Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA 2009-08-01

 Dyondzisa Vana Va Wena

Rahava U Swi Twile Leswi Humeleleke

Rahava U Swi Twile Leswi Humeleleke

A HI swi tekeni onge mhaka leyi leyi humeleleke kwalomu ka malembe ya 3 500 lama nga hundza yi le ku endlekeni sweswi. Hi le mutini wa Yeriko, etikweni ra Kanana. Nhwanyana loyi a vuriwaka Rahava u tshama emutini lowu. U velekiwe endzhaku ka loko Muxe a tshunxe Vaisrayele evuhlongeni bya Egipta kutani va hundza hi le Lwandle ro Tshwuka emisaveni leyi omeke! Ku hava swiya-ni-moya, tithelevhixini kumbe Internet, kambe Rahava wa ri tiva nhlori leri—hambileswi ri humeleleke ekule swinene ni laha a tshamaka kona. Xana wa swi tiva leswaku u swi tivise ku yini sweswo?— *

Handle ko kanakana, vavalangi hi vona lava n’wi byeleke hi masingita lawa. Loko a ri karhi a kula, Rahava, u tsundzuke leswi Yehovha a swi endleleke vanhu vakwe. Kutani endzhaku ka sweswo u twe swilo leswi hlamarisaka hi Vaisrayele. Endzhaku ka malembe ya 40 va ri emananga, va nghene eKanana naswona Xikwembu xi va pfunile leswaku va hlula valala va vona. Sweswi Rahava wa swi tiva leswaku Vaisrayele va dzime mixaxa etlhelo ka Nambu wa Yordani ku suka emutini wa Yeriko.

Hi madyambu man’wana, ku fike vanhu vambe vambirhi eka Rahava, hikuva a va swi tiva leswaku u tirha laha vaendzi va fikelaka kona. Kutani u va amukerile. Hi vusiku byebyo, hosi ya Yeriko yi twe leswaku tinhlori ta Vaisrayele ti tile eYeriko naswona ti fikele endlwini leyi Rahava a tirhelaka eka yona. Hikwalaho, hosi yi rhumele varhumiwa eka Rahava, lava n’wi byeleke leswaku a humesa vavanuna lava a va amukeleke endlwini yakwe. Xana wa swi tiva leswi Rahava se a a swi tiva ni leswaku u endle yini ha swona?—

Emahlweni ko va varhumiwa va hosi va fika eka Rahava, ana se a swi tiva leswaku vaendzi vakwe i tinhlori ta Vaisrayele. Hikwalaho u va tumbete ehenhla ka lwangu, naswona sweswi u byela varhumiwa va hosi a ku: “lna, vavanuna va tile eka mina . . . Vavanuna volavo va hume loko ku pfariwa nyangwa, loko ri phumela.” U tlhele a ku: “Va saleni endzhaku.”

Xana u ehleketa leswaku i yini lexi endleke leswaku Rahava a sirhelela tinhlori?— U hlamusela xivangelo xa kona hi ku ti byela leswi: “Ndzi swi tiva kahle leswaku Yehovha u ta mi nyika tiko hakunene . . . Hikuva hi yi twile ndlela leyi Yehovha a omiseke ha yona mati ya Lwandle ro Tshwuka emahlweni ka n’wina loko mi huma aEgipta.”  Naswona a a swi twile leswaku Xikwembu xi pfune Vaisrayele ku hlula valala va vona.

Hakunene swi n’wi tsakisile Yehovha leswi Rahava a sirheleleke tinhlori, hilaha Bibele yi hi byelaka hakona eka Vaheveru 11:31. U tlhele a tsakisiwa hileswi Rahava a kombeleke tinhlori a ku: ‘Ndzi mi kombe musa, ndzi kombela mi ndzi tshembisa leswaku loko muti wa Yeriko wu hlaseriwa mi ta ponisa tatana na manana swin’we ni vamakwerhu va xinuna ni va xisati.’ Tinhlori ti tshembise Rahava leswaku ti ta swi endla sweswo ntsena loko a landzela swiletelo swa tona. Xana wa swi tiva swiletelo swa kona?—

Tinhlori ti te: ‘Teka ntambhu leyi yo tshwuka u yi tsimba efasitereni ra wena kutani u hlengeleta maxaka ya wena hinkwawo endlwini ya wena. Loko u endla tano, un’wana ni un’wana loyi a nga ta va a ri kwalaho u ta pona.’ Rahava u endle hilaha tinhlori ti n’wi leriseke hakona. Xana wa swi tiva leswaku ku humelele yini endzhaku ka sweswo?—

Vaisrayele va fikile ehandle ka marhangu ya muti wa Yeriko. Siku ni siku a va gwirima ematlhelo ka muti va miyerile ku ringana masiku ya tsevu. Hi siku ra vunkombo, va gwirime ematlhelo ka muti ku ringana ka nkombo kutani va huwelela. Rirhangu ri hirimuka—ku sala ntsena laha a ku ri ni ntambhu yo tshwuka leyi a yi tsimbiwe efasitereni! Rahava ni ndyangu wakwe va ponile.—Yoxuwa 2:1-24; 6:1-5, 14, 15, 20-25.

Hi nga dyondza yini eka leswi Rahava a swi endleke?— A nga lo twa ntsena swilo leswi Xikwembu xi swi endleke leswaku xi sirhelela vanhu va xona kambe u tlhele a va pfuna. Rahava ni ndyangu wa ka vona va hlawule ku tirhela Yehovha. Xana na wena u ta endla hilaha ku fanaka?— Hi tshemba leswaku na wena u ta endla tano.

^ ndzim. 3 Loko u hlayela vana, mfungho lowu wu endleriwe ku ku tsundzuxa leswaku u yima, kutani u rindzela leswaku va hlamula xivutiso xa kona.