Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  2008-02-01

Ha Yini Hi Khongela Hi Vito Ra Yesu?

Ha Yini Hi Khongela Hi Vito Ra Yesu?

YESU a a tala ku dyondzisa vanhu ndlela yo khongela. Esikwini rakwe, varhangeri va vukhongeri va Vayuda a va khongela “[emahlanganweni] ya tindlela to anama.” Ha yini? “Leswaku va voniwa hi vanhu.” Swi le rivaleni leswaku a va lava ku xiximiwa hikwalaho ka ku hisekela ka vona Xikwembu. Vo tala a va lehisa swikhongelo swa vona, va phindha-phindha nchumu lowu fanaka onge hiloko “ku tirhisa marito yo tala” a swi endla leswaku swikhongelo swa vona swi twiwa. (Matewu 6:5-8) Yesu u vule leswaku mikhuva yo tano a yi nga pfuni nchumu, xisweswo a pfuna vanhu va timbilu letinene leswaku va tiva leswi va faneleke va swi papalata loko va khongela. Hambiswiritano, a nga va dyondzisanga ntsena leswi a va fanele va swi papalata loko va khongela.

Yesu u dyondzise leswaku swikhongelo swa hina swi fanele swi kombisa leswaku hi lava vito ra Xikwembu ri kwetsimisiwa, Mfumo wa xona wu ta ni leswaku ku rhandza ka xona ku endleka. Yesu u tlhele a dyondzisa leswaku swi fanerile ku kombela Xikwembu leswaku xi hi pfuna etimhakeni ta hina vini. (Matewu 6:9-13; Luka 11:2-4) Hi ku tirhisa swifaniso, Yesu u kombise leswaku hi fanele hi phikelela, hi va ni ripfumelo naswona hi titsongahata loko hi lava leswaku swikhongelo swa hina swi twiwa hi Yehovha. (Luka 11:5-13; 18:1-14) Naswona leswi a a swi dyondzisa a a tlhela a swi endla.—Matewu 14:23; Marka 1:35.

A swi kanakanisi leswaku dyondzo leyi yi pfune vadyondzisiwa va Yesu leswaku va antswisa swikhongelo swa vona. Hambiswiritano, Yesu u rindze kukondza ku va vusiku bya yena byo hetelela emisaveni ku ri kona a dyondzisaka vadyondzisiwa vakwe dyondzo ya nkoka swinene hi xikhongelo.

 “Ku Cinca Lokukulu Eka Ndlela Leyi A Ku Khongeriwa Ha Yona”

Yesu u hete nkarhi wo tala eka vusiku byakwe byo hetelela a ri karhi a khutaza vaapostola vakwe vo tshembeka. Wolowo a wu ri nkarhi lowu faneleke wa leswaku a paluxa nchumu lowuntshwa. Yesu u te: “Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina.” Endzhakunyana u va tshembise nchumu lowu khutazaka: “Xin’wana ni xin’wana lexi mi xi kombelaka hi vito ra mina, ndzi ta xi endla, leswaku Tatana a vangamisiwa mayelana ni N’wana. Loko mi kombela xin’wana ni xin’wana hi vito ra mina, ndzi ta xi endla.” Loko a ri ekusuhi ni ku gimeta bulo rakwe u te: “Ku fikela enkarhini wa sweswi a mi si kombela nchumu ni wun’we hi vito ra mina. Kombelani mi ta swi kuma, leswaku ntsako wa n’wina wu tatiwa.”—Yohane 14:6, 13, 14; 16:24.

Marito wolawo a ma ri ya nkoka swinene. Buku yin’wana ya tinhlamuselo yi vula leswaku marito lawa ma ve “ku cinca lokukulu eka ndlela leyi a ku khongeriwa ha yona.” Yesu a a nga vuli swona leswaku xikhongelo xi fanele xi yisiwa eka yena ematshan’weni ya Xikwembu. Kambe, a a pfula ndlela leyintshwa yo tshinela eka Yehovha Xikwembu.

