Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) OCTOBER 2015

Xana Wa Swi Vona Leswaku Xikwembu Xi Ku Pfuna Njhani eVuton’wini?

Xana Wa Swi Vona Leswaku Xikwembu Xi Ku Pfuna Njhani eVuton’wini?

“Kunene voko ra Yehovha ri ta tivisiwa eka malandza ya yena.”—ESAYA 66:14.

TINSIMU: 65, 26

1, 2. I yini leswi vanhu van’wana va swi anakanyaka hi Xikwembu?

VANHU vo tala va anakanya leswaku Xikwembu a xi na mhaka ni leswi va swi endlaka. Va ehleketa leswaku a xi khathali hi leswi va humelelaka. Hi xikombiso, endzhaku ka loko xidzedze lexikulu xi onhe xiphemu lexikulu xa le Philippines hi November 2013, meyara wa doroba rin’wana lerikulu u te: “Xikwembu xi fanele xi ri kun’wana.”

2 Vanhu van’wana va anakanya leswaku Xikwembu a xi swi voni leswi va swi endlaka. (Esaya 26:10, 11; 3 Yohane 11) Eminkarhini ya muapostola Pawulo vanhu van’wana a va anakanya hi ndlela yoleyo. U vule leswi hi vona: “A va vona swi nga fanelanga ku tiva Xikwembu.” A va endla swilo leswi nga faneriki, vuhomboloki, makwanga ni vubihi.—Varhoma 1:28, 29.

3. (a) Hi swihi swivutiso leswi hi faneleke hi tivutisa swona? (b) Hakanyingi eBibeleni loko ku tirhisiwe rito leri nge “voko” ra Xikwembu, ku va ku vuriwa yini?

3 Ku vuriwa yini hi hina? Ha swi tiva leswaku Yehovha u vona hinkwaswo leswi hi swi endlaka. Kambe, xana ha tshemba leswaku Yehovha wa khathala hi hina? Xana ha yi vona ndlela leyi a hi  pfunaka ha yona evuton’wini bya hina? Hakanyingi eBibeleni loko ku tirhisiwe rito leri nge “voko” ra Xikwembu, ku va ku vuriwa matimba lawa xi ma tirhisaka. Xi tirhisa matimba ya xona ku pfuna malandza ya xona ni ku hlula valala va xona. (Hlaya Deteronoma 26:8.) Yesu u vule leswaku vanhu van’wana va ta “vona Xikwembu.” (Matewu 5:8) Xana hi le xikarhi ka vanhu volavo? Xana hi nga xi “vona [njhani] Xikwembu”? A hi kambisiseni swikombiso swin’wana swa le Bibeleni swa vanhu lava voneke ndlela leyi Xikwembu xi va pfuneke ha yona evuton’wini bya vona ni lava nga yi vonangiki. Hi ta tlhela hi twa leswaku ripfumelo ri nga hi pfuna njhani leswaku hi vona mpfuno wa Yehovha.

VA ALE KU VONA MATIMBA YA XIKWEMBU

4. Ha yini valala va Vaisrayele va ale ku vona matimba ya Xikwembu?

4 Enkarhini lowu hundzeke, vanhu vo tala va ve ni lunghelo ro vona va tlhela va twa ndlela leyi Xikwembu xi pfuneke Vaisrayele ha yona. Yehovha u tirhise masingita ku ntshunxa vanhu va yena aEgipta ni ku hlula tihosi to tala eTikweni leri Tshembisiweke. (Yoxuwa 9:3, 9, 10) Hambileswi tihosi tin’wana ti swi tweke ti tlhela ti vona ndlela leyi Yehovha a poniseke vanhu va yena ha yona, “ti [hlengeletanile] hinkwato leswaku ti lwa na Yoxuwa na Israyele hi vun’we.” (Yoxuwa 9:1, 2) Loko tihosi teto ti lwa ni Vaisrayele, ti vone matimba ya Xikwembu. Hikwalaho ka matimba lamakulu ya Yehovha, “dyambu ri yima, ni n’weti wu yima wu nga fambi, kukondza tiko ri tirihisela eka valala va rona.” (Yoxuwa 10:13) Kambe, Yehovha u pfumelele timbilu ta valala va Vaisrayele “ti sihalala,” leswaku va ta lwa ni Vaisrayele. (Yoxuwa 11:20) Valala va Vaisrayele va hluriwile hikuva a va nga pfumeli leswaku Yehovha a a va lwela vanhu vakwe.

