Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  2008-08-01

 Dyondzisa Vana Va Wena

Samuwele U Hambete A Endla Leswinene

Samuwele U Hambete A Endla Leswinene

XANA u tshame u vona vanhu va endla swilo swo biha?— * Samuwele u va vonile. A a tshama endhawini leyi eka yona a wu nga ta swi langutela ku vona vanhu va endla swilo swo biha. Ndhawu ya kona hi le tabernakeleni ya Xikwembu, kumbe ndhawu ya vugandzeri, leyi a yi ri eXilo. Sweswi a hi voneni ndlela leyi tabernakela yi veke kaya ra Samuwele ha yona eka malembe yo tlula 3 000 lama hundzeke.

Loko Samuwele a nga si velekiwa, mana wakwe Hana, a a swi lava swinene ku va ni n’wana. Loko ndyangu hinkwawo wu ye etabernakeleni, Hana u khongele eka Xikwembu hi mhaka leyi. U khongele hi mbilu hinkwayo lerova milomu yakwe yi vendzavendza. Leswi swi endle leswaku muprista lonkulu Eli a ehleketa leswaku a a dakwile. Kambe loko Eli a xiye leswaku Hana a a nga dakwanga kambe a a karhatekile swinene, u n’wi katekisile a ku: “Onge Xikwembu xa Israyele xi nga hlamula xikombelo [xa wena].”—1 Samuwele 1:17.

Endzhaku ka nkarhi Samuwele u velekiwile, naswona Hana u tsake swinene lerova a byela nuna wakwe Elkana a ku: ‘Hi ku hatlisa loko ndzi lumula Samuwele, ndzi ta n’wi yisa etabernakeleni leswaku a ya tirhela Xikwembu kwalaho.’ Kutani u endle tano! Swi nga endleka leswaku hi nkarhi wolowo Samuwele a a ri ni malembe ya mune kumbe ntlhanu.

Eli se a a dyuharile, naswona vana vakwe va majaha Hofini na Finiyasi, a va nga n’wi gandzeli hi ndlela leyi faneleke Yehovha. Naswona a va tikhoma hi ndlela yo biha hi tlhelo ra rimbewu ni vavasati lava a va ta etabernakeleni! U ehleketa leswaku i yini leswi tata wa vona a a fanele a swi endlile?— A a fanele a va tshinyile kutani a nga va pfumeleli ku endla swilo sweswo swo biha.

Samuwele loyi a a ha ri ntsongo loyi a a tshama etabernakeleni, swi nga ha endleka leswaku a a swi tiva leswaku vana va Eli a va tikhoma hi ndlela yo biha. Xana Samuwele u tekelele xikombiso xa vona xo biha?— Doo, u hambete a endla leswinene hilaha vatswari vakwe a va n’wi dyondzise hakona. Hikwalaho a swi hlamarisi leswi Yehovha a hlundzukeleke Eli. U kale a rhumela muprofeta  un’wana leswaku a ya byela Eli ndlela leyi A A ta xupula ndyangu wakwe ha yona, ngopfu-ngopfu vana vakwe vo homboloka.—1 Samuwele 2:22-36.

Samuwele u hambete a tirha na Eli etabernakeleni. Kutani siku rin’wana nivusiku loko Samuwele a etlele, u twe rito ri n’wi vitana. Hiloko a tsutsuma a ya eka Eli, kambe Eli u n’wi byele leswaku a a nga n’wi vitananga. Nchumu lowu fanaka wu tlhele wu endleka. Endzhaku ka loko sweswo swi endleke kanharhu, Eli u byele Samuwele leswaku a hlamula a ku: “Yehovha, vulavula hikuva nandza wa wena u yingisile.” Loko Samuwele a vule sweswo, Yehovha u vulavule na yena. Xana wa swi tiva leswi Yehovha a swi byeleke Samuwele?—

Xikwembu xi phindhe xikongomelo xa xona eka Samuwele xa leswaku xi ta xupula ndyangu wa Eli. Xa mundzuku xa kona nimixo, Samuwele u chave ku byela Eli leswi Yehovha a swi vuleke. Kambe Eli u kombele Samuwele a ku: “Ndzi kombela u nga ndzi fihleli rona.” Kutani Samuwele u hetelele a byela Eli hinkwaswo leswi Yehovha a vuleke leswaku A A ta swi endla, hilaha muprofeta Wakwe a byeleke Eli hakona eku sunguleni. Eli u hlamule a ku: “Leswi swi nga swinene ematihlweni yakwe [Yehovha] a a swi endle.” Eku heteleleni, Hofini na Finiyasi va dlayiwile naswona Eli na yena u file.—1 Samuwele 3:1-18.

Hi nkarhi wolowo, “Samuwele a ya emahlweni a kula, naswona Yehovha a va na yena.” Swi nga ha endleka leswaku hi nkarhi wolowo Samuwele a a ri muntshwa, ku nga nkarhi wa nkoka evuton’wini bya vana. Xana u ehleketa leswaku a swi n’wi olovela Samuwele ku hambeta a endla leswinene hambiloko van’wana va endla leswo biha?— Hambileswi a swi nga olovi, Samuwele u tirhele Yehovha hi ku tshembeka vutomi byakwe hinkwabyo.—1 Samuwele 3:19-21.

Ku vuriwa yini hi wena? Xana u ta fana na Samuwele loko u ri karhi u kula? Xana u ta hambeta u endla leswinene? Xana u ta ya emahlweni u yingisa milawu ya Bibele naswona u endla leswi vatswari va wena va ku dyondziseke swona? Loko u endla tano, u ta tsakisa Yehovha ni vatswari va wena.

^ ndzim. 3 Loko u hlayela vana, mfungho lowu wu ku tsundzuxa leswaku u yimanyana kutani u va vutisa xivutiso.