Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  2010-03-01

Xana Bibele I Rito Ra Xikwembu?

Xana Bibele I Rito Ra Xikwembu?

“Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo, ku laya eku lulameni, leswaku munhu wa Xikwembu a faneleka hi ku helela, a hlomisiwa hi ku helela eka ntirho wun’wana ni wun’wana lowunene.”—2 TIMOTIYA 3:16, 17.

HAKUNENE ma khutaza swinene marito lama tsariweke hi muapostola Pawulo malunghana ni ndlela leyi Bibele yi nga ya nkoka ha yona! A a vulavula hi xiphemu xa Bibele lexi a xi ri kona hi nkarhi wolowo, ku nga matsalwa lawa vanhu minkarhi yin’wana va ma vulaka Testamente ya Khale. Kambe hi ku angarhela marito yakwe ma tirha eka tibuku hinkwato ta 66 ta Bibele, ku katsa ni leti tsariweke hi vadyondzisiwa vo tshembeka va Yesu hi lembe-xidzana ro sungula C.E.

Xana na wena u xixima Bibele swinene hilaha Pawulo a a yi xixima hakona? Xana u ehleketa leswaku vatsari va yona a va huhuteriwe hi Xikwembu? Vakreste va lembe-xidzana ro sungula a va yi xixima naswona a va tshemba leswaku yi huhuteriwe hi Xikwembu. Ntshembo wolowo wu hundzele ni le ka Vakreste va ntiyiso eka malembe-xidzana lama nga landzela. Hi xikombiso, hi lembe-xidzana ra vu-14, John Wycliffe loyi a nga mufundhisi wa Munghezi, a a languta Bibele tanihi “nawu lowu hetisekeke.” Loko The New Bible Dictionary, yi vulavula hi marito ya Pawulo lama tshahiweke laha henhla yi vula leswaku moya wa Xikwembu lowu “huhuteriweke wu tiyisekisa ntiyiso wa hinkwaswo leswi tsariweke eBibeleni.”

Ku Cinca Ka Ndlela Leyi Bibele Yi Langutiwaka Ha Yona

Hambiswiritano, eminkarhini leyi hi hanyaka eka yona, vanhu a va ha yi tshembi Bibele. Buku leyi nge The World’s Religions, yi vula leswaku “Vakreste hinkwavo va [ha] yi tshemba Bibele leswaku  yi va kongomisa eka leswi va swi endlaka ni ku va pfuna leswaku va tiyisa ntshembo lowu va nga na wona.” Nilokoswiritano, eka vo tala a swa ha ri tano. Vanhu vo tala namuntlha va languta Bibele tanihi leyi fanaka ni “mindhavuko ya vanhu leyi nga tshembekiki.” Hambileswi va pfumelaka leswaku vavanuna lava tsaleke Bibele a va ri ni ripfumelo, va va vona tanihi vavanuna lava swi va tikeleke swinene ku hlamusela mintiyiso leyi enteke ya moya hikwalaho ko pfumala vutivi ni dyondzo leyi hi nga na yona namuntlha.

Manguva lawa, vanhu lava pfumelelaka Bibele yi kongomisa mianakanyo ni swiendlo swa vona a va tati ni xandla. Hi xikombiso, i kangani u twa vanhu va vula leswaku milawu ya Bibele ya mahanyelo yi hundzeriwe hi nkarhi naswona a ya ha ri ya nkoka? Vo tala va ehleketa leswaku va nga dyondzisa milawu ya Bibele leyi vanhu va lavaka ku yi twa kumbe va hlawula ku ka va nga va dyondzisi hi ku helela. Vanhu van’wana lava tivulaka Vakreste va swi honisa hi vomu leswi Bibele yi swi vulaka malunghana ni vumbhisa, vuoswi, ku nga tshembeki ni vudakwa.—1 Vakorinto 6:9, 10.

Ha yini swi ri tano? Eku sunguleni ka lembe-xidzana ra vu-20, xivangelo xin’wana xi hlamuseriwe hi Nkulukumba Charles Marston loyi a nga mutivi wa vuyimburi ebukwini yakwe leyi nge The Bible Is True. U vule leswaku vanhu a swi va tikelanga “ku amukela leswi vatsari vo tala va manguva lawa [lava lwisanaka ni ku tshembeka ka Bibele] va nga swi vula.” Xana sweswo swa ha ri tano ninamuntlha? Xana u fanele u ma teka njhani mavonelo ni tidyondzo ta valavisisi lava endlaka leswaku Bibele yi nga ha tshembiwi? Twana leswi xihloko lexi landzelaka xi swi vulaka malunghana ni mhaka leyi.