Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA 2010-02-01

 Swivutiso Swa Vahlayi . . . 

Xana U Fanele U Pfumela Eka Dyondzo Ya Vunharhu-un’we Leswaku U Va Mukreste?

Xana U Fanele U Pfumela Eka Dyondzo Ya Vunharhu-un’we Leswaku U Va Mukreste?

Buku ya le xikolweni xa le henhla leyi vuriwaka World Religions in Denmark, leyi humesiweke hi 2007 yi hlamusele Timbhoni ta Yehovha tanihi Vakreste lava nga tatiki ni xandla lava landzelaka leswi Bibele yi swi vulaka. Entiyisweni, Timbhoni ta Yehovha i vukhongeri bya Vukreste lebyi nga bya vunharhu hi ku kula eDenmark.

Hambiswiritano, bixopo wa Kereke ya Tiko ya le Denmark u sole xiboho xa mutsari wa buku yoleyo xo va a katse Timbhoni eka yona. Ha yini? Bixopo u te: “Ndza ha fanele ndzi hlangana ni mufundhisi loyi a tekaka [Timbhoni ta Yehovha] ti ri Vakreste. A ti pfumeli eka dyondzo ya Vunharhu-un’we leyi nga ya nkoka swinene evugandzerini bya Vukreste.”

Annika Hvithamar mutsari wa buku yoleyo, loyi a nga mukambisisi wa tidyondzo ta vukhongeri u vule leswaku loko vanhu va vutisiwa leswaku ha yini va tivula Vakreste, u nge va twi va vula leswaku hileswi va pfumelaka leswaku Xikwembu i Vunharhu-un’we. Ku tlula kwalaho xiyenge xa buku yoleyo lexi nga ni nhloko-mhaka leyi nge “Xana U Mukreste?” xi ri: “Dyondzo ya Vunharhu-un’we i yin’wana ya tidyondzo leti tikaka swinene ku ti twisisa etidyondzweni ta Vukreste.” Xi engetela xi ku: “Minkarhi hinkwayo swa tika ku hlamusela Vakreste lava nga nghenangiki xikolo leswaku ha yini Xikwembu lexi Vakreste va xi gandzelaka xi ri xikwembu xin’we ku nga ri swinharhu.”

“Dyondzo ya Vunharhu-un’we i yin’wana ya tidyondzo leti tikaka swinene ku ti twisisa etidyondzweni ta Vukreste”

Leswi Bibele yi swi dyondzisaka hi Xikwembu na Yesu swi le rivaleni naswona swi olovile. Swa olova ku swi twisisa. A ku kona laha rito “Vunharhu-un’we” ri kumekaka kona eRitweni ra Xikwembu hambi ku ri nhlamuselo ya rona. Bibele yi swi veka erivaleni leswaku Yesu Kreste i N’wana wa Xikwembu wa mativula. (Vakolosa 1:15) Nakambe yi vulavula hi Yesu tanihi ‘muhlanganisi exikarhi ka Xikwembu ni vanhu.’ (1 Timotiya 2:5) Malunghana na Tatana, Bibele yi ri: “Wena loyi vito ra wena u nga Yehovha, wena u ri wexe u La nge Henhla-henhla emisaveni hinkwayo.”—Pisalema 83:18.

Timbhoni ta Yehovha ti tshemba leswaku ku pfumela eka Yesu i swa nkoka. (Yohane 3:16) Hikwalaho ka sweswo, ti xi tekela enhlokweni xileriso xa Yesu lexi nge: “Ku tsariwile, ‘U fanele ku gandzela Yehovha Xikwembu xa wena, naswona u fanele ku endlela yena ntsena ntirho wo kwetsima.’” (Matewu 4:10) Hakunene munhu loyi a tikarhatelaka ku yingisa swileriso swa Yesu a nga vuriwa Mukreste.