I ntiyiso leswaku minkarhi hinkwayo Xikwembu a xi yingisa swikhongelo swa malandza ya xona yo tshembeka. (1 Samuwele 1:9-19; Pisalema 65:2) Hambiswiritano, loko Xikwembu xi endle Ntwanano wa Nawu ni tiko ra Israyele, lava a va lava leswaku swikhongelo swa vona swi twiwa a va fanele va pfumela leswaku Israyele i tiko leri hlawuriweke hi Xikwembu. Naswona endzhaku ka nkarhi, ku sukela esikwini ra Solomoni a va fanele va pfumela leswaku tempele i ndhawu leyi hlawuriweke hi Xikwembu yo endlela eka yona switlhavelo. (Deteronoma 9:29; 2 Tikronika 6:32, 33) Hambiswiritano, endlelo leri ro gandzela a ri nga ta teka nkarhi wo leha. Hilaha muapostola Pawulo a tsaleke hakona, Nawu lowu a wu nyikiwe Vaisrayele ni magandzelo lawa a ma nyikeriwa etempeleni a ma ri “ndzhuti wa swilo leswinene leswi nga ta ta, kambe leswi ku nga riki swilo swa kona hi xiviri.” (Vaheveru 10:1, 2) Ndzhuti a wu fanele wu siviwa hi swilo swa xiviri. (Vakolosa 2:17) Ku sukela hi 33 C.E., vuxaka bya munhu un’wana ni un’wana na Yehovha a byi nga ha titsheganga hi ku yingisa Nawu wa Muxe. Kambe, a byi titshege hi ku yingisa loyi Nawu a wu kombetela eka yena, ku nga Kreste Yesu.—Yohane 15:14-16; Vagalatiya 3:24, 25.

Vito Leri Nga “eHenhla Ka Mavito Man’wana Hinkwawo”

Yesu u simeke xisekelo lexi tlakukeke xo tshinela eka Yehovha, a tihlamusela a ri munghana la nga ni matimba, loyi a pfulaka ndlela ya leswaku swikhongelo swa hina swi twiwa ni ku hlamuriwa hi Xikwembu. I yini leswi endlaka leswaku Yesu a kota ku hi pfulela ndlela?

Leswi hinkwerhu hi tswaleriweke exidyohweni, ku hava mintirho leyi hi nga yi endlaka kumbe switlhavelo leswi hi nga swi nyikelaka leswi nga hi   basisaka eka xidyoho kumbe swi hi endla hi faneleka ku va ni vuxaka na Yehovha, Xikwembu xa hina lexi kwetsimaka. (Varhoma 3:20, 24; Vaheveru 1:3, 4) Hambiswiritano, Yesu u nyikele hi vutomi byakwe lebyi hetisekeke kutani a hakela swidyoho swa vanhu leswaku va vuyelelana ni Xikwembu. (Varhoma 5:12, 18, 19) Hinkwavo lava lavaka leswaku swidyoho swa vona swi basisiwa, va nga va ni lunghelo ro va lava amukelekaka eka Yehovha kutani va tsakela ku va ni “ntshunxeko wo vulavula” ni Xikwembu—kambe leswi swi koteka ntsena loko va kombisa ripfumelo eka Yesu ni ku khongela hi vito rakwe.—Vaefesa 3:11, 12.

Loko hi khongela hi vito ra Yesu, hi kombisa ripfumelo eka tindlela tin’wana tinharhu leti a ti endleke leswaku a hetisisa xikongomelo xa Xikwembu: (1) Yesu i “Xinyimpfana xa Xikwembu” lexi xitlhavelo xa xona xi veke xisekelo xa ku rivaleriwa swidyoho. (2) U pfuxiwe hi Yehovha naswona sweswi i “muprista lonkulu” loyi a nyikaka vuyelo bya nkutsulo. (3) Hi yena ntsena a nga “ndlela” yo ya eka Yehovha hi xikhongelo.—Yohane 1:29; 14:6; Vaheveru 4:14, 15.

Ku khongela hi vito ra Yesu swi endla leswaku a xiximeka. Swa fanela ku n’wi xixima hi ndlela yoleyo hikuva ku rhandza ka Yehovha hileswaku “matsolo hinkwawo . . .  ma nkhinsama hi vito ra Yesu, naswona ririmi rin’wana ni rin’wana ri fanele ku twarisa erivaleni leswaku Yesu Kreste i Hosi leswaku ku vangamisiwa Xikwembu Tatana.” (Vafilipiya 2:10, 11) Kambe xa nkoka swinene hileswaku ku khongela hi vito ra Yesu swi vangamisa Yehovha, loyi a nyikeleke hi N’wana wakwe leswaku hi vuyeriwa.—Yohane 3:16.

