Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA 2008-04-01

Xana Nyimpi Ya Armagedoni Yi Ta Lweriwa Kwihi?

Xana Nyimpi Ya Armagedoni Yi Ta Lweriwa Kwihi?

 Swivutiso Swa Vahlayi

Xana Nyimpi Ya Armagedoni Yi Ta Lweriwa Kwihi?

Nyimpi ya Armagedoni a yi nge lweriwi endhawini yo karhi leyi kongomeke leyi ku lweriwaka eka yona tinyimpi. Ematshan’weni ya sweswo, yi ta lweriwa emisaveni hinkwayo. Ha yini? Hikuva mintlawa leyimbirhi leyi lwaka yi tele ngopfu lerova ku hava mbango ni wun’we lowu yi nga hlanganaka eka wona hinkwayo.

Armagedoni kumbe Har–Magedoni yi tlhela yi tiveka tanihi “nyimpi ya siku lerikulu ra Xikwembu xa Matimba Hinkwawo.” Yehovha Xikwembu u ta tirhisa N’wana wakwe Kreste Yesu leswaku a hlengeleta vuthu ra tintsumi ku lwa ni mavuthu lama hlanganeke ya tihosi hinkwato to homboloka ta laha misaveni.—Nhlavutelo 16:14; 19:11-16.

Matiko ma ta kanganyisiwa hi ndlela yo karhi hi tintsumi ta Sathana leswaku ma hlanganyela enyimpini leyi. Bibele yi vulavula hi “marito lama huhuteriweke hi madimona” lama yaka “etihosini [vafumi] ta misava hinkwayo leyi akiweke, ku ti hlengeletela . . . endhawini leyi vuriwaka Har–Magedoni hi Xiheveru.”—Nhlavutelo 16:14-16.

Ku hambana ni tibuku tin’wana ta Bibele, buku ya Nhlavutelo yi susumetele vahlayi vo tala va Bibele ku ringeta ku tiva leswaku sweswo swi vula yini. Vahlayi vo tala lava ehleketaka leswaku leswi buku ya Nhlavutelo yi swi vulaka swi fanele swi tekiwa hi ndlela ya xiviri, va kombetele ndhawu leyi va tshembaka leswaku nyimpi yi ta sungula kona, kutani va tshama va langutise swiendlakalo leswi endlekaka endhawini yoleyo. Mhaka ya leswaku Armagedoni yi kombetela endhawini yo karhi leyi kongomeke yi kumeka ebukwini ya khale swinene ya Xigriki leyi vulavulaka hi buku ya Nhlavutelo, leyi ya ha riki kona ninamuntlha leyi tsariweke hi Oecumenius hi lembe-xidzana ra vutsevu C.E.

Loko John F. Walvoord, khale ka presidente ya Xikolo xa Vufundhisi xa le Dallas a vulavula hi mhaka leyi dumeke exikarhi ka vafundhisi va kereke ya Protestente lava pfumelaka leswaku tidyondzo hinkwato ta Bibele ti hlamuseriwa hi ndlela ya xiviri ntsena, u vula leswaku Armagedoni i “nyimpi yo hetelela leyi nga ni khombo ya misava leyi nga riki na ntshembo leyi nga ta lweriwa eVuxa Xikarhi.” Walvoord u vula leswaku nchumu lowu vanhu va ehleketaka ngopfu ha wona malunghana ni nyimpi leyi leyikulu leyi taka i “‘Ntshava ya Medido,’ ku nga xitshabyana lexi nga en’walungwini wa Palestina emakumu ka nkova lowukulu.”

Hambiswiritano, buku ya Nhlavutelo a yi tsaleriwanga ku komba ndhawu ya xiviri leyi vuriwaka Armagedoni. Marito ya yona yo sungula ma vula leswaku mhaka ya kona yi nyikeriwa “yi ri swikombiso.” (Nhlavutelo 1:1) Ebukwini yin’wana ya tona, Timbhoni ta Yehovha ti vule khale ti ku: “A hi fanelanga hi rindzela ku vona vanhu va hlengeletana hi ndlela ya xiviri eNtshaveni ya Megido.”—Studies in the Scriptures, Vholumo ya Vumune.

Swiendlakalo leswi humeleleke enkarhini lowu hundzeke emutini wa Megido swi ringanyeta xiyimo lexi nga papalatekiki lexi nga ta wela valala va Xikwembu. Xisweswo, Xikwembu xi ta endla leswaku vukanganyisi ni vubihi hinkwabyo, ku nga khathariseki leswaku byi ta kumiwa kwihi emisaveni leyi, byi herisiwa hi ku helela enyimpini ya Armagedoni.—Nhlavutelo 21:8.

Lava rhandzaka Yehovha Xikwembu ni N’wana wakwe Yesu Kreste a va fanelanga va chava nyimpi leyi ya Armagedoni. Nyimpi ya Xikwembu yi kongomisiwa hi ku kongoma eka vanhu lava Xikwembu xi vonaka leswaku va nge pfuki va hundzukile etindleleni ta vona to homboloka. Nyimpi ya xona yi nge lovisi munhu un’wana ni un’wana. Bibele yi ri: “Yehovha wa yi tiva ndlela yo va kutsula endzingweni vanhu lava nga ni ku tinyiketela loku nga ni vukwembu.” (2 Petro 2:9) Xitshembiso lexi khutazaka lexi nga eka Pisalema 37:34 xi ri: “Tshemba Yehovha u hlayisa ndlela yakwe, u ta ku tlakusa leswaku u dya ndzhaka ya misava. U ta swi vona loko lavo homboloka va herisiwa.”