Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA DECEMBER 2011

A Ku Nge He Vi Na Timhangu!

A Ku Nge He Vi Na Timhangu!

XANA a wu ta angula njhani loko un’wana a ku byela leswaku, “Ku nga ri khale, a ku nge he vi na timhangu?” U nga ha hlamula u ku: “Sweswo i milorho. Timhangu i nchumu lowu nga papalatekiki evuton’wini.” Kumbe u nga ha tivutisa leswaku ‘U ehleketa leswaku u tlanga na mani?’

Hambileswi swi vonakaka onge ku ta tshama ku ri ni timhangu ta ntumbuluko, ku ni xisekelo xa ntshembo wa xiviri xa leswaku leswi swi ta cinca. Hambiswiritano, ku cinca loku a ku nge tisiwi hi matshalatshala ya munhu. Vanhu va nyama a va swi twisisi hi ku helela leswaku ha yini swilo leswi swi humelela hi ntumbuluko ni leswaku swi humelela njhani, hi nga ha vuli ku swi cinca kumbe ku swi lawula. Hosi Solomoni wa le Israyele wa khale, loyi a tivekaka hi vutlhari byakwe u tsale a ku: ‘Vanhu a va nge swi koti ku kumisisa ntirho lowu endliweke ehansi ka dyambu; hambiswiritano, vanhu vo tala va ya emahlweni va tirha hi matimba leswaku va kuma swo karhi, kambe a va swi kumi. Hambiloko vo vula leswaku va tlharihe ngopfu leswaku va nga swi tiva, a va nge swi tivi.’—Eklesiasta 8:17.

Loko ku ri hileswaku vanhu a va nge swi koti ku lawula timhangu ta ntumbuluko, i mani a nga swi kotaka? Bibele yi hlamusela Muvumbi wa hina tanihi yena ntsena loyi a nga ta endla ku cinca loku. Hi Yena a endleke mafambiselo ya misava ya ikholoji, yo tanihi ndzhendzheleko wa mati. (Eklesiasta 1:7) Ku hambana ni vanhu, Xikwembu xi ni matimba lama nga pimanisiwiki na nchumu. Loko muprofeta Yeremiya a tiyisekisa mhaka leyi, u te: “Oho, Wena Yehovha, Hosi leyi Lawulaka! Waswivo, wena u endle matilo ni misava hi matimba ya wena lamakulu ni hi voko ra wena leri tshambulutiweke. Mhaka leyi hinkwayo a yi hlamarisi ngopfu eka wena.” (Yeremiya 32:17) Leswi Xikwembu xi vumbeke misava ni swiaki swa yona, swa twisiseka leswi xi kotaka ku lawula swilo hi ndlela leyi nga ta endla leswaku vanhu va tshama eka yona hi ku rhula naswona va sirhelelekile.—Pisalema 37:11; 115:16.

Kutani, xana Xikwembu xi ta ku tisa njhani ku cinca loku lavekaka? U ta tsundzuka leswaku xihloko xa vumbirhi eka swihloko leswi swa ntlhandlamano xi vule leswaku swilo swo tala swo chavisa leswi humelelaka namuntlha laha misaveni i “xikombiso” lexi funghaka “makumu ya mafambiselo ya swilo.” Yesu u te: “Loko mi vona swilo leswi swi humelela, tivani leswaku mfumo wa Xikwembu wu kusuhi.” (Matewu 24:3; Luka 21:31) Mfumo wa Xikwembu, ku nga hulumendhe ya xona ya le tilweni, yi ta tisa ku cinca lokukulu emisaveni, hambi ku ri ku endla leswaku swiaki swa yona swa ntumbuluko swi lawuleka. Hambileswi Yehovha Xikwembu a nga ni matimba yo endla leswi hi yexe, u hlawule ku nyika N’wana wakwe ntirho lowu. Loko muprofeta Daniyele a vulavula ha yena, u te: “A nyikiwa ku fuma ni xindzhuti ni mfumo, leswaku vanhu, vanhu va matiko  ni tindzimi hinkwato va n’wi tirhela.”—Daniyele 7:14.

Yesu Kreste N’wana wa Xikwembu, u nyikiwe matimba lama lavekaka yo tisa ku cinca hinkwako loku lavekaka ku endlela leswaku misava yi va ndhawu leyi tsakisaka. Eka malembe ya 2 000 lama hundzeke, loko Yesu a ri laha misaveni u swi kombise hi mpimo wutsongo leswaku u ni vuswikoti byo lawula swiaki swa ntumbuluko. Siku rin’wana loko yena ni vadyondzisiwa vakwe va ri ebyatsweni eLwandle ra Galeliya, “ku [pfuke] xidzedze lexikulu ngopfu, magandlati ma ba byatso ma nghena, lerova byatso a byi ri kusuhi ni ku khubumeteka.” Vadyondzisiwa vakwe va sungule ku khomiwa hi rhumbyana. Leswi a va chavela vutomi bya vona, va ye eka Yesu. Xana Yesu u endle yini? U “[tshinye] mheho, kutani a byela lwandle a ku: ‘Miyela! U ku whii!’ Kutani mheho yi hunguteka, hiloko ku va ni ku rhula lokukulu.” Vadyondzisiwa va hlamarile kutani va vutisa va ku: “Kahle-kahle loyi i mani, hikuva hambi ku ri mheho ni lwandle swa n’wi yingisa?”—Marka 4:37-41.

