Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) AUGUST 2014

Yingisa Rito Ra Yehovha Kun’wana Ni Kun’wana Laha U Nga Kona

Yingisa Rito Ra Yehovha Kun’wana Ni Kun’wana Laha U Nga Kona

“Tindleve ta n’wina ti ta twa rito endzhaku ka n’wina ri ku: ‘Ndlela hi leyi.’”—ESA. 30:21.

1, 2. Yehovha u vulavurisana njhani ni malandza yakwe?

EMATIN’WINI hinkwawo ya Bibele, Yehovha u kongomise vanhu hi tindlela to hambana-hambana. Xikwembu xi vulavule ni van’wana hi ku tirhisa tintsumi kumbe swivono kumbe milorho, xi va paluxela leswi a swi ta humelela enkarhini lowu taka. Yehovha u tlhele a va nyika mintirho yo karhi. (Tinhl. 7:89; Ezek. 1:1; Dan. 2:19) Van’wana va kume nkongomiso eka vayimeri va Yehovha lava nga xiphemu xa laha misaveni xa nhlengeletano yakwe. Ku nga khathariseki leswaku rito ra Yehovha ri hundziseriwe njhani eka vanhu vakwe, lava va yingiseke swileriso swakwe va katekisiwile.

2 Namuntlha, Yehovha u kongomisa vanhu vakwe hi ku tirhisa Bibele, moya wakwe lowo kwetsima ni vandlha. (Mint. 9:31; 15:28; 2 Tim. 3:16, 17) Nkongomiso lowu hi wu kumaka eka yena wa twisiseka lerova swi fana ni loko ‘tindleve ta hina ti twa rito endzhaku ka hina ri ku: “Ndlela hi leyi. Fambani hi yona.”’ (Esa. 30:21) Entiyisweni, Yesu u tlhela a hundzisela rito ra Yehovha eka hina loko a ri karhi a kongomisa vandlha hi ku tirhisa “hlonga ro tshembeka ni ro tlhariha.” (Mat. 24:45) Hi fanele hi wu tekela enhlokweni nkongomiso wolowo hikuva leswaku hi kuma vutomi lebyi nga heriki swi titshege hi ku yingisa ka hina.—Hev. 5:9.

3. I yini leswi nga hi sivelaka ku yingisa nkongomiso wa Yehovha? (Vona xifaniso lexi nga eku sunguleni ka xihloko lexi.)

3 Sathana Diyavulosi u tiyimisele ku hi sivela leswaku hi nga wu yingisi  nkongomiso lowu ponisaka vutomi lowu humaka eka Yehovha. Ku tlula kwalaho, ‘mbilu ya hina leyi kanganyisaka’ swi nga ha endleka yi nga swi lavi ku yingisa Yehovha hi ku helela. (Yer. 17:9) Hikwalaho, a hi kambisiseni ndlela leyi hi nga swi hlulaka ha yona swihinga leswi endlaka leswaku swi tika ku yingisa rito ra Xikwembu. A hi buleni hi ndlela leyi ku tshama hi ri karhi hi vulavurisana na Yehovha hi xikhongelo swi nga byi sirhelelaka ha yona vuxaka bya hina na yena ku nga khathariseki leswaku hi langutana ni swiyimo swa njhani.

NDLELA YO HLULA MARHENGU YA SATHANA

4. Sathana u ringeta njhani ku kucetela ndlela leyi vanhu va anakanyaka ha yona?

4 Sathana u ringeta ku kucetela ndlela leyi vanhu va anakanyaka ha yona hi ku tirhisa rungula leri nga riki ntiyiso ni leri kanganyisaka. (Hlaya 1 Yohane 5:19.) Ku engetela eka swilo leswi kandziyisiweke, emisaveni hinkwayo—ku katsa ni le tindhawini ta le kule—rungula rolero ri hangalasiwa hi xiya-ni-moya, thelevhixini ni hi Internet. Switirhisiwa leswi swi nga ha hi nyika rungula leri pfunaka, kambe hakanyingi swi khutaza mahanyelo lama lwisanaka ni milawu ya Yehovha. (Yer. 2:13) Hi xikombiso, emahungwini ni le ka minongonoko ya vuhungasi ku nga ha vuriwa leswaku a swi hoxanga leswaku vanhu va rimbewu leri fanaka va tekana, naswona vanhu vo tala va vona onge leswi Bibele yi swi vulaka hi vusodoma yo tikisa.—1 Kor. 6:9, 10.

