Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

XIHONDZO XO RINDZA 2010-06-01

 Dyondzisa Vana Va Wena

Vanhu Lava Tsaleke Hi Vutomi Bya Yesu

Vanhu Lava Tsaleke Hi Vutomi Bya Yesu

XANA wa swi tsakela ku hlaya na vona hi timhaka ta vutomi bya Yesu?— * Vanhu van’wana swa va hlamarisa ku twa leswaku ku hava buku ni yin’we eBibeleni leyi tsariweke hi Yesu. Hambiswiritano, vatsari va nhungu va Bibele va hi byela swo tala hi Yesu. Van’wana va vona va hanye hi nkarhi wa Yesu naswona va hi byela leswi a a swi dyondzisa. Xana u nga boxa mavito ya vona?— I Matewu, Marka, Luka na Yohane kasi lavan’wana va mune i Petro, Yakobo, Yudha na Pawulo. I yini leswi u swi tivaka hi vatsari lava?—

A hi rhangeni hi bula hi vatsari vanharhu lava a va ri exikarhi ka vaapostola va 12 va Yesu. Xana wa ma tiva mavito ya vona?— I Petro, Yohane na Matewu. Petro u tsalele Vakreste-kulobye mapapila mambirhi. U va byele hi swilo leswi a voneke Yesu a swi endla swin’we ni ku swi vula. Pfula Bibele ya wena eka Petro wa Vumbirhi 1:16-18 kutani u hlaya hi rungula leri Petro a nga ri twa hi tindleve takwe loko Yehovha Xikwembu a vulavula na Yesu a ri etilweni.—Matewu 17:5.

Muapostola Yohane u tsale tibuku ta ntlhanu ta Bibele. A a ri etlhelo ka Yesu loko vadyondzisiwa va dya swakudya swo hetelela ni N’wini wa vona. Nakambe a a ri na Yesu loko a dlayiwa. (Yohane 13:23-26; 19:26) Yohane u tsale yin’wana ya tibuku ta mune ta Bibele leti vulavulaka hi vutomi bya Yesu naswona ti vuriwaka Tievhangeli. Nakambe u tsale buku ya Nhlavutelo leyi Yesu a n’wi hlavuteleke yona swin’we ni mapapila manharhu lama nga eBibeleni lama vitaniwaka hi vito rakwe. (Nhlavutelo 1:1) Mutsari va vunharhu wa Bibele loyi a veke muapostola wa Yesu i Matewu. A a ri muhakerisi wa xibalo.

Vatsari van’wana vambirhi va Bibele a va n’wi tiva kahle Yesu. A va ri vamakwavo wakwe hi manana, kambe hinkwavo ka vona a va ri vana va Yosefa na Mariya. (Matewu 13:55) Kambe eku sunguleni a va nga ri vadyondzisiwa va Yesu. Minkarhi yin’wana a va ehleketa leswaku wa hlanya hileswi a a hisekela ntirho wo chumayela. (Marka 3:21) A ku ri vamani vamakwavo volavo?— Un’wana wa vona a ku ri Yakobo. U tsale buku ya Bibele leyi vuriwaka Yakobo. Loyi un’wana i Yudasi, loyi minkarhi yin’wana a a vitaniwa Yudha. U tsale buku ya Bibele leyi vuriwaka Yudha.—Yudha 1.

Vatsari van’wana vambirhi lava tsaleke hi vutomi bya Yesu i Marka na Luka. Mariya mana wa Marka a a ri ni kaya lerikulu eYerusalema, leri Vakreste vo sungula a va hlangana eka rona ku katsa na muapostola Petro. (Mintirho 12:11, 12) Malembe ma nga ri mangani emahlweni ko va Yesu a va ni Paseka yo hetelela ni vaapostola vakwe, swi nga ha endleka leswaku Marka u va landzerile loko va ya entangeni wa Getsemani. Loko Yesu a khomiwa, masocha ma khome na Marka kambe u chupukile a tsutsuma a nga ambalanga.—Marka 14:51, 52.

Luka a a dyondzekile hikuva a a ri dokodela naswona swi nga ha endleka leswaku u ve mudyondzisiwa endzhaku ka loko Yesu a file. U dyondze hi vutomi bya Yesu kutani a tsala ha byona. Endzhakunyana, Luka u fambe na muapostola Pawulo entirhweni wa vurhumiwa naswona hi yena la nga tsala buku ya Bibele  ya Mintirho.—Luka 1:1-3; Mintirho 1:1.

Pawulo i mutsari wa vunhungu wa Bibele la tsaleke hi vutomi bya Yesu. U dyondzisiwe hi Gamaliyele mutivi wa nawu la dumeke. Pawulo loyi a a vitaniwa Sawulo u kurisiwe ni ku dyondzisiwa hi Vafarisi, leswi hi swona swi endleke leswaku a venga vadyondzisiwa va Yesu naswona a hoxa xandla loko va dlayiwa. (Mintirho 7:58–8:3; 22:1-5; 26:4, 5) Xana wa swi tiva leswaku swi tise ku yini leswaku Pawulo a dyondza ntiyiso hi Yesu?—

Loko Pawulo a ri endleleni yo ya eDamaska leswaku a ya khoma vadyondzisiwa va Yesu, hi xitshuketa ku humelele rihati leri n’wi dlayeke mahlo. U twe rito ri ku: “Sawulo, Sawulo, u ndzi xanisela yini?” A ku ri Yesu loyi a a vulavula na yena! U byele Pawulo leswaku a ya eDamaska. Yesu u byele mudyondzisiwa wakwe Ananiya leswaku a ya vulavula na Pawulo naswona endzhaku ka sweswo, u ve mudyondzisiwa wa Yesu. (Mintirho 9:1-18) Pawulo u tsale tibuku ta 14 ta Bibele, leti sungulaka eka Varhoma ku ya eka Vaheveru.

Xana se u sungurile ku hlaya tibuku ta Bibele leti vulavulaka hi vutomi bya Yesu kumbe u kombela un’wana leswaku a ku hlayela tona?— Nchumu wun’wana wa nkoka lowu u nga wu endlaka evuton’wini bya wena i ku sungula sweswi wa ha ri ntsongo ku dyondza leswi Bibele yi swi vulaka hi vutomi bya Yesu.

^ ndzim. 3 Loko u hlayela n’wana, mfungho lowu wu endleriwe ku ku tsundzuxa leswaku u yima, kutani u rindzela leswaku a hlamula xivutiso xa kona.