Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA 2009-08-01

Vukhongeri Lebyi Amukelekaka Eka Xikwembu Byi Dyondzisa Swirho Swa Byona Ku Rhandzana Ni Ku Rhandza Vanhu Van’wana

Vukhongeri Lebyi Amukelekaka Eka Xikwembu Byi Dyondzisa Swirho Swa Byona Ku Rhandzana Ni Ku Rhandza Vanhu Van’wana

BIBELE yi ri: “Loyi a nga riki na rirhandzu, a nga tivi Xikwembu, hikuva Xikwembu i rirhandzu.” (1 Yohane 4:8, Bibele—Mahungu Lamanene) Hikwalaho, vukhongeri lebyi amukelekaka eka Xikwembu byi fanele byi dyondzisa swirho swa byona ku rhandzana ni ku rhandza vanhu van’wana.

Vukhongeri byo tala byi endla ntirho lowunene wo khathalela lava vabyaka, lava dyuhaleke ni swisiwana. Byi khutaza swirho swa byona ku tirhisa ndzayo ya muapostola Yohane leyi nge: “Loko munhu a ri ni swilo swa misava leyi, kutani a vona makwavo a ri eku pfumaleni, kambe a nonon’hwisa mbilu ya yena a nga n’wi pfuni, xana rirhandzu ro rhandza Xikwembu ri nga tshamisisa ku yini eka yena xana? Vana vanga, hi nga rhandzaneni   hi marito kumbe hi ku vulavula ntsena, kambe a ku ve hi mintirho ni ntiyiso.”—1 Yohane 3:17, 18, Bibele—Mahungu Lamanene.

Kambe ku humelela yini loko matiko ma ya enyimpini? Xana nawu wa Xikwembu lowu nge: “Rhandza wa rikwenu kukota loko u tirhandza” wu nga tirhisiwa ntsena eminkarhini leyi nga ni ku rhula kambe yi bakanyeriwa etlhelo loko xirho xa tipolitiki kumbe hosi yi lwa ni tiko leri yi akelaneke na rona?—Matewu 22:39, Bibele Ya Xitsonga.

Yesu u te: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35, Bibele—Mahungu Lamanene) Loko u ri karhi u hlamula swivutiso leswi landzelaka, tivutise, ‘Xana minkarhi hinkwayo swirho swa vukhongeri lebyi swi kombisa rirhandzu eka vanhu hinkwavo ku nga ri hi marito ntsena kambe ni hi swiendlo?’

NHLOKO-MHAKA: Nyimpi.

LESWI BIBELE YI SWI DYONDZISAKA:

Yesu u lerise vadyondzisiwa vakwe a ku: “Ndzi ri ka n’wina: Rhandzani valala va n’wina, mi khongelela lava va mi xanisaka.”—Matewu 5:44, Bibele—Mahungu Lamanene.

Loko masocha ma tile leswaku ma ta khoma Yesu, muapostola Petro u humese banga rakwe leswaku a ta n’wi sirhelela. Kambe Yesu u te: “Tlherisela banga ra wena enkotlotweni wa rona, hikuva hinkwavo lava tirhisaka mabanga, va ta dlawa hi mabanga.”—Matewu 26:52, Bibele—Mahungu Lamanene.

Muapostola Yohane u tsale a ku: “Vana va Xikwembu ni vana va Diyavulosi va vonaka hi leswi: Mani na mani la nga hambetiki a famba hi ku lulama a nga humi eka Xikwembu, hambi ku ri loyi a nga rhandziki makwavo. Hikuva leri i rungula leri mi ri tweke ku sukela eku sunguleni, leswaku hi fanele hi rhandzana; hi nga fani na Kayini, loyi a humeke eka lowo homboloka ivi a dlaya makwavo.”—1 Yohane 3:10-12, Vuhundzuluxeri Bya Misava Leyintshwa Bya Matsalwa Yo Kwetsima.

XIVUTISO:

Xana vukhongeri lebyi byi khutaza swirho swa byona leswaku swi ya enyimpini?

NHLOKO-MHAKA: Tipolitiki.

