Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

XIHONDZO XO RINDZA JULY 2011

 Tshinela Eka Xikwembu

Xana Yehovha U Ni Mintlhaveko?

Xana Yehovha U Ni Mintlhaveko?

LOKO nhlamulo ku ri ina, ku tlakuka xivutiso xin’wana lexi nge: Xana mahanyelo ya hina ma khumba ndlela leyi Xikwembu xi titwaka ha yona? Xana swiendlo swa hina swi nga tsakisa Xikwembu kumbe swi xi vavisa? Vativi van’wana va khale va filosofi va vule leswaku a swi tano. Va vule leswaku ku hava ni un’we la nga kucetelaka Xikwembu naswona a xi na mintlhaveko. Kambe Bibele yi hi dyondzisa leswi hambaneke, ku nga leswaku Yehovha u ni rirhandzu naswona wa khathala swinene hileswi hi swi endlaka. Xiya marito lama kumekaka eka Pisalema 78:40, 41.

Pisalema 78 yi hlamusela ndlela leyi Xikwembu xi tirhisaneke ha yona ni Vaisrayele va khale. Endzhaku ka loko Yehovha a va kutsule evuhlongeni aEgipta, u tinyiketele ku va ni vuxaka byo hlawuleka na vona. U va tshembise leswaku loko nkarhi hinkwawo vo yingisa milawu yakwe, a va ta va ‘ndzhaka yakwe yo hlawuleka’ naswona a a ta va tirhisa hi ndlela leyi hlamarisaka leswaku va hetisisa xitshembiso xakwe. Va pfumerile kutani va nghena eka ntwanano wa Nawu. Xana va hanye hi ku pfumelelana ni ntwanano wolowo ku fikela emakumu?—Eksoda 19:3-8.

Ku hava nchumu wa risima lowu hi nga wu nyikaka Yehovha ku tlula ku hanya hi ndlela leyi nga ta endla leswaku mbilu yakwe yi tsaka

Mupisalema u ri: “A va xandzuka ko tala swinene eka xona emananga!” (Ndzimana 40) Ndzimana leyi landzelaka yi engetela yi ku: “A va ringa Xikwembu hi ku phindha-phindha.” (Ndzimana 41) Xiya leswaku mutsari u hlamusela ndlela leyi a va xandzuka ha yona. Vaisrayele va sungule ku ka va nga ha xiximi va tlhela va xandzuka emananga endzhakunyana ka loko va kutsuriwe aEgipta. Vanhu va sungule ku gungulela Xikwembu, va kanakana loko xi ta swi kota niloko xi tiyimisele ku va khathalela. (Tinhlayo 14:1-4) Buku ya vahundzuluxeri va Bibele yi vula leswaku marito lama nge “a va n’wi pfukela” ma nga ha “hlamuseriwa hi ndlela leyi leyi twalaka leyi nge ‘a va endla timbilu ta vona ti nonon’hwa emahlweni ka Xikwembu’ kumbe a va pfumelanga eka Xikwembu.” Kambe hikwalaho ka tintswalo takwe, Yehovha a a ta va rivalela vanhu vakwe loko va kombisa ku hundzuka. Kambe a va ta tlhelela etindleleni ta vona ta khale kutani va tlhela va xandzuka.—Pisalema 78:10-19, 38.

Xana nkarhi na nkarhi Yehovha a a titwa njhani loko vanhu vakwe lava a va tshamela ku cinca-cinca va xandzuka? Ndzimana 40 yi ri: “A va [n’wi] twisa ku vava.” Vuhundzuluxeri byin’wana byi vula leswaku “a va endla leswaku a va ni gome.” Buku yin’wana ya tinhlamuselo ta Bibele yi ri: “Ndlela leyi Vaheveru a va hanya ha yona a yi twisa ku vava—hilaha mahanyelo ya n’wana la nga yingisiki ni la xandzukeke ma twisaka ku vava hakona.” Tanihi leswi n’wana la nga yingisiki a nga ha vavisaka timbilu ta vatswari vakwe, Vaisrayele lava xandzukeke “a va twisa ni Mukwetsimi wa Israyele ku vava.”—Ndzimana 41.

Hi nga dyondza yini eka pisalema leyi? Swa khutaza ku tiva leswaku Yehovha u va rhandza swinene vagandzeri vakwe naswona a nga hatliseli ku va fularhela. Hi nkarhi lowu fanaka, swa vavisa ku tiva leswaku Yehovha u ni mintlhaveko naswona mahanyelo ya hina ma nga khumba ndlela leyi a titwaka ha yona. Xana ku tiva leswaku Yehovha u ni mintlhaveko swi ku khumba njhani? Xana a swi ku susumeteli ku endla leswi nga swinene?

Ematshan’weni yo endla xidyoho kutani hi vavisa mbilu ya Yehovha, hi nga hlawula ku endla leswi nga swinene kutani hi tsakisa mbilu yakwe. Sweswo hi swona leswi a swi kombelaka eka malandza yakwe: “N’wananga, tlhariha u tsakisa mbilu yanga.” (Swivuriso 27:11) Ku hava nchumu wa risima lowu hi nga wu nyikaka Yehovha ku tlula ku hanya hi ndlela leyi nga ta endla leswaku mbilu yakwe yi tsaka.

Tindzimana ta Bibele leti u nga ti hlayaka hi July: