Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) SEPTEMBER 2014

Tindlela To Pfuna Lava Nga Le Ntirhweni Wa Nkarhi Hinkwawo

Tindlela To Pfuna Lava Nga Le Ntirhweni Wa Nkarhi Hinkwawo

“Minkarhi hinkwayo hi tsundzuka ntirho wa n’wina wo tshembeka ni ku tikarhata ka n’wina ka rirhandzu.”—1 TES. 1:3.

1. Pawulo u titwe njhani hi vanhu lava tirhelaka Yehovha hi ku hiseka?

MUAPOSTOLA PAWULO a nga va rivalanga lava a va tirha hi matimba leswaku va chumayela mahungu lamanene. U tsale a ku: “Minkarhi hinkwayo hi tsundzuka ntirho wa n’wina wo tshembeka ni ku tikarhata ka n’wina ka rirhandzu ni ku tiyisela ka n’wina hikwalaho ka ntshembo lowu mi nga na wona eHosini ya hina Yesu Kreste emahlweni ka Xikwembu tlhelo Tata wa hina.” (1 Tes. 1:3) Yehovha na yena a nga yi rivali mintirho ya rirhandzu ya vanhu hinkwavo lava n’wi tirhelaka hi ku tshembeka, ku nga khathariseki leswaku swiyimo swa vona swi va pfumelela ku endla swo tala kumbe leswitsongo.—Hev. 6:10.

2. Hi ta tlhuvutsa yini exihlokweni lexi?

2 Vo tala va vatirhi-kulorhi—va le nkarhini lowu hundzeke ni va le nkarhini wa sweswi—va titsone swo tala leswaku va ta kota ku tirhela Yehovha nkarhi hinkwawo. A hi kambisiseni ndlela leyi van’wana va n’wi tirheleke ha yona eminkarhini ya vaapostola. Hi ta tlhela hi kambisisa mintirho yin’wana ya nkarhi hinkwawo ya le nkarhini wa hina kutani hi vona ndlela leyi hi nga va pfunaka ha yona vanhu volavo lava rhandzekaka lava tinyikeleke hi ku tirhandzela leswaku va tirha hi tindlela to hlawuleka.

VAKRESTE VA LE MINKARHINI YA VAAPOSTOLA

3, 4. (a) Van’wana va n’wi tirhele njhani Yehovha eminkarhini ya vaapostola? (b) A va tihanyisa njhani?

3 Endzhakunyana ka loko Yesu a khuvuriwile, u sungule ku endla ntirho  wo chumayela hi Mfumo lowu a wu ta endliwa emisaveni hinkwayo. (Luka 3:21-23; 4:14, 15, 43) Endzhaku ka ku fa ka yena, vaapostola va yena va rhangerile entirhweni lowu wo chumayela lowu a wu ya wu kula. (Mint. 5:42; 6:7) Vakreste van’wana vo tanihi Filipi, va ve vavuri va evhangeli ni varhumiwa ePalestina. (Mint. 8:5, 40; 21:8) Pawulo ni van’wana va chumayele mahungu lamanene ematikweni yo tala. (Mint. 13:2-4; 14:26; 2 Kor. 1:19) Van’wana, vo tanihi Silvhano (Silasi), Marka na Luka, a va ri vamatsalana kumbe vatsari va tibuku tin’wana ta le Bibeleni. (1 Pet. 5:12) Vamakwerhu va xisati lava nga Vakreste va tirhe swin’we ni vamakwerhu lava va xinuna vo tshembeka. (Mint. 18:26; Rhom. 16:1, 2) Swilo swo tsakisa leswi humeleleke vanhu lava swi endla leswaku swi tsakisa ku hlaya Matsalwa ya Vukreste ya Xigriki, naswona swi kombisa leswaku Yehovha a nga ma rivali malandza ya yena naswona wa ma khathalela.

4 Vatirhi va nkarhi hinkwawo va le minkarhini ya vaapostola a va tihanyisa njhani? Minkarhi yin’wana a va kombisiwa malwandla va tlhela va pfuniwa hi tindlela tin’wana hi Vakreste-kulobye, kambe a va nga va sindzisi vamakwavo leswaku va va pfuna. (1 Kor. 9:11-15) Vanhu van’wana ku katsa ni mavandlha a va va pfuna hi ku tirhandzela. (Hlaya Mintirho 16:14, 15; Vafilipiya 4:15-18.) Pawulo ni vatirhi-kulobye a va tlhela va endla swintirhwana swo karhi leswaku va kota ku tihanyisa.

