Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) APRIL 2015

Tshemba Yehovha Minkarhi Hinkwayo!

Tshemba Yehovha Minkarhi Hinkwayo!

“N’wina xi tshembeni minkarhi hinkwayo.”—PISALEMA 62:8.

1-3. Ha yini Pawulo a a khorwiseka leswaku a nga n’wi tshemba Yehovha? (Vona xifaniso lexi nga eku sunguleni ka xihloko lexi.)

LOKO a wu ri Mukreste eRhoma enkarhini wa vaapostola a wu ta va u hanya enkarhini lowu nga ni khombo. Vakreste a va xanisiwa hi ndlela ya tihanyi hi Varhoma. Varhoma va vone Vakreste nandzu wa leswaku hi vona va sunguleke ndzilo lowukulu eRhoma va tlhela va va hehla hileswaku va venga vanhu. Vamakwenu vo tala va xinuna ni va xisati lava nga Vakreste a va khomiwa. Van’wana a va handzuleriwa hi swiharhi. Van’wanyana a va beleriwa etimhandzini ivi va hisiwa va ri karhi va hanya leswaku va ta voninga nivusiku. Siku ni siku a wu swi tiva leswaku xin’wana xa swilo leswi a xi ta ku humelela.

2 Muapostola Pawulo a a pfaleriwe ekhotsweni hi nkarhi lowu wo tika swinene. A nga ha va a tivutisile loko vamakwavo va yena va Vakreste a va ta n’wi pfuna, hikuva u anakanye hi xiyimo xa le nkarhini lowu hundzeke laha ku nga vangiki na munhu la n’wi pfuneke. Kambe Pawulo u pfuniwe hi Yehovha hi ku tirhisa Hosi Yesu. U tsarile: “Hosi yi yime ekusuhi na mina yi ndzi nyika matimba.” Yesu u nyike Pawulo matimba lawa a a ma lava. Pawulo u tlhele a tsala leswaku u “kutsuriwile enon’wini wa tinghala.” 2 Timotiya 4:16, 17. * (Vona nhlamuselo ya le hansi.)

3 Pawulo u tsundzuke ndlela leyi Yehovha a n’wi pfuneke ha yona enkarhini lowu hundzeke. Hikwalaho a a tiyiseka leswaku Yehovha a a ta n’wi nyika matimba lawa a a ma lava leswaku a tiyisela xiyimo lexi a a ri eka xona hi nkarhi wolowo ni miringo yihi ni yihi leyi a a ta langutana na yona enkarhini lowu taka. A a tiyiseka swinene hi mhaka yoleyo lerova u tsarile: “Hosi yi ta ndzi kutsula entirhweni wun’wana ni wun’wana wo homboloka.” (2 Timotiya 4:18) Pawulo a a dyondze leswaku hambiloko a ri eswiyin’weni leswi vamakwavo a va nga ta swi kota ku n’wi pfuna, minkarhi hinkwayo a a tiyiseka leswaku Yehovha na Yesu va ta n’wi pfuna. A a nga kanakani hi mhaka yoleyo.

MINKARHI LEYI HI NGA SWI KOMBISAKA HA YONA LESWAKU HI TSHEMBA YEHOVHA

4, 5. (a) I mani loyi minkarhi hinkwayo a nga ta ku nyika mpfuno lowu u wu lavaka? (b) U nga byi kurisa njhani vuxaka bya wena na Yehovha?

4 Xana u tshame u va ni xiphiqo xo tika ivi u vona onge a ku na munhu la nga ta ku pfuna? Kumbexana a wu heleriwe hi ntirho kumbe u ri ni ntshikilelo exikolweni. Kumbexana a wu vabya swinene kumbe u langutane ni ndzingo wun’wana wo tika. U nga ha va u kombele mpfuno eka vanhu van’wana kambe u hele matimba hileswi va nga ku pfunangiki. I ntiyiso leswaku ku ni swiphiqo swin’wana leswi vanhu va tsandzekaka ku swi tlhantlha. U ta endla yini loko u ri exiyin’weni xo tano? Bibele yi hi byela leswaku hi “tshemba Yehovha.” (Swivuriso 3:5, 6) Kambe xana u nga tiyiseka leswaku u ta ku pfuna? Ina! Hi nga hlaya hi swikombiso swo tala eBibeleni leswi hi khorwisaka leswaku Yehovha wa va pfuna vanhu va yena hakunene.

