Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA APRIL 2011

Yesu—Xivangelo Xo Va A File

Yesu—Xivangelo Xo Va A File

‘N’wana wa munhu a a tele ku nyikela moya-xiviri wakwe kumbe vutomi byakwe leswaku byi va nkutsulo wa lavo tala.’—MARKA 10:45.

YESU a a swi tiva leswi nga ta endleka hi vutomi byakwe. A a swi tiva leswaku a nge hanyi vutomi bya le ka byandlana. Hi hala tlhelo, loko a ri emalembeni ya va-30, a a swi tiva leswaku u ta dlayiwa hi ndlela yo vava naswona sweswo a swi lunghekerile.

Bibele yi kombisa leswaku rifu ra Yesu i ra nkoka swinene. Buku yin’wana ya tinhlamuselo ta Bibele yi kombisa leswaku rifu ra Yesu ri boxiwa minkarhi ya kwalomu ka 175 eka Matsalwa ya Vukreste ya Xigriki kumbe eka Testamente Leyintshwa. Kutani ha yini Yesu a a fanele a xaniseka a tlhela a fa? I swa nkoka leswaku hi tiva nhlamulo ya xivutiso lexi hikuva rifu ra Yesu ri nga byi khumba swinene vutomi bya hina.

Leswi Yesu a a swi languterile

Eka lembe ro hetelela ra vutomi byakwe, Yesu u byele vadyondzisiwa vakwe ko tala malunghana ni ku xanisiwa kakwe ni rifu leri a a ta langutana na rona. Loko a ri endleleni yo ya eYerusalema leswaku a ya tlangela Paseka yakwe yo hetelela, u byele vaapostola vakwe va 12 a ku: “N’wana wa munhu u ta nyiketiwa eka vaprista lavakulu ni le ka vatsari, kutani va ta n’wi gwevela rifu, naswona va ta n’wi nyiketa eka vanhu va matiko, va ta endla xihlekiso ha yena, va n’wi tshwutelela, va n’wi ba naswona va n’wi dlaya.” * (Marka 10:33, 34) Ha yini a a tiyiseka hileswi a swi ta endleka ha yena?

Yesu a a byi tiva vuprofeta byo tala lebyi nga eMatsalweni ya Xiheveru lebyi profeteke ndlela leyi vutomi byakwe a byi ta hela ha yona. (Luka 18:31-33) Xiya byin’wana bya vuprofeta ni tindzimana ta Bibele leti hlamuselaka ndlela leyi byi hetisekeke ha yona.

Mesiya a a ta . . .

  • Xengiwa hi swiphemu swa silivhere swa 30.—ZAKARIYA 11:12; MATEWU 26:14-16.

  • Biwa ni ku tshwuteleriwa.—ESAYA 50:6; MATEWU 26:67; 27:26, 30.

  • Beleriwa.—PISALEMA 22:16; MARKA 15:24, 25.

  • Tseketseriwa emhandzini ya nxaniso.—PISALEMA 22:7, 8; MATEWU 27:39-43.

  • Dlayiwa kambe marhambu yakwe a ma nga ta tshoviwa.—PISALEMA 34:20; YOHANE 19:33, 36.

Yesu u hetisise vuprofeta lebyi ni byin’wana byo tala. Leswi a a nga ta swi endla hi matimba yakwe. Ku va Yesu a hetisise vuprofeta lebyi hinkwabyo swi kombisa leswaku hakunene a a rhumiwe hi Xikwembu. *

Kutani, ha yini a swi fanerile leswaku Yesu a xaniseka ni ku fa?

Ku fa ka Yesu ku hetisise timhaka tin’wana ta nkoka

Yesu a a yi tiva mphikamakaneta leyi sunguleke entangeni wa Edeni. Hikwalaho ko kuceteriwa hi xivumbiwa xa moya lexi xandzukeke, Adamu na Evha va hlawule ku nga xi yingisi Xikwembu. Ku xandzuka ka mpatswa lowu swi endle leswaku vuhosi bya Xikwembu ni ndlela leyi xi fumaka ha yona swi kanakaniwa. Ku dyoha ka vona swi endle leswaku swi kanakanisa leswaku vanhu va nga tshembeka eka Xikwembu loko va ringiwa.—Genesa 3:1-6; Yobo 2:1-5.

