Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) MARCH 2015

Xana U Ta ‘Tshama U Rindzile’?

Xana U Ta ‘Tshama U Rindzile’?

“Hikokwalaho, tshamani mi rindzile, hikuva a mi ri tivi siku hambi ku ri nkarhi wa kona.”—MATEWU 25:13.

1, 2. (a) I yini leswi Yesu a swi vuleke malunghana ni masiku ya makumu? (b) Hi swihi swivutiso leswi hi nga ta bula ha swona?

RINGETA ku anakanya Yesu a tshame eNtshaveni ya Mitlhwari a langute tempele ya le Yerusalema. U ni vaapostola vakwe va mune ku nga Petro, Andriya, Yakobo na Yohane. Va yingiserisise Yesu loko a ri karhi a va byela vuprofeta lebyi tsakisaka malunghana ni vumundzuku. Vuprofeta byolebyo byi paluxe leswi nga ta endleka emasikwini yo hetelela ya misava leyi yo homboloka loko Yesu a ta va a fuma eMfun’weni wa Xikwembu. Yesu u va byele leswaku hi nkarhi wolowo lowu tsakisaka, “hlonga [ra yena] ro tshembeka ni ro tlhariha” ri ta va muyimeri wakwe laha misaveni naswona ri ta nyika valandzeri vakwe swakudya swa moya hi nkarhi lowu faneleke.—Matewu 24:45-47.

2 Endzhaku ka sweswo, eka vuprofeta lebyi fanaka, Yesu u va  byele xifaniso xa vanhwana va khume. (Hlaya Matewu 25:1-13.) Exihlokweni lexi, hi ta bula hi swivutiso leswi: (1) Xi vula yini xifaniso lexi? (2) Vatotiwa lava tshembekaka va yi tirhise njhani ndzayo leyi kumekaka eka xifaniso lexi, naswona ku va ni vuyelo byihi? (3) Un’wana ni un’wana wa hina a nga vuyeriwa njhani eka xifaniso xa Yesu namuntlha?

XI VULA YINI XIFANISO LEXI?

3. Enkarhini lowu hundzeke, minkandziyiso ya hina a yi xi hlamusela njhani xifaniso xa vanhwana va khume naswona a ku va ni vuyelo byihi?

3 Exihlokweni lexi hundzeke, hi dyondze leswaku emalembeni lama ha ku hundzaka, hlonga ro tshembeka ri lulamise ndlela leyi timhaka tin’wana ta le Bibeleni ti hlamuseriwaka ha yona. Sweswi hlonga ro tshembeka ri dzika swinene eka leswi hi swi dyondzaka naswona a ra ha dziki ngopfu eka leswi timhaka toleto ti nga ha vaka ti fanekisela swona kumbe eka leswi vuprofeta byi vulaka swona. Hi xikombiso, anakanya hi xifaniso xa Yesu xa vanhwana va khume. Minkandziyiso ya hina a yi tala ku vula leswaku timboni, mafurha ni swikutsu a swi fanekisela nchumu wo karhi kumbe munhu wo karhi. Xana swi nga endleka leswaku leswi a ku dzikiwa eka vuxokoxoko lebyitsongo, rungula ro olova ri tlhela ri va ra xihatla ra xifaniso xolexo a ri nga kandziyisiwi? Nhlamulo ya xivutiso xolexo i ya nkoka.

Vanhwana va fanele va va va lunghekile ni timboni ta vona ti lumekiwile loko muteki a fika

4. Exifanisweni xa vanhwana va khume hi swi tivisa ku yini leswaku (a) i mani muteki? (b) i vamani vanhwana?

4 A hi kambisiseni leswi xifaniso lexi xa Yesu xi vulaka swona. Xo sungula, anakanya hi vanhu lava ku vulavuriwaka ha vona exifanisweni xa vanhwana va khume. I mani muteki? I Yesu. Sweswo ha swi tiva hikuva emahlweninyana ka kwalaho, Yesu u tivule muteki. (Luka 5:34, 35) I vamani vanhwana? I “ntlhambinyana” wa Vakreste lava totiweke. Hi swi tivisa ku yini? Exifanisweni, vanhwana va fanele va va va lunghekile ni timboni ta vona ti lumekiwile loko muteki a fika. Sweswi xiya leswi Yesu a swi byeleke valandzeri vakwe lava totiweke: “Masenge ya n’wina a ma khamiwe ni timboni ta n’wina a ti pfurhe, n’wina kotisani vanhu lava rindzeleke n’wini wa vona loko a vuya enkhubyeni wa vukati.” (Luka 12:32, 35, 36) Ku engetela kwalaho, muapostola Pawulo u fanise valandzeri va Kreste lava totiweke ni vanhwana lava tengeke. (2 Vakorinto 11:2) Hikwalaho hi nga swi vona leswaku ndzayo ni xitsundzuxo leswi kumekaka eka Matewu 25:1-13 swi kongomisiwe eka valandzeri va Yesu lava totiweke.

5. Yesu u kombise leswaku xifaniso xakwe xi tirha rini?

5 Ndzayo ya Yesu yi tirha rini? Leswi Yesu a swi vuleke loko xifaniso xolexo xi ya emakumu swi hi pfuna ku kuma nhlamulo. U te: “Muteki a fika.” (Matewu 25:10) Eka Xihondzo xo Rindza xa July 15, 2013, hi dyondze leswaku vuprofeta bya Yesu lebyi nga eka Matewu tindzima 24 na 25 byi vulavula ka nhungu hi ku “ta” ka Yesu. Loko Yesu a vulavula hi ku “ta” ka yena, u vulavula hi nkarhi wa nhlomulo lowukulu laha a nga ta tela ku avanyisa ni ku lovisa misava leyi yo homboloka.  Hikwalaho hi nga gimeta hi leswaku xifaniso xa Yesu xi tirha emasikwini ya makumu, kambe u ta “ta” hi nkarhi wa nhlomulo lowukulu.

6. Xi vula yini xifaniso lexi?

6 Hi dyondza yini eka xifaniso lexi? Tsundzuka mongo wa mhaka yoleyo ya le Bibeleni. Eka Matewu ndzima 24, Yesu u vulavule hi “hlonga ro tshembeka ni ro tlhariha.” Hlonga rolero a ku ta va ntlawa lowutsongo wa vavanuna lava totiweke lava a va ta rhangela exikarhi ka valandzeri va Kreste emasikwini ya makumu. Yesu u tsundzuxe vavanuna volavo leswaku va fanele va tshama va tshembekile. Eka ndzima leyi landzelaka, Yesu u tirhise xifaniso xa vanhwana va khume leswaku a nyika valandzeri vakwe hinkwavo lava totiweke ndzayo emasikwini lawa ya makumu. Yinhla ya nkoka hi leswaku a va fanele va ‘tshama va rindzile’ leswaku va nga lahlekeriwi hi hakelo ya vona yo ya hanya etilweni. (Matewu 25:13) Sweswi a hi kambisiseni xifaniso lexi kutani hi vona ndlela leyi vatotiwa va yi tirhiseke ha yona ndzayo yoleyo.

VATOTIWA VA YI TIRHISE NJHANI NDZAYO YA XIFANISO LEXI?

7, 8. (a) Ha yini vanhwana vo tlhariha a va lunghekile? (b) Vatotiwa va swi kombisa njhani leswaku va lunghekile?

7 Exifanisweni, Yesu u kandziyise leswaku ku hambana ni vanhwana va swiphukuphuku, vanhwana vo tlhariha a va lunghekile loko muteki a fika. Ha yini? Hikuva a va tilunghiselerile naswona a va rindzile. Vanhwana hinkwavo va khume a va fanele va tshama va xalamukile naswona va hlayisa timboni ta vona ti ri karhi ti pfurha nivusiku. Ku hambana ni vanhwana va swiphukuphuku, vanhwana va ntlhanu vo tlhariha a va lunghekile hikuva a va te ni mafurha lama engetelekeke swin’we ni timboni ta vona. Vakreste lava totiweke vo tshembeka va ku lunghekele njhani ku fika ka Yesu?

8 Vatotiwa va swi lunghekerile ku endla xiavelo xa vona ku ya fika emakumu. Va swi xiya leswaku loko va tirhela Xikwembu va fanele va tshika rifuwo ra misava ya Sathana, kambe va tiyimiserile ku endla tano. Va tiyimisele ku tirhela Yehovha hi ku tshembeka, ku nga ri hikwalaho ka leswi makumu ma tshineleke, kambe hikwalaho ka leswi va n’wi rhandzaka va tlhela va rhandza ni N’wana wakwe. Va tshama va tshembekile naswona a va pfumeli ku hambukisiwa hi ku rhandza rifuwo ra misava leyi, ku tikhoma loko biha ni ku va ni vutianakanyi. Ku fana ni vanhwana vo tlhariha lava a va lunghekile ni timboni ta vona, vatotiwa va ya emahlweni va voninga swinene, va rindzele ku fika ka Muteki va nga heli mbilu, hambiloko a nga ha tikomba a hlwela.—Vafilipiya 2:15.