Ndzingo wu hi nyika nkarhi wo tshemba Yehovha hi mbilu hinkwayo

5 U nga hlundzuki loko vanhu va nga ku pfuni. Ku ri na sweswo, ku fana na Pawulo, teka ndzingo wolowo tanihi nkarhi wo kombisa leswaku u tshemba Yehovha hi mbilu hinkwayo. Nakambe i nkarhi wo vona ndlela leyi a ku khathalelaka ha yona. Ndlela leyi u n’wi tshembaka ha yona Yehovha ni vuxaka bya wena na yena swi ta kula.

HI FANELE HI TSHEMBA YEHOVHA

6. Ha yini swi nga ha tikaka ku tshemba Yehovha loko hi ri ni xiphiqo lexikulu?

6 U nga ha va u ri ni xiphiqo lexikulu lexi ku khunguvanyisaka. U nga ha va u endle hinkwaswo leswi u nga swi kotaka leswaku u lulamisa xiyimo xolexo, naswona u nga ha va u kombele mpfuno eka Yehovha. Xana u nga titwa u ri ni ku rhula hileswi u tshembaka leswaku Yehovha u ta ku pfuna? Ina! (Hlaya Pisalema 62:8; 1 Petro 5:7.) Loko u lava ku va ni vuxaka lebyinene na Yehovha, i swa nkoka leswaku u dyondza ku n’wi tshemba. Kambe minkarhi yin’wana a swi olovi ku endla tano. Ha yini? Xivangelo xin’wana hileswi Yehovha minkarhi yin’wana a nga ta ka a nga xi hlamuli hi nkarhi wolowo xikhongelo xa wena.—Pisalema 13:1, 2; 74:10; 89:46; 90:13; Habakuku 1:2.

Yehovha, Tata wa hina wa le tilweni wa hi rhandza naswona wa swi tiva leswi hi swi pfumalaka

7. Ha yini minkarhi yin’wana Yehovha a nga hlamuli swikhongelo swa hina hi nkarhi lowu hi khongelaka ha wona?

7 Ha yini Yehovha minkarhi yin’wana a nga swi hlamuli hi nkarhi wolowo swikhongelo swa hina? Bibele yi vula leswaku Yehovha i Tata wa hina naswona hina hi vana vakwe. (Pisalema 103:13) Tatana a nga nyiki n’wana wa  yena nchumu wun’wana ni wun’wana lowu a wu kombelaka kumbe a n’wi nyika wona hi nkarhi lowu a wu kombelaka ha wona. Tatana wa swi tiva leswaku n’wana a nga ha lava nchumu wo karhi ivi a cinca a nga ha wu lavi. Nakambe tatana wa swi tiva leswi nga vuyerisaka n’wana wa yena, naswona wa yi tiva ndlela leyi swi nga va khumbaka ha yona van’wana. Wa swi tiva leswi n’wana wa yena a swi lavaka ni nkarhi lowu a faneleke a swi kuma ha wona. Loko tatana a a nyika n’wana wa yena swilo hinkwaswo leswi a swi kombelaka hi nkarhi lowu a swi kombelaka ha wona, tatana yoloye a a ta va hlonga ra n’wana wa yena. Yehovha, Tata wa hina wa le tilweni wa hi rhandza. Leswi a nga Muvumbi wa hina la tlhariheke, wa swi tiva leswi hi swi pfumalaka naswona hi yena a endlaka xiboho xa leswaku hi wihi nkarhi lowunene wo hi nyika leswi hi swi kombelaka. I swinene leswaku hi rindza kutani hi vona ndlela leyi Yehovha a swi hlamulaka ha yona swikhongelo swa hina.—Ringanisa na Esaya 29:16; 45:9.

