Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) JULY 2014

 MHAKA YA VUTOMI

Ndzi Feriwa Hi Tatana—Ndzi Kuma Tatana Un’wana

Ndzi Feriwa Hi Tatana—Ndzi Kuma Tatana Un’wana

TATANA u velekiwe hi 1899, eGraz le Austria, hikwalaho a a ri jaha hi nkarhi wa Nyimpi yo Sungula ya Misava. U tsarisiwe ku va socha ra le Jarimani endzhakunyana ka loko Nyimpi ya Vumbirhi ya Misava yi sungurile hi 1939. U dlayiwe hi 1943 enyimpini le Rhaxiya. Khombo ra kona, yoleyo i ndlela leyi ndzi feriweke hi Tatana ha yona loko ndzi ri ni malembe ya kwalomu ka mambirhi ntsena. A ndzi kotanga ku n’wi tiva naswona a ndzi swi navela swinene ku va na tatana, ngopfu-ngopfu loko ndzi xiya leswaku vafana van’wana vo tala exikolweni va na vatatana. Hi ku famba ka nkarhi, loko ndzi ri emalembeni ya kondlo-a-ndzi-dyi, ndzi chavelelekile loko ndzi dyondza hi Tata wa hina wa le tilweni, Tatana la tlakukeke loyi a nga taka a nga fi.—Hab. 1:12.

NDZI TIHLANGANISA NI NHLANGANO WA BOY SCOUTS

Loko ndza ha ri xifanyetana

Loko ndzi ri ni malembe ya nkombo, ndzi ve xirho xa nhlangano wa vantshwa lowu vuriwaka Boy Scouts. Nhlangano lowu lowu sunguriweke hi 1908 eGreat Britain, hi Robert Stephenson Smyth Baden-Powell, ndhuna ya masocha ya le Britain, i wa misava hinkwayo. Hi 1916, u sungule nhlangano wa Wolf Cubs (kumbe Cub Scouts) wa vafana lavatsongo lava a va ringana na mina.

A ndzi swi tsakela loko hi mahelo-vhiki hi etlela ekhwatini ematendeni, hi ambala yunifomo hi tlhela hi macha loko ku chayiwa swigubu. Ngopfu-ngopfu a ndzi swi tsakela ku va ni vafana lavan’wana va nhlangano lowu, ku katsa ni ku yimbelela loko hi ri karhi hi orha ndzilo nimadyambu ni ku tlanga mintlango ekhwatini. Hi tlhele hi dyondza swo tala hi ntumbuluko, leswi endleke leswaku ndzi tsakela swilo leswi endliweke hi Muvumbi wa hina.

Eka nhlangano lowu wa Boy Scouts a hi khutaziwa ku endla nchumu lowunene siku ni siku. Wolawo i marito ya vona yo thopa. A hi xewetana hi marito lama nge, “Tshama U Lunghekile.” Leswi a swi ndzi tsakisa. Eka ntlawa wa hina wa vafana vo tlula dzana, kwalomu ka hafu ya vona a va ri Makhatoliki, hafu a va ri Maprotestente kasi un’we a a ri Mubudha.

Ku sukela hi 1920, ku khomiwe tinhlengeletano ematikweni yo hambana-hambana kumbe minkhuvo endzhaku ka malembe ma nga ri mangani. Ndzi ye eka Nkhuvo wa vunkombo wa World Scout eBad Ischl, le Austria, hi August 1951 ni le ka wa vukaye eSutton Park, ekusuhi ni le Birmingham, eNghilandhi, hi August 1957. Eka lowa vukaye, a ku ri ni vafana va kwalomu ka 33 000 lava humaka ematