneleki ku rhandziwa. Loko ndzi ri karhi ndzi kula, sweswo swi endle leswaku ndzi xandzuka. Ndzi sungule ku va nhwanyana loyi a a tshama a hlundzukile ni ku va ni madzolonga.

Loko ndzi ri ni malembe ya 14, ndzi sungule ku baleka ekaya. Hakanyingi a ndzi yivela Manana ni vakokwa wa mina mali. Exikolweni a ndzi tshama ndzi ri ekhombyeni hileswi a ndzi ri ni ximbilwambilwana naswona hikwalaho ka sweswo ndzi rhumeriwe eka swikolo swa ntlhanu leswi nga faniki ku nga si hela malembe ma nga ri mangani ntsena. Eka malembe manharhu emahlweni ko va ndzi kuma diploma ya mina, ndzi tshike xikolo. A ndzi ri ni mahanyelo yo biha swinene. Ndzi sungule ku godzomberiwa hi ku dzaha fole ni mbangi. A ndzi nwa ngopfu naswona nkarhi hinkwawo a ndzi ya eswinkhubyanini naswona ndzi sungule ku katseka eku ngungumeriseni ka swidzidziharisi. A swi ndzi karhata ku hanya emisaveni leyi nga riki na ntshembo leyi eka yona vanhu va xanisekaka ni ku fa. Kutani a ndzi hanyela ku titsakisa swa siku rero ntsena.

Hi 1998, loko ndzi ri ni malembe ya 24, ndzi khomiwile erivaleni ra swihaha-mpfhuka eSão Paulo, le Brazil, hikwalaho ko ngungumerisa swidzidziharisi leswi nga riki enawini. Ndzi gweviwe ku tshama malembe ya mune ekhotsweni.

NDLELA LEYI BIBELE YI HUNDZULEKE VUTOMI BYA MINA HA YONA:

Hi 2000, Timbhoni ta Yehovha ti sungule ku ndzi endzela ekhotsweni kan’we hi vhiki. Un’wana wa tona, ku nga Marines, a a ri ni musa swinene eka mina. U ndzi endle ndzi lava ku dyondza swo tala hi Bibele. Leswi a ndzi nga si tshama ndzi twa hi Timbhoni ta Yehovha, ndzi kombele vabohiwa-kulorhi leswaku va ndzi hlamusela leswi va swi tivaka ha tona. Lexi ndzi hlamariseke hileswi vo tala va vulavuleke ku biha hi Timbhoni. Mubohiwa un’wana u ndzi byele leswaku ndzi nga ya eka vukhongeri byin’wana ni byin’wana kambe ku nga ri bya Timbhoni ta Yehovha. Rungula rakwe ri ndzi endle leswaku ndzi ya ndzi lava ku tiva; A ndzi lava ku kumisisa leswaku ha yini ti vengiwa swinene. Ndzi sungule ku swi vona leswaku a swi vangiwa hileswi ti nga eka vukhongeri bya ntiyiso. Phela Bibele yi vula leswaku un’wana ni un’wana loyi a ringetaka ku landzela Yesu hi mbilu hinkwayo u ta xanisiwa.—2 Timotiya 3:12.

Hi nkarhi wolowo ndzi averiwe ku tirha ehofisini ya khotso. Siku rin’wana ndzi kume mabokisi lama nga ni timagazini * ta khale ta Xihondzo xo Rindza ni Xalamuka! ekamareni ra vuhlayiselo. Ndzi fambe na tona exitokisini xa mina kutani ndzi sungula ku ti hlaya. Loko ndzi ri karhi ndzi ti hlaya a ndzi ya ndzi titwa ndzi fana ni munhu loyi a nga emananga loyi a kumeke xihlovo xa mati yo tenga. Leswi a ndzi ri ni nkarhi, ndzi hete tiawara to tala ndzi ri karhi ndzi hlaya Bibele masiku hinkwawo.

Siku rin’wana ndzi vitaniwe ehofisini ya khotso. A ndzi langutele ku ntshunxiwa ekhotsweni, hiloko ndzi namba ndzi teka swilo swa mina swi nga ri swingani,  ndzi lela vabohiwa-kulorhi kutani ndzi tsutsumela ehofisini. Hambiswiritano, loko ndzi fika kwalaho, ndzi kume leswaku ndzi pfuleriwe nandzu wun’wana lowu a wu katsa ku va ni maphepha ya vuxisi. Hikwalaho ka sweswo ndzi gweviwe ku tshama ekhotsweni malembe man’wana mambirhi.