Hi fanele hi ringeta ku vona matimba ya Xikwembu evuton’wini bya hina

5. I yini lexi Hosi Akabu lowo homboloka a ala ku xi tshemba?

5 Endzhaku ka sweswo, Hosi Akabu la hombolokeke u vone matimba ya Xikwembu minkarhi yo hlayanyana. Eliya u te: “A ku nge vi na mberha kumbe mpfula loko ku nga ri hi xileriso xa rito ra mina!” (1 Tihosi 17:1) Sweswo swi koteke hi matimba ya Xikwembu ntsena kambe Akabu a a nga swi tshembi. Hi ku famba ka nkarhi, Eliya u khongerile eka Yehovha naswona Xikwembu xi n’wi hlamurile hi ku rhumela ndzilo lowu humaka etilweni. Akabu u swi vonile sweswo. Hiloko Eliya a byela Akabu leswaku Yehovha a a ta herisa dyandza ivi a nisa mpfula. (1 Tihosi 18:22-45) Akabu u vone masingita wolawo hinkwawo, kambe a a nga tshembi leswaku u vone matimba ya Yehovha. Hi dyondza yini eka swikombiso leswi? Hi fanele hi ringeta ku vona matimba ya Xikwembu evuton’wini bya hina.

VA VONE MATIMBA YA YEHOVHA

6, 7. I yini leswi Vagibiyoni na Rahava va swi xiyeke?

6 Vagibiyoni a va hambane ngopfu ni matiko lawa a ma va rhendzerile. Va vone matimba ya Yehovha. Ematshan’weni yo lwa ni Vaisrayele, Vagibiyoni a va lava ku endla ku rhula na vona. Ha yini? Va vule leswaku hikwalaho ka leswi va swi tweke hi Yehovha ni hinkwaswo leswi a swi endleke. (Yoxuwa 9:3, 9, 10) A ku ri vutlhari ku va va xiye leswaku Yehovha a a lwela Vaisrayele.

7 Rahava na yena u vone matimba ya Yehovha. A a nga ri Muisrayele, kambe u swi twile leswaku Yehovha u va ponise njhani vanhu vakwe  aEgipta. Loko tinhlori timbirhi ti fika eka yena, u te: “Ndzi swi tiva kahle leswaku Yehovha u ta mi nyika tiko hakunene.” Rahava a a tshemba leswaku Yehovha a nga ponisa yena ni ndyangu wa ka vona. U kombise ripfumelo eka Yehovha hambileswi a a swi tiva leswaku ku endla tano swi nga ha n’wi nghenisa ekhombyeni.—Yoxuwa 2:9-13; 4:23, 24.

8. Vaisrayele van’wana va ma vone njhani matimba ya Xikwembu?

8 Ku hambana na Hosi Akabu lowo homboloka, Vaisrayele van’wana lava voneke ndzilo lowu humaka etilweni loko ku hlamuriwa xikhongelo xa Eliya va swi xiyile leswaku i Xikwembu lexi endleke sweswo. Va huwelele va ku: “Yehovha i Xikwembu xa ntiyiso!” (1 Tihosi 18:39) Eka vona a swi ri erivaleni leswaku va vone matimba ya Xikwembu.

9. Xana hi nga n’wi vona njhani Yehovha swin’we ni matimba ya yena namuntlha?

9 Hi kambisise swikombiso leswinene ni leswo biha leswi hi pfunaka ku twisisa leswi swi vulaka swona ku “vona Xikwembu” kumbe ku vona matimba ya Xikwembu. Loko se hi tiva Yehovha ni timfanelo ta yena, hi vona matimba ya yena hi ‘mahlo ya timbilu ta hina.’ (Vaefesa 1:18) Leswi swi hi susumetela ku tekelela vanhu vo tshembeka va le nkarhini lowu hundzeke ni va namuntlha lava voneke ndlela leyi Yehovha a pfuneke vanhu va yena ha yona. Hambiswiritano, xana byi kona vumbhoni bya leswaku Xikwembu xa va pfuna vanhu va xona namuntlha?

