Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) MAY 2015

Swivutiso Swa Vahlayi

Swivutiso Swa Vahlayi

I mani Gogo wa Magogo loyi ku vulavuriwaka ha yena ebukwini ya Ezekiyele?

Ku ringana malembe yo tala, minkandziyiso ya hina a yi vula leswaku vito leri nge Gogo wa Magogo i vito leri Sathana a vitaniweke ha rona endzhaku ka loko a hlongoriwile etilweni. Ha yini a yi vula tano? Hikuva buku ya Nhlavutelo yi vula leswaku Sathana hi yena la nga ta rhangela loko vanhu va Xikwembu va hlaseriwa emisaveni hinkwayo. (Nhlavutelo 12:1-17) Hikwalaho a hi anakanya leswaku Gogo ku fanele ku ri vito rin’wana ra Sathana.

Hambiswiritano, a ku ri ni swiphiqo swo karhi malunghana ni nhlamuselo leyi. Anakanya hi mhaka leyi landzelaka: Loko Yehovha a vulavula hi ku lovisiwa ka Gogo, u vule leswaku u ta nyiketa Gogo a va “swakudya swa tinyenyana leti ti dyaka nyama, tinyenyana ta mixaka hinkwayo ya timpapa, ni swivandzana swa nhova.” (Ezekiyele 39:4) Endzhaku ka sweswo, Yehovha u tlhele a ku: “Esikwini rero ndzi ta nyika Gogo ndhawu kwalaho, xilahlo eIsrayele.” (Ezekiyele 39:11) Kambe xana swi nga kotekisa ku yini leswaku Sathana loyi a nga xivumbiwa xa moya lexi nga vonakiki, a dyiwa hi tinyenyana ni swivandzana? Swi nga kotekisa ku yini leswaku a lahliwa laha misaveni? Bibele yi swi kombisa kahle leswaku Sathana u ta lahleriwa ekheleni ro enta ku ringana malembe ya 1 000. A nge dyiwi kumbe a lahliwa.—Nhlavutelo 20:1, 2.

Bibele yi vula leswaku loko ku hela malembe ya 1 000, Sathana u ta ntshunxiwa ekheleni ro enta, naswona “u ta huma a ya hambukisa matiko lama nga etinhleni ta mune ta misava, yena Gogo na Magogo, leswaku a ma hlengeletela nyimpi.” (Nhlavutelo 20:8) Kambe loko Sathana a ri Gogo, swi vula leswaku Sathana u ta tihambukisa. Hikwalaho “Gogo” loyi ku vulavuriwaka ha yena ebukwini ya Ezekiyele kumbe ya Nhlavutelo a hi Sathana.

Hikwalaho Gogo wa Magogo i mani? Leswaku hi hlamula xivutiso xolexo, hi fanele hi kambisisa Bibele leswaku hi ta tiva leswaku i vamani lava nga ta hlasela vanhu va Xikwembu. Bibele yi vulavula hi ku hlaseriwa hi ‘Gogo wa Magogo,’ ku hlaseriwa hi “hosi ya le n’walungwini” ni ku hlaseriwa hi “tihosi ta misava.” (Ezekiyele 38:2, 10-13; Daniyele 11:40, 44, 45; Nhlavutelo 17:14; 19:19) Xana minhlaselo leyi a yi fani? A swi tikombi tano. Swi vonaka onge Bibele yi tirhisa mavito lama hambaneke ku hlamusela nhlaselo wun’we. Ha yini hi vula tano? Hikuva Bibele yi hi byela leswaku matiko hinkwawo ya misava ma ta hlanganyela eka ku hlasela koloko ko hetelela loku nga ta sungula nyimpi ya Armagedoni.—Nhlavutelo 16:14, 16.

