Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) OCTOBER 2014

Va Tinyikele Hi Ku Tirhandzela Le Taiwan

Va Tinyikele Hi Ku Tirhandzela Le Taiwan

KWALOMU ka malembe ya ntlhanu lama hundzeke, Choong Keon na Julie, vatekani lava sweswi va nga le xikarhi ka malembe ya va-30, a va ri maphayona ya nkarhi hinkwawo eSydney, le Australia. Choong Keon u ri: “A hi ri ni ntirho wo tihanyisa wa nkarhinyana naswona a hi hanya emafurheni. Laha a hi tshama kona, maxelo ya kona a ma ri manene naswona a hi hanya vutomi bya vulovolovo. A hi swi tsakela ku va ekusuhi ni mindyangu ya ka hina swin’we ni vanghana va hina.” Hambiswiritano, Choong Keon na Julie a va kingindziwa hi ripfalo. Ha yini? A va swi tiva leswaku swiyimo swa vona a swi va pfumelela ku endla leswi engetelekeke entirhweni wa Yehovha, kambe a va kanakana ku endla tano.

Kutani enhlengeletanweni ya xifundzha hi 2009, va twe nkulumo leyi khumbeke timbilu ta vona. Xivulavuri xi kongomise marito ya xona eka lava nga endlaka leswi engetelekeke entirhweni wa nsimu. Xi te: “Anakanya hi mhaka leyi: Muchayeri a nga endla leswaku movha wakwe wu jikela exineneni kumbe eximatsini ntsena loko wu ri eku fambeni. Hilaha ku fanaka, Yesu u ta hi kongomisa leswaku hi ndlandlamuxa ntirho wa hina wo chumayela loko ntsena hi tiyimisele ku fikelela pakani ya hina.” * Mpatswa lowu wu twe onge xivulavuri a xi vulavula na wona hi ku kongoma. Enhlengeletanweni yoleyo, ku vulavurisaniwe ni mpatswa lowu nga varhumiwa le Taiwan. Wu vulavule hi ntsako lowu wu wu kumaka ensin’wini wu tlhela wu kandziyisa leswaku ka ha laveka vatirhi lava engetelekeke. Nakambe, Choong Keon na Julie va tlhele va vona onge marito wolawo a ma kongomisiwe eka vona.

Julie u ri: “Endzhaku ka nhlengeletano yoleyo, hi khongele eka Yehovha leswaku a hi nyika xivindzi xo teka goza ro rhurhela eTaiwan.” U tlhele a ku: “Kambe a hi khomiwe hi rhumbyana. A hi kanakana.” Tsalwa leri va pfuneke leswaku va teka goza i Eklesiasta 11:4, leyi nge: “Loyi a langutaka mheho a nge byali mbewu; naswona loyi a langutaka mapapa a nge tshoveli.” Choong Keon u ri: “Hi endle xiboho xo tshika ku ‘languta’ kutani hi sungula ku ‘byala ni ku tshovela.’” Va khongele hi ku phindha-phindha—va hlaya timhaka ta vutomi ta varhumiwa, va rhumela va tlhela va amukela ti-email to tala leti humaka eka vanhu lava se a va rhurhele eTaiwan, kutani va xavisa timovha ni nhundzu ya vona ivi endzhaku ka tin’hweti tinharhu va rhurhela eTaiwan.

 KU KUMA NTSAKO HIKWALAHO KO CHUMAYELA

Vamakwerhu va xinuna ni va xisati vo tlula 100 vo huma ematikweni yo hambana-hambana, sweswi va chumayela eTaiwan etindhawini leti ku nga ni xilaveko lexikulu xa vahuweleri va Mfumo. Va huma eAustralia, eBritain, eCanada, eFurwa, eJapani, eKorea, eSpain ni le United States naswona va ni malembe lama sukelaka eka 21 ku ya eka 73. Exikarhi ka vona ku ni vamakwerhu va xisati vo tlula 50 lava nga tekiwangiki. I yini lexi pfuneke vamakwerhu lava va xinuna ni va xisati lava hisekaka leswaku va ya chumayela etikweni rimbe? A hi voneni.

Laura

Laura, makwerhu wa xisati wa le Canada loyi a nga tekiwangiki, u phayona evupela-dyambu bya Taiwan. Kwalomu ka malembe ya khume lama hundzeke a a nga wu rhandzi ntirho wo chumayela. Laura u ri: “A ndzo ya ensin’wini leswaku ndzi tisusa nandzu.” Kutani vanghana va yena va le Canada va n’wi kombele leswaku a famba na vona eMexico leswaku a ya chumayela na vona ku ringana n’hweti. U te: “A ku ri ro sungula ndzi tirha nkarhi wo leha ensin’wini naswona lexi ndzi hlamariseke a swi tsakisa!”

Ntokoto wolowo wo tsakisa wu susumetele Laura ku anakanya hi ku rhurhela evandlheni leri tirhisaka ririmi rimbe le Canada. U tsarise eka tlilasi yo dyondza Xichayina, a tirha ni ntlawa lowu vulavulaka Xichayina ivi a tivekela pakani yo rhurhela eTaiwan, leyi a yi fikeleleke hi September 2008. Laura u ri: “Swi ndzi tekele lembe ku tolovela ndhawu leyintshwa leyi ndzi rhurheleke eka yona, kambe sweswi a ndzi anakanyi hi ku tlhelela eCanada.” U titwa njhani hi ntirho wo chumayela? U ri: “Ndza wu tsakela swinene sweswi. A wu kona nchumu lowu enerisaka swinene ku tlula ku vona ndlela leyi swichudeni swa Bibele swi cincaka vutomi bya swona ha yona loko swi sungula ku tiva Yehovha. Ku chumayela eTaiwan swi endle leswaku ndzi kuma ntsako lowukulu swinene.”

NDLELA YO LANGUTANA NI KU KA U NGA RI TIVI KAHLE RIRIMI

Brian na Michelle

Brian na Michelle, mpatswa lowu humaka eUnited States lowu nga ni malembe ya le xikarhi ka va-30, wu rhurhele eTaiwan malembe ya kwalomu ka nhungu lama hundzeke. Eku sunguleni a wu titwa onge ntirho wa wona ensin’wini a wu nga ri wa nkoka. Kambe murhumiwa  loyi a nga ni ntokoto u te: “Hambiloko mo nyika munhu xiphephana, mi fanele mi tsundzuka leswaku swi nga ha endleka ku ri ro sungula munhu yoloye a twa rungula leri vulavulaka hi Yehovha. Kutani mi ta va se mi chumayele rungula ra nkoka!” Marito wolawo lama khutazaka ma pfune Brian na Michelle swinene leswaku va nga heli matimba. Makwerhu un’wana u te: “Leswaku mi papalata ku nga heli matimba, mi fanele mi kambela nhluvuko wa n’wina wo dyondza Xichayina, ku nga ri siku ni siku, kambe endzhaku ka nhlengeletano yin’wana ni yin’wana.” Va endle nhluvuko hakunene naswona namuntlha i maphayona lama nga ni vuswikoti.

I yini lexi nga ha ku susumetelaka ku dyondza ririmi rimbe? Ringeta ku endzela tiko leri u tsakelaka ku ya chumayela eka rona. Yana eminhlanganweni ya kona, tihlanganise ni vamakwerhu va xinuna ni va xisati va kwalaho u tlhela u famba na vona entirhweni wo chumayela. Brian u ri: “Endzhaku ka loko u xiye ndlela leyi vo tala va amukelaka rungula ra Mfumo ha yona naswona u vone rirhandzu leri vamakwerhu va xinuna ni va xisati va nga na rona, u ta susumeteleka ku ya chumayela etikweni rimbe.”

KU VURIWA YINI HI NTIRHO WO TIHANYISA?

Kristin na Michelle

Vanhu vo tala lava rhurheleke laha ku nga ni xilaveko lexikulu le Taiwan a va dyondzisa vanhu Xinghezi leswaku va ta kota ku tihanyisa tanihi maphayona. Kristin na Michelle va xavisa tinhlampfi leti vuriwaka n’wenga. Kristin u ri: “A ndzi nga si tshama ndzi xavisa, kambe ntirho wa muxaka lowu wu ndzi pfuna leswaku ndzi kota ku tshama laha tikweni.” Hi ku famba ka nkarhi, Kristin u kume vanhu lava a va xava nkarhi na nkarhi. Ntirho lowu wa nkarhinyana wu pfunile leswaku yena ni nsati wakwe va kota ku tihanyisa naswona wu endla leswaku va va ni nkarhi lowu eneleke wo endla ntirho wa vona wa nkoka, ku nga ntirho wa ku phayona, va phasa vanhu.