 Yesu u nyikele nhlamulo leyi enerisaka etimhakeni leti hinkwato—emhakeni ya vuhosi bya Yehovha ni le mhakeni ya ku tshembeka ka vanhu. Hi ku yingisa kakwe “ku ya fika eku feni . . . emhandzini ya nxaniso,” u seketele vuhosi bya Xikwembu. (Vafilipiya 2:8) U tlhele a kombisa leswaku munhu la hetisekeke a nga tshembeka eka Yehovha ku nga khathariseki miringo.

Yesu u file leswaku a kutsula vanhu

Muprofeta Esaya u profete leswaku ku xaniseka ni ku fa ka Mesiya la tshembisiweke swi ta endla leswaku vanhu va rivaleriwa swidyoho swa vona. (Esaya 53:5, 10) Yesu a a swi tiva leswi, kutani hi ku tirhandzela u nyikele hi “moya-xiviri wakwe [leswaku] wu va nkutsulo wa lavo tala.” (Matewu 20:28) Rifu rakwe ri endle leswaku vanhu lava nga hetisekangiki va va ni vuxaka lebyinene na Yehovha naswona va kutsuriwa eka xidyoho ni rifu. Ri tlhele ri endla leswaku hi kuma leswi Adamu na Evha va swi lahleke, ku nga lunghelo ro hanya hilaha ku nga heriki emisaveni leyi hetisekeke. *Nhlavutelo 21:3, 4.

Leswi u nga swi endlaka

Eka swihloko leswi swa nxaxamelo, hi kambisise leswi Bibele yi swi vulaka hi Yesu—laha a humaka kona, ndlela leyi a hanyeke ha yona ni xivangelo xo va a file. Ku tiva leswi ha Yesu swi hi vuyerisa hi tindlela to tala ku tlula timhaka leti nga riki ntiyiso ha yena. Ku hanya hi ku pfumelelana na swona swi nga hi tisela mikateko—vutomi byo antswa sweswi ni lebyi nga heriki enkarhini lowu taka. Bibele yi hi byela leswi hi faneleke hi swi endla leswaku hi kuma mikateko yoleyo.

  • Dyondza swo tala hi Yesu Kreste ni hileswi a swi endlaka leswaku xikongomelo xa Yehovha xi hetiseka.—YOHANE 17:3.

  • Vana ni ripfumelo eka Yesu naswona ndlela leyi u hanyaka ha yona a yi kombise leswaku u n’wi teka a ri Muponisi wa wena.—YOHANE 3:36; MINTIRHO 5:31.

Timbhoni ta Yehovha ti ta swi tsakela ku ku pfuna leswaku u dyondza swo tala hi Yesu Kreste, la nga “N’wana wa [Xikwembu] la tswariweke a ri swakwe,” loyi ha yena hi nga kumaka nyiko ya “vutomi lebyi nga heriki.”—Yohane 3:16.

^ ndzim. 5 Minkarhi yo tala Yesu a a tivula “N’wana wa munhu.” (Matewu 8:20) Xiga lexi a xo kombisa ntsena leswaku a a ri munhu wa nyama, kambe xi tlhela xi kombisa leswaku a a ri “n’wana wa munhu” loyi vuprofeta bya Bibele byi profeteke ha yena.—Daniyele 7:13, 14.

^ ndzim. 13 Leswaku u kuma rungula leri engetelekeke malunghana ni vuprofeta lebyi hetisiseke hi Yesu, vona xiengetelo ehansi ka nhloko-mhaka leyi nge “Yesu Kreste I Mesiya La Tshembisiweke,” ebukwini leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

^ ndzim. 17 Leswaku u kuma rungula leri engetelekeke malunghana ni nkoka wa rifu ra Yesu, vona ndzima 5, leyi nge “Nkutsulo I Nyiko Ya Nkoka Leyi Humaka Eka Xikwembu,” ebukwini leyi nge Xana Bibele Yi Dyondzisa Yini Hakunene?

DYONDZA SWO TALA

Yesu Kreste I Mani?

Dyondza xivangelo lexi endlaka Yesu a va Mesiya loyi a tshembisiweke, laha a humaka kona ni leswaku ha yini a ri N’wana wa Yehovha loyi a tswariweke a ri swakwe.