Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA FEBRUARY 2011

  Swivutiso Swa Vahlayi . . .

Xana Timbhoni Ta Yehovha Ta Byi Amukela Vutshunguri?

Xana Timbhoni Ta Yehovha Ta Byi Amukela Vutshunguri?

Yesu u vule leswaku “vanhu lava hanyeke a va lavi n’anga, kambe yi laviwa hi lava va vabyaka.” (Matewu 9:12) Kutani u swi veke erivaleni leswaku Matsalwa a ma swi siveli ku va munhu a kuma vutshunguri. Xisweswo, Timbhoni ta Yehovha ta yi tirhisa mirhi naswona ta byi amukela vutshunguri. Ti lava ku va ni rihanyo lerinene ni ku hanya nkarhi wo leha. Ku fana ni Mukreste wa lembe-xidzana ro sungula Luka, Timbhoni tin’wana ta Yehovha i madokodela.—Vakolosa 4:14.

Kambe Timbhoni ta Yehovha a ti byi amukeli vutshunguri lebyi lwisanaka ni milawu ya Bibele. Hi xikombiso, a ti pfumeli ku pomperiwa ngati hikuva Bibele a yi pfumeli leswaku hi tirhisa ngati loko hi tshunguriwa. (Genesa 9:4; Levhitika 17:1-14; Mintirho 15:28, 29) Rito ra Xikwembu ri tlhela ri hi sivela ku tirhisa vutshunguri lebyi fambisanaka ni “masalamusi” kumbe vungoma.—Esaya 1:13; Vagalatiya 5:19-21.

Madokodela yo tala ni vaongori va nyikela vutshunguri lebyi pfunaka swinene naswona byi fambisanaka ni milawu ya Bibele. Hakanyingi, vutshunguri byo tano, lebyi Timbhoni ti byi hlawulaka bya pfuna ku tlula lebyi nga fambisaniki ni milawu ya Xikwembu.

Kambe ku ni swilo swo tala leswi vuriwaka malunghana ni vutshunguri. Vutshunguri lebyi pfunaka munhu un’wana swi nga ha endleka leswaku byi nga n’wi pfuni un’wana. Xisweswo, vanhu lava lavaka ku kuma vutshunguri bya vuvabyi byo karhi va nga vona swi fanerile leswaku va ya eka madokodela mambirhi lama hambaneke.—Swivuriso 14:15.

Leswi a swi vuli swona leswaku Timbhoni hinkwato ti hlawula vutshunguri lebyi fanaka. Rito ra Xikwembu ri lava leswaku Vakreste va tirhisa mapfalo ya vona lama leteriweke hi Bibele. (Varhoma 14:2-4) Kutani un’wana ni un’wana u fanele a tiyiseka hi vutshunguri lebyi a byi hlawulaka naswona a tiyiseka leswaku byi fambisana ni milawu ya Bibele.—Vagalatiya 6:5; Vaheveru 5:14.

Mbhoni yi tiendlela xiboho ku fana ni muchayeri loyi a kongomeke laha tindlela ti hlanganaka kona. Loko o landzela timovha leti nga emahlweni kakwe kutani a hundza hi rivilo, a nga ha vanga khombo. Muchayeri wo tlhariha u ta hunguta rivilo kutani a xiyisisa timovha letin’wana a nga si hundza. Hilaha ku fanaka, Timbhoni a to na swipfuketana ti amukela vutshunguri byin’wana ni byin’wana kumbe ti landzela leswi vanhu van’wana va swi endlaka. Ematshan’weni ya sweswo, ti kambisisa milawu ya Bibele loko ti nga si endla xiboho.

Timbhoni ta Yehovha ti wa tlangela swinene matshalatshala ni ku tinyiketela loku endliwaka hi madokodela. Ta tsaka swinene leswi ma hoxaka xandla eku endleni ka leswaku vanhu va kuma vutshunguri.