Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) OCTOBER 2014

Tlangela Lunghelo Ra Wena Ro Tirha Na Yehovha!

Tlangela Lunghelo Ra Wena Ro Tirha Na Yehovha!

“Hina hi vatirhi-kulobye ni Xikwembu.”1 KOR. 3:9.

1. Yehovha u titwa njhani hi ntirho, naswona sweswo swi n’wi susumetela ku endla yini?

YEHOVHA i mutirhi loyi a tsakelaka ntirho wa yena. (Ps. 135:6; Yoh. 5:17) U lava leswaku tintsumi ni vanhu va tiphina hi ntirho wa vona, hikwalaho u va nyike ntirho lowu tsakisaka wu tlhela wu enerisa. Hi xikombiso, u tirhe swin’we ni N’wana wa yena wa mativula entirhweni wa Yena wo tumbuluxa. (Hlaya Vakolosa 1:15, 16.) Bibele yi hi byela leswaku loko Yesu a nga si ta laha misaveni, a a ri etlhelo ka Xikwembu etilweni a ri “mutirhi la nga ni vuswikoti.”—Swiv. 8:30.

2. I yini leswi kombisaka leswaku minkarhi hinkwayo tintsumi a ti nyikiwa ntirho wa nkoka ni lowu enerisaka?

2 Ku sukela eku sunguleni ka yona ku ya emakumu, Bibele yi ni swikombiso leswi kombisaka leswaku minkarhi hinkwayo Yehovha u nyike tintsumi ta yena ntirho. Endzhaku ka loko Adamu na Evha va dyohile ivi va hlongoriwa ekaya ra vona leri a ri ri Paradeyisi, Xikwembu xi “[veke] evuxeni bya ntanga wa Edeni makerubu ni banga leri pfurhaka malangavi, leri a ri tshama ri ndziwika leswaku ri rindza ndlela leyi yaka emurhini wa vutomi.” (Gen. 3:24) Naswona Nhlavutelo 22:6 yi vula leswaku Yehovha “u rhume ntsumi ya yena ku komba mahlonga ya yena swilo leswi faneleke ku endleka hi ku hatlisa.”

 KU VURIWA YINI HI VANHU?

3. Yesu u xi landzele njhani xikombiso xa Tata wa yena loko a ha ri laha misaveni?

3 Loko Yesu a ha ri laha misaveni a ri munhu la hetisekeke, u wu endle hi ntsako ntirho lowu Yehovha a a n’wi nyike leswaku a wu endla. U tekelele xikombiso xa Tata wa yena hi ku nyika vadyondzisiwa vakwe ntirho wa nkoka. U va endle va xi langutela hi mahlo-ngati xiavelo lexi a va nyikeke xona hi ku va byela marito lawa: “Hakunene ndzi tiyisile ndzi ri eka n’wina, Loyi a kombisaka ripfumelo eka mina, na yena u ta endla mintirho leyi ndzi yi endlaka; naswona u ta endla mintirho leyikulu ku tlula leyi, hikuva ndza famba ndzi ya eka Tatana.” (Yoh. 14:12) Leswaku Yesu a kombisa leswaku ntirho lowu a wu ri wa xihatla, u te: “Hi fanele ku endla mintirho ya loyi a ndzi rhumeke ka ha ri nhlikanhi; vusiku bya ta laha ku nga riki na munhu loyi a nga endlaka ntirho.”—Yoh. 9:4.

4-6. (a) Ha yini hi fanele hi tsaka hi leswi Nowa na Muxe va endleke ntirho lowu Yehovha a va nyikeke wona? (b) Hi swihi swilo swimbirhi leswi endlekaka loko vanhu va endla ntirho lowu Xikwembu xi va nyikeke wona?