VATIRHI VA NKARHI HINKWAWO VA MANGUVA LAWA

5. Mpatswa wun’wana lowu tekaneke wu vule yini malunghana ni ku va ka wona eka ntirho wa nkarhi hinkwawo?

5 Ninamuntlha, vo tala va tirha hi matimba emintirhweni yo hambana-hambana ya nkarhi hinkwawo. (Vona bokisi leri nge “ Mintirho Yo Hambana-hambana Ya Nkarhi Hinkwawo.”) Va titwa njhani hi ntirho wolowo lowu va tihlawuleleke wona? Xolexo i xivutiso lexi u nga va vutisaka xona, naswona u nga ha tikuma u khutazekile loko wo va vutisa. Anakanya hi xikombiso lexi: Makwerhu un’wana wa xinuna loyi a veke phayona ra nkarhi hinkwawo, phayona ro hlawuleka, murhumiwa ni xirho xa ndyangu wa Bethele etikweni rin’wana u ri: “Ndzi hlawule ntirho lowunene ngopfu hi leswi ndzi ngheneleke ntirho wa nkarhi hinkwawo. Loko ndzi ri ni malembe ya 18 a swi ndzi tikela ku hlawula loko ndzi fanele ndzi ya eyunivhesiti, ndzi ya tirha ntirho wa ku tihanyisa kumbe ndzi phayona. Swikombiso swa vanhu vo tala swi ndzi endle ndzi swi vona leswaku Yehovha a nga swi rivali leswi u titsonaka swona leswaku u n’wi tirhela nkarhi hinkwawo. Ndzi kote ku tirhisa vuswikoti byihi na byihi lebyi Yehovha a ndzi nyikeke byona hi tindlela leti a ndzi nga ta kota ku byi tirhisa loko a ndzi hlawule ntirho wa ku tihanyisa.” Nsati wa yena u ri: “Xiavelo xin’wana ni xin’wana lexi hi xi kumeke xi ndzi pfunile leswaku ndzi kula. Hi swi xiye ko tala leswaku Yehovha wa hi sirhelela a tlhela a hi kongomisa ni hi tindlela leti a swi ta va swi nga endlekanga sweswo, loko a hi nga endlanga ku cinca koloko lokukulu. Siku ni siku ndzi nkhensa Yehovha hileswi ndzi nga le ntirhweni wa nkarhi hinkwawo.” Xana na wena u nga tsakela ku titwa hi ndlela yoleyo hi vutomi bya wena?

6. Yehovha u titwa njhani hi ntirho lowu hi n’wi endlelaka wona?

6 Van’wana swiyimo swa vona a swi va pfumeleli leswaku va nghenela ntirho wa nkarhi hinkwawo sweswi. Ha tiyiseka leswaku Yehovha u wu teka wu ri wa nkoka ntirho wa vona lowu va wu endlaka hi moya-xiviri hinkwawo. Anakanya hi vanhu lava Pawulo a boxeke mavito ya vona eka Filemoni 1-3, ku katsa ni vanhu hinkwavo lava a va hlanganyela evandlheni ra le Kolosa. (Yi hlaye.) Pawulo a a va teka va ri va nkoka, na Yehovha a a va teka va ri va nkoka. Tata wa hina wa le tilweni na yena u teka ntirho wa wena wu ri wa nkoka. Kambe, u nga va seketela njhani lava nga le ntirhweni wa nkarhi hinkwawo sweswi?

TINDLELA LETI HI NGA PFUNAKA MAPHAYONA HA TONA

7, 8. Ntirho wa vuphayona wu katsa yini, naswona van’wana evandlheni va nga ma pfuna njhani maphayona?

7 Maphayona lama hisekaka ma ma khutaza swinene mavandlha, ku fana ni vachumayeri va le minkarhini ya vaapostola. Yo tala ma heta tiawara ta 70 n’hweti na n’hweti ma ri karhi ma chumayela. U nga ma pfuna njhani?

 8 Phayona rin’wana ra xisati leri vuriwaka Shari ri te: “Maphayona ma tikomba ma tiyile hileswi ma yaka ensin’wini siku ni siku. Kambe, ma swi lava ku khutaziwa.” (Rhom. 1:11, 12) Makwerhu un’wana wa xisati loyi a koteke ku phayona malembe yo hlayanyana u vule leswaku maphayona ya le vandlheni ra vona ma tirha hi matimba ku ringana nkarhi wo leha. U tlhele a vula leswaku loko van’wana va ma rhamba eswakudyeni, va ma nyika malinyana ya xo famba ha xona kumbe ya swin’wana, ma swi tlangela swinene naswona sweswo swa ma kombisa leswaku van’wana va khathala hakunene hi wona.

