Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Xihondzo Xo Rindza  |  2009-01-01

  Swivutiso Swa Vahlayi

Ha Yini Xikwembu Xi Nga Swi Hlamuli Swikhongelo Swin’wana?

Ha Yini Xikwembu Xi Nga Swi Hlamuli Swikhongelo Swin’wana?

Xikwembu xi ngheneka hi ku olova. Tanihi leswi tatana loyi a nga ni rirhandzu a tsakaka loko vana vakwe va vulavula na yena va ntshunxekile, Yehovha Xikwembu u lava leswaku hi khongela eka yena. Nilokoswiritano, ku fana ni tatana un’wana ni un’wana loyi a tlhariheke, Xikwembu xi ni swivangelo leswi twalaka swa ku ka xi nga swi hlamuli swikhongelo swin’wana. Xana swivangelo swa kona swa tiveka kumbe ku ni swikombiso eBibeleni leswi nga hi pfunaka ku twisisa leswaku ha yini xi nga swi hlamuli swikhongelo swin’wana?

Muapostola Yohane u hlamusele a ku: “Ku tiyiseka loku hi nga na kona ha xona, i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.” (1 Yohane 5:14) Swilo leswi hi swi kombelaka swi fanele swi fambisana ni ku rhandza ka Xikwembu. Van’wana va khongelela swilo leswi nga fambisaniki ni ku rhandza ka Xikwembu—hi xikombiso, va khongelela ku wina eka mintlangu yo gembula. Van’wana va khongela va ri ni swikongomelo swo biha. Mudyondzisiwa Yakobo u hi lemukisa malunghana ni ku khongela hi ndlela yoleyo leyi hoxeke, a ku: “Ma kombela, kambe ke, a mi nyikiwi, hikuva mi kombela hi xikongomelo lexi hoxeke, leswaku mi ta xi tirhisa eku naveleni ka n’wina ntsako wa swa nyama.”—Yakobo 4:3.

Hi xikombiso, ehleketa hi swipano swimbirhi swa bolo leswi tlangaka swin’we leswi haswimbirhi ka swona swi khongelelaka ku wina. Swi ta va swi nga twali ku langutela leswaku Xikwembu xi hlamula swikhongelo swo tano leswi lwisanaka. Ku nga vuriwa nchumu lowu fanaka hi tinyimpi ta manguva lawa laha matiko lama lwaka swin’we ma khongelelaka ku hlula enyimpini.

Xikwembu a xi nge swi hlamuli swikhongelo swa lava nga yi yingisiki milawu ya xona. Siku rin’wana Yehovha u boheke ku byela vagandzeri lava nga ni vukanganyisi a ku: “Hambiloko mi endla swikhongelo swo tala, a ndzi yingisi; mavoko ya n’wina ma tele ku  halata ngati.” (Esaya 1:15) Bibele yi ri: “Loyi a kendlusaka ndleve yakwe leswaku yi nga yingisi nawu—hambi ku ri xikhongelo xakwe i nchumu wo nyenyetsa.”—Swivuriso 28:9.

Hi hala tlhelo, Yehovha u ta swi yingisa minkarhi hinkwayo swikhongelo leswi humaka embilwini swa vagandzeri vakwe lava endlaka hinkwaswo leswi va nga swi kotaka leswaku va n’wi tirhela hi ku ya hi ku rhandza kakwe. Kambe, xana sweswo swi vula leswaku u ta va nyika xin’wana ni xin’wana lexi va xi kombelaka? Doo! Xiya swikombiso swin’wana leswi nga eMatsalweni.

Muxe a a ri ni vuxaka lebyikulu ni Xikwembu; hambiswiritano, na yena a a fanele a kombela swilo leswi fambisanaka ni “ku rhandza ka [Xikwembu].” Ku hambana ni xikongomelo lexi Xikwembu xi xi vuleke, Muxe u kombele mpfumelelo wo nghena etikweni ra Kanana, a ku: “Ndzi kombela u ndzi pfumelela ndzi hundza ndzi vona tiko lerinene leri nga entsungeni wa Yordani.” Kambe enkarhini lowu hundzeke Muxe u byeriwe leswaku a nge ngheni etikweni rero hikwalaho ka xidyoho lexi a xi endleke. Kutani ematshan’weni yo va Yehovha a pfumelela Muxe ku nghena etikweni rero, u te eka yena: “Swi ringene hi wena! U nga ha pfuki u vulavula na mina hi mhaka leyi nakambe.”—Deteronoma 3:25, 26; 32:51.

Muapostola Pawulo u khongelele leswaku ku susiwa nchumu lowu a a wu vitana “mutwa enyameni [yakwe].” (2 Vakorinto 12:7) Kumbexana “mutwa” lowu a ku ri vuvabyi bya mahlo yakwe lawa a ma nga tshunguleki kumbe ku tshamela ku xanisiwa hi vakaneti vakwe ni hi ‘vamakwavo va mavunwa.’ (2 Vakorinto 11:26; Vagalatiya 4:14, 15) Pawulo u tsale a ku: “Ndzi kombele Hosi kanharhu leswaku wu suka eka mina.” Hambiswiritano, Xikwembu a xi swi tiva leswaku loko Pawulo a hambeta a chumayela ku nga khathariseki ‘mutwa lowu a wu n’wi karhata enyameni yakwe’ a swi ta ma kombisa kahle matimba ya Xikwembu ni leswaku a a tshembela eka xona hilaha ku heleleke. Xisweswo, ematshan’weni yo va Xikwembu xi endla hilaha Pawulo a kombeleke hakona, xi n’wi byele leswi: “Matimba ya mina ma endliwa lama hetisekeke eku tsaneni.”—2 Vakorinto 12:8, 9.

I ntiyiso leswaku Xikwembu xi swi tiva ku antswa ku tlula hina leswaku loko xi hi nyika swilo swo karhi leswi hi swi kombelaka swi ta hi pfuna kumbe e-e. Minkarhi hinkwayo Yehovha u hlamula swikhongelo leswi nga ta hi vuyerisa, hi ku pfumelelana ni swikongomelo swakwe swa rirhandzu leswi tsariweke eBibeleni.