Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) MARCH 2015

Leyi I “Ndlela Leyi Amukeriwaka Hi Wena”

Leyi I “Ndlela Leyi Amukeriwaka Hi Wena”

“Swilo leswi u va fihlele hi vukheta lavo tlhariha ni lava va nga ni ku twisisa, kutani u swi hlavutele swihlangi.”—LUKA 10:21.

1. Ha yini Yesu a a “[tsakisise] hi moya lowo kwetsima”? (Vona xifaniso lexi nga eku sunguleni ka xihloko lexi.)

RINGETA ku anakanya leswaku a swi ri njhani ku vona Yesu loko a “[tsakisise] hi moya lowo kwetsima.” Kumbexana a a n’wayitela swinene naswona mahlo yakwe a ma kombisa leswaku a a tsakile. Kambe ha yini a a tsakile? A ha ku rhuma vadyondzisiwa vakwe va 70 leswaku va ya chumayela mahungu lamanene ya Mfumo wa Xikwembu. Leswi a ku ri ni vakaneti vo tala va mahungu lamanene lava a va ri ni matimba, a a swi langutele hi mahlongati ku vona ndlela leyi vadyondzisiwa vakwe a va ta xi endla ha yona xiavelo xa vona. Vakaneti volavo a va katsa vatsari ni Vafarisi, lava a va dyondzeke ngopfu va tlhela va tlhariha. A va lava leswaku vanhu va teka Yesu tanihi muvatli kutani vadyondzisiwa vakwe va va teka tanihi “vanhu lava nga dyondzekangiki, lava tolovelekeke.” (Mintirho 4:13; Marka 6:3) Hambiswiritano, loko vadyondzisiwa va vuya exiavelweni xa vona, a va tsakile swinene. Va chumayerile hambiloko va kanetiwa ni hi madimona! Va swi kotise ku yini ku tshama va tsakile va tlhela va va ni xivindzi?—Hlaya Luka 10:1, 17-21.

Vanhu va Xikwembu va antswise ndlela ya vona yo dyondzisa hi ku yi endla yi olova naswona yi twisiseka

2. (a) Vadyondzisiwa va Yesu a va fana ni swihlangi hi ndlela yihi? (b) I yini lexi pfuneke vadyondzisiwa va Yesu ku twisisa ntiyiso wa Bibele lowu enteke?

2 Yesu u byele Yehovha a ku: “Tatana, ndza ku dzunisa erivaleni,  Hosi ya tilo ni misava, hikuva swilo leswi u swi fihlele lavo tlhariha ni lava nga ni ku twisisa kutani u swi hlavutele swihlangi. Ina, Wena Tatana, hikuva ku endlisa sweswo ku ve ndlela leyi amukeriweke hi wena.” (Matewu 11:25, 26) Ha yini Yesu a vule leswaku vadyondzisiwa vakwe i swihlangi? Hikuva ku hambana ni vatsari ni Vafarisi lava a va dyondzekile swinene va tlhela va anakanya leswaku va tlharihile, vadyondzisiwa va Yesu a va tiyimisele ku dyondzisiwa ku fana ni swihlangi. Va dyondze ku titsongahata ku nga ri ku titlakusa. (Matewu 18:1-4) Leswi a va titsongahata, Yehovha u tirhise moya wakwe lowo kwetsima leswaku wu va pfuna va twisisa ntiyiso wa Bibele lowu enteke. Kambe varhangeri va vukhongeri va Vayuda lava a va titlakusa a va pfariwe mahlo hi Sathana ni hi ku tikukumuxa ka vona.

3. Hi ta bula hi yini exihlokweni lexi?

3 A swi hlamarisi leswi Yesu a a tsakile swinene! A a tsakele ku vona ndlela leyi Yehovha a endleke leswaku ntiyiso wa Bibele lowu enteke wu tiviwa hi vanhu lava titsongahataka, ku nga khathariseki leswaku va dyondze ku fikela kwihi. Ndlela leyi yo dyondzisa ya amukeleka eka Xikwembu naswona Xikwembu a xi cincanga. Xi swi kombisa njhani leswaku ndlela leyi yo dyondzisa ya ha amukeleka eka xona? Exihlokweni lexi, hi ta dyondza hi ndlela leyi Yehovha a va tivisaka ha yona vanhu lava titsongahataka ntiyiso wa Bibele lowu enteke namuntlha.