Eku sunguleni a ndzi hele matimba. Kambe endzhaku ka masiku ma nga ri mangani ndzi sungule ku swi xiya leswaku sweswo a ku ri nkateko. Hambileswi a ndzi dyondze swilo swo tala eBibeleni, embilwini ya mina a ndzi lava ku ya emahlweni ni mahanyelo ya mina ya khale endzhaku ka loko ndzi ntshunxiwe ekhotsweni. A ndza ha lava nkarhi lowu engetelekeke leswaku ndzi cinca.

Minkarhi yin’wana a ndzi vona onge a swi nge koteki leswaku Xikwembu xi ndzi amukela tanihi un’wana wa vagandzeri va xona. Kambe ndzi anakanyisise hi tindzimana to tanihi 1 Vakorinto 6:9-11. Tindzimana teto ti kombisa leswaku hi lembe-xidzana ro sungula C.E., Vakreste van’wana a va ri makhamba, swidakwa ni vadyeleri emahlweni ko va va tirhela Yehovha. Kambe hikwalaho ko pfuniwa hi Yehovha, va hundzukile. Xikombiso xa vona xi ndzi khutaze swinene.

Swi ndzi oloverile ku tshika mahanyelo man’wana ya mina yo biha. Hi xikombiso, a swi ndzi tikelanga ku tshika ku tirhisa swidzidziharisi. Kambe swi ndzi tikele swinene ku tshika ku dzaha. Eku heteleleni ndzi kote ku tshika mukhuva lowu endzhaku ka loko ndzi hete lembe ndzi ri karhi ndzi lwa hi matimba. Nchumu wun’wana lowu ndzi pfuneke a ku ri ku tidyondzisa hi swilo swo biha leswi ku dzaha ku swi endlaka eka rihanyo ra munhu. Ku tlula kwalaho, ku hambeta ndzi khongela swi ndzi pfunile leswaku ndzi ri tshika.

“Ndzi xiye leswaku ndzi kume Tatana lonene—loyi a nga ta ka a nga ndzi fularheli ni siku ni rin’we!”

Loko ndzi ri karhi ndzi tshinela eka Yehovha, hakatsongo-tsongo ndzi sungule ku hlula ku titwa loku a ndzi ri na kona ko fularheriwa endzhaku ka loko Tatana a fambe a hi siya. Marito lama nga eka Pisalema 27:10 ma ndzi khumbe swinene. Ndzimana yoleyo yi ri: “Loko tatana na manana vo ndzi tshika, Yehovha u ta ndzi teka.” Ndzi xiye leswaku ndzi kume Tatana lonene—loyi a nga ta ka a nga ndzi fularheli ni siku ni rin’we! Sweswi vutomi bya mina byi ni xikongomelo. Hi April 2004, endzhaku ka tin’hweti ta tsevu ndzi ntshunxiwe ekhotsweni, ndzi khuvuriwe ndzi va Mbhoni ya Yehovha.

NDLELA LEYI NDZI VUYERIWEKE HA YONA:

Ndzi ni ntsako. A ndza ha ri ni mikhuva leyi nga ta ndzi vavisa naswona ndzi tiphina hi rihanyo ro antswa ku tlula leri a ndzi ri na rona loko ndza ha ri ntsongo. Ndzi tiphina hi ku va ni ntsako evukatini bya mina ni ku va ni vuxaka lebyikulu ni Tata wa mina wa le tilweni, ku nga Yehovha. Exikarhi ka vagandzeri vakwe, ndzi kume vatatana, vamanana, vabuti ni vasesi vo tala. (Marka 10:29, 30) Ndza swi tlangela leswi va voneke vuswikoti lebyi ndzi nga na byona—emahlweni ko va ndzi byi xiya.

Minkarhi yin’wana ndzi titwa ndzi kingindziwa hi ripfalo hikwalaho ka mahanyelo ya mina ya khale. Kambe swa ndzi chavelela ku tiva leswaku emisaveni leyintshwa leyi tshembisiweke hi Xikwembu, swilo swo biha “a swi nge tsundzukiwi.” (Esaya 65:17) Sweswi mintokoto ya mina yi ndzi pfuna ku va ni ntwela-vusiwana eka vanhu lava langutanaka ni swiphiqo leswi fanaka. Hi ndlela yoleyo, mahanyelo ya mina ya nkarhi lowu hundzeke ma ndzi pfuna. Hi xikombiso, loko ndzi chumayela evutirhelini bya Vukreste, swa ndzi olovela swinene ku vulavula ni vanhu lava godzomberiweke hi swidzidziharisi ni byala kumbe swigevenga—handle ko va ni xihlawuhlawu. Ndza tiyiseka leswaku leswi ndzi koteke ku hundzuka leswaku ndzi tsakisa Yehovha, un’wana ni un’wana a nga swi kota!

^ ndzim. 29 Ti kandziyisiwe hi Timbhoni ta Yehovha.