Yesu u tsundzuxe vatotiwa leswaku va fanele va tshama va tshembekile

9. (a) Hi xihi xitsundzuxo lexi Yesu a xi nyikeleke malunghana ni ku khudzehela? (b) Vatotiwa va angule njhani loko ku huweleriwa va ku: “Hi loyi muteki”? (Vona ni nhlamuselo ya le hansi.)

9 Vanhwana vo tlhariha a va lunghekele ku fika ka muteki hikuva a va rindzile. Kambe exifanisweni, vanhwana hinkwavo va khume “va [khudzeherile] ivi va ya etlela” loko va ha rindzele muteki loyi a a tikomba a hlwela. Hikwalaho  xana Vakreste lava totiweke va nga “etlela” namuntlha, hileswaku va kavanyetiwa loko va ha rindzele ku fika ka Kreste? Ina. Yesu a a swi tiva leswaku hambi ku ri munhu la tiyimiseleke a tlhela a hiseka a nga tsana a tlhela a kavanyetiwa loko a ha rindzele ku fika ka yena. Hikwalaho Vakreste vo tshembeka lava totiweke va tirhe hi matimba leswaku va tshama va rindzile. Njhani? Exifanisweni, vanhwana hinkwavo va khume va pfukile loko va twa ku huweleriwa va ku: “Hi loyi muteki!” Kambe i vanhwana vo tlhariha ntsena lava tshameke va rindzile. (Matewu 25:5, 6; 26:41) Hilaha ku fanaka, emasikwini lawa ya makumu, Vakreste vo tshembeka lava totiweke va pfukile loko ku huweleriwa va ku: “Hi loyi muteki.” Va byi amukerile vumbhoni lebyi nga ni matimba bya leswaku Yesu u le kusuhi ni ku ta, naswona va ku lunghekerile ku fika ka yena. * (Vona nhlamuselo ya le hansi.) A hi kambisiseni xiyenge xo hetelela xa xifaniso xa Yesu, lexi vulavulaka hi nkarhi wo karhi.

HAKELO YA VANHWANA VO TLHARIHA NI NXUPULO WA VANHWANA VA SWIPHUKUPHUKU

10. I yini leswi hi nga ha swi vutisaka malunghana ni ku burisana loku nga ta va kona exikarhi ka vanhwana vo tlhariha ni va swiphukuphuku?

10 Loko xifaniso lexi xi ya emakumu, vanhwana va swiphukuphuku va kombele mafurha eka vanhwana vo tlhariha leswaku va ta ma chela eka timboni ta vona. Kambe vanhwana vo tlhariha a va va nyikanga. (Hlaya Matewu 25:8, 9.) Kambe hi rini laha Vakreste vo tshembeka lava totiweke va aleke ku pfuna munhu wo karhi la lavaka ku pfuniwa? Tsundzuka nkarhi lowu xifaniso lexi xi nga ta tirha ha wona. Yesu, loyi a nga Muteki u ta tela ku avanyisa loko nhlomulo lowukulu wu ri kusuhi ni ku hela. Hikwalaho swi nga ha endleka leswaku ku burisana koloko ku ta endleka loko nhlomulo lowukulu wu ri kusuhi ni ku hela. Ha yini hi vula tano? Hikuva hi nkarhi wolowo vatotiwa va ta va va funghiwe ro hetelela.

11. (a) Ku ta endleka yini emahlweninyana ka ku va ku sungula nhlomulo lowukulu? (b) Xana vanhwana vo tlhariha a va vula yini loko va byela vanhwana va swiphukuphuku leswaku va famba va ya tixavela mafurha?

