Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) DECEMBER 2014

A A “Yi Tiva Ndlela”

A A “Yi Tiva Ndlela”

GUY HOLLIS PIERCE, loyi a a ri xirho xa Huvo leyi Fumaka ya Timbhoni ta Yehovha, u hete pfhumba rakwe ra laha misaveni hi Ravumbirhi hi March 18, 2014. A a ri ni malembe ya 79 loko a pfuxiwa tanihi makwavo wa Kreste kutani a kuma hakelo yakwe ya le tilweni.—Hev. 2:10-12; 1 Pet. 3:18.

Guy Pierce u velekiwe le Auburn, eCalifornia, le U.S.A., hi November 6, 1934, naswona u khuvuriwe hi 1955. Hi 1977, u tekane ni nsati wakwe Penny loyi a a n’wi rhandza kutani va va ni ndyangu. Ku va ni ndyangu swi n’wi pfune leswaku a kota ku khoma vanhu van’wana tanihi tata wa vona. Hi 1982 yena na Penny va sungule ku phayona naswona hi 1986 u ve mulanguteri wa muganga le United States laha a heteke malembe ya 11 a endla ntirho wolowo.

Hi 1997, Guy na Penny Pierce va ve swirho swa ndyangu wa Bethele ya le United States. Makwerhu Pierce u fike a tirha eka Ndzawulo ya Ntirho naswona hi 1998 u hlawuriwe leswaku a pfuneta eka Komiti yo Khathalela Vatirhi ya Huvo leyi Fumaka. Hi October 2, 1999, eka nhlangano wa lembe ni lembe wa Watch Tower Bible and Tract Society of Pennsylvania ku tivisiwe leswaku Makwerhu Pierce i xirho xa Huvo leyi Fumaka. Emalembeni lama hundzeke, u tirhe ni Komiti yo Khathalela Vatirhi, ya Vatsari, ya Vukandziyisi ni ya Vahlanganisi.

Lexi a xi endla leswaku vanhu va swiyimo ni va mindhavuko yo hambana-hambana va rhandza Makwerhu Pierce a ku ri ku n’wayitela ka yena swi huma embilwini ni ku va ni misavu. Hambiswiritano, timfanelo leti a ti endla leswaku vanhu va n’wi rhandza ngopfu a ku ri rirhandzu ra yena, ku titsongahata ka yena, ku xixima ka yena milawu yo lulama ni ku va ni ripfumelo leri heleleke eka Yehovha. Guy Pierce a a tiyiseka leswaku switshembiso swa Yehovha swi ta hetiseka tanihi leswi hi tiyisekaka leswaku dyambu ri ta huma, naswona a a lava leswaku misava hinkwayo yi swi tiva sweswo.

Makwerhu Pierce a a tirhela Yehovha hi matimba, a pfuka ka ha ri mixo swinene naswona minkarhi yo tala a a tirha ku kala ku va vusiku ngopfu. U ye ematikweni yo hambana-hambana leswaku a ya khutaza vamakwavo lava nga Vakreste naswona a a tinyika nkarhi wo burisana ni swirho swo hambana-hambana swa ndyangu wa Bethele ni van’wana lava a va lava ku va ni vunakulobye na yena, va lava xitsundzuxo ni mpfuno. Hambiloko ku hundze malembe yo tala, vapfumeri-kulobye va ha ma tsundzuka malwandla ya yena, xinghana xa yena ni xikhutazo lexi humaka eMatsalweni.

Makwerhu tlhelo munghana wa hina la rhandzekaka u siye nsati ni vana va tsevu swin’we ni vatukulu ni vatukulu-xinguwe. Nakambe a a ri ni vana vo tala swinene va moya. Nkulumo ya xilahlo ya Makwerhu Pierce yi nyikeriwe eBethele ya le Brooklyn hi Mugqivela hi March 22, 2014, hi Mark Sanderson, loyi na yena a nga xirho xa Huvo leyi Fumaka. U vulavule hi ntshembo wa Makwerhu Pierce wo ya hanya etilweni kutani a hlaya marito ya Yesu lama nge: “Endlwini ya Tatana ku ni vutshamo byo tala. . . . Loko ndzi ya mi lunghisela ndhawu, ndzi ta tlhela ndzi vuya kutani ndzi ta mi amukela ekaya mi va na mina, leswaku laha ndzi nga kona na n’wina mi va kona. Naswona ma yi tiva ndlela ya laha ndzi yaka kona.”—Yoh. 14:2-4.

Hi ta n’wi tsundzuka swinene Makwerhu Pierce. Kambe ha tsaka leswi a a “yi tiva ndlela” yo ya ‘evutshan’weni’ bya yena bya hilaha ku nga heriki.