9, 10. Van’wana va endle yini leswaku va pfuna maphayona emavandlheni ya vona?

9 Xana u nga tsakela ku pfuna maphayona ensin’wini? Phayona leri vuriwaka Bobbi ri te: “Hi lava ku seketeriwa swinene exikarhi ka vhiki.” Phayona rin’wana ra le vandlheni rolero ri te: “Swi tika swinene ku kuma vanhu vo tirha na vona ensin’wini ninhlikanhi.” Makwerhu un’wana wa xisati loyi sweswi a tirhaka eBethele ya le Brooklyn u vula leswi landzelaka malunghana ni ntirho wa yena wa vuphayona, u ri: “Makwerhu un’wana wa xisati loyi a a ri ni movha u te, ‘Loko u nga ri na munhu wo tirha na yena nsimu, ndzi tivise, ndzi ta famba na wena.’ U ndzi pfunile leswaku ndzi ya emahlweni ndzi phayona.” Shari yena u ri: “Loko maphayona lama nga nghenelangiki vukati ma vuyile ensin’wini ma va ma ri woxe. Minkarhi yin’wana mi nga ha rhamba vamakwerhu va xinuna kumbe va xisati lava nga nghenelangiki vukati leswaku va ta va na n’wina eka vugandzeri bya n’wina bya ndyangu. Loko mi va rhamba ni loko mi endla mintirho yin’wana swi ta va pfuna leswaku va tshama va tiyile.”

10 Makwerhu un’wana wa xisati loyi a nga ni malembe ya kwalomu ka 50 a ri entirhweni wa nkarhi hinkwawo, loko a anakanya hi nkarhi lowu a a phayona ni vamakwerhu van’wana va xisati lava nga nghenelangiki vukati u ri: “Vakulu va le vandlheni a va endzela maphayona endzhaku ka tin’hweti ti nga ri tingani. A va hi vutisa hi rihanyo ra hina ni ntirho wa hina wo tihanyisa va tlhela va lava ku tiva loko ku ri ni leswi swi hi karhataka. A va khathala hi hina hakunene. A va hi endzela laha hi tshamaka kona leswaku va ta vona loko hi lava mpfuno wo karhi.” Leswi swi nga ha ku tsundzuxa ndlela leyi Pawulo a wu tlangeleke ha yona mpfuno lowu a wu kumeke eka wanuna un’wana loyi a a ri ni ndyangu le Efesa.—2 Tim. 1:18.

11. Swi katsa yini ku va phayona ro hlawuleka?

11 Emavandlheni man’wana ku ni maphayona yo hlawuleka. Vo tala va vamakwerhu lava va xinuna  ni va xisati va tirha tiawara ta 130 ensin’wini n’hweti ni n’hweti. Leswi va hetaka nkarhi wo tala va ri ensin’wini va tlhela va pfuneta ni hi tindlela tin’wana, va sala ni nkarhi wutsongo wo tirha ntirho wo tihanyisa kumbe va nga vi na wona. N’hweti na n’hweti rhavi ri va nyika malinyana yo karhi yo xava swilo leswi va swi pfumalaka leswaku va ta heta nkarhi wo tala va ri ensin’wini.

12. Vakulu ni van’wana va nga ma pfuna njhani maphayona yo hlawuleka?

12 Hi nga ma pfuna njhani maphayona yo hlawuleka? Nkulu un’wana loyi a tirhaka erhavini naswona a vulavurisaneke ni maphayona yo tala yo hlawuleka u ri: “Vakulu va fanele va vulavurisana na wona leswaku va ta tiva swiyimo swa wona, kutani va vona ndlela leyi va nga ma pfunaka ha yona. Timbhoni tin’wana ti anakanya leswaku maphayona yo hlawuleka a ma pfumali nchumu hi leswi ma nyikiwaka malinyana yo karhi, kambe vamakwerhu va le vandlheni va nga ma pfuna hi tindlela to tala.” Ku fana ni maphayona ya nkarhi hinkwawo, maphayona yo hlawuleka ma tsaka swinene loko vamakwerhu emavandlheni va tirha na wona ensin’wini. Xana u nga tirha na wona?

NDLELA LEYI HI NGA PFUNAKA VALANGUTERI VA MIGANGA HA YONA

13, 14. (a) I yini leswi hi faneleke hi swi tsundzuka hi valanguteri va miganga? (b) U nga endla yini leswaku u pfuna valanguteri va miganga?