Loko hi ringanisa tindzimana leti hinkwato ta le Bibeleni leti vulavulaka hi ku hlaseriwa ko hetelela ka  vanhu va Xikwembu, swi le rivaleni leswaku vito leri nge Gogo wa Magogo a ri vuli Sathana. Ku ri na sweswo, Gogo wa Magogo i ntlawa wa matiko. Xana ntlawa wolowo wu ta rhangeriwa hi “hosi ya le n’walungwini”? A hi tiyiseki. Kambe nhlamuselo leyi yi tikomba yi fambisana ni leswi Yehovha a swi vuleke malunghana na Gogo: “Kunene u ta ta u huma endhawini ya wena, ku suka eswiphen’wini swa le kule swinene swa le n’walungwini, wena ni vanhu vo tala lava va nga na wena, hinkwavo va gade tihanci, va ri nhlengeletano leyikulu, nhlengeletano leyikulu swinene ya nyimpi.”—Ezekiyele 38:6, 15.

Hilaha ku fanaka, muprofeta Daniyele loyi a hanyeke hi nkarhi wun’we na Ezekiyele, u vule leswi malunghana ni hosi ya le n’walungwini: “Ku ta va ni swiviko leswi swi nga ta yi karhata, ku suka evuhuma-dyambu ni ku suka en’walungwini, kunene yi ta huma hi vukarhi lebyikulu leswaku yi lovisa ni ku nyiketa vo tala endzovisweni. Yi ta dzima mintsonga ya yona leyi fanaka ni xigodlo exikarhi ka lwandle lerikulu ni ntshava yo kwetsima yo Khavisiwa; yi ta boheka ku famba yi ya fika emakumu ka yona, naswona a yi nge vi na mupfuni.” (Daniyele 11:44, 45) Leswi swa fana ni leswi buku ya Ezekiyele yi vulaka leswaku Gogo u ta swi endla.—Ezekiyele 38:8-12, 16.

Ku ta endleka yini endzhaku ka ku hlaseriwa ko hetelela? Daniyele u ri: “Enkarhini wolowo Mikayele [Yesu Kreste] u ta yima [eArmagedoni], hosana leyikulu leyi yi yimelaka [ku sukela hi 1914] vana va vanhu va wena. Kunene ku ta va ni nkarhi wa maxangu [nhlomulo lowukulu] lama nga si tshamaka ma va kona ku sukela loko tiko ri ve kona ku fika enkarhini wolowo. Enkarhini wolowo vanhu va wena va ta pona, un’wana ni un’wana loyi a kumekaka a tsariwe ebukwini.” (Daniyele 12:1) Eka Nhlavutelo 19:11-21 hi hlaya nhlamuselo leyi fanaka ya leswi Yesu a nga ta swi endla.

Kambe i mani “Gogo na Magogo” loyi ku vulavuriwaka ha yena eka Nhlavutelo 20:8? Vito leri ri vula vanhu hinkwavo lava nga ta xandzukela Yehovha va tlhela va hlasela vanhu vakwe hi nkarhi wa ndzingo wo hetelela loko ku hela malembe ya 1 000. Va ta va va ri ni rivengo leri fanaka ni ra Gogo wa Magogo, ku nga matiko lama nga ta hlasela vanhu va Xikwembu loko ku hela nhlomulo lowukulu. Gogo na Magogo na yena u ta lovisiwa ku fana ni matiko wolawo lama nga ta lovisiwa eArmagedoni. (Nhlavutelo 19:20, 21; 20:9) Kutani, swi tikomba swi fanerile ku vula leswaku hinkwavo lava nga ta xandzuka loko ku hela malembe ya 1 000 va ta vitaniwa “Gogo na Magogo.”

Tanihi swichudeni swa Bibele leswi hisekaka, hi tiyimisele ku tiva leswaku i mani la nga ta va “hosi ya le n’walungwini” ku nga ri khale. Kambe ku nga khathariseki leswaku i mani la nga ta rhangela matiko loko ma hlasela vanhu va Xikwembu, hi tiyiseka hi swilo leswi swimbirhi: (1) Gogo wa Magogo ni mavuthu yakwe va ta hluriwa kutani va lovisiwa. (2) Hosi ya hina, Yesu Kreste u ta ponisa vanhu va Xikwembu kutani a va nghenisa emisaveni leyintshwa leyi nga ta va yi ri ni ku rhula ni nsirhelelo wa xiviri.—Nhlavutelo 7:14-17.