KU HLAMUSELA NTIYISO LOWU ENTEKE EKA HINKWAVO

4. Nkandziyiso lowu olovisiweke wa Xihondzo xo Rindza i nyiko hi tindlela tihi?

4 Emalembeni lama ha ku hundzaka, nhlengeletano ya Xikwembu yi kandziyise nkoka wo dyondzisa hi ndlela yo olova ni leyi twisisekaka. A hi kambisiseni swikombiso swinharhu. Xo sungula, ku ni nkandziyiso lowu olovisiweke wa Xihondzo xo Rindza. * (Vona nhlamuselo ya le hansi.) I nyiko leyi pfuneke vanhu vo tala, ku katsa ni lava a va tikeriwa hi ku hlaya kumbe hi ririmi. Hikwalaho ka nkandziyiso lowu olovisiweke, mindyangu yi kume leswaku vana va xi twisisa ku antswa Xihondzo xo Rindza. Vanhu vo tala va tsale mapapila yo kombisa ku khensa. Makwerhu un’wana wa xisati u vule leswaku a a chava ku hlamula eka Dyondzo ya Xihondzo xo Rindza. Kambe sweswi a nga ha chavi. Endzhaku ka loko a tirhise nkandziyiso lowu olovisiweke, u tsale a ku: “Sweswi ndzi hlamula ko tala naswona a ndza ha chavi! Ndzi khensa n’wina na Yehovha.”

5. Hi tihi tindlela tin’wana leti nkandziyiso lowu pfuxetiweke wa Vuhundzuluxeri Bya Misava Leyintshwa Bya Matsalwa Yo Kwetsima wu vuyerisaka ha tona?

5 Xa vumbirhi, ku ni nkandziyiso lowu pfuxetiweke wa Vuhundzuluxeri Bya Misava Leyintshwa Bya Matsalwa Yo Kwetsima, lowu humesiweke hi Xinghezi eka nhlangano wa lembe ni lembe hi October 5, 2013. * (Vona nhlamuselo ya le hansi.) Sweswi matsalwa yo tala a ma ha tirhisi marito yo tala, kambe mongo a wu cincanga naswona swa olova ku ma twisisa. Hi xikombiso, Yobo 10:1 a yi ri ni marito ya 27 naswona ma hungutiwile ma va 19 kasi Swivuriso 8:6 a yi ri ni marito ya 20 naswona ma hungutiwile ma va 13. Tindzimana leti hatimbirhi ta twisiseka  eka nkandziyiso lowu lowuntshwa. Makwerhu un’wana wa xinuna loyi a nga mutotiwa loyi a nga ni malembe yo tala a tirhela Yehovha hi ku tshembeka u te: “Ndza ha ku hlaya buku ya Yobo eka nkandziyiso lowu lowuntshwa naswona ndzi titwa onge ndza sungula ku yi twisisa!” Vo tala va vule leswi fanaka.

6. U titwa njhani hi leswi Matewu 24:45-47 se yi twisisekaka kahle?

6 Xa vunharhu, anakanya hi ku antswisiwa kun’wana loku ka ha ku endliwaka eka ndlela leyi hi ma twisisaka ha yona matsalwa yo karhi. Hi xikombiso, nhlamuselo leyi twisisekaka kahle ya xiga lexi nge “hlonga ro tshembeka ni ro tlhariha” yi humesiwile eka Xihondzo xo Rindza xa July 15, 2013. (Matewu 24:45-47) Xihloko xexo xi hlamusele leswaku hlonga ro tshembeka ni ro tlhariha i Huvo leyi Fumaka. Naswona “va yindlu” i vatotiwa ni “tinyimpfu tin’wana,” lava hinkwavo va phameriwaka hi hlonga ro tshembeka. (Yohane 10:16) Ha tiphina hi ku dyondza ntiyiso lowu naswona hi tiyimiserile swinene ku wu dyondzisa van’wana! Hi tihi tindlela tin’wana leti Yehovha a kombiseke ha tona leswaku wa yi amukela dyondzo leyi olovaka yi tlhela yi twisiseka?

NHLAMUSELO LEYI OLOVAKA YA TIMHAKA TA LE BIBELENI

7, 8. Hi swihi swikombiso swin’wana swa timhaka ta le Bibeleni leswi a swi yimela nchumu wa nkoka lowu a wu ta endleka enkarhini lowu taka?