4 Vanhu va nyikiwe ntirho lowu enerisaka ni le mahlweni ka ku va Yesu a ta laha misaveni. Hambileswi Adamu na Evha va tsandzekeke ku endla ntirho lowu a va nyikiwe wona, vanhu van’wana va swi endlile leswi Xikwembu xi va kombeleke leswaku va swi endla. (Gen. 1:28) Nowa a a nyikiwe swileriso swo karhi malunghana ni ndlela leyi a a fanele a yi aka ha yona ngalava leswaku yena ni ndyangu wa yena va ta pona Ndhambi leyikulu. U swi endle hinkwaswo leswi Yehovha a n’wi leriseke leswaku a swi endla. Hi kona namuntlha hikwalaho ka leswi a yingiseke swileriso swa Yehovha hinkwaswo.—Gen. 6:14-16, 22; 2 Pet. 2:5.

5 Muxe u swi landzele hinkwaswo swileriso leswi a nyikiweke swona swa leswaku a aka tabernakela a tlhela a veka vaprista. (Eks. 39:32; 40:12-16) Ninamuntlha, ha vuyeriwa hileswi a hetisiseke xiavelo xolexo hi ku tshembeka. Hi vuyeriwa njhani? Muapostola Pawulo u hlamusele leswaku swilo swoleswo leswi fambisanaka ni Nawu, ku nga tabernakela ni vaprista, a swi fanekisela “swilo leswinene leswi nga ta ta.”—Hev. 9:1-5, 9; 10:1.

6 Loko xikongomelo xa Xikwembu xi ri karhi xi hetiseka, ntirho lowu xi wu nyikaka malandza ya xona nkarhi na nkarhi wa hambana. Nilokoswiritano, ntirho lowu ma nyikiweke wona minkarhi hinkwayo wu yisa ku dzuneka eka Yehovha wu tlhela wu vuyerisa vanhu van’wana. Sweswo swi ve tano eka ntirho lowu Yesu a wu endleke loko a nga si ta laha misaveni ni loko se a ri laha misaveni. (Yoh. 4:34; 17:4) Hilaha ku fanaka, ntirho lowu hi nyikiweke wona namuntlha wu yisa ku dzuneka eka Yehovha. (Mat. 5:16; hlaya 1 Vakorinto 15:58.) Ha yini hi vula tano?

KU TSHAMA HI RI NI LANGUTELO LERINENE HI NTIRHO

7, 8. (a) Hlamusela ntirho lowu Vakreste va nga ni lunghelo ro wu endla namuntlha. (b) Hi fanele hi wu teka njhani nkongomiso wa Yehovha?

7 I lunghelo leswi Yehovha a rhambeke vanhu lava nga hetisekangiki leswaku va va vatirhi-kulobye na yena. (1 Kor. 3:9) Lava hlanganyelaka eku akeni ka Tiholo ta Tinhlengeletano, Tiholo ta Mfumo ni miako ya marhavi va hlanganyela eku akeni ka miako ya xiviri, hilaha Nowa na Muxe va endleke hakona. Ku nga khathariseki leswaku u pfuneta eku lunghisiweni ka Holo ya Mfumo ya le ndhawini ya ka n’wina kumbe eku akeni ka ntsindza wa hina wa misava hinkwayo le Warwick, eNew York, ri teke ri ri ra nkoka lunghelo ra wena ro endla ntirho wolowo. (Vona xifaniso lexi mpfampfarhutiweke lexi nga eku sunguleni ka xihloko lexi.) I ntirho wo kwetsima. Hambiswiritano, Vakreste hinkwavo va rhambiwa leswaku va hlanganyela entirhweni wo aka hi tlhelo ra moya. Ntirho wolowo na wona wu yisa ku dzuneka eka Yehovha naswona wu vuyerisa vanhu lava yingisaka. (Mint. 13:47-49) Nkongomiso lowu faneleke wo endla ntirho wolowo hi ndlela leyinene wu kumeka enhlengeletanweni ya Xikwembu. Minkarhi yin’wana sweswo swi nga ha vula leswaku hi ta nyikiwa swiavelo leswintshwa.