“TSAKELA NTIRHO WA WENA WA NSIMU”

William na Jennifer, mpatswa lowu humaka eUnited States, wu ye eTaiwan kwalomu ka malembe ya nkombo lama hundzeke. William u ri: “Ku dyondza ririmi, ku phayona, ku langutela vandlha ni ku kuma mali leyi ringaneke yo wundla ndyangu minkarhi yin’wana a swi karharisa.” I yini leswi va pfuneke leswaku swilo swi va fambela kahle ni ku tshama va tsakile? Va ringeta ku tivekela tipakani leti fikelelekaka. Hi xikombiso, leswi a va nga languteli swilo swa le henhla loko va ri karhi va dyondza Xichayina, a va helanga matimba ngopfu loko swi teka nkarhi ku endla nhluvuko.

William na Jennifer

William u tsundzuka leswi mulanguteri un’wana wa muganga a tshameke a n’wi byela swona, a ku: “Tsakela ntirho wa wena wa nsimu, ku nga ri ndhawu leyi u rhumeriweke eka yona ntsena.” Hi marito man’wana, endzhaku ka loko hi tivekele pakani ya moya, hi fanele hi tsaka hikwalaho ka magoza lawa hi ma tekeke lama nga ta endla leswaku hi fikelela pakani ya hina. William u vula leswaku ku yingisa ndzayo yoleyo swi pfune yena ni nsati wakwe leswaku va pfumelelana ni swiyimo, va yingisa ndzayo ya vamakwerhu lava nga ni vutihlamuleri va kwalaho ni ku antswisa ndlela leyi va endlaka swilo ha yona leswaku swilo swi ta va fambela kahle entirhweni wa vona wo chumayela etikweni rin’wana. U tlhele a ku: “Swi tlhele swi hi pfuna leswaku hi nga rivali ku tinyika nkarhi wo tiphina hi ku hlalela ku saseka ka xihlala lexi hi chumayelaka eka xona.”

Ku fana na William na Jennifer, Megan, makwerhu wa xisati la nga tekiwangiki wa le United States u ‘tsakela ntirho wakwe wa nsimu’ a ri karhi a ringeta ku fikelela pakani yakwe yo xi vulavula kahle Xichayina. Hi mahelo-vhiki man’wana ni man’wana u famba ni ntlawa wa vahuweleri lava chumayelaka ensin’wini leyi tsakisaka, ku nga hlaluko ra Kaohsiung, leri nga rona lerikulu le Taiwan. Megan u kote ku chumayela mahungu lamanene eswikepeni swo hambana-hambana ni le ka vaphasi va tinhlampfi vo huma eBangladesh, eIndiya, eIndonesia, ePhilippines, eThailand ni le Vanuatu. “Leswi vaphasi va tinhlampfi va vaka ehlalukweni swa xinkarhana, loko hi bula na vona hi namba hi sungula dyondzo ya Bibele. Leswaku ndzi kota ku dyondza na vona hinkwavo, hakanyingi ndzi dyondza ni vanhu va mune kumbe va ntlhanu hi nkarhi wun’we.” Xana ku dyondza ka yena Xichayina  ku famba njhani? U ri: “Ndzi navela onge ndzi nga dyondza hi ku hatlisa, kambe ndzi tshama ndzi ri karhi ndzi anakanya hi leswi makwerhu un’wana a tshameke a ndzi byela swona, a ku: ‘Endla leswi u nga swi kotaka kutani Yehovha u ta ku pfuna leswaku u kota ku endla ntirho wa wena wo chumayela.’”

Megan

VAMAKWERHU VA XISATI LAVA NGA TEKIWANGIKI LAVA PHAYONAKA EMATIKWENI MAN’WANA

Loko Cathy wa le Britain, a nga si rhurhela etikweni rin’wana, u endle ndzavisiso hi tiko leri makwerhu wa xisati la nga tekiwangiki a nga chumayelaka eka rona a sirhelelekile. U khongele eka Yehovha a n’wi phofulela leswi a swi n’wi karhata a tlhela a tsalela marhavi yo hlayanyana mapapila, a vutisa hi makhombo lama nga ha vaka kona eka vamakwerhu va xisati lava nga tekiwangiki. Endzhaku ka sweswo, u ti hlaye hi vukheta tinhlamulo ta mapapila yakwe kutani a hlawula ku rhurhela eTaiwan.