VUMBHONI BYA LESWAKU XIKWEMBU XA VA PFUNA VANHU VA XONA NAMUNTLHA

10. Hi byihi vumbhoni lebyi hi nga na byona bya leswaku Yehovha u pfuna vanhu namuntlha? (Vona xifaniso lexi nga eku sunguleni ka xihloko lexi.)

10 Hi ni vumbhoni byo tala bya leswaku Yehovha u ya emahlweni a pfuna vanhu vakwe namuntlha. Hakanyingi hi twa mintokoto ya  vanhu lava va khongeleke leswaku Xikwembu xi va pfuna va tlhela va hlamuriwa. (Pisalema 53:2) Hi xikombiso, loko Allan a ha chumayela exihlaleni lexitsongo xa le Philippines, u hlangane ni wansati loyi a nga sungula ku rila loko a n’wi vona. U ri: “Mixo wolowo, wansati yoloye u khongerile eka Yehovha leswaku Timbhoni ta yena ti ta n’wi endzela.” Loko a ha ri muntshwa, u dyondze Bibele ni Timbhoni, kambe loko a ta va a tekiwile naswona a rhurhele exihlaleni xin’wana a nga ha yanga emahlweni ni ku dyondza. Xikwembu xi hlamule xikhongelo xakwe hi ku hatlisa swinene lerova swi khumbe mbilu ya yena. Ku nga si hela lembe, u nyiketele vutomi byakwe eka Yehovha.

Xana u lava tindlela to vona matimba ya Yehovha evuton’wini bya wena? (Vona tindzimana 11-13)

11, 12. (a) Yehovha u ma pfuna njhani malandza yakwe? (b) Hlamusela leswaku Yehovha u n’wi pfune njhani makwerhu un’wana wa xisati.

11 Malandza ya Yehovha yo tala ma vone matimba ya yena loko ma tshike mikhuva yo biha, leyi a ma ri na yona loko ma nga si va malandza ya yena yo tanihi ku dzaha, ku tirhisa swidzidziharisi kumbe ku hlalela swifaniso swa vanhu lava nga ambalangiki. Man’wana ma vula leswaku ma ringetile ku tshika hi woxe kambe a ma swi kotanga. Hambiswiritano, endzhaku ka loko ma kombele mpfuno eka Yehovha, u ma nyike “matimba lama tlulaka lama tolovelekeke” naswona ma hetelele ma tshike mikhuva ya wona yo biha.—2 Vakorinto 4:7; Pisalema 37:23, 24.

Yehovha u pfuna malandza ya yena ku tiyisela swiphiqo leswi ma langutanaka na swona

12 Yehovha u tlhela a pfuna malandza ya yena ku tiyisela swiphiqo leswi ma langutanaka na swona. Leswi swi endlekile eka Amy. A a averiwe ku pfuneta ku aka Holo ya Mfumo ni kaya ra varhumiwa exihlaleni lexitsongo eLwandle ra Pacific. Ndhavuko wa kona a wu hambanile ni wa yena, minkarhi yo tala a ku va ku nga ri na gezi kumbe mati, switarata a swi tele hi mati, a tsundzuka ndyangu wa ka vona naswona a tshama ekamareni leritsongo ra le hotela. Siku rin’wana u holovele makwerhu wa xisati loyi a a tirha na yena. U tisorile hileswi a swi endleke. Loko a tlhelela ekamareni rakwe leri a ri ri munyama, u khongerile eka Yehovha a kombela mpfuno. Kutani loko gezi ri vuyile, u hlaye xihloko xa le ka Xihondzo xo Rindza lexi vulavulaka hi ku thwasa exikolweni xa le Giliyadi. Xihloko lexi a xi vulavula hi swiyimo swo tika swo fana ni leswi a bohekeke ku swi tiyisela. U ri: “Ndzi swi xiyile leswaku Yehovha a a vulavula na mina vusiku byebyo. Xi ndzi khutazile leswaku ndzi ya emahlweni ni xiavelo xa mina.”—Pisalema 44:25, 26; Esaya 41:10, 13.

