Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) DECEMBER 2015

 MHAKA YA VUTOMI

Ndzi Ni Ku Rhula Ni Xikwembu Na Manana

Ndzi Ni Ku Rhula Ni Xikwembu Na Manana

MANANA u ndzi vutise a ku: “Ha yini u nga va gandzeli vakokwa va wena lava feke? A wu swi voni leswaku u hanya hikwalaho ka vona? U ta ala ku fikela rini ku va nkhensa? Ha yini u tshika mikhuva leyi ku nga khale yi ri karhi yi endliwa? Loko u ala ku gandzela vakokwa va hina lava feke u kombisa leswaku leswi hi swi endlaka i vuphukuphuku.” Endzhaku ko vula marito lawa, Manana u sungule ku rila.

Eka tin’hweti ti nga ri tingani leswi swi nga si endleka, Timbhoni ta Yehovha ti kombele ku dyondza na manana Bibele. A a nga swi tsakeli ku dyondza, kambe u hlele leswaku ti dyondza na mina hileswi a a lava ku tikomba musa. Kambe sweswi a a ndzi hlundzukerile, ku nga leswi a ndzi nga swi twisisi hikuva a ndzi n’wi yingisa minkarhi hinkwayo. Hambiswiritano, leswi a ndzi lava ku tsakisa Yehovha a ndzi n’wi yingisanga manana. A swi nga olovi, kambe Yehovha u ndzi pfunile.

NDZI DYONDZA HI YEHOVHA

Endyangwini wa ka hina a hi ri Mabudha, ku fana ni vanhu vo tala va le Japani. Kambe endzhaku ka tin’hweti timbirhi ndzi ri karhi ndzi dyondza ni Timbhoni ta Yehovha se a ndzi tiyiseka leswaku Bibele yi vulavula ntiyiso. Loko ndzi dyondza leswaku ndzi ni Tatana wa le tilweni, ndzi lave ku n’wi tiva kahle. Eku sunguleni, mina na Manana a hi tiphina hi ku bula hi leswi a ndzi ri eku swi dyondzeni. Ndzi sungule ku ya eminhlanganweni hi Sonto eHolweni ya Mfumo. Loko ndzi ri karhi ndzi dyondza swo tala, ndzi byele Manana leswaku ndzi ta tshika ku tlangela minkhuvo ya Mabudha. Hi xinkarhana manana u cince langutelo rakwe. U te, “I ndzhukano ku va xirho xa ndyangu xi nga xiximi vakokwa wa hina lava feke.” U ndzi byele leswaku ndzi tshika ku dyondza Bibele ni ku ya eminhlanganweni. A ndzi nga ehleketi leswaku manana a nga pfuka a ndzi byele sweswo! Se a cincile.

Tatana u pfumelelane na Manana. Eka Vaefesa ndzima 6 ndzi dyondze leswaku Yehovha u lava leswaku ndzi xixima vatswari va mina. A ndzi lava leswaku endyangwini wa ka hina ku tlhela ku va ni ku rhula naswona ndzi tibyele leswaku loko ndzo va yingisa na vona a va ta hetelela va ndzi yingisile. Hi nkarhi wolowo, a ndzi fanele ndzi tilunghiselela swikambelo, kutani ndzi tibyele leswaku ndzi ta yimanyana tin’hweti tinharhu hilaha vatswari va mina a va lava hakona. Kambe ndzi tshembise Yehovha leswaku ndzi ta tlhela ndzi ya eminhlanganweni loko ku hundza tin’hweti teto.

 Xiboho lexi ndzi xi tekeke a xi nga ri xinene hikwalaho ka swivangelo swimbirhi. Xo sungula, a ndzi ehleketa leswaku endzhaku ka tin’hweti tinharhu a ndzi ta va ndza ha swi lava ku tirhela Yehovha. Kambe, vuxaka bya mina na yena byi tsane hi ku hatlisa. Xa vumbirhi, Manana na Tatana va ye va ringeta swinene ku ndzi tshikisa ku tirhela Yehovha.

NDZI KUMA MPFUNO NI KU TLHELA NDZI XANISIWA

Loko ndzi ri eHolweni ya Mfumo, ndzi hlangane ni Timbhoni to tala leti na tona ti xanisiweke hi swirho swa ndyangu. Ti ndzi tiyisekise leswaku Yehovha u ta ndzi pfuna. (Matewu 10:34-37) Ti ndzi hlamusele leswaku loko ndzo tshama ndzi tshembekile eka Yehovha ndyangu wa ka hina wu nga dyondza hi Yehovha. A ndzi lava ku titshega hi Yehovha kutani ndzi sungule ku khongela hi mbilu hinkwayo.