5. Hi nga swi papalata njhani ku kuceteriwa hi rungula leri nga mavunwa ra Sathana?

5 Lava va rhandzaka milawu ya Xikwembu va nga swi papalata njhani ku kuceteriwa hi rungula leri nga mavunwa ra Sathana? Va nga swi hambanisa njhani swilo leswi lulameke eka leswi hoxeke? “Hi ku tshama [va] rindzile hi ku landza rito ra [Xikwembu].” (Ps. 119:9) Rito ra Xikwembu leri tsariweke ri ni nkongomiso wa nkoka lowu endlaka leswaku hi kota ku tiva rungula ra ntiyiso ni leri kanganyisaka. (Swiv. 23:23) Loko Yesu a tshaha Matsalwa u vule leswaku “munhu . . . u fanele ku hanya ni hi rito rin’wana ni rin’wana leri humaka enon’wini wa Yehovha.” (Mat. 4:4) Hi fanele hi dyondza ndlela yo tirhisa milawu ya Bibele evuton’wini bya hina. Hi xikombiso, loko Muxe a nga si tsala nawu wa Yehovha lowu lwisanaka ni vuoswi, Yosefa a a swi tiva leswaku ku endla vuoswi a ku ri xidyoho eka Xikwembu. Loko nsati wa Potifaro a ringete ku n’wi yenga leswaku a dyoha, a nga kalanga a anakanya hi ku nga n’wi yingisi Yehovha. (Hlaya Genesa 39:7-9.) Hambileswi nsati wa Potifaro a n’wi sindziseke nkarhi wo leha, Yosefa u hlawule ku yingisa rito ra Xikwembu ematshan’weni ya rito ra wansati yoloye. Lexi nga hi pfunaka leswaku hi hambanisa leswi lulameke eka leswi hoxeke, i ku yingisa rito ra Yehovha ku nga ri rungula leri nga mavunwa ra Sathana leri hi tshamelaka ku ri twa.

6, 7. Hi fanele hi endla yini leswaku hi papalata xitsundzuxo xo biha xa Sathana?

6 Misava yi tele hi tidyondzo ta vukhongeri leti pfilunganyaka naswona ti endla leswaku vanhu vo tala va vona onge a swi pfuni nchumu ku lavisisa vukhongeri bya ntiyiso. Hambiswiritano, Yehovha u endle leswaku lava tiyimiseleke ku n’wi yingisa swi va olovela ku kuma ntiyiso. Hi fanele hi tiendlela xiboho xa leswaku hi lava ku yingisa mani. Leswi swi nga kotekiki ku yingisa marito  mambirhi hi nkarhi wun’we, hi fanele hi “tiva rito” ra Yesu kutani hi n’wi yingisa. Yehovha u hlawule yena leswaku a langutela tinyimpfu Takwe.—Hlaya Yohane 10:3-5.

7 Yesu u te: “Nyikelani nyingiso eka leswi mi swi twaka.” (Mar. 4:24) Ndzayo ya Yehovha ya twisiseka naswona i yinene, kambe hi fanele hi va ni langutelo lerinene leswaku hi ta yi yingisa. Loko hi nga tivoneli, hi nga yingisa xitsundzuxo xo biha xa Sathana ematshan’weni yo yingisa ndzayo ya Xikwembu ya rirhandzu. U nga pfumeleli vutomi bya wena byi lawuriwa hi vuyimbeleri bya misava, tivhidiyo, minongonoko ya le ka thelevhixini, tibuku, vanghana, vadyondzisi kumbe lava vuriwaka tintlhari.—Kol. 2:8.

8. (a) Timbilu ta hina ti nga swi endlisa ku yini leswaku hi hlaseriwa hi ku olova hi marhengu ya Sathana? (b) Ku nga humelela yini hi hina loko hi honisa swikombiso swa swilo leswi humelelaka etimbilwini ta hina?

