Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XIHONDZO XO RINDZA SEPTEMBER 2012

 Dyondzisa Vana Va Wena

Makwanga Ya Endle Leswaku Gehazi A Nga Ha Tsakeriwi Hi Xikwembu

Makwanga Ya Endle Leswaku Gehazi A Nga Ha Tsakeriwi Hi Xikwembu

XANA u tshame u lava nchumu wo karhi ku tlula mpimo? * Loko swi ri tano, a wu wexe. Kambe xana u fanele u ringeta ku kuma leswi u swi lavaka hi ku hemba?— Doo, a wu fanelanga u endla tano. Munhu loyi a endlaka tano u ni makwanga. A hi voneni ndlela leyi ha yona wanuna loyi a vuriwaka Gehazi a onhiweke hi makwanga. A a ri nandza wa Elixa, muprofeta wa Xikwembu xa ntiyiso, ku nga Yehovha.

Elixa na Gehazi va hanye khale swinene, kwalomu ka malembe ya 1 000 emahlweni ko va N’wana wa Xikwembu, ku nga Yesu, a velekiwa laha misaveni. Yehovha u tirhise Elixa leswaku a endla swilo swo hlamarisa—ku nga ku endla masingita! Hi xikombiso, Bibele yi vulavula hi wanuna loyi a a ri ni xikhundlha xo karhi evuthwini ra Siriya loyi a a ri ni vuvabyi lebyi vavaka bya nhlokonho. A ku nga ri na munhu loyi a a ta n’wi horisa, kambe Elixa u n’wi horisile.

Loko Elixa a tirhisiwa hi Xikwembu leswaku a pfuna vanhu va hola, a a nga lavi ku hakeriwa. Xana wa swi tiva leswaku ha yini?— Hikuva Elixa a a swi tiva leswaku masingita wolawo ma huma eka Yehovha—ku nga ri eka yena. Loko Namani a horisiwile, u tsake lerova a lava ku nyika Elixa tinyiko ta nsuku, silivhere ni swiambalo leswinene. Elixa a nga swi amukelanga, kambe Gehazi a a ti lava swinene tinyiko leti.

Endzhaku ka loko Namani a fambile, Gehazi u tsutsume a n’wi sala endzhaku handle ko byela Elixa. Loko a fika eka Namani, wa swi tiva leswaku u n’wi byele yini?— ‘Elixa u ndzi rhume leswaku ndzi ta ku byela leswaku ka ha ku fika vaendzi vambirhi. U ri a nga tsakela leswaku u n’wi nyika swiambalo swimbirhi swa ku cinca leswaku a ta swi nyika vanhu lava.’

 Kambe sweswo a ku ri mavunwa! Gehazi u sungule xitori xa vaendzi vambirhi. U vule tano hikuva a a lava swiambalo leswi Namani a a lava ku swi nyika Elixa. Entiyisweni, Namani a a nga swi tivi leswi. Kutani hi ntsako u nyike Gehazi tinyiko toleto. Namani u tlhele a nyika Gehazi swilo swo tala ku tlula leswi Gehazi a swi kombeleke. Xana wa swi tiva leswaku ku humelele yini endzhaku ka sweswo?

Loko Gehazi a fika ekaya, Elixa u n’wi vutise a ku: ‘A wu ye kwihi?’

Gehazi u hlamule a ku: ‘A ndzi nga yanga helo.’ Hambiswiritano, Yehovha a a tivise Elixa leswi Gehazi a swi endleke. Kutani Elixa u te: ‘Lowu a hi nkarhi wa ku amukela mali ni swiambalo!’

Gehazi u amukele mali ni swiambalo leswi nga riki swa yena. Kutani Xikwembu xi endle leswaku nhlokonho lowu a wu ri eka Namani wu ya eka Gehazi. Xana u ehleketa leswaku hi nga dyondza yini eka leswi?— Hi dyondza leswaku a hi fanelanga hi hemba.

Ha yini Gehazi a vule xitori lexi entiyisweni a xi ri mavunwa?— A ku ri hileswi Gehazi a a ri ni makwanga. A a lava swilo leswi nga riki swa yena naswona u ringete ku swi kuma hi ku hemba. Hikwalaho ka sweswo, u ve ni vuvabyi byo vava vutomi byakwe hinkwabyo.

Entiyisweni, Gehazi u kume vuyelo lebyi vavaka swinene ku tlula ku hlaseriwa hi nhlokonho. Xana wa byi tiva vuyelo bya kona?— U lahlekeriwe hi vuxaka lebyi a a ri na byona na Xikwembu. Onge hi nga papalata ku endla xin’wana ni xin’wana lexi nga endlaka leswaku hi lahlekeriwa hi vuxaka bya hina na Xikwembu! Ematshan’weni ya sweswo, a hi veni ni musa naswona hi tshama hi lunghekele ku avelana swilo leswi hi nga na swona ni van’wana.

Hlaya matsalwa lawa eBibeleni ya wena

^ ndzim. 3 Loko u hlayela n’wana, mfungho lowu wu endleriwe ku ku tsundzuxa leswaku u yima, kutani u rindzela leswaku a hlamula xivutiso xa kona.