Ndyangu wa ka hina wu ndzi kanete hi tindlela to tala. Manana u ringete ku ndzi tshikisa ku dyondza Bibele. Minkarhi yo tala a ndzi nga n’wi hlamuli. Loko ndzi vula xo karhi, hakanyingi a hi holova hikuva havumbirhi bya hina a hi lava ku kombisana leswaku hi tiyisile. Sweswi ndza swi xiya leswaku loko a ndzi lo xixima ndlela leyi Manana a a titwa ha yona, xiyimo a xi ta va xi nga nyanyangi. Vatswari va mina va ndzi engetelele mintirho leswaku ndzi nga yi helo. Minkarhi yin’wana, a va khiya endlwini leswaku ndzi tshama ehandle kumbe va nga ndzi nyiki swakudya.

Manana u kombele van’wana leswaku va vulavula na mina. U vulavule ni mudyondzisi wa mina, kambe a swo fana ni kwala. U ndzi yise eka mininjhere wakwe leswaku a ta ringeta ku ndzi khorwisa leswaku vukhongeri lebyin’wana hinkwabyo a byi pfuni nchumu. Manana u tlhele a fonela maxaka ya ka hina a ma kombela a ri karhi a rila leswaku ma n’wi pfuna. Sweswo a swi ndzi twisa ku vava swinene. Kambe eminhlanganweni vakulu va ndzi byele leswaku loko Manana a byela vanhu van’wana hi xiyimo xa hina, kahlekahle u va a ri eku va chumayeleni.

 Vatswari va mina a va lava leswaku ndzi ya eyunivhesiti leswaku ndzi ta kuma ntirho lowu holelaka. Tanihi leswi a hi holova loko hi vulavula hi mhaka leyi, ndzi va tsalele mapapila yo hlayanyana ndzi va byela hi tipakani ta mina. Tatana u hlundzuke ngopfu kutani a ku, “Loko u ehleketa leswaku u ta kuma ntirho, mundzuku leri xaka u va u wu kumile, loko swi nga ri tano u nga ha wu veki laha.” Ndzi khongele Yehovha ndzi kombela leswaku a ndzi pfuna. Hi siku leri landzelaka loko ndzi ri ensin’wini, vamakwerhu vambirhi va xisati va ndzi nyike ntirho wo dyondzisa vana va vona. Tatana a yi n’wi tsakisanga mhaka leyi kutani u sungule ku ka a nga ha ndzi hlamuli ni ku ndzi papalata. Manana u vule leswaku a swi ta antswa loko a ndzi ri xigevenga ku ri ni ku va Mbhoni ya Yehovha.

Yehovha u ndzi pfunile leswaku ndzi lulamisa vonelo ra mina ni ku tiva leswi ndzi faneleke ndzi swi endla

Minkarhi yin’wana a ndzi nga tiyiseki loko Yehovha a lava leswaku ndzi holova ni vatswari va mina. Kutani ndzi khongele eka Yehovha ivi ndzi anakanyisisa hi leswi Bibele yi swi vulaka hi ndlela leyi a hi rhandzaka ha yona. Leswi swi ndzi pfunile leswaku ndzi tshama ndzi ri ni langutelo lerinene ni ku twisisa leswaku vatswari va mina va ndzi kaneta hi leswi va karhatekeke ha mina. Yehovha u ndzi pfunile leswaku ndzi lulamisa vonelo ra mina ni ku tiva leswi ndzi faneleke ndzi swi endla. Nakambe, loko ndzi tshamela ku va kona ensin’wini ndzi ye ndzi yi rhandza. A ndzi lava ku phayona.

NDZI VA PHAYONA

Loko vamakwerhu van’wana va xisati va twa leswaku ndzi lava ku phayona, va ndzi byele leswaku ndzi yimanyana kukondza vatswari va mina va vohla. Ndzi khongelele ku va ni vutlhari, ndzi endla ndzavisiso, ndzi anakanyisisa hi lexi ndzi endlaka ndzi lava ku phayona ni ku tlhela ndzi bula ni vamakwerhu lava nga ni ntokoto. Kutani ndzi endle xiboho xo lava ku tsakisa Yehovha. Naswona a ndzi swi xiya leswaku loko ndzo yimanyana ndzi nga phayoni swi nga ha endleka vatswari va mina va ndzi kaneta.

Ndzi sungule ku phayona hi lembe ra mina ro hetelela exikolweni xa le henhla. Endzhaku ka loko ndzi phayone nkarhi wo lehanyana, se a ndzi lava ku ya phayona laha ku nga ni xilaveko lexikulu. Kambe vatswari va mina a va nga swi lavi leswaku ndzi suka ekaya. Kutani ndzi rindze ku kondza ndzi va ni malembe ya 20. Ndzi kombele rhavi leswaku ri ndzi nyika xiavelo xo tirha endhawini leyi nga ekusuhi ni laha maxaka ya mina ma tshamaka kona edzongeni wa Japani leswaku Manana a nga vileli ngopfu.