8 Sathana wa swi tiva leswaku hi ni mukhuva wa ku tshamela ku dyoha kutani u ringeta ku hi ringa leswaku hi dyoha. Loko Sathana a hi ringa hi ndlela leyi, swi nga hi tikela ku tshama hi tshembekile. (Yoh. 8:44-47) Hi nga wu hlula njhani ntlhontlho lowu? Anakanya hi munhu loyi a endlaka xidyoho lexi a a nga anakanyi leswaku a nga pfuka a xi endlile. (Rhom. 7:15) I yini leswi endleke leswaku a endla xidyoho xolexo? Swi nga ha endleka leswaku u tshike ku yingisa rito ra Yehovha hakatsongo-tsongo. Kumbexana u tsandzeke ku xiya swikombiso swa swilo leswi a swi humelela embilwini yakwe kumbe u hlawule ku swi honisa. Hi xikombiso, a nga ha va a tshike ku khongela, a nga ha yi kahle ensin’wini kumbe a sungule ku xwa eminhlanganweni. Eku heteleleni, u pfumele ku hetisisa ku navela ka yena kutani a endla leswi a swi tivaka leswaku swi hoxile. Hi nga papalata xihoxo xexo lexikulu loko hi tshama hi xalamukele swikombiso swin’wana ni swin’wana swa swilo leswi humelelaka etimbilwini ta hina, kutani hi teka goza ro swi lulamisa hi ku hatlisa. Naswona loko hi yingiserisisa rito ra Yehovha, a hi nge pfuki hi yingise tidyondzo ta vagwinehi.—Swiv. 11:9.

9. Ha yini swi ri swa nkoka swinene ku hatla hi xiya mukhuva lowu nga endlaka leswaku hi ringeka?

9 Munhu a nga tshunguriwa vuvabyi bya yena hi ku olova loko byo hatla byi kumiwa. Hilaha ku fanaka, hi nga papalata khombo loko hi hatla hi xiya mukhuva lowu nga endlaka leswaku hi ringeka. Loko hi kala hi wu xiya, hi ta va hi tlharihile loko hi teka goza hi ku hatlisa—hi nga si ‘phasiwa hi Sathana hi ri karhi hi hanya leswaku hi endla ku rhandza ka yena.’ (2 Tim. 2:26) Hi fanele hi endla yini loko hi xiya leswaku hi pfumelele mianakanyo ni ku navela ka hina swi hambana ni leswi Yehovha a swi languteleke eka hina? Hi fanele hi hatla hi tlhelela eka yena hi ku titsongahata, hi yingisa ndzayo yakwe naswona hi n’wi yingisa hi timbilu ta hina hinkwato. (Esa. 44:22) Hi  fanele hi tsundzuka leswaku vuyelo bya swihoxo swin’wana byi nga ha hi twisa ku vava swinene hambiloko hi tlhelele eka Yehovha. Swi nga va swinene leswaku hi nga n’wi fularheli Yehovha!

Ku khomeka hi swilo swa moya swi nga ku sirhelela njhani eka marhengu ya Sathana? (Vona tindzimana 4-9)

NDLELA YO HLULA KU TIKUKUMUXA NI MAKWANGA

10, 11. (a) Hi swihi swikombiso swin’wana swa ku tikukumuxa? (b) Hi dyondza yini eka xikombiso xo biha xa Kora, Dathani na Abirama?

10 Hi fanele hi tsundzuka leswaku timbilu ta hina ti nga hi hambukisa. Mukhuva lowu hi nga na wona wo endla xidyoho wu ni matimba swinene! Hi xikombiso, anakanya hi ku tikukumuxa ni makwanga. Anakanya hi ndlela leyi mikhuva leyi yi nga hi sivelaka ha yona ku yingisa rito ra Yehovha naswona yi nga endlaka leswaku hi endla swihoxo leswikulu. Munhu loyi a tikukumuxaka a nga ha anakanya leswaku u hlawulekile. A nga ha vona onge u ni mfanelo yo endla xin’wana ni xin’wana lexi a xi lavaka ni leswaku a ku na munhu loyi a nga n’wi byelaka leswaku a endla yini. Kutani a nga ha anakanya leswaku a nga fanelanga a yingisa nkongomiso ni ndzayo leyi humaka eka Vakreste-kulobye, vakulu hambi ku ri eka nhlengeletano ya Xikwembu. Munhu wo tano a nga ha hetelela a nga ha ri twi rito ra Yehovha.

11 Loko Vaisrayele va ri emananga, Kora, Dathani na Abirama va xandzukele Muxe na Aroni. Leswi vaxandzuki lava a va tikukumuxa, a va lava ku gandzela Yehovha hi ndlela ya vona. Yehovha u angule njhani? U va dlayile. (Tinhl. 26:8-10) Xikombiso lexi xi hi dyondzisa dyondzo ya nkoka swinene. Ku xandzukela Yehovha swi ni khombo swinene. Nakambe a hi tsundzukeni leswaku “ku tinyungubyisa ku le kusuhi ni ku wa.”—Swiv. 16:18; Esa. 13:11.

