Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) SEPTEMBER 2014

Swivutiso Swa Vahlayi

Swivutiso Swa Vahlayi

Xana marito ya Davhida lama nga eka Pisalema 37:25 ni ya Yesu lama nga eka Matewu 6:33 ma vula leswaku Yehovha a nge pfuki a pfumelele leswaku Mukreste wihi na wihi a nga vi ni swakudya leswi eneleke?

Davhida u tsale leswaku a nga “si tshama [a] vona munhu la lulameke a tshikiwa hi ku helela, hambi ku ri vana vakwe va lava xinkwa.” U vule marito wolawo hi ku ya hi leswi n’wi humeleleke. A a swi tiva leswaku Xikwembu xi tshama xi ri karhi xi va khathalela vanhu va xona. (Ps. 37:25) Kambe marito ya Davhida a ma vuli swona leswaku a nga kona mugandzeri wa Yehovha la nga si tshamaka a pfumala kumbe loyi a nga taka a nga pfumali.

A ku ri ni minkarhi leyi Davhida a a langutana ni swiyimo swo tika swinene. Xin’wana xa swiyimo swoleswo a ku ri hi nkarhi lowu a a baleka Sawulo. Davhida a a heleriwe hi swakudya, kutani u kombelele yena ni lava a va ri na yena xinkwa. (1 Sam. 21:1-6) Hi nkarhi wolowo, Davhida a a “lava xinkwa.” Kambe, enkarhini wolowo wo tika, a a swi tiva leswaku Yehovha a a nga n’wi fularhelanga. Ntiyiso wa mhaka hi leswaku a ku kona laha hi hlayaka leswaku Davhida u boheke ku kombela swakudya leswaku a ta kota ku hanya.

Eka Matewu 6:33, hi kuma xitiyisekiso xa Yesu xa leswaku Xikwembu xi ta enerisa swilaveko swa malandza ya xona yo tshembeka lama rhangisaka timhaka ta Mfumo evuton’wini bya wona. Yesu u te: “Kutani, hambetani mi lava mfumo ni ku lulama ka yena ku sungula, xisweswo swilo leswin’wana hinkwaswo mi ta engeteleriwa swona.” Hambiswiritano, Yesu u tlhele a vula leswaku ‘vamakwavo’ va yena va nga ha va ni ndlala hikwalaho ko xanisiwa. (Mat. 25:35, 37, 40) Sweswo swi endlekile eka muapostola Pawulo. Minkarhi yin’wana u ve ni ndlala ni torha.—2 Kor. 11:27.

Yehovha u hi byela leswaku hi ta xanisiwa hi tindlela to hambana-hambana. A nga ha pfumelela leswaku hi pfumala swo karhi loko hi ri karhi hi pfuneta eku hlamuleni ka swihehlo swa Diyavulosi. (Yobo 2:3-5) Hi xikombiso, Vakreste-kulorhi van’wana, vo tanihi lava a va ri etikampeni ta nxaniso ta Manazi, va tikume va ri ekhombyeni hikwalaho ko xanisiwa. Ku nga nyikiwi ka Timbhoni swakudya leswi eneleke a ku ri yin’wana ya tindlela ta Diyavulosi yo endla leswaku ti nga tshembeki. Timbhoni leti tshembekaka ti hambete ti yingisa Yehovha; naswona a nga ti fularhelanga. U pfumelele leswaku ti ringiwa tanihi leswi a pfumelelaka Vakreste hinkwavo leswaku va langutana ni miringo yo hambana-hambana. Hambiswiritano, a swi kanakanisi leswaku Yehovha u seketela vanhu hinkwavo lava xanisekaka hikwalaho ka vito ra yena. (1 Kor. 10:13) Hi fanele hi tsundzuka marito lama nga eka Vafilipiya 1:29 lama nge: “N’wina mi nyikiwe lunghelo hikwalaho ka Kreste, ku nga ri ro veka ripfumelo ra n’wina eka yena ntsena, kambe ni ku xaniseka hikwalaho ka yena.”

Yehovha u tshembisa leswaku u ta va ni malandza yakwe. Hi xikombiso, Esaya 54:17 yi ri: “Tlhari rihi ni rihi leri nga ta endleriwa ku ku hlasela a ri nge humeleli.” Xitshembiso lexi ni swin’wana leswi fanaka na xona swa tiyisekisa leswaku vanhu va Xikwembu hinkwavo va ta sirheleriwa. Kambe, Mukreste ha un’we a nga ha ringiwa hi tindlela to hambana-hambana, hambi ku ri ku dlayiwa.