Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA SEPTEMBER 2012

 Tshinela Eka Xikwembu

“Matiko Ma Ta Tiva Leswaku Hi Mina Yehovha”

“Matiko Ma Ta Tiva Leswaku Hi Mina Yehovha”

XANA a wu ta titwa njhani loko a wu hehliwa hi vugevenga lebyi u nga byi endlangiki? Nakambe ku vuriwa yini loko ku ri hileswaku vugevenga byebyo byi vangele vanhu van’wana ku xaniseka lokukulu, ku katsa ni vanhu vo tala lava nga riki na nandzu? Hakunene a wu ta lava ku kombisa leswaku a wu na nandzu eka xihehlo xexo! Xana wa swi xiya leswaku Yehovha u langutane ni xihehlo lexi fanaka? Namuntlha vanhu vo tala hi xihoxo va hehla Xikwembu hi vuhomboloki ni ku xaniseka loku nga kona emisaveni leyi. Xana Yehovha u tiyimisele ku basisa vito rakwe? Hakunene, u tiyimiserile! Xiya leswi vuriwaka ebukwini ya Ezekiyele.—Hlaya Ezekiyele 39:7.

Yehovha u ri: “Ndzi nga ka ndzi nga ha tshiki vito ra mina ro kwetsima ri nyamisiwa.” Loko vanhu va n’wi sola hikwalaho ka vuhomboloki, va nyamisa vito rakwe. Njhani? Hakanyingi eBibeleni, “vito” ri vula ndhuma. Buku yin’wana ya tinhlamuselo ta Bibele yi vula leswaku vito ra Xikwembu ri kombetela eka “leswi xi tiviwaka ha swona—ndlela leyi xi tipaluxaka ha yona; ri tlhela ri vula ndhuma ya xona ni ku fundzhiwa ka xona.” Vito ra Yehovha ri katsa ndhuma yakwe. I yini leswi tiviwaka hi Yehovha loko swi ta eka vuhomboloki? Wa byi venga! Nakambe u va twela-vusiwana lava xanisiwaka hi vuhomboloki. * (Eksoda 22:22-24) Loko vanhu va vula leswaku Xikwembu xi ni vutihlamuleri eka swilo hinkwaswo leswi xi swi vengaka, va xi onha vito. Xisweswo va “khoma vito ra [xona] hi ndlela leyi nga kombisiki xichavo.”—Pisalema 74:10.

Xiya leswaku Yehovha u tirhisa xiga lexi nge “vito ra mina ro kwetsima” ku ringana kambirhi. (Ndzimana 7) EBibeleni, vito ra Yehovha ri hlanganisiwa ni rito leri nge “kwetsima” ni leri nge “vukwetsimi” minkarhi yo hlayanyana. Rito leri nge “kwetsima” ri vula nchumu lowu hambanisiweke; ri tlhela ri vula ku basa ni ku tenga. Vito ra Yehovha ra kwetsima hikuva Xikwembu lexi byarhaka vito rero xa kwetsima—xi hambane hi ku helela ni nchumu wun’wana ni wun’wana lowu nga ni xidyoho ni lowu nga basangiki. Xana wa swi vona leswaku ha yini vanhu lava solaka Yehovha hikwalaho ka vuhomboloki va ri lava solaka “vito [rakwe] ro kwetsima” hi ku helela?

Xikongomelo xa Yehovha xo basisa vito ra yena hi ku tirhisa Mfumo wakwe i nhloko-mhaka-nkulu ya Bibele. Nhloko-mhaka yoleyo yi kandziyisiwe ebukwini ya Ezekiyele, leyi hi ku phindha-phindha yi vulaka leswaku “matiko ma ta tiva leswaku hi mina Yehovha.” (Ezekiyele 36:23; 37:28; 38:23; 39:7) Xiya leswaku matiko a ma nge tihlawuleli ku va ma tiva Yehovha kumbe e-e. Ematshan’weni ya sweswo, ma “ta tiva.” Hi marito man’wana, Yehovha u tiyimisele ku teka goza leri nga ta endla leswaku matiko ya misava ya swi vona leswaku u leswi a vulaka leswaku u swona—Yehovha, Hosi leyi Lawulaka, loyi vito rakwe ri yimelaka swilo hinkwaswo leswi kwetsimaka, leswi tengeke ni leswi baseke.

Xitshembiso lexi hakanyingi xi phindha-phindhiwaka xa leswaku “matiko ma ta tiva leswaku hi mina Yehovha” i mahungu lamanene eka vanhu lava swi languteleke hi mahlo-ngati ku vona ku herisiwa ka vuhomboloki ni ku xaniseka. Ku nga ri khale, Yehovha u ta hetisisa xitshembiso xexo kutani a basisa vito rakwe eka swisolo hinkwaswo. U ta herisa vuhomboloki ni vanhu lava byi hlohlotelaka kambe u ta hlayisa lava xiximaka vito rakwe ni leswi ri yimelaka swona. (Swivuriso 18:10) Xana u susumeteleka ku dyondza ndlela leyi u nga tshinelaka eka Yehovha ha yona, Xikwembu xo kwetsima, lexi ‘rhandzaka vululami’?—Pisalema 37:9-11, 28.

Tindzimana ta Bibele leti u nga ti hlayaka hi September:

Ezekiyele 39Daniyele 3

^ ndzim. 4 Vona xihloko lexi nge “Tshinela Eka Xikwembu—Lexi Rhandzaka Vululami,” eka Xihondzo xo Rindza xa November 1, 2008.