8 Minkarhi hinkwayo malandza yo tshembeka ya Yehovha ma tiyimisele ku yingisa nkongomiso  wa yena. (Hlaya Vaheveru 13:7, 17.) Swi nga ha endleka hi nga swi twisisi swivangelo leswi endleke leswaku hi nyikiwa xiavelo lexintshwa. Nilokoswiritano, hi byi tiva kahle vuyelo lebyinene bya ku tirhisana na Yehovha eka mindzulamiso yihi na yihi leyi a vonaka swi fanerile leswaku a yi endla.

9. Hi xihi xikombiso lexinene lexi vakulu va xi vekelaka vandlha?

9 Ndlela leyi vakulu va rhangelaka ha yona evandlheni yi kombisa leswaku va swi navela hi mbilu hinkwayo ku endla ku rhandza ka Yehovha. (2 Kor. 1:24; 1 Tes. 5:12, 13) Va swi kombisa leswaku va tiyimiserile ku tirha hi matimba ni ku fambisana ni swiyimo leswi cinca-cincaka. Va hatla va dyondza tindlela letintshwa leti ntirho wa hina wo chumayela hi Mfumo wa Xikwembu lowu se wu fumaka wu faneleke wu endliwa ha tona. Hambileswi van’wana swi nga ha endlekaka a va kanakana ku hlela ntirho wo chumayela hi riqingho, ku chumayela emahlalukweni kumbe ku chumayela etindhawini ta mani na mani, va hatle va vona vuyelo bya kona lebyinene. Hi xikombiso, maphayona ya mune ya le Jarimani ma ye ma ya tirha nsimu leyi nga ni mabindzu leyi a yi ri ni nkarhi wo leha yi nga tirhiwi. Michael u ri: “Se a hi ri ni malembe yo hlayanyana hi nga si chumayela hi ndlela leyi, hikwalaho a hi chuhile. Yehovha u fanele a swi xiyile leswi hikuva u endle leswaku hi wu tsakela swinene ntirho wo chumayela mixo wolowo. A hi tsake swinene leswi hi landzeleke nkongomiso lowu a wu kumeka eka Vutirheli Bya Hina Bya Mfumo hi tlhela hi titshega hi Yehovha leswaku a hi seketela.” Xana u tiyimiserile ku ringeta tindlela letintshwa to chumayela ensin’wini ya ka n’wina?

10. Hi kwihi ku cinca loku endliweke enhlengeletanweni emalembeni ya sweswinyana?

10 Minkarhi yin’wana ku endliwa ku cinca enhlengeletanweni. Emalembeni ya sweswinyana, marhavi man’wana lamatsongo ma pfariwile ivi ntirho lowu a wu endliwa eka wona wu rhurhiseriwa emarhavini lamakulu. Hambileswi vamakwerhu va le marhavini wolawo va bohekeke ku endla mindzulamiso, kambe swi nga si ya kule va vone vuyelo bya kona lebyinene. (Ekl. 7:8) Vatirhi lava va ku tirhandzela va tsaka leswi va hoxeke xandla eka matimu ya manguva lawa ya vanhu va Yehovha.

11-13. Hi yihi mintlhontlho leyi van’wana va langutaneke na yona hikwalaho ka ku cinca loku veke kona enhlengeletanweni?

11 Hi nga dyondza dyondzo ya nkoka eka vanhu lava a va tirha emarhavini lawa ma hlanganisiweke. Van’wana a va ri ni makume ya malembe va ri karhi va tirha nkarhi hinkwawo emakaya ya Bethele ya le tikweni ra rikwavo. Mpatswa wun’wana lowu a wu tirha ekaya ra Bethele leritsongo le Amerika Xikarhi wu komberiwe ku ya tirha ekaya ra Bethele ra le Mexico, leri a ri ri rikulu swinene ku tlula ra le tikweni ra rikwavo. Rogelio u ri: “A swi tika swinene ku siya ndyangu ni vanghana.” Makwerhu un’wana la vuriwaka Juan, loyi a komberiweke ku rhurhela eMexico, u ri: “Swi fana ni loko u tswariwa ra vumbirhi; u fanele u tiendlela vanghana lavantshwa. Swi lava u sungula ku tolovelana ni mikhuva leyintshwa ni tindlela letintshwa to anakanya.”