7 Loko u ri ni malembe yo tala u ri karhi u tirhela Yehovha, u nga ha va u ku xiyile ku cinca eka ndlela leyi minkandziyiso ya hina yi ti hlamuselaka ha yona timhaka tin’wana ta le Bibeleni. Enkarhini lowu hundzeke, a swi tolovelekile ku vula leswaku timhaka tin’wana ti yimela nchumu wa nkoka lowu nga ta endleka enkarhini lowu taka. Xana ku ni swivangelo leswi twalaka swo hlamusela timhaka ta le Bibeleni hi ndlela leyi? Ina. Hi xikombiso, Yesu u vulavule hi “singita ra Yonasi lowa muprofeta.” (Hlaya Matewu 12:39, 40.) Yesu u hlamusele leswaku nkarhi lowu Yonasi a wu heteke a ri ekhwirini ra nhlampfi a wu yimela nkarhi lowu Yesu a a ta wu heta esirheni.

Loko hi dyondza hi timhaka ta le Bibeleni ni leswi ti yimelaka swona, ripfumelo ra hina ra tiya

8 Ku ni timhaka tin’wana ta le Bibeleni leti a ti yimela nchumu wa nkoka lowu a wu ta endleka enkarhini lowu taka. Muapostola Pawulo u hlamusele to hlayanyana. Hi xikombiso, vuxaka lebyi Abrahama a a ri na byona na Agara na Sara a byi yimela vuxaka bya Yehovha ni tiko ra Israyele ni xiphemu xa le tilweni xa nhlengeletano ya Xikwembu. (Vagalatiya 4:22-26) Hilaha ku fanaka, tabernakela, tempele, Siku ro Kombela ku Rivaleriwa, muprista lonkulu ni swilo swin’wana leswi fambisanaka ni Nawu a swi ri “ndzhuti wa swilo leswinene leswi nga ta ta.” (Vaheveru 9:23-25; 10:1) Loko hi dyondza hi timhaka leti ta le Bibeleni ni leswi ti yimelaka swona, ripfumelo ra hina ra tiya. Kambe, xana sweswo swi vula leswaku munhu un’wana ni un’wana, xiendlakalo xin’wana ni xin’wana ni swilo swin’wana ni swin’wana leswi hlamuseriweke eBibeleni swi yimela munhu kumbe nchumu wo karhi?

9. Enkarhini lowu hundzeke, mhaka ya le Bibeleni ya Naboti a yi hlamuseriwa njhani?

9 Enkarhini lowu hundzeke, minkandziyiso ya hina a yi tala ku vula leswaku munhu un’wana ni un’wana, xiendlakalo xin’wana ni xin’wana  kumbe nchumu wun’wana ni wun’wana lowu nga ematsalweni man’wana a swi yimela munhu kumbe nchumu wo karhi. Hi xikombiso, Hosi ya Xisati Yezabele wo homboloka u endle leswaku Naboti a dlayiwa leswaku nuna wakwe, Akabu, a kota ku teka nsimu ya vhinya ya Naboti. (1 Tihosi 21:1-16) Hi 1932, Xihondzo xo Rindza xi hlamusele leswaku Akabu na Yezabele a va yimela Sathana ni nhlengeletano yakwe, kasi Naboti a a yimela Yesu ni leswaku rifu ra Naboti a ri yimela ku dlayiwa ka Yesu. Hambiswiritano, hi 1961, buku leyi nge, “Let Your Name Be Sanctified” yi vule leswaku Naboti a a yimela vatotiwa ni leswaku Yezabele a a yimela Vujagana. Nakambe, ku xanisiwa ka Naboti hi Yezabele a ku yimela ku xanisiwa ka vatotiwa emasikwini yo hetelela. Tinhlamuselo leti ti tiyise ripfumelo ra vanhu va Xikwembu ku ringana malembe yo tala. Kutani ha yini hi hlamusela timhaka hi ndlela leyi hambaneke sweswi?

10. (a) Hlonga ro tshembeka ri ni vuxiyaxiya swinene loko ri hlamusela timhaka to karhi ta le Bibeleni hi ndlela yihi? (b) Minkandziyiso ya hina namuntlha yi dzika ngopfu eka yini?

10 Loko malembe ma ri karhi ma famba, Yehovha u pfune “hlonga ro tshembeka ni ro tlhariha” leswaku ri tlhariha kumbe ri va ni vuxiyaxiya swinene. Hi ndlela yihi? Sweswi hlonga ro tshembeka ri vula leswaku mhaka ya le Bibeleni yi yimela nchumu wa nkoka ntsena loko ku ri ni xivangelo xa le Matsalweni xo endla tano. Tinhlamuselo tin’wana ta khale ta nchumu wa nkoka lowu nga ta endleka enkarhini lowu taka a swi tika ku ti twisisa, ku ti tsundzuka ni  ku ti tirhisa. Xa nkoka ngopfu, loko ku dzikiwa swinene eka leswi tinhlamuselo ta timhaka ta le Bibeleni a ti yimela swona, leswi swi dyondziwaka eka tona a swi nga vi erivaleni. Hikwalaho, namuntlha minkandziyiso ya hina yi dzika ngopfu eka tidyondzo to olova, leswi hi swi dyondzaka malunghana ni ripfumelo, ku tiyisela, ku tinyiketela eka Xikwembu ni timfanelo tin’wana ta nkoka leti hi nga ti dyondzaka eka timhaka ta le Bibeleni. *—Vona nhlamuselo ya le hansi.