8. Yehovha u tshembisa yini malunghana ni leswi hi kotaka ku swi tiyisela?

8 Nakambe, tsundzuka leswaku Yehovha wa swi tiva leswi munhu ha un’we a nga kotaka ku swi tiyisela ni leswi a nga tsandzekaka ku swi tiyisela. (Pisalema 103:14) Hikwalaho u hi nyika matimba lawa hi ma lavaka. I ntiyiso leswaku minkarhi yin’wana hi nga ha vona onge a ha ha ri na matimba ya ku tiyisela. Kambe Yehovha wa hi tshembisa leswaku loko hi tsandzeka ku tiyisela ndzingo, u ta hi “nyika ndlela yo huma.” (Hlaya 1 Vakorinto 10:13.) Swa chavelela ku tiva leswaku hi nga swi tshemba leswaku Yehovha wa swi tiva leswaku hi nga kota ku tiyisela ku fika kwihi.

9. Hi fanele hi endla yini loko hi khongela hi kombela mpfuno eka Yehovha kambe a nga hi hlamuli hi nkarhi wolowo?

9 Loko hi khongela hi kombela mpfuno eka Yehovha kambe a nga hi hlamuli hi nkarhi wolowo, hi fanele hi lehisa mbilu. Tsundzuka leswaku Yehovha u tiyimiserile ku hi pfuna, kambe u lehisa mbilu a rindzela nkarhi lowu faneleke leswaku a ta hi nyika leswi hi swi lavaka. Bibele ya hi byela yi ku: “Yehovha u ta tshama a langutele ku mi komba tintswalo, kutani u ta suka a yima a mi komba tintswalo. Hikuva Yehovha i Xikwembu xa vuavanyisi. Va tsaka hinkwavo lava tshamaka va n’wi languterile.”—Esaya 30:18.

“ENON’WINI WA TINGHALA”

10-12. (a) I yini lexi nga ha endlaka leswaku swi tika ku khathalela xirho xa ndyangu lexi vabyaka? (b) Loko u tshemba Yehovha eminkarhini yo tika, swi ta byi khumba njhani vuxaka bya wena na yena? Nyika xikombiso.

10 Xiyimo xa wena xi nga ha va xi ku tikela swinene lerova u titwa ku fana na Pawulo naswona u lava ku kutsuriwa “enon’wini wa tinghala.” (2 Timotiya 4:17) I swa nkoka swinene ku tshemba Yehovha hi minkarhi yo fana ni yoleyo. Hi xikombiso, u nga ha va u khathalela xirho xa ndyangu lexi vabyaka. U nga ha va u khongerile eka Yehovha leswaku a ku pfuna u endla swiboho leswinene u tlhela u va ni matimba. * (Vona nhlamuselo ya le hansi.) U nga ha titwa u ri ni ku rhula loko u tsundzuka leswaku Yehovha wa xi vona xiyimo xa wena naswona wa ku twisisa. U ta ku pfuna leswaku  u tiyisela naswona u tshembeka eka yena.—Pisalema 32:8.

Tiyiseka leswaku Tata wa wena wa le tilweni u ta ku nyika matimba yo n’wi yingisa hi mbilu hinkwayo

11 Minkarhi yin’wana swi nga ha vonaka onge Yehovha a nga le ku ku pfuneni. Kumbexana madokodela a ma pfumelelani hi leswi ma faneleke ma swi endla eka wena. Kumbe a wu anakanya leswaku maxaka ya wena ma ta ku chavelela, kambe ku ri na sweswo ma tikomba ma nyanyisa swilo. Minkarhi hinkwayo titshege hi Yehovha leswaku a ku nyika matimba. Tshama u ri karhi u tshinela eka yena. (Hlaya 1 Samuwele 30:3, 6.) Hi ku famba ka nkarhi u ta yi xiya ndlela leyi Yehovha a ku pfuneke ha yona naswona vuxaka bya wena na yena byi ta kula.

12 Yoleyo i ndlela leyi Linda a a titwa ha yona. * (Vona nhlamuselo ya le hansi.) Loko vatswari vakwe va nga si fa, u va khathalele nkarhi wo leha loko va ri karhi va vabya. U ri: “Loko ha ha langutane ni xiyimo xolexo, mina, nuna wa mina na makwerhu wa xinuna a swi hi tikela ku tiva leswi hi faneleke hi swi endla. Minkarhi yin’wana a hi titwa hi nga ri na matimba yo endla nchumu. Kambe loko se hi anakanya hi nkarhi wolowo, hi yi vona kahle ndlela leyi Yehovha a hi pfuneke ha yona. U hi nyike matimba a tlhela a hi nyika leswi a hi swi lava hambiloko hi nga ha tivi leswaku hi endla yini.”