Loko ndzi ri kwalaho, swi ndzi tsakisile ku vona swichudeni swa mina swo hlayanyana swi khuvuriwa. Ndzi sungule ku dyondza Xinghezi hikuva a ndzi lava ku fikelela vanhu vo tala. Kutani endzhaku ko vona ndlela leyi maphayona mambirhi yo hlawuleka ya le vandlheni a ma hiseka ni ku pfuna van’wana ha yona, ndzi endle xiboho xo va phayona ro hlawuleka. Hi nkarhi wolowo, Manana u vabye kambirhi swinene naswona hi minkarhi yoleyo ndzi tlhelele ekaya leswaku ndzi ya n’wi pfuna. Leswi swi n’wi hlamarisile naswona u sungule ku ndzi khoma kahle.

NDZI KUMA MIKATEKO YO TALA LEYI HUMAKA EKA YEHOVHA

Endzhaku ka malembe ya nkombo, Atsushi, loyi a ri un’wana wa maphayona yo hlawuleka lawa ndzi vulavuleke ha wona eku sunguleni, u ndzi rhumele papila. A a lava ku nghenela vukati naswona a lava ku tiva leswaku ndzi titwa njhani hi yena. A ndzi nga si tshama ndzi n’wi rhandza naswona a ndzi ehleketa leswaku na yena a nga si tshama a ndzi rhandza. Endzhaku ka n’hweti, ndzi n’wi byele leswaku ndzi nga tsakela ku n’wi tiva ku antswa. Hi xiye leswaku hi ni tipakani leti fanaka. A hi lava ku ya emahlweni ni ntirho wa nkarhi hinkwawo naswona a hi tiyimisele ku amukela xiavelo xin’wana ni xin’wana. Hi hetelele hi tekanile. A ndzi tsake ngopfu leswi Manana na Tatana ni maxaka man’wana va veke kona emucatweni wa hina.

Nepal

Endzhakunyana, loko hi ri nkarhi hi tirha tanihi maphayona, Atsushi u vekiwe ku va mulanguteri wa muganga la khomelaka. Endzhaku, hi hlawuriwe ku  va maphayona yo hlawuleka ivi hi nyikiwa ntirho wo endzela mavandlha. Endzhaku ka loko hi hete ku endzela mavandlha hinkwawo lama nga emugangeni wa hina ro sungula, rhavi ri hi bele riqingho. Ri hi vutise loko hi tiyimisele ku rhurhela eNepal leswaku hi ya emahlweni hi endzela mavandlha kona.

Ku tirha ematikweni yo hlayanyana swi ndzi dyondzise swo tala hi Yehovha

A ndzi karhateka hi leswaku vatswari va mina va ta titwa njhani hi ku rhurha ka hina hi ya ekule. Loko ndzi va fonerile, Tatana u te, “U ya tshama endhawini ya kahle.” Loko ka ha sale vhiki emahlweni ka kwalaho, un’wana wa vanghana va Tatana u n’wi nyike buku leyi vulavulaka hi tiko ra Nepal naswona a ri karhi a ehleketisisa leswaku i ndhawu ya kahle leyi munhu a nga yi endzelaka.

A hi tsakile ku tshama ni vanhu lava nga ni xinghana va le Nepal. Hi ku famba ka nkarhi hi tlhele hi averiwa ku endzela mavandlha ya le Bangladesh. Hambileswi tiko leri ri nga le kusuhi ni le Nepal, ri hambane swinene na rona. Nsimu ya kona na yona a yi hambanile. Endzhaku ko heta malembe ya ntlhanu hi averiwe ku tlhelela eJapani, laha ni sweswi hi tiphinaka hi ku endzela mavandlha.

Ndzi dyondze swo tala hi Yehovha loko hi tirha eJapani, Nepal ni le Bangladesh. Vanhu va le matikweni lawa va ni mindhavuko, mahanyelo ni mikhuva yo hambana. Naswona munhu un’wana ni un’wana u hlawulekile. Ndzi yi vonile ndlela leyi Yehovha a khathalela vanhu ha yona, a va amukela, a va pfuna ni ku tlhela a va katekisa.

Swi tele leswi ndzi nga khensaka Yehovha hikwalaho ka swona. U ndzi pfumelele leswaku ndzi n’wi tiva ni ku endla ntirho wakwe naswona u ndzi nyike nuna lonene wa Mukreste. Xikwembu xi ndzi pfune leswaku ndzi endla swiboho leswinene naswona sweswi ndzi ni vuxaka lebyinene na xona ni ndyangu wa ka hina. Ndzi khensa Yehovha hileswi mina na Manana hi nga tlhela hi va vanghana lavakulu. Ndza tlangela swinene leswi ndzi nga ni ku rhula ni Xikwembu na manana.

Ha tiphina swinene hi ntirho wo endzela mavandlha