Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

XIHONDZO XO RINDZA 2008-06-01

 Dyondzisa Vana Va Wena

A Xi Lava Ku Pfuna

A Xi Lava Ku Pfuna

XANA u kona munhu loyi a a vabya swinene loyi u n’wi tivaka?— Xana a wu navela onge u nga endla xo karhi leswaku u n’wi pfuna?— Ku vuriwa yini loko a huma etikweni rimbe kumbe a ri wa vukhongeri byin’wana lebyi nga faniki ni bya wena? Xana a wa ha ta lava ku n’wi pfuna leswaku a hlakarhela?— Xinhwanyetana xin’wana lexi a xi tshama etikweni ra Israyele kwalomu ka malembe ya 3 000 lama hundzeke xi swi endlile sweswo. A hi vulavuleni hi leswi swi endlekeke hi nkarhi wolowo.

Tiko ra khale ra Israyele laha xinhwanyetana lexi a xi tshama kona, a ri tshamela ku lwa ni tiko ra Siriya leri akelaneke na rona. (1 Tihosi 22:1) Siku rin’wana Vaasiriya va ye eIsrayele kutani va teka xinhwanyetana xin’wana va famba na xona. Va ye na xona eSiriya, laha xi fikeke xi va nandza wa nsati wa Namani, ndhuna ya vuthu ra Vaasiriya. Namani a a ri ni vuvabyi lebyi chavisaka lebyi vuriwaka nhlokonho, lebyi nga endlaka leswaku nyama ya munhu yi hlakala.

Xinhwanyetana xexo lexi nga nandza xi byele nsati wa Namani ndlela leyi nuna wakwe a nga hanyisiwaka ha yona. Xi te: ‘Loko Namani a a ri eSamariya, Elixa muprofeta wa Yehovha a a ta n’wi hanyisa eka nhlokonho yakwe.’ Ndlela leyi xinhwanyetana xexo lexi nga nandza xi vulavuleke ha yona hi Elixa yi endle leswaku Namani a tshemba leswaku hakunene muprofeta yoloye a a ta swi kota ku n’wi hanyisa. Kutani endzhaku ko pfumeleriwa hi Beni-hadadi, hosi ya Siriya, Namani ni varindzi van’wana va teke riendzo ro leha ra kwalomu ka tikhilomitara ta 150 va kongoma laha Elixa a a tshama kona.

Xo sungula, va ye eka Yehorama, hosi ya Israyele. Va n’wi kombe papila ra Hosi Beni-hadadi ro kombela leswaku Namani a pfuniwa. Kambe Yehorama a a nga pfumeli eka Yehovha kumbe eka muprofeta Elixa. Yehorama a a ehleketa leswaku Beni-hadadi u lava ku ringeta ku pfuxa nyimpi. Loko Elixa a twa sweswo, u byele Hosi Yehorama a ku: “Ndzi kombela a ta eka mina.” Elixa a a lava ku kombisa matimba ya Xikwembu hi ku horisa Namani eka vuvabyi byakwe lebyi chavisaka.—2 Tihosi 5:1-8.

Loko Namani a fika endlwini ya Elixa a ri ni tihanci ni makalichi yakwe, Elixa u rhume murhumiwa leswaku a n’wi byela leswi: ‘U fanele u hlamba ka nkombo eNambyeni wa Yordani kutani u ta hanyisiwa.’ Sweswo swi hlundzukise Namani. A a langutele leswaku Elixa u ta huma a ta tlakusa voko ra yena ehenhla ka nhlokonho leswaku yi nyamalala. Ematshan’weni ya sweswo, ku te murhumiwa! Kutani Namani u hlundzuke ngopfu kutani a tlhelela ekaya.—2 Tihosi 5:9-12.

 Xana wena a wu ta va u endle yini loko a wu ri un’wana wa malandza ya Namani?— Malandza yakwe ma n’wi vutisile ma ku: ‘Loko Elixa a a ku byele leswaku u endla nchumu lowu tikaka, xana a wu nga ta wu endla? Kutani ha yini u nga endli nchumu lowu wo olova—ku nga ku hlamba ntsena kutani u tenga?’ Namani u yingise marito ya malandza wolawo. Hiloko a “rhelela a sungula ku nghena eYordani ka nkombo . . . , endzhaku ka sweswo nyama yakwe yi tlhela yi hanya ku fana ni nyama ya mufana lontsongo.”

Namani u tlhelele eka Elixa kutani a ku: “Waswivo, kunene sweswi ndza swi tiva leswaku a ku na Xikwembu xin’wana hambi ku ri kwihi emisaveni, kambe xi le Israyele.” U tshembise Elixa leswaku a nge he pfuki “a [endle] gandzelo ro hisiwa kumbe xitlhavelo eka swikwembu swin’wana, kambe u ta swi endlela Yehovha.”—2 Tihosi 5:13-17.

Xana u nga swi tsakela ku pfuna munhu leswaku a dyondza hi Yehovha ni leswi A nga ta swi endla, hilaha xinhwanyetana lexi xi endleke hakona?— Loko Yesu a ha ri emisaveni, wanuna loyi a a ri ni nhlokonho u ve ni ripfumelo eka yena kutani a ku: ‘Loko hakunene u swi lava ku ndzi pfuna u nga ndzi pfuna.’ Xana wa swi tiva leswaku Yesu u hlamule a ku yini?— U te, “Ndza swi lava.” Kutani Yesu u n’wi hanyisile, hilaha Yehovha a hanyiseke Namani hakona.—Matewu 8:2, 3.

Xana wa swi tiva leswaku Yehovha u ta tisa misava leyintshwa leyi eka yona vanhu va nga ta va ni rihanyo lerinene va tlhela va hanya hilaha ku nga heriki?— (2 Petro 3:13; Nhlavutelo 21:3, 4) Kutani, hakunene u ta swi tsakela ku byela van’wana hi swilo leswi swo tsakisa!