13. Ku tshemba Yehovha swi n’wi pfune njhani Rhonda ku tiyisela makhombo lawa a mo landzelelana?

13 Loko hi tshemba Yehovha hi timbilu ta hina hinkwato swi ta hi pfuna leswaku hi tiyisela makhombo. Sweswo hi leswi Rhonda a tshameke a langutana na swona. Nuna wakwe loyi a nga riki Mbhoni ya Yehovha a a lava ku dlaya vukati. Hi nkarhi wolowo, makwavo wa yena wa xinuna u kume leswaku u ni vuvabyi lebyikulu swinene lebyi vuriwaka lupus, lebyi masocha ya miri ma hlaselaka swirho swa miri. Endzhaku ka tin’hweti ti nga ri tingani, nsati wa makwavo wakwe wa xinuna u file. Loko Rhonda a sungula ku hlakarhela eku langutaneni ni swiendlakalo swoleswo, u teke vuphayona bya nkarhi hinkwawo. Kambe endzhaku ka sweswo mana wakwe u lovile. Rhonda u swi kotise ku yini ku langutana ni makhombo wolawo? U ri: “A ndzi vulavurisana na Yehovha siku ni siku, hambiloko ndzi fanele ndzi endla swiboho leswitsongo. Sweswo swi endle leswaku Yehovha a va wa xiviri eka mina. Swi ndzi dyondzise ku titshega hi Yehovha ematshan’weni yo titshega hi mina kumbe hi vanhu van’wana. Naswona mpfuno lowu a ndzi nyikeke wona a wu ri wa xiviri—swilaveko swa mina hinkwaswo swi khathaleriwile. Hikwalaho, ndzi titwisile ku tirhisana na Yehovha.”

Swiyimo swin’wana swa le ndyangwini wa wena swi nga ringeta ku tsanisa vuxaka bya wena na Yehovha (Vona tindzimana 14-16)

14. Yehovha a nga ku pfuna njhani loko xirho xa ndyangu wa wena xi susiwile?

14 Anakanya hi xiyimo xin’wana xo tika. A hi nge xirho xin’wana xa ndyangu wa wena xi susiwile evandlheni. Wa swi tiva leswi Bibele yi swi vulaka malunghana ni ndlela leyi vanhu lava susiweke va faneleke va khomiwa ha yona. (1 Vakorinto 5:11; 2 Yohane 10) Kambe leswi u n’wi rhandzaka munhu yoloye, u nga ha vona onge swa tika swinene kumbe a swi koteki ku yingisa xileriso xolexo xa le Bibeleni. Xana u ta swi tshemba leswaku Tata wa wena wa le tilweni u ta ku nyika matimba yo n’wi yingisa hi mbilu hinkwayo?  Xana u ta teka xiyimo xolexo tanihi nkarhi wo tshinela eka Yehovha?

15. Ha yini Adamu a nga n’wi yingisanga Yehovha?

15 Xiyimo lexi xi fana njhani ni xa wanuna wo sungula, Adamu? Xana a a anakanya leswaku a nga tshika ku yingisa Yehovha kambe a ya emahlweni a hanya? Doo, “a hi Adamu la xisiweke.” (1 Timotiya 2:14) Kutani ha yini a nga n’wi yingisanga Yehovha? Adamu u dye mbhandzu lowu nsati wakwe a n’wi nyikeke wona hikwalaho ka leswi a a rhandza nsati wakwe swinene ku tlula Yehovha. U yingise nsati wakwe ematshan’weni yo yingisa xileriso xa Yehovha.—Genesa 3:6, 17.