Cathy u rhurhele eTaiwan hi 2004, a ri ni malembe ya 31, laha a hanyaka vutomi byo olova swinene. Wa hlamusela: “Ndzi vutise vamakwerhu va xinuna ni va xisati hi tindhawu letinene to xava mihandzu ni matsavu hi mali ya le hansi. Xitsundzuxo xa vona lexinene xi ndzi pfunile leswaku ndzi hlayisa mali.” I yini leswi n’wi pfunaka leswaku a hanya vutomi byo olova? Cathy u ri: “Hakanyingi ndzi khongela eka Yehovha leswaku a ndzi pfuna ndzi eneriseka hi swakudya swo olova leswi ndzi swi dyaka ni swiambalo leswi nga durhiki leswi ndzi swi ambalaka. Ndza swi vona leswaku Yehovha u hlamula swikhongelo swa mina hi ku ndzi dyondzisa ku tiva swilo leswi ndzi swi pfumalaka, a tlhela a ndzi pfuna leswaku ndzi eneriseka hambiloko ka ha ri ni swilo leswi ndzi swi lavaka.” U tlhela a ku: “Ndza tiphina hi ku hanya vutomi byo olova hikuva swi ndzi pfuna leswaku ndzi dzikisa mianakanyo ya mina eka swilo swa moya.”

Cathy

Vutomi bya Cathy bya olova byi tlhela byi tsakisa. Loko a hlamusela xivangelo xa kona u ri: “Ndzi kota ku chumayela endhawini leyi vanhu vo tala va amukelaka mahungu lamanene. Sweswo swa tsakisa hakunene!” Loko a fika eTaiwan, a ku ri ni mavandlha mambirhi ya Xichayina edorobeni leri a sunguleke ku phayona eka rona, kambe namuntlha ku ni mavandlha ya nkombo. Cathy u ri: “Loko ndzi vona ku andza loku loku hlamarisaka ndzi tlhela ndzi hlanganyela entshovelweni swi endla leswaku vutomi bya mina byi tsakisa!”

“A VA WU LAVA NI MPFUNO WA MINA!”

Swilo swi n’wi fambele njhani Choong Keon na Julie lava boxiweke eku sunguleni? Eku sunguleni Choong Keon a a vona onge leswi a a nga xi tivi kahle Xichayina a a nga pfuni ngopfu evandlheni. Kambe vamakwerhu va kwalaho a va titwa hi ndlela leyi hambaneke. Choong Keon u ri: “Loko vandlha ra hina ri hambanisiwe ri va mavandlha mambirhi, ndzi nyikiwe vutihlamuleri lebyi engetelekeke tanihi leswi a ndzi ri nandza wa vutirheli.” U vulavula a ri karhi a n’wayitela a ku: “Hi nkarhi wolowo, a ndzi titwa leswaku hakunene ndzi tirha endhawini leyi a yi ri ni xilaveko lexikulu. A xi ri xikulu lerova a va wu lava ni mpfuno wa mina!” Namuntlha i nkulu. Julie yena u ri: “Hi titwa hi hetisise swo karhi, hi enerisekile hi tlhela hi va ni ntsako lowu hi nga si tshamaka hi va na wona. Hi te laha leswaku hi ta pfuna, kambe hi titwa hi pfunekile hi ntokoto lowu wo tsakisa. Hi nkhensa Yehovha leswi a hi pfumeleleke leswaku hi ta tirha laha!”

Ematikweni yo tala, ka ha ri ni xilaveko xa vatirhi lava engetelekeke entshovelweni wa moya. Xana u le kusuhi ni ku heta xikolo naswona wa tivutisa leswaku u ta endla yini hi vutomi bya wena? Xana a wu byi nghenelanga vukati naswona u navela ku tirhisiwa swinene enhlengeletanweni ya Yehovha? Xana u nga swi tsakela leswaku ndyangu wa wena wu va ni swo tala swo swi tsundzuka entirhweni wa Yehovha? Xana u hume penceni naswona u ni ntokoto wa nkoka lowu u nga wu avelaka van’wana? U nga tiyiseka leswaku u ta kuma mikateko yo tala loko wo endla leswi engetelekeke entirhweni wa wena wa nsimu, hi ku ya chumayela laha ku nga ni xilaveko lexikulu xa vahuweleri va Mfumo.

^ ndzim. 3 Vona buku leyi nge, Chumayela Mfumo Wa Xikwembu Hi Rixaladza’ ndzima 16, tindzimana 5-6.