13. Hi byihi vumbhoni lebyi hi nga na byona bya leswaku Yehovha u pfune vanhu va yena leswaku va lwela mfanelo ya vona yo chumayela?

13 Yehovha u tlhele a pfuna vanhu va yena leswaku va lwela mahungu lamanene ni ku ma simeka hi nawu. (Vafilipiya 1:7) Hi xikombiso, loko mimfumo yin’wana yi ringeta ku sivela ntirho wo chumayela, hi kote ku tiyimela ehubyeni. Hi hlule milandzu ya kwalomu ka 268 eka tihuvo leti tlakukeke emisaveni hinkwayo, 24 ya yona yi hluriwe eka Huvo ya Matiko ya le Yuropa ya Timfanelo ta Vanhu ku sukela hi lembe ra 2000. Swi le rivaleni leswaku a ku na munhu la nga sivelaka Xikwembu leswaku xi hi pfuna!—Esaya 54:17; hlaya Esaya 59:1.

14. Hi byihi vumbhoni byin’wana lebyi hi nga na byona bya leswaku Xikwembu xi ni vanhu va xona?

14 Ku chumayeriwa ka mahungu lamanene emisaveni hinkwayo i vumbhoni lebyi engetelekeke  bya ku pfuniwa hi Xikwembu. (Matewu 24:14; Mintirho 1:8) Nakambe malandza ya Yehovha lama humaka eka matiko hinkwawo ma ni vun’we hikwalaho ko pfuniwa hi Yehovha. Vun’we lebyi byi hlawulekile! Hambi ku ri vanhu lava nga gandzeliki Yehovha va pfumerile va ku: “Xikwembu xi le xikarhi ka n’wina hakunene.” (1 Vakorinto 14:25) Hi ni vumbhoni byo tala bya leswaku Xikwembu xi ni vanhu va xona. (Hlaya Esaya 66:14.) Xana wena xi nga ku pfuna? Xana wa swi vona leswaku Yehovha u ku pfuna njhani evuton’wini?

XANA WA MA VONA MATIMBA YA YEHOVHA EVUTON’WINI BYA WENA?

15. Ha yini minkarhi yin’wana hi nga swi koti ku vona matimba ya Yehovha evuton’wini bya hina?

15 Minkarhi yin’wana, a hi ma voni matimba ya Yehovha evuton’wini bya hina. Ha yini? Loko hi ri ni swiphiqo swo tala, hi nga ha rivala leswaku Yehovha u hi pfune ko tala enkarhini lowu hundzeke. Leswi swi endlekile eka Eliya. A a ri ni xivindzi kambe loko Hosi ya xisati Yezabele a lava ku n’wi dlaya, a a chava. Hi xinkarhana, u rivale ndlela leyi Yehovha a tshameke a n’wi pfuna ha yona. Bibele yi vula leswaku Eliya a a lava ku fa. (1 Tihosi 19:1-4) Hi kwihi laha a ta wu kuma kona mpfuno ni xivindzi? A a fanele a lava mpfuno eka Yehovha!—1 Tihosi 19:14-18.

16. Hi nga yi vona njhani ndlela leyi Xikwembu xi hi pfunaka ha yona loko hi ri ni swiphiqo?

16 Yobo a dzikise mianakanyo yakwe eka swiphiqo swa yena lerova xiyimo xa yena a nga xi voni hi ndlela leyi Yehovha a a xi vona ha yona. (Yobo 42:3-6) Minkarhi yin’wana, na hina swi nga ha hi tikela ku vona ndlela leyi Xikwembu xi hi pfunaka ha yona hikwalaho ka swiphiqo swa hina. I yini lexi nga ta hi pfuna ku vona leswi Xikwembu xi hi endlelaka swona? Hi fanele hi anakanyisisa hi leswi Bibele yi swi vulaka hi swiphiqo swa hina.  Kutani, Yehovha u ta va wa xiviri eka hina naswona na hina hi ta kota ku vula hi ku: “Ndzi twe ha wena hi mahungundlela, kambe sweswi tihlo ra mina ra ku vona.”