13 Hakanyingi valanguteri va miganga ni vasati va vona va tekiwa tanihi vamakwerhu lava nga ni ntokoto ni ripfumelo leri tiyeke ni lava hi khutazaka. Sweswo i ntiyiso, kambe na vona va lava ku khutaziwa, va lava vanhu vo tirha na vona ensin’wini ni ku rhambiwa loko vamakwerhu va tihungasa hi ndlela leyi ringaniseriweke. Ku vuriwa yini loko va vabya ivi va yisiwa exibedlhele, kumbexana va fanele va endliwa vuhandzuri kumbe va fanele va kuma vutshunguri byo karhi? Swa va tsakisa swinene loko vamakwerhu va le vandlheni va va pfuna va tlhela va khathala hi vona. Hi nga anakanya ndlela leyi Luka “n’anga leyi rhandzekaka” tlhelo mutsari wa buku ya Mintirho, a faneleke a n’wi khathalele ha yona Pawulo swin’we ni van’wana lava a va tirha na yena.—Kol. 4:14; Mint. 20:5–21:18.

14 Valanguteri va miganga ni vasati va vona va swi lava ku kombisiwa rirhandzu ni ku khutaziwa hi vanghana lavakulu. Mulanguteri un’wana wa muganga u tsale a ku: “Swi tikomba onge vanghana va mina va swi vona loko ndzi lava ku khutaziwa. Va ndzi vutisa swivutiso hi vutlhari leswi ndzi pfunaka leswaku ndzi phofula leswi ndzi karhataka. Va ndzi pfuna swinene hi leswi va nga vayingiseri lavanene.” Valanguteri va miganga ni vasati va vona va swi tlangela swinene loko vamakwavo va swi kombisa leswaku va khathala hakunene ha vona ivi va va vanghana va ntiyiso.

NDLELA LEYI HI NGA PFUNAKA SWIRHO SWA NDYANGU WA BETHELE HA YONA

15, 16. Ha yini ntirho lowu endliwaka hi lava tirhaka eBethele ni le Tiholweni ta Tinhlengeletano wu ri wa nkoka naswona hi nga va pfuna njhani?

15 Emisaveni hinkwayo, lava tirhaka eBethele ni le Tiholweni ta Tinhlengeletano va endla ntirho wa nkoka lowu seketelaka ntirho wo chumayela hi Mfumo ematikweni lama languteriwaka hi rhavi ra vona. Loko evandlheni ra n’wina kumbe eka muganga wa n’wina mi ri ni lava tirhaka eBethele, mi nga va pfuna njhani?

16 Loko va ha ku fika eBethele, va nga ha va va tsundzuka ekaya hileswi va siyeke ndyangu ni vanghana va vona lava va rhandzaka. Va swi tlangela swinene loko van’wana eBethele ni le vandlheni ra vona lerintshwa va va vanghana va vona. (Mar. 10:29, 30) Xiyimiso xa ntirho wa vona xi endla leswaku va kota ku ya eminhlanganweni ya vandlha va tlhela va ya ensin’wini vhiki na vhiki. Hambiswiritano, minkarhi yin’wana vatirhi va le Bethele va nga ha va ni mintirho leyi engetelekeke. Loko mavandlha ma swi twisisa leswi naswona ma kombisa leswaku ma teka vatirhi va le Bethele va ri va nkoka swin’we ni ntirho lowu va wu endlaka, hinkwavo va vuyeriwa.—Hlaya 1 Vatesalonika 2:9.

NDLELA YO PFUNA VATIRHI VA NKARHI HINKWAWO LAVA NGA LE MATIKWENI MAMBE

17, 18. Hi swihi swiavelo leswi nyikiwaka vamakwerhu lava nga le ntirhweni wa nkarhi hinkwawo ematikweni mambe?

17 Lava amukelaka swiavelo swo ya tirha ematikweni man’wana va nga ha boheka ku dya swakudya  leswi va nga swi tolovelangiki, ku dyondza ririmi lerintshwa ni ku tolovela ndhavuko lowuntshwa ni ndlela leyintshwa yo hanya. Hi swihi swiavelo leswi vatirhi va nkarhi hinkwawo lava nga le matikweni mambe va swi kumaka?