Ku sukela kwalaho, Yesu u tlakuseriwe exivandleni xa moya naswona u nyikiwe matimba lamakulu ni vulawuri. Tanihi Hosi ya Mfumo wa Xikwembu, u ni vutihlamuleri ni vuswikoti bya ku endla ku cinca hinkwako loku lavekaka loku nga ta nyika vanhu vutomi lebyi nga ni ku rhula ni nsirhelelo laha misaveni.

Hambiswiritano, hilaha hi swi voneke hakona, swiphiqo ni timhangu to tala swi vangiwa hi vanhu naswona swi nyanyisiwa hi swiendlo swa vanhu lava nga ni vutianakanyi ni makwanga. Xana Mfumo wu ta endla yini hi vanhu lava phikelelaka eka swiendlo swo tano va nga lavi ku cinca? Bibele yi vulavula hi Hosi Yesu loyi a taka “a huma etilweni swin’we ni tintsumi takwe ta matimba a ri endzilweni lowu pfurhaka malangavi, a tisa ndzihiselo eka lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu.” Ina, u ta “lovisa lava onhaka misava.”—2 Vatesalonika 1:7, 8; Nhlavutelo 11:18.

Endzhaku ka sweswo, “Hosi ya tihosi,” ku nga Yesu Kreste, u ta lawula matimba ya ntumbuluko ya misava hi ku helela. (Nhlavutelo 19:16) U ta tiyiseka leswaku vanhu lava nga ehansi ka Mfumo lowu a va nge he xanisiwi hi makhombo man’wana ni man’wana. U ta tirhisa matimba yakwe ku pima swiaki swa le xibakabakeni leswaku maxelo ni tinguva swi tirha hi ndlela leyi nga ta vuyerisa vanhu. Vuyelo bya kona ku ta va ku hetiseka ka marito lawa khale ka khaleni, Yehovha Xikwembu a ma tshembiseke vanhu vakwe a ku: “Kunene ndzi ta tlhela ndzi mi nisela timpfula hi nkarhi lowu faneleke, hakunene tiko ri ta veka swa rona, naswona murhi wa le nhoveni wu ta veka mihandzu ya wona.” (Levhitika 26:4) Vanhu va ta kota ku aka tindlu handle ko chava ku lahlekeriwa ha tona hikwalaho ka makhombo man’wana: “Kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona.”—Esaya 65:21.

I Yini Leswi U Faneleke U Swi Endla?

A swi kanakanisi leswaku na wena ku fana ni van’wana vo tala, wa swi navela ku hanya emisaveni leyi nga riki na makhombo lama tsemaka nhlana. Kambe, i yini leswi u faneleke u swi endla leswaku na wena u ta va kwalaho? Leswi “lava va nga xi tiviki Xikwembu” ni “lava va nga ma yingisiki mahungu lamanene” va nga taka va nga faneleki ku hanya emisaveni leyi pfumalaka timhangu leyi taka, swi le rivaleni leswaku sweswi vanhu va fanele va dyondza ha xona ni ku seketela lunghiselelo ra xona ra vuhosi ra laha misaveni. Xikwembu xi langutele leswaku hi xi tiva ni ku yingisa mahungu lamanene ya Mfumo lama xi ma simekeke hi ku tirhisa N’wana wa xona.

Ndlela leyinene yo dyondza ku endla leswi i ku dyondza Bibele hi vurhon’wana. Yi tamele swiletelo swo fanelekela ku hanya endhawini leyi hlayisekeke leyi nga ta va kona ehansi ka vulawuri bya Mfumo. Ha yini u nga kombeli Timbhoni ta Yehovha leswaku ti ku pfuna ku dyondza leswi Bibele yi swi dyondzisaka? Ti swi lunghekerile ku endla tano. Mhaka yin’we leyi nga ntiyiso hi leswaku loko u endla matshalatshala ya ku tiva Xikwembu ni ku yingisa mahungu lamanene, marito ya Swivuriso 1:33 ma ta hetiseka eka wena: “Loko ku ri loyi a ndzi yingisaka, u ta tshama a sirhelelekile naswona a nge kavanyetiwi hi ku chava khombo.”

DYONDZA SWO TALA

I Yini Mahungu Lamanene?

Dyondza leswaku hi wahi mahungu lama humaka eka Xikwembu, leswaku ha yini ma ri ma xihatla ni leswi u faneleke u swi endla.

Mfumo Wa Xikwembu I Yini?

I mani Hosi ya Mfumo wa Xikwembu naswona Mfumo wu ta hetisisa yini?

Kombela Dyondzo Ya Bibele

Dyondza Bibele hi nkarhi ni le ndhawini leyi u yi tsakelaka.