Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

XIHONDZO XO RINDZA MARCH 2012

 Dyondzisa Vana Va Wena

“U Hambete A Namarhela Yehovha”

“U Hambete A Namarhela Yehovha”

XANA u tshame u byeriwa leswaku u namarhela nchumu wo karhi? * Vatswari ni vadyondzisi va nga ha byela vana leswaku va namarhela tidyondzo ta vona. Leswi swi vula leswaku va fanele va ti teka ti ri ta nkoka. Hi lava ku vulavula hi munhu loyi Bibele yi vulaka leswaku u “hambete a namarhela Yehovha,” ku nga Xikwembu xa ntiyiso. Vito ra munhu yoloye i Hezekiya. A hi voneni leswi hi nga swi dyondzaka eka xikombiso xakwe.

Loko a ha ri ntsongo, Hezekiya a a dya mbitsi a xeva hi nhlomulo. Tata wakwe Akazi, loyi a ri hosi ya Yuda u tshike ku tirhela Yehovha. Akazi u sungule ku gandzela swikwembu swa hava loko Hezekiya a ha ri mufana. Akazi u tlhele a dlaya un’wana wa vana vakwe—makwavo wa Hezekiya—kutani a n’wi nyikela tanihi xitlhavelo eka xikwembu lexi a a xi gandzela!

Hambileswi Akazi a yeke emahlweni a ri karhi a endla swilo swo biha, Hezekiya u hambete a yingisa Yehovha. Xana u anakanya leswaku a swi n’wi tikela ku endla tano?— Swi fanele swi n’wi tikerile. Kambe Hezekiya a nga lahlanga thawula! A hi voneni leswaku u swi kotise ku yini ku namarhela Yehovha ni leswaku hina hi nga swi kotisa ku yini.

Hezekiya u dyondze hi vanhu van’wana lava namarheleke Yehovha. Davhida a ku ri un’wana wa vanhu volavo lava endleke tano. Hambileswi Davhida a hanyeke eka madzana ya malembe emahlweni ko va Hezekiya a velekiwa, Hezekiya u kote ku dyondza ha yena eMatsalweni. Davhida u tsale a ku: “Loko tatana na manana vo ndzi tshika, Yehovha u ta ndzi teka.”

Xana wa swi vona leswaku i yini lexi pfuneke Davhida leswaku a yingisa Yehovha?— I ripfumelo rakwe! Davhida a a tiyiseka leswaku loko a yingisa, Yehovha a a ta n’wi pfuna. Davhida a a nga swi kanakani sweswo! Hakunene, ku va Hezekiya a anakanyisise  hi Davhida swi n’wi pfune leswaku a namarhela Yehovha hi ku va a N’wi yingisa. Na wena u nga tiyiseka leswaku Yehovha u ta ku pfuna loko u n’wi namarhela hi ku va u n’wi yingisa.

Kambe ku vuriwa yini loko tata wa wena kumbe mana wa wena a nga gandzeli Yehovha?— Xikwembu xi vula leswaku vana va fanele va yingisa vatswari va vona. Kutani na wena u fanele u yingisa vatswari va wena. Hambiswiritano, loko vatswari va wena va ku byela leswaku u endla swilo leswi Xikwembu xi vulaka leswaku u nga swi endli, u nga ha va hlamusela leswaku ha yini u nga taka u nga swi koti ku swi endla. A wu fanelanga u hemba, u yiva kumbe u endla nchumu wun’wana ni wun’wana wo biha lowu Xikwembu xi vulaka leswaku wu bihile, ku nga khathariseki leswaku i mani loyi a ku byelaka leswaku u wu endla. U endla kahle loko u yingisa Xikwembu!

Ku ni swikombiso leswinene leswi hi nga swi tekelelaka. Hezekiya a nga tekelelanga xikombiso xa Davhida ntsena, kambe u tlhele a tekelela xikombiso xa kokwa wakwe Yohatama. Hambileswi Yohatama a feke Hezekiya a nga si velekiwa, Hezekiya u swi kotile ku dyondza ha yena, hilaha na hina hi nga dyondzaka hakona eTibibeleni ta hina namuntlha. Xana u nga tsundzuka swikombiso swin’wana leswinene leswi hi nga swi tekelelaka?

I ntiyiso leswaku eBibeleni u nga hlaya hi swihoxo swin’wana leswi Hezekiya, Davhida, Yohatama ni vanhu van’wana lava nga hetisekangiki va swi endleke. Kambe vanhu volavo a va rhandza Yehovha, va pfumele swihoxo swa vona kutani va ringeta ku endla leswi nga swinene. Tsundzuka leswaku i Yesu, N’wana wa Xikwembu ntsena loyi a a hetisekile. A hi dyondzeni ha yena kutani hi ringeta ku tekelela xikombiso xakwe.

^ ndzim. 3 Loko u hlayela n’wana, mfungho lowu wu endleriwe ku ku tsundzuxa leswaku u yima, kutani u rindzela leswaku a hlamula xivutiso xa kona.