12 Vatirhi van’wana va le Bethele lava komberiweke ku rhurhela erhavini ra le Jarimani, lava humaka ematikweni man’wana ya le Yuropa na vona va langutane ni mintlhontlho. Munhu un’wana ni un’wana loyi a tsakisiwaka hi tintshava to saseka a nga swi twisisa leswaku a swi va tikela lava rhurheke eSwitzerland, ku siya tintshava letikulu ta Alps ta le tikweni ra rikwavo. Kasi van’wana lava humaka eAustria a va tsundzuka ndyangu wa vona wa Bethele lowutsongo.

13 Vamakwerhu va xinuna ni va xisati lava rhurhelaka erhavini ra le tikweni rin’wana va fanele va endla mindzulamiso yo tala, va fanele va tolovela kaya ra vona lerintshwa, vatirhi-kulobye lavantshwa kumbexana ni ntirho lowuntshwa. Va fanele va tlhela va tolovela vandlha lerintshwa, nsimu leyintshwa kumbexana ni ririmi lerintshwa. Swi nga ha tika ku endla ku cinca koloko. Kambe, vatirhi vo tala va le Bethele va ku endlile. Ha yini va ku endlile?

14, 15. (a) Vamakwerhu vo tala va swi kombise njhani leswaku va ri teka ri ri ra nkoka lunghelo ra ku tirha na Yehovha kun’wana ni kun’wana laha va averiwaka kona? (b) Vamakwerhu lava i xikombiso lexinene eka hina hinkwerhu hi ndlela yihi?

 14 Grethel u ri: “Ndzi amukele xirhambo xolexo hikuva a ku ri ndlela leyi ndzi nga kombisaka Yehovha ha yona leswaku ndza n’wi rhandza ku nga khathariseki leswaku ndzi le tikweni rihi, emuakweni wa njhani kumbe ndzi ni lunghelo ra njhani.” Dayska u ri: “Loko ndzi tsundzuka leswaku xirhambo lexi xi huma eka Yehovha, ndzi xi amukele hi ntsako.” André na Gabriela va pfumelelana va ku: “Hi vone tindlela tin’wana to tirhela Yehovha hi leswi hi nga rhangisangiki ku navela ka hina. Hi tibyele leswaku, ‘Loko hi langutane ni ku cinca loku humaka eka Yehovha, swa antswa ku fambisana na kona ematshan’weni yo lwisana na kona.’”

Phela hi ni lunghelo lerikulu ro tirha na Yehovha!

15 Loko marhavi ma hlanganisiwa, vatirhi van’wana va le Bethele va averiwa ku ya va maphayona. Sweswo swi endlekile eka vatirhi vo tala va le Bethele loko rhavi ra le Denmark, ra le Norway ni ra le Sweden ma hlanganisiwa ivi ma va rhavi ra le Scandinavia. Van’wana va vona a ku ri Florian na Anja, lava nga te: “Hi teka xiavelo xa hina lexintshwa xi ri ntlhontlho lowu tsakisaka. Hi swi teka swi ri swa nkoka ku tirhisiwa hi Yehovha kun’wana ni kun’wana. Hi nga vula hi mbilu hinkwayo leswaku hi titwa hi katekisiwile swinene!” Hambileswi vunyingi bya hina hi nga taka hi nga boheki ku endla mindzulamiso yo tano, xana hi nga tekelela ku tiyimisela ka vamakwerhu lava ivi hi rhangisa timhaka ta Mfumo? (Esa. 6:8) Minkarhi hinkwayo Yehovha u katekisa vanhu lava ri tekaka ri ri ra nkoka lunghelo ra vona ro tirha na yena, kun’wana ni kun’wana laha va averiwaka kona.

YANA EMAHLWENI U TIPHINA HI LUNGHELO RA WENA RO TIRHA NA YEHOVHA!

16. (a) Vagalatiya 6:4 yi hi byela leswaku hi endla yini? (b) Hi rihi lunghelo lerikulu leri munhu wihi na wihi a nga vaka na rona?