Xikombiso xa Naboti xi hi dyondzisa dyondzo ya nkoka (Vona ndzimana 11)

11. (a) Sweswi se hi yi twisisa njhani mhaka ya Naboti naswona xikombiso xa yena xi hi pfuna njhani? (b) Emalembeni lama ha ku hundzaka, ha yini minkandziyiso ya hina a yi nga ha vulavuli ngopfu hi timhaka to karhi ta le Bibeleni tanihi leti yimelaka nchumu wo karhi wa nkoka? (Vona “Swivutiso Swa Vahlayi” enkandziyisweni lowu.)

11 Sweswi ndlela leyi mhaka ya Naboti yi hlamuseriwaka ha yona ya twisiseka naswona ya olova. Naboti a nga fanga hileswi a a yimela Yesu kumbe vatotiwa. Kambe, u fe hileswi a a tiyimisele ku tshama a tshembekile eka Xikwembu. U yingise Nawu wa Yehovha hambileswi a xanisiweke hi ndlela yo vava hi mufumi la nga ni matimba. (Tinhlayo 36:7; 1 Tihosi 21:3) U ma vekele xikombiso lexinene malandza hinkwawo ya Xikwembu namuntlha lawa ma nga ha bohekaka ku tiyisela ku xanisiwa hi ndlela leyi fanaka. (Hlaya 2 Timotiya 3:12.) Vakreste hinkwavo va nga twisisa, va tsundzuka va tlhela va tirhisa leswi va swi dyondzaka kutani va tiyisa ripfumelo ra vona.

12. (a) I yini leswi hi nga fanelangiki hi gimeta ha swona malunghana ni timhaka leti ku vulavuriwaka ha tona eBibeleni? (b) Ha yini hi kota ku kuma tinhlamuselo leti twisisekaka ta swilo leswi enteke? (Vona nhlamuselo ya le hansi.)

12 Xana hi fanele hi gimeta hi leswaku eka timhaka leti ku vulavuriwaka ha tona eBibeleni ko va ni leswi hi swi dyondzaka ntsena naswona a ku na nhlamuselo yin’wana? Doo! Kambe ematshan’weni yo hlamusela timhaka tin’wana ta le Bibeleni tanihi leti yimelaka nchumu wo karhi wa nkoka, minkandziyiso ya hina sweswi yi dzika ngopfu eka ndlela leyi mhaka yo karhi ya le Bibeleni yi fambisanaka ha yona ni yin’wana. Hi xikombiso, ku tshembeka ka Naboti ku nga khathariseki ku xanisiwa ni ku dlayiwa ka yena ku hi tsundzuxa hi ku tshembeka ka Kreste ni vatotiwa. Hambiswiritano, ku tlhela ku hi tsundzuxa hi ku tshembeka ka “tinyimpfu tin’wana” to tala. Hi yi vona kahle ndlela yo olova leyi Yehovha a hi dyondzisaka ha yona. *—Vona nhlamuselo ya le hansi.

NHLAMUSELO LEYI OLOVAKA YA SWIFANISO SWA YESU

13. Hi swihi swikombiso leswi kombisaka leswaku sweswi swifaniso swin’wana swa Yesu hi swi hlamusela hi ndlela yo olova ni leyi twisisekaka?

13 Yesu Kreste a a ri Mudyondzisi lonkulu  loyi a tshameke a hanya. A a rhandza ku tirhisa swifaniso kumbe swikombiso loko a dyondzisa. (Matewu 13:34) Swifaniso swa pfuna hikuva swi hlamusela mhaka yo tika hi ndlela yo olova leyi nga hi endlaka hi anakanyisisa naswona swi nga khumba timbilu ta hina. Minkandziyiso ya hina yi hlamusele swifaniso swa Yesu hi ndlela yo olova ni leyi twisisekaka. Hi xikombiso, Xihondzo xo Rindza xa July 15, 2008, xi hi pfune ku xi twisisa kahle xifaniso xa Yesu xa comela, xa ndzoho ya sinapi ni xa rikoka. Sweswi ha swi tiva leswaku swifaniso leswi swi vulavula hi Mfumo wa Xikwembu, lowu pfuneke vanhu vo tala ku fularhela misava leyi yo homboloka kutani va va vadyondzisiwa va Kreste.