12, 13. (a) Nyika xikombiso lexi kombisaka ndlela leyi makwanga ma nga hi vangelaka khombo ha yona. (b) Hlamusela ndlela leyi makwanga ma nga kulaka hi ku hatlisa ha yona loko hi ma pfumelela.

12 Nakambe, anakanya hi makwanga. Munhu wa makwanga hakanyingi u vona onge nkongomiso wa Yehovha a wu tirhi eka yena. Endzhaku ka loko Namani, ndhuna ya vuthu ra Vasiriya a hanyisiwe nhlokonho, u nyike muprofeta Elixa tinyiko, ivi yena a ti ala. Hambiswiritano, Gehazi nandza wa Elixa u ti naverile tinyiko toleto. Gehazi u tibyerile a ku: “Leswi Yehovha a hanyaka, ndzi ta tsutsuma ndzi . . . sala [Namani] endzhaku, ndzi teka swo karhi eka yena.” U sale Namani endzhaku a nga n’wi byelanga Elixa, kutani a fika a n’wi byela mavunwa a kombela “talenta ya silivhere ni tinguvu timbirhi ta ku cinca ha tona.” Ku humelele yini eka Gehazi leswi a endleke sweswo naswona a hembeleke muprofeta wa Yehovha? Nhlokonho ya Namani yi tlulele Gehazi wa makwanga.—2 Tih. 5:20-27.

13 Makwanga ma nga ha sungula katsongo, kambe loko hi ma pfumelela ma nga kula hi ku hatlisa ivi ma hi onha. Rungula ra le Bibeleni ra Akani ri kombisa ndlela leyi makwanga ma nga ni matimba ha yona. Xiya ndlela leyi makwanga ya Akani ma kuleke hi ku hatlisa ha yona. U te: “Exikarhi ka leswi phangiweke ndzi vone nguvu ya ximfumo ya le Xinara, yo saseka, ni tixikele ta silivhere ta 200 ni xiphepherhele xin’we xa nsuku, xi ri ni ntikelo wa tixikele ta 50, ndzi swi naverile, kutani ndzi swi teka.” Ematshan’weni ya leswaku Akani a lwisana ni ku navela koloko ko biha, u yive swilo swoleswo kutani a ya swi tumbeta entsongeni wa yena. Loko xidyoho xa Akani xi paluxiwile, Yoxuwa u n’wi byele leswaku Yehovha u ta n’wi tisela khombo. Akani ni ndyangu wakwe va khandliwe hi maribye va fa hi siku rero. (Yox. 7:11, 21, 24, 25) Un’wana ni un’wana wa hina a nga va ni makwanga ku fana na Akani. Hikwalaho a hi “[tivoneleni] eka muxaka wun’wana ni wun’wana wa ku navela.” (Luka 12:15) Hambiloko minkarhi yin’wana hi nga ha anakanyaka swilo leswi thyakeke kumbe swilo swo biha, i swa nkoka ku lawula mianakanyo ya hina naswona hi nga pfumeleli ku navela ka hina ku hi endla hi dyoha.—Hlaya Yakobo 1:14, 15.

14. Hi fanele hi endla yini loko hi ringiwa leswaku hi endla swilo swo biha hikwalaho ka ku tikukumuxa ni makwanga?

14 Ku tikukumuxa ni makwanga swi nga hi vangela  khombo. Ku anakanya hi vuyelo bya ku endla xidyoho swi ta hi pfuna leswaku hi nga pfumeleli mukhuva wo tano wu endla leswaku hi nga ri yingisi rito ra Yehovha. (Det. 32:29) EBibeleni, Xikwembu xa ntiyiso xi hi byela leswaku hi swihi swilo leswinene xi tlhela xi hi byela hi vuyelo bya ku swi endla ni vuyelo bya ku endla swilo swo biha. Loko timbilu ta hina ti hi susumetela ku endla swilo swo biha hikwalaho ka ku tikukumuxa kumbe makwanga, ku ta va vutlhari ku anakanya hi vuyelo bya kona. Hi fanele hi anakanya hi ndlela leyi xidyoho xolexo xi nga hi khumbaka ha yona hina, varhandziwa va hina naswona ngopfu-ngopfu vuxaka bya hina na Yehovha.