16 Vanhu lava nga hetisekangiki va tala ku tiringanisa ni van’wana, kambe Rito ra Xikwembu ri hi byela leswaku hi dzikisa mianakanyo ya hina eka leswi hi kotaka ku swi endla. (Hlaya Vagalatiya 6:4.) Vo tala va hina a hi na lunghelo ro va valanguteri enhlengeletanweni. Nakambe, a hi hinkwerhu hi nga vaka maphayona kumbe varhumiwa kumbe vatirhi va le Bethele. Entiyisweni, lawa i malunghelo lamanene. Kambe a hi fanelanga  hi rivala leswaku lunghelo lerikulu leri munhu wihi na wihi a nga vaka na rona hi leri hinkwerhu hi nga na rona. I lunghelo ra ku va vatirhi-kulobye na Yehovha hi twarisa mahungu lamanene. Leri i lunghelo leri faneleke ri tekiwa ri ri ra nkoka!

17. Hi wihi nchumu lowu hi nga ta langutana na wona loko ntsena misava ya Sathana ya ha ri kona, kambe ha yini sweswo swi nga fanelanga swi hi heta matimba?

17 Loko ntsena misava ya Sathana ya ha ri kona, hi nga ha tsandzeka ku tirhela Yehovha hi ndlela leyi hi tsakelaka ku n’wi tirhela ha yona. Ku nga ha va ni swiyimo leswi hi tsandzekaka ku swi lawula, swo tanihi vutihlamuleri bya hina bya ndyangu kumbe swiphiqo swa rihanyo. Kambe sweswo a swi fanelanga swi hi heta matimba. U nga byi tekeli ehansi vuswikoti bya wena byo tirha ni Xikwembu hi ku chumayela hi vito ra xona ni ku twarisa Mfumo wa xona nkarhi wun’wana ni wun’wana. Xa nkoka swinene hileswaku u tirha na xona hilaha u nga kotaka hakona u tlhela u khongelela leswaku xi katekisa vamakwenu lava kotaka ku endla swo tlula leswi wena u kotaka ku swi endla. Tsundzuka, munhu un’wana ni un’wana la dzunisaka vito ra Yehovha i wa risima emahlweni ka yena.

18. I yini leswi hi faneleke hi tiyimisela ku swi vekela etlhelo, naswona ha yini?

18 Yehovha u hi pfumelela ku va vatirhi-kulobye na yena hambileswi hi nga hetisekangiki. Hi ri teka ri ri ra nkoka lunghelo ra hina ro tirha ni Xikwembu xa hina emasikwini lawa yo hetelela! Hikwalaho, hi fanele hi tiyimisela ku swi vekela etlhelo swilaveko swa hina swo tala, hi ri karhi hi swi tiva leswaku emisaveni ya yena leyintshwa, Yehovha u ta endla leswaku hi tiphina hi “[vutomi] bya xiviri,” ku nga vutomi lebyi nga heriki ehansi ka swiyimo leswi tsakisaka ni leswi rhuleke.—1 Tim. 6:18, 19.

Xana u ri teka ri ri ra nkoka lunghelo ra wena ro pfuna van’wana? (Vona tindzimana 16-18)

19. Hi byihi vumundzuku lebyi Yehovha a hi tshembisaka byona?

19 Leswi misava leyintshwa yi nga kwala nyongeni, anakanya hi leswi Muxe a swi byeleke Vaisrayele emahlweninyana ka ku va va nghena eTikweni leri Tshembisiweke, u te: “Hakunene Yehovha Xikwembu xa wena u ta ku endla u va ni swilo swo tala ngopfu entirhweni wun’wana ni wun’wana wa voko ra wena.” (Det. 30:9) Loko Armagedoni yi ta va yi hundzile, Xikwembu xi ta va nyika misava lava a va tirha na xona, hilaha xi va tshembiseke hakona. Endzhaku ka sweswo, xiavelo xa hina lexintshwa ku ta va ku endla misava yi va paradeyisi yo saseka.