Swifaniso swa pfuna hikuva swi hlamusela mhaka yo tika hi ndlela yo olova leyi nga hi endlaka hi anakanyisisa naswona swi nga khumba timbilu ta hina

14. (a) A hi xi hlamusela njhani xifaniso xa Musamariya wa musa? (b) Hi xi twisisa njhani xifaniso xexo xa Yesu sweswi?

14 Hi nga byi twisisa njhani vuxokoxoko bya mhaka yo karhi kumbe bya swifaniso leswi Yesu a vulavuleke ha swona? Tin’wana ta timhaka toleto ti yimela swo karhi kumbe i vuprofeta. Tin’wana ta dyondzisa. Kambe hi nga swi tiva njhani leswaku hi tihi leti yimelaka mhaka yo karhi ni leti nga yimeliki nchumu? Loko malembe ma ri karhi ma famba, nhlamulo yi ve erivaleni. Hi xikombiso, anakanya hi ndlela leyi a hi xi hlamusela ha yona xifaniso xa Yesu xa Musamariya wa musa. (Luka 10:30-37) Hi 1924, Xihondzo xo Rindza xi vule leswaku Musamariya a a yimela Yesu ni leswaku gondzo leri rhelelaka ku suka eYerusalema ri ya eYeriko a ri yimela xiyimo lexi nyanyeke ku biha xa vanhu ku sukela loko ku ve ni ku xandzuka ka le Edeni. Naswona swigevenga leswi a swi ri egondzweni a swi yimela mabindzu lamakulu ni van’wamabindzu va makwanga ni leswaku muprista ni Mulevhi a va yimela Vujagana. Kambe namuntlha, minkandziyiso ya hina yi tirhisa xifaniso xexo ku tsundzuxa Vakreste hinkwavo leswaku va nga vi ni xihlawuhlawu. Hi fanele hi pfuna hinkwavo lava pfumalaka, ngopfungopfu hi ku va pfuna va dyondza ntiyiso malunghana ni Xikwembu. Swa hi tsakisa ku vona ndlela leyi Yehovha a endlaka ntiyiso wu twisiseka ha yona.

15. Hi ta bula hi yini exihlokweni lexi landzelaka?

15 Exihlokweni xa hina lexi landzelaka hi ta bula hi xifaniso xa Yesu xa vanhwana va khume. (Matewu 25:1-13) Yesu a a lava leswaku valandzeri vakwe va le masikwini yo hetelela va xi twisisa njhani xifaniso xexo lexi nga ni matimba? Xana munhu un’wana ni un’wana, nchumu wun’wana ni wun’wana kumbe xiendlakalo xin’wana ni xin’wana swa le xifanisweni xexo swi yimela munhu wo karhi kumbe nchumu wo karhi wa nkoka lowu nga ta endleka enkarhini lowu taka? Kumbe xana a a lava hi dyondza swo karhi leswi a swi ta hi pfuna emasikwini lawa yo hetelela? A hi voneni.

^ ndzim. 4 Nkandziyiso lowu olovisiweke wu sungule ku kumeka hi Xinghezi hi July 2011. Ku sukela hi nkarhi wolowo, nkandziyiso lowu olovisiweke se wu kumeka hi tindzimi tin’wana to hlayanyana.

^ ndzim. 5 Nkandziyiso lowu pfuxetiweke wu ta kumeka ni hi tindzimi tin’wana.

^ ndzim. 10 Hi xikombiso, buku leyi nge Tekelela Ripfumelo Ra Vona yi vulavula hi vanhu va le Bibeleni va 14. Buku leyi yi vulavula ngopfu hi leswi ku dyondziwaka swona, ku nga ri leswi vanhu volavo va yimelaka swona.

^ ndzim. 12 Rito ra Xikwembu ri tlhela ri va ni swilo leswi nga ha vonakaka swi “[nonon’hwa] ku swi twisisa,” ku katsa ni swiphemu swin’wana leswi tsariweke hi Pawulo. Hambiswiritano, vatsari hinkwavo va Bibele a va huhuteriwe hi moya lowo kwetsima. Moya wa Xikwembu wu pfuna Vakreste va ntiyiso namuntlha leswaku va twisisa Bibele, ku katsa ni “swilo leswi enteke swa Xikwembu.”—2 Petro 3:16, 17; 1 Vakorinto 2:10.