Xana Yehovha wa ku tirhisa leswaku u pfuna van’wana va vona ndlela leyi a va pfunaka ha yona? (Vona tindzimana 17, 18)

17, 18. (a) U nga ma vona njhani matimba ya Yehovha evuton’wini bya wena? (b) Hlamusela ntokoto lowu kombisaka ndlela leyi Yehovha a hi pfunaka ha yona namuntlha.

17 U nga ma vona njhani matimba ya Yehovha evuton’wini bya wena? A hi kambisiseni swikombiso swa ntlhanu. Xo sungula, u nga ha swi vona leswaku Yehovha u ku pfunile leswaku u kuma ntiyiso. Xa vumbirhi, minkarhi yin’wana loko u ye eminhlanganweni ya Vukreste, u yingisela nkulumo u nga ha va u te, “Leswi hi swona leswi a ndzi swi lava!” Xa vunharhu, kumbexana u nga ha va u vone ndlela leyi Yehovha a hlamuleke xin’wana xa swikhongelo swa wena. Xa vumune, kumbexana a wu lava ku endlela Yehovha swo tala naswona u xiye ndlela leyi a ku pfuneke ha yona ku fikelela pakani ya wena. Xa vuntlhanu, swi nga ha endleka u tshike ntirho wa wena hileswi a wu ku sivela ku tirhela Yehovha, kutani u vone Xikwembu xi hetisisa xitshembiso xa xona lexi nge: “Ndzi nga ka ndzi nga ku fularheli.” (Vaheveru 13:5) Loko hi ri ni vuxaka lebyikulu na Yehovha, swi ta hi olovela ku vona ndlela leyi a hi pfunaka ha yona evuton’wini bya hina.

18 Sarah, makwerhu wa xisati wa le Kenya u ri: “Ndzi khongele hi xichudeni lexi a ndzi vona onge a xi yi tsakeli dyondzo ya xona ya Bibele. Ndzi vutise Yehovha loko ndzi fanele ndzi tshika ku dyondza na xona. Endzhakunyana ka loko ndzi te ‘Amen’ selfoni ya mina yi ririle. Xichudeni xa mina xa Bibele a xi lava ku vutisa loko swi ta koteka leswaku xi ya na mina eminhlanganweni! A ndzi tsake ngopfu!” Loko hi vona leswi Xikwembu xi hi endlelaka swona, hi ta xiya ndlela leyi xi hi pfunaka ha yona. Rhonna, makwerhu wa xisati loyi a tshamaka eAsia, u vula leswaku swi teka nkarhi ku vona ndlela leyi Yehovha a hi pfunaka ha yona evuton’wini bya hina. U tlhela a ku: “Kambe loko se u swi vonile, swi ta ku hlamarisa ku xiya ndlela leyi a hi khathalelaka ha yona!”

19. I yini xin’wana lexi hi faneleke hi xi endla leswaku hi vona matimba ya Xikwembu?

19 Yesu u vule leswaku lava nga “ta vona Xikwembu” va fanele va va “lavo tenga embilwini.” (Matewu 5:8) Swi vula yini sweswo? Hi fanele hi hlayisa mianakanyo ya hina yi ri leyi hlutekeke naswona hi tshika ku endla leswo biha. (Hlaya 2 Vakorinto 4:2.) Exihlokweni lexi, hi dyondze leswaku loko hi lava ku vona matimba ya Xikwembu, hi fanele hi tshama hi ri karhi hi tiyisa vuxaka bya hina na xona. Exihlokweni lexi landzelaka, hi ta bula hi ndlela leyi ripfumelo ri nga hi pfunaka ha yona leswaku hi vona matimba ya Yehovha evuton’wini bya hina.