11 Hikwalaho, loko nhlomulo lowukulu wu nga si sungula, vatotiwa vo tshembeka hinkwavo lava nga ta va va ha ri laha misaveni va ta va va funghiwe ro hetelela. (Nhlavutelo 7:1-4) Ku sukela hi nkarhi wolowo ku ya emahlweni, va ta va va tiyiseka leswaku va ta ya etilweni. Kambe anakanya hi malembe ya le mahlweni ka nhlomulo lowukulu. Ku ta endleka yini hi vatotiwa lava nga tshamangiki va rindzile kutani va nga ha tshembeki? A va nge funghiwi ro hetelela. Hi nkarhi wolowo, ku ta va ku totiwe Vakreste van’wana vo tshembeka leswaku va va siva. Loko nhlomulo lowukulu wu kala wu sungula, vanhwana va swiphukuphuku va nga ha tsemeka nhlana loko va vona Babilona Lonkulu a lovisiwa. Swi nga ha endleka va swi xiya hi nkarhi wolowo leswaku a va ku lunghekelanga ku fika ka Yesu. Ku ta humelela yini loko va kombela mpfuno hi nkarhi wolowo? Nhlamulo yi kumeka exifanisweni. Vanhwana vo tlhariha va arile ku nyika vanhwana va swiphukuphuku mafurha naswona ku ri na sweswo va va byele leswaku va famba va ya tixavela mafurha. Leswi a ku ri “exikarhi-karhi ka vusiku,” a ku nga ri na munhu loyi a a ta va  xavisela mafurha. Nkarhi a wu nga ha ri kona!

12. (a) Hi nkarhi wa nhlomulo lowukulu, ku ta endleka yini hi munhu wihi ni wihi loyi a tshameke a totiwa kambe a nga tshembekangiki loko a nga si funghiwa ro hetelela? (b) Ku ta humelela yini hi lava va fanaka ni vanhwana va swiphukuphuku?

12 Hi nkarhi wa nhlomulo lowukulu, vatotiwa vo tshembeka a va nge va pfuni vatotiwa lava nga tshembekangiki. Nkarhi wu ta va wu nga ha ri kona. Hikwalaho, ku ta endleka yini hi vatotiwa lava nga tshembekangiki? Xiya leswi humeleleke eka vanhwana va swiphukuphuku lava yeke va ya xava mafurha: “Muteki a fika, kutani vanhwana lava a va lunghekile va nghena na yena enkhubyeni wa vukati; hiloko nyangwa yi pfariwa.” Loko Yesu a fika eku vangameni kakwe loko nhlomulo lowukulu wu ri kusuhi ni ku hela, u ta hlengeleta vatotiwa vo tshembeka va ya etilweni. (Matewu 24:31; 25:10; Yohane 14:1-3; 1 Vatesalonika 4:17) Kambe, Yesu u ta fularhela vatotiwa lava nga tshembekangiki. Ku fana ni vanhwana va swiphukuphuku, va nga ha ku: “Nkulukumba, nkulukumba, hi pfulele!” Kambe xana Yesu u ta va hlamula njhani? Khombo ra kona, u ta va hlamula hi ndlela leyi a nga ta va hlamula ha yona vanhu vo tala lava fanaka ni timbuti, a ku: “Ndzi mi byela ntiyiso, a ndzi mi tivi.”—Matewu 7:21-23; 25:11, 12.

Mukreste un’wana ni un’wana la totiweke u fanele a hlawula ku va la lunghekeke naswona a tshama a rindzile

13. (a) Ha yini ku nga ri na xilaveko xo gimeta hi leswaku valandzeri vo tala lava totiweke va Kreste a va nge tshembeki? (b) Ha yini hi nga vulaka leswaku xifaniso xa Yesu xi kombisa leswaku wa va tshemba Vakreste lava totiweke? (Vona xifaniso lexi nga eku sunguleni ka xihloko lexi.)

13 Xana Yesu a a vula leswaku vatotiwa vo tala a va nge tshembeki kutani va ta fanela ku siviwa? Doo! Eka Matewu ndzima 24, hi hlaya leswaku Yesu u tsundzuxe hlonga ro tshembeka ni ro tlhariha leswaku ri nga hundzuki hlonga lero biha. Leswi a swi nga vuli swona leswaku a a langutele leswaku sweswo swi ta endleka. Hilaha ku fanaka, xifaniso xa vanhwana va khume i xilemukiso. Tanihi leswi vanhwana va ntlhanu a va ri swiphukuphuku kasi va ntlhanu a va tlharihile, Mukreste un’wana ni un’wana la totiweke u fanele a hlawula ku va la lunghekeke naswona a tshama a rindzile. Loko a nga endli tano u ta va xiphukuphuku naswona u ta va a nga tshembekanga. Pawulo u nyikele xilemukiso lexi fanaka eka vamakwavo va yena va xinuna ni va xisati lava totiweke. (Hlaya Vaheveru 6:4-9; ringanisa na Deteronoma 30:19.) Xilemukiso xa yena a xi kongomile, kambe a a tiyiseka leswaku vamakwavo va yena xa xinuna ni va xisati va ta yi kuma hakelo ya vona. Xilemukiso lexi nga exifanisweni xa vanhwana va khume xi paluxa leswaku Yesu na yena a a va tshemba hi ndlela leyi fanaka vatotiwa. Wa swi tiva leswaku nandza un’wana ni un’wana wa yena la totiweke a nga tshama a tshembekile kutani a kuma hakelo leyikulu!