16. I mani loyi hi faneleke hi n’wi rhandza swinene, naswona ha yini?

16 Xiboho lexi endliweke hi Adamu xi hi dyondzisa leswaku hi fanele hi rhandza Yehovha swinene ku tlula ndlela leyi hi rhandzaka munhu un’wana ni un’wana ha yona. (Hlaya Matewu 22:37, 38.) Naswona loko hi rhandza Yehovha hi ndlela yoleyo leyikulu, hi nga pfuna maxaka ya hina hi ndlela leyinene, ku nga khathariseki leswaku ma tirhela Yehovha kumbe a ma n’wi tirheli. Hikwalaho tshama u ri karhi u tiyisa ndlela leyi u n’wi rhandzaka ha yona Yehovha ni ndlela leyi u n’wi tshembaka ha yona. Loko u karhateka hikwalaho ka xirho xa ndyangu lexi susiweke, khongela eka Yehovha u n’wi byela ndlela leyi u titwaka ha yona. * (Vona nhlamuselo ya le hansi.) (Varhoma 12:12; Vafilipiya 4:6, 7) Hambiloko u xaniseka swinene, teka xiyimo xolexo tanihi nkarhi wo tiyisa vuxaka bya wena na Yehovha. Kutani u ta kota ku n’wi tshemba ni ku tiva leswaku  loko u n’wi yingisa u ta kuma vuyelo lebyinene ngopfu.

LOKO HA HA RINDZILE

Kombisa Yehovha leswaku wa n’wi tshemba hi ku tshama u khomekile entirhweni wo chumayela (Vona ndzimana 17)

17. Loko hi tshama hi khomekile entirhweni wo chumayela, i yini lexi hi nga tiyisekaka ha xona leswaku Yehovha u ta xi endla?

17 Ha yini Yehovha a kutsule Pawulo “enon’wini wa tinghala”? Pawulo u ri: “Leswaku ha mina, ku chumayela ku hetisisiwa hi xitalo.” (2 Timotiya 4:17) Yehovha u hi nyike ntirho wo chumayela “mahungu lamanene,” naswona u hi vitana “vatirhi-kulobye” na yena. (1 Vatesalonika 2:4; 1 Vakorinto 3:9) Loko hi tshama hi khomekile hilaha hi nga kotaka hakona entirhweni lowu, hi nga tiyiseka leswaku Yehovha u ta hi nyika swilo hinkwaswo leswi hi swi pfumalaka. (Matewu 6:33) Naswona swi ta hi olovela ku rindzela Yehovha leswaku a hlamula swikhongelo swa hina.

18. I yini lexi nga ku pfunaka ku tshemba Yehovha u tlhela u tiyisa vuxaka bya wena na yena?

18 Hikwalaho tirhisa siku rin’wana ni rin’wana leswaku u tiyisa vuxaka bya wena na Yehovha. Loko u hlaseriwa hi ndzingo ivi u karhateka, tirhisa nkarhi wolowo leswaku u tshinela eka Yehovha. Hlaya u tlhela u anakanyisisa hi Rito ra Xikwembu, ku nga Bibele. Khongela eka Yehovha nkarhi ni nkarhi naswona tshama u khomekile hi ku n’wi tirhela. Loko u endla swilo leswi, u nga tiyiseka leswaku Yehovha u ta ku pfuna leswaku u tiyisela miringo ya wena hinkwayo sweswi ni miringo yihi ni yihi leyi nga ha ku hlaselaka enkarhini lowu taka.

^ ndzim. 2 Swi nga ha endleka leswaku Pawulo u kutsuriwe eka tinghala ta xiviri kumbe exiyin’weni xin’wana lexi a xi ri ni khombo.

^ ndzim. 10 Ku ni swihloko leswi humesiweke leswaku swi pfuna Vakreste va tiyisela vuvabyi swi tlhela swi pfuna vanhu lava va khathalelaka. Vona Xalamuka! ya February 8, 1994; February 8, 1997; June 8, 2000; ni ya February 8, 2001.

^ ndzim. 12 Mavito ma cinciwile.

^ ndzim. 16 Ku ni swihloko leswi humesiweke leswaku swi hi pfuna loko xirho xa ndyangu xi tshike ku tirhela Yehovha. Vona Xihondzo xo Rindza xa September 1, 2006, matluka 17-21, ni xa January 15, 2007, matluka 17-20.