18 Van’wana i varhumiwa naswona va heta nkarhi wa vona wo tala va ri ensin’wini laha va dyondzisaka hi vutshila va tlhela va avela mavandlha lawa va nga eka wona leswi va dyondzisiweke swona. Rhavi ri lunghiselela varhumiwa ndhawu leyi faneleke yo tshama eka yona ri tlhela ri va nyika malinyana leyi va pfunaka ku xava leswi va swi pfumalaka. Van’wana lava nga le matikweni mambe va averiwa ku tirha erhavini kumbe ku pfuneta eku akiweni ka miako ya rhavi, tihofisi to hundzuluxelela eka tona, Tiholo ta Tinhlengeletano kumbe Tiholo ta Mfumo. Va lunghiseleriwa swakudya, ndhawu leyi faneleke yo tshama eka yona va endleriwa ni swilo swin’wana. Va ya eminhlanganweni nkarhi na nkarhi va tlhela va ya ensin’wini ku fana ni swirho swa ndyangu wa Bethele, hikwalaho vamakwerhu va vuyeriwa hi tindlela to tala.

19. U nga va pfuna njhani vatirhi va nkarhi hinkwawo lava nga le tikweni ra ka n’wina?

19 U nga va pfuna njhani vatirhi volavo va nkarhi hinkwawo? Tsundzuka leswaku va nga ha va va nga swi tolovelanga swakudya swa kwalaho, ngopfu-ngopfu loko va ha ku fika. Sweswo u nga ha tshama u ri karhi u swi tsundzuka loko u va rhamba leswaku va ta dya swakudya; u nga rhanga u va vutisa leswi va nga tsakelaka ku swi dya kumbe leswi va nga lavaka ku swi ringeta. Va lehisele mbilu loko va ri karhi va dyondza ririmi ra kwalaho ni mindhavuko ya kona. Swi nga ha va tekela nkarhi leswaku va twisisa hinkwaswo leswi u swi vulaka, kambe u nga va pfuna hi musa hi mavitanelo ya marito. Va lava ku dyondza.

20. Hi nga va pfuna njhani vatirhi va nkarhi hinkwawo ni vatswari va vona?

20 Vatirhi va nkarhi hinkwawo va kula naswona vatswari va vona va dyuhala. Loko vatswari va vona va ri Timbhoni, a swi kanakanisi leswaku va nga tsakela leswaku vana va vona va ya emahlweni ni swiavelo swa vona. (3 Yoh. 4) Vatirhi va nkarhi hinkwawo va ta endla leswi va nga swi kotaka loko vatswari va vona va lava ku khathaleriwa naswona va ta va endzela hilaha va nga kotaka hakona. Nilokoswiritano, vamakwerhu lava nga le vandlheni ra vatswari volavo va nga pfuna vatirhi va nkarhi hinkwawo hi ku khathalela vatswari va vona lava dyuhaleke loko va lava ku pfuniwa. A hi fanelanga hi rivala leswaku vatirhi va nkarhi hinkwawo va khomekile swinene hi ku seketela ntirho wo chumayela, lowu nga wa nkoka swinene emisaveni namuntlha. (Mat. 28:19, 20) Xana wena kumbe vandlha ra ka n’wina mi nga pfuna vatswari va vatirhi va nkarhi hinkwawo loko va lava mpfuno?

21. Lava nga le ntirhweni wa nkarhi hinkwawo va titwa njhani hi ndlela leyi van’wana va va pfunaka ha yona ni hi ndlela leyi va va khutazaka ha yona?

21 Lava nghenelaka ntirho wa nkarhi hinkwawo va wu nghenela hi leswi va lavaka ku nyika Yehovha ni ku pfuna van’wana, a va lavi ku fuwa. Va yi tlangela swinene ndlela yin’wana ni yin’wana leyi u nga va pfunaka ha yona. Makwerhu un’wana wa xisati la nga le ntirhweni wa nkarhi hinkwawo etikweni rimbe u te: “Hambi ku ri marito yo koma yo tlangela ma kombisa leswaku van’wana va anakanya ha wena ni leswaku va tsakela ntirho lowu u wu endlaka.”

22. U titwa njhani hi ntirho wa nkarhi hinkwawo?

22 Ku tirhela Yehovha entirhweni wa nkarhi hinkwawo swa vuyerisa swinene evuton’wini. Swi lava matshalatshala lamakulu, swa dyondzisa naswona swa enerisa. I ndlela leyinene yo hi endla hi lunghekela ntirho lowu tsakisaka lowu nga ta endliwa hi malandza hinkwawo yo tshembeka ya Yehovha ehansi ka Mfumo wa Xikwembu. Onge hinkwerhu ka hina ‘minkarhi hinkwayo hi nga tsundzuka ntirho wo tshembeka ni ku tikarhata ka rirhandzu’ ka lava nga le ntirhweni wa nkarhi hinkwawo.—1 Tes. 1:3.