“TINYIMPFU TIN’WANA” TA KRESTE TI NGA VUYERIWA NJHANI?

14. Ha yini “tinyimpfu tin’wana” ti nga vuyeriwaka na tona eka xifaniso xa vanhwana va khume?

14 Xifaniso xa Yesu a xi kongomisiwe eka Vakreste lava totiweke. Kambe xana “tinyimpfu  tin’wana” ti nga vuyeriwa na tona eka xifaniso xa Yesu? (Yohane 10:16) Ina! Yinhla ya xifaniso lexi ya olova: “Tshamani mi rindzile.” Naswona Yesu u tshame a ku: “Leswi ndzi mi byelaka swona, ndzi swi byela hinkwavo, Tshamani mi rindzile.” (Marka 13:37) Yesu u lava leswaku vadyondzisiwa vakwe hinkwavo va tshama va lunghekile naswona va rindzile. Naswona Vakreste hinkwavo va nga tekelela xikombiso lexinene xa vatotiwa, lava rhangisaka ntirho wo chumayela evuton’wini bya vona. Tsundzuka leswaku vanhwana va swiphukuphuku va kombele mafurha eka vanhwana vo tlhariha. Kambe a va va nyikanga. Sweswo swi hi tsundzuxa leswaku swi le ka un’wana ni un’wana wa hina ku tshama hi tshembekile eka Xikwembu, ku va lava lunghekeke ni ku tshama hi rindzile. A nga kona loyi a nga hi endlelaka sweswo. Un’wana ni un’wana wa hina u ta tihlamulela eka Yesu Kreste, Muavanyisi wo lulama, loyi a nga ta ta ku nga ri khale. Hikwalaho hi fanele hi tshama hi lunghekile!

Swi le ka un’wana ni un’wana wa hina ku tshama hi rindzile kumbe hi tshembekile

15. Ha yini Vakreste hinkwavo va ntiyiso va tsakisiwa hi vukati bya Kreste ni mutekiwa wakwe?

15 Vakreste hinkwavo va tsakisiwa hi vukati lebyi ku vulavuriwaka ha byona exifanisweni xa Yesu. Enkarhini lowu taka, endzhaku ka nyimpi ya Armagedoni, Vakreste lava totiweke va ta va mutekiwa wa Kreste. (Nhlavutelo 19:7-9) Munhu un’wana ni un’wana loyi a nga ta va a ri laha misaveni hi nkarhi wolowo u ta vuyeriwa eka vukati byolebyo bya le tilweni. Ha yini? Hikuva byi ta tiyisekisa leswaku vanhu hinkwavo va ta fumiwa hi hulumendhe leyi hetisekeke. Ku nga khathariseki leswaku hi ni ntshembo wo hanya hilaha ku nga heriki etilweni kumbe laha misaveni, a hi tiyimiseleni ku tshama hi lunghekile ni ku tshama hi rindzile. Loko hi endla tano, hi ta tiphina hi vumundzuku lebyi tsakisaka lebyi Yehovha a hi lunghiseleleke byona!

^ ndzim. 9 Exifanisweni, ku hundze nkarhi wo karhi endzhaku ka loko ku huweleriwe va ku, “Hi loyi muteki” (ndzimana 6) ni loko muteki se a fikile (ndzimana 10). Emasikwini lawa ya makumu, vatotiwa va tshame va rindzile. Va xi xiyile xikombiso xa vukona bya Yesu, hikwalaho va swi tiva leswaku wa fuma tanihi Hosi ya Mfumo wa Xikwembu. Nilokoswiritano, va fanele va tshama va rindzile kukondza a fika.