Hi fanele hi khongela hi ‘mbilu ya hina hinkwayo,’ ku nga ri ku hetisisa nawu

Leswaku hi kota ku twisisa ndlela leyi xikhundlha xa Yesu xi tlakukeke ha yona, Bibele yi tirhisa swithopo ni mavito yo hambana-hambana leswaku yi n’wi hlamusela. Leswi swi hi pfuna ku twisisa mikateko yo tala leyi hi yi kumaka hikwalaho ka leswi Yesu a swi endleke ni leswi a swi endlaka swin’we ni leswi a nga ta hi endlela swona. (Vona bokisi leri nge “ Xikhundlha Xa Nkoka Xa Yesu”.) Hakunene Yesu u nyikiwe “vito leri nga ehenhla ka mavito man’wana hinkwawo.” * U nyikiwe vulawuri hinkwabyo etilweni ni le misaveni.—Vafilipiya 2:9; Matewu 28:18.

Ku Khongela Hi Vito Ra Yesu A Swi Fanelanga Swi Va Ku Hetisisa Nawu Ntsena

Hakunene loko hi lava leswaku swikhongelo swa hina swi twiwa hi Yehovha hi fanele hi  khongela hi vito ra Yesu. (Yohane 14:13, 14) Kambe a hi fanelanga hi phindha-phindha xiga lexi nge “hi vito ra Yesu” onge hiloko se ku ri mukhuva wa hina ntsena. Ha yini?

Xiya xikombiso lexi. Loko u kuma papila leri humaka eka n’wamabindzu, hi ntolovelo ri gimeta hi marito lama nge “wa wena la tshembekaka.” Xana u ehleketa leswaku marito lawa ma phofula ndlela leyi n’wamabindzu a nga xiswona hakunene, kumbe u tirhisa marito lawa ntsena hileswi ma amukelekaka eka matsalelo ya mapapila ya swa mabindzu? Hakunene ku tirhisa vito ra Yesu eswikhongelweni swa hina swi fanele swi va ni xikongomelo ku tlula ndlela leyi amukelekaka yo gimeta papila ra swa mabindzu. Hambileswi hi faneleke hi ‘khongela minkarhi hinkwayo,’ hi fanele hi endla tano “hi mbilu hinkwayo” ku nga ri ku hetisisa nawu ntsena.—1 Vatesalonika 5:17; Pisalema 119:145.

U nga swi papalata njhani ku tirhisa xiga lexi nge “hi vito ra Yesu” tanihi mukhuva lowu nga vuliki nchumu? Ha yini u nga anakanyisisi hi timfanelo leti tsakisaka ta Yesu? Anakanya hi leswi se a ku endleleke swona ni leswi a tiyimiseleke ku ku endlela swona. Eswikhongelweni swa wena, nkhensa Yehovha ni ku n’wi dzunisa hikwalaho ka ndlela yo hlamarisa leyi a tirhiseke N’wana wakwe ha yona. Loko u hambeta u endla tano, u ta ya u xi tshemba swinene xitshembiso xa Yesu lexi nge: “Loko mi kombela xin’wana ni xin’wana eka Tatana, u ta mi nyika xona hi vito ra mina.”—Yohane 16:23.

^ ndzim. 14 Hi ku ya hi xihlamusela-marito xa Vine, rito ra Xigriki leri hundzuluxeriweke va ku “vito” ri vula “hinkwaswo leswi vito ri yimelaka swona malunghana ni vulawuri, timfanelo leti hlawulekeke, xikhundlha, vukulu ni matimba.”—Expository Dictionary of New Testament Words.

 

DYONDZA SWO TALA

Xana Bibele Yi Dyondzisa Yini Hakunene?

Tshinela Eka Xikwembu Hi Xikhongelo

Xana Xikwembu xa yingisa loko u khongela? Leswaku u hlamula xivutiso xexo, u fanele u twisisa leswi Bibele yi swi dyondzisaka hi xikhongelo.