Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA 2009-08-01

Vukhongeri Lebyi Amukelekaka Eka Xikwembu Byi Dyondzisa Vanhu Leswaku Va Xixima Rito Ra Xikwembu

Vukhongeri Lebyi Amukelekaka Eka Xikwembu Byi Dyondzisa Vanhu Leswaku Va Xixima Rito Ra Xikwembu

YESU u dyondzise vanhu leswaku va xixima Rito ra Xikwembu, ku nga Bibele. Leswi swi vonake eka ndlela leyi Yesu a hlamuleke ha yona loko a ringiwa hi Diyavulosi. (Matewu 4:4-11) Hi xikombiso, xana Yesu u angule njhani loko Sathana a n’wi ringa leswaku a hundzula maribye ya va xinkwa? Yesu u hlule ndzingo wolowo hi ku tshaha marito ya Muxe lama huhuteriweke lawa u nga ma hlayaka eka Deteronoma 8:3. Xana Yesu u angule njhani loko Diyavulosi a n’wi tshembisa leswaku u ta n’wi nyika vulawuri bya mimfumo hinkwayo ya misava loko o n’wi gandzela? U arile hi ku va a tshaha nawu lowu nga eMatsalweni lowu nga eka Deteronoma 6:13.

Hambileswi Yesu a a ri N’wana wa Xikwembu a a tirhisa Bibele loko a dyondzisa. Naswona a nga kalanga a honisa Rito ra Xikwembu hikwalaho ka mindhavuko ya vanhu. (Yohane 7:16-18) Hambiswiritano, varhangeri vo tala va vukhongeri va le minkarhini ya Yesu a va ri xiximanga Rito ra Xikwembu hilaha Yesu a a ri xixima hakona. Hikwalaho ka yini? Hikuva mindhavuko ya vona a va yi teka yi ri ya nkoka swinene ku tlula Matsalwa yo Kwetsima. Handle ko ba mariri, Yesu u byele vavanuna volavo va vukhongeri a ku: “Mi endle rito ra Xikwembu ri nga tirhi hikwalaho ka ndhavuko wa n’wina. N’wina vakanganyisi, Esaya u profete hilaha ku faneleke malunghana na n’wina, loko a ku, ‘Vanhu lava va ndzi xixima hi milomu ya vona, kambe timbilu ta vona ti le kule swinene na mina. Va tama va ndzi gandzela swa hava, hikuva va dyondzisa swileriso swa vanhu va swi endla tidyondzo leti nga enawini.’”—Matewu 15:6-9, Vuhundzuluxeri Bya Misava Leyintshwa Bya Matsalwa Yo Kwetsima.

Vukhongeri byo tala emisaveni, bya Vukreste ni lebyi nga riki bya Vukreste, byi vula leswaku byi xixima Bibele. Nilokoswiritano, i byingani vukhongeri  lebyi u byi tivaka lebyi papalataka mindhavuko ya vanhu loko yi lwisana hi ku kongoma ni tidyondzo leti kumekaka eRitweni ra Xikwembu? Kambisisa swivutiso swimbirhi leswi landzelaka.

NHLOKO-MHAKA: Swithopo swa varhangeri va vukhongeri.

LESWI BIBELE YI SWI DYONDZISAKA:

Yesu u sole varhangeri va vukhongeri va le nkarhini wakwe hikwalaho ka leswi a va rhandza swithopo ni ku lava ku va ni ndhuma. U vule leswaku vavanuna volavo va rhandza “switshamo swa le mahlweni eminkhubyeni, ni switshamo leswo rhanga emasinagogeni, ni ku losiwa emintsendzeleni, ni ku vuriwa hi vanhu: Rabi (hi leswaku mufundhisi).” Kutani Yesu u byele vadyondzisiwa vakwe a ku: “Mi nga tshuki mi vuriwa Rabi, hikuva mufundhisi wa n’wina i un’we; kutani n’wina hinkwenu mi vamakwenu. Kambe mi nga tshuki mi vula munhu la misaveni, tatana, hikuva i un’we ntsena la nga Tata wa n’wina, hi loyi a nge matilweni.”—Matewu 23:1-10, Bibele Ya Xitsonga.

XIVUTISO:

Xana varhangeri va vukhongeri lebyi va rhandza ku vitaniwa hi swithopo swo va xixima naswona va tilavela ndhuma endhawini leyi va tshamaka eka yona kumbe va yingisa xileriso xa Yesu xa leswaku va papalata sweswo?

NHLOKO-MHAKA: Ku tirhisiwa ka swifaniso evugandzerini.

LESWI BIBELE YI SWI DYONDZISAKA:

“U nga tshuki u tiendlela xifaniso lexi vatliweke, niloko xi ri xifaniso xihi ni xihi xa swilo leswi nge henhla etilweni, ni loko xi ri xa swilo leswi nge hansi emisaveni, ni loko xi ri xa swilo leswi nge matini, ehansi ka misava. U nga tshuki u swi nkhisamela, ni loko ku ri ku swi tirhela.”—Eksoda 20:4, 5, Bibele Ya Xitsonga.

Muapostola Yohane u tsalele Vakreste a ku: “Tivoneleni swifaniso.”—1 Yohane 5:21, Vuhundzuluxeri Bya Misava Leyintshwa Bya Matsalwa Yo Kwetsima.

XIVUTISO:

Xana vukhongeri lebyi byi yingisa xileriso lexi nga eBibeleni xo papalata ku tirhisa swifaniso evugandzerini bya Xikwembu?

U Nga Kuma Ndlela Leyinene

Ku nga khathariseki tindlela to tala to hambana-hambana ta vukhongeri leti nga kona namuntlha, u nga yi kuma ndlela yin’we leyi kongomisaka evuton’wini. Swi tele swilo leswi nga ku pfunaka ku vona “vukhongeri lebyi tengeke, lebyi nga riki na xisandzu emahlweni ka Xikwembu.” (Yakobo 1:27, Bibele Ya Xitsonga) Matsalwa lama ma tlhuvutsiweke eka swihloko leswi ma nga ha tirha tanihi mimfungho yo kongomisa leyi yi nga ku kongomisaka eka vukhongeri lebyi amukelekaka eka Xikwembu.

Ha yini u nga kombeli Timbhoni ta Yehovha ti ku nyika tinhlamulo ta swivutiso leswi vutisiweke eka swihloko leswi? Loko u ri karhi u anakanyisisa hi leswi ti swi vulaka landzela xikombiso xa vanhu lava a va tshama emutini wa Beriya hi lembe-xidzana ro sungula. Endzhaku ka loko va yingise leswi muapostola Pawulo a va chumayeleke swona, “va [kambisise] Matsalwa masiku hinkwawo, va lava ku tiva leswaku xana timhaka ti tano xana.” (Mintirho 17:11, Bibele—Mahungu Lamanene) Loko u xixima Rito ra Xikwembu naswona u hisekela ku ri hlaya hilaha Vaberiya a va endla hakona, u ta kuma ndlela leyi yisaka evuton’wini. Swi le ka wena leswaku hi yihi ndlela leyi u nga ta yi hlawula endzhaku ka loko u kambisise leswi Matsalwa ma swi vulaka.

Hi byihi vukhongeri lebyi khutazaka vanhu leswaku va hlaya Matsalwa ku vona leswaku leswi va swi dyondzaka i ntiyiso hakunene?