TSHAMA U RI KARHI U VULAVULA NA YEHOVHA

15. Hi nga dyondza yini eka xikombiso xa Yesu?

15 Yehovha u hi navelela leswinene. (Ps. 1:1-3) U hi nyika nkongomiso lowunene hi nkarhi lowu faneleke. (Hlaya Vaheveru 4:16.) Hambileswi Yesu a a hetisekile, a a titshege hi ku vulavula na Yehovha minkarhi hinkwayo naswona a a khongela nkarhi na nkarhi. Yehovha u seketele Yesu a tlhela a n’wi kongomisa hi tindlela to hlamarisa. U rhume tintsumi leswaku ti n’wi khathalela, u n’wi nyike moya Wakwe lowo kwetsima leswaku wu n’wi pfuna a tlhela a n’wi kongomisa loko a hlawula vaapostola va 12. Yehovha u vulavule a ri ematilweni a vula leswaku U seketela Yesu ni ku n’wi amukela. (Mat. 3:17; 17:5; Mar. 1:12, 13; Luka 6:12, 13; Yoh. 12:28) Ku fana na Yesu, hi fanele hi phofulela Xikwembu leswi nga le timbilwini ta hina hi xikhongelo. (Ps. 62:7, 8; Hev. 5:7) Hi nga tshama hi ri karhi hi vulavula na Yehovha hi xikhongelo hi tlhela hi hanya hi ndlela leyi yisaka ku dzuneka eka yena.

16. Yehovha u hi pfuna njhani leswaku hi twa rito ra yena?

16 Hambileswi Yehovha a endleke leswaku xitsundzuxo xakwe xi kumeka hi ku olova, a nga sindzisi munhu leswaku a xi landzela. Hi fanele hi kombela moya wakwe lowo kwetsima naswona u ta hi nyika wona hilaha ku tlurisaka swinene. (Hlaya Luka 11:10-13.) Kambe, i swa nkoka leswaku hi ‘nyikela nyingiso eka ndlela leyi hi yingisaka ha yona.’ (Luka 8:18) Hi xikombiso, hi ta va hi nga lavi mpfuno wa Yehovha loko hi kombela leswaku a hi pfuna hi hlula mukhuva wo tikhoma hi ndlela yo biha, kambe hi hala tlhelo hi ri karhi hi ya emahlweni hi languta swifaniso swo navetisa rimbewu kumbe hi hlalela tifilimi leti thyakeke. Leswaku hi kuma mpfuno wa Yehovha, hi fanele hi va etindhawini kumbe eswiyin’weni leswi moya lowo kwetsima wu kumekaka eka swona. Ha swi tiva leswaku moya wa yena wu kumeka eminhlanganweni ya vandlha. Malandza ya Yehovha yo tala ma papalate khombo hi ku yingisa Yehovha hi nkarhi wa minhlangano ya hina. Hikwalaho ka sweswo, ma swi xiyile loko ma sungula ku va ni ku navela ko biha etimbilwini ta wona naswona ma lulamise tindlela ta wona.—Ps. 73:12-17; 143:10.

TSHAMA U RI KARHI U YINGISERISISA RITO RA YEHOVHA

17. Ha yini ku titshemba swi ri ni khombo?

17 Anakanya hi Hosi Davhida wa le Israyele wa khale. Loko a ha ri jaha, u hlule Goliyadi xihontlovila xa Mufilista. Davhida u ve socha, hosi, musirheleri a tlhela a endlela tiko swiboho. Kambe loko Davhida a sungule ku titshemba, mbilu yakwe yi n’wi kanganyisile naswona u endle xidyoho lexikulu na Bati-xeba, a tlhela a hlela leswaku nuna wakwe Uriya a dlayiwa. Loko Davhida a tshinyiwile, hi ku titsongahata u pfumele xihoxo xakwe a tlhela a va ni vuxaka lebyinene na Yehovha.—Ps. 51:4, 6, 10, 11.

18. I yini leswi nga hi pfunaka leswaku hi tshama hi ri karhi hi yingisa rito ra Yehovha?

18 A hi yingiseni ndzayo leyi nga eka 1 Vakorinto 10:12 kutani hi nga titshembi ku tlula mpimo. Leswi hi nga swi kotiki ku ‘kongomisa nkondzo wa hina,’ hi ta yingisa rito ra Yehovha kumbe ra Nala wakwe. (Yer. 10:23) Onge hi nga khongela nkarhi na nkarhi, hi landzela nkongomiso wa moya lowo kwetsima naswona nkarhi hinkwawo hi yingiserisisa rito ra Yehovha.