LESWI BIBELE YI SWI DYONDZISAKA:

Endzhaku ka loko va vone matimba ya Yesu yo endla masingita, vanhu van’wana va lave ku n’wi endla murhangeri etimhakeni ta tipolitiki. Xana u endle yini? “Yesu, hi ku tiva leswaku va lava ku ta va ta n’wi vutla leswaku va n’wi endla Hosi, a tlhelela entshaveni a ri yexe.”—Yohane 6:15, Bibele—Mahungu Lamanene.

Loko Yesu a khomiwile naswona a hehliwe hi mavunwa ya leswaku u pfukela mfumo, u hlamule a ku: “Ku fuma ka mina a hi ka misava leyi; loko ku fuma ka mina a ku ri ka misava leyi, malandza ya mina a ma ta ndzi lwela; leswaku ndzi nga tshuki ndzi nyiketiwa Vayuda; kambe sweswi, ku fuma ka mina a hi ka la hansi.”—Yohane 18:36, Bibele Ya Xitsonga.

Loko Yesu a khongela eka Xikwembu malunghana ni vadyondzisiwa vakwe u te: “Ndzi va nyikile rito ra wena, kutani misava yi va vengile; hikuva a hi va misava, kukotisa mina ndzi nga riki wa misava.”—Yohane 17:14, Bibele Ya Xitsonga.

 XIVUTISO:

Xana vukhongeri lebyi byi landzela xikombiso xa Yesu naswona byi papalata ku katseka eka tipolitiki, hambiloko sweswo swi vula leswaku swirho swa byona swi ta vengiwa hi van’watipolitiki van’wana?

NHLOKO-MHAKA: Xihlawuhlawu.

LESWI BIBELE YI SWI DYONDZISAKA:

Loko vanhu vo sungula lava nga yimbangiki lava a va nga ri Vayuda va ve Vakreste, muapostola Petro u te: “Xikwembu a xi yi hi nghohe ya vanhu; kambe exikarhi ka matiko hinkwawo, loyi a xi chavaka, a endla leswi lulameke, xa n’wi tsakela.”—Mintirho 10:34, 35, Bibele Ya Xitsonga.

Loko Yakobo a tsalela Vakreste va lembe-xidzana ro sungula u te: “Vamakwerhu, ripfumelo leri mi nga na rona eka Hosi ya hina Yesu Kreste, ku vangama ka hina, a ri fambisani ni swiendlo swa xihlawuhlawu, a hi swona ke? Hikuva, loko munhu la veheleke swingwavila swa nsuku etintihweni ta yena, a ambale swiambalo leswi hatimaka a nghena enhlengeletanweni ya n’wina, ivi ku nghena xisiwana lexi ambaleke swiambalo leswi thyakeke, kambe mi va ni tintswalo eka la ambaleke swiambalo leswi hatimaka kutani mi ku: “Wena tshama laha ndhawini leyinene,” kutani eka la nga xisiwana mi ku: “Wena yimisa sweswo,” kumbe: “Tshama lahaya vunavelweni bya milenge ya mina,” ma tihambanisa hi mintlawa exikarhi ka n’wina naswona se mi vaavanyisi lava endlaka swiboho swo homboloka, a swi tano ke?”—Yakobo 2:1-4, Vuhundzuluxeri Bya Misava Leyintshwa Bya Matsalwa Yo Kwetsima.

XIVUTISO:

Xana vukhongeri lebyi byi dyondzisa leswaku vanhu hinkwavo va ringana emahlweni ka Xikwembu nileswaku swirho swa byona a swi fanelanga swi tekelana ehansi hikwalaho ka rixaka kumbe hileswi swi nga ringaniki hi tlhelo ra timali?

Hi byihi vukhongeri lebyi byi dyondzisaka swirho swa byona ku papalata rivengo leri vangiwaka hi xihlawuhlawu lexi nga ha vangiwaka hi mpfilumpfilu wa tipolitiki, wa rixaka swin’we ni ku tekela van’wana ehansi hileswi va nga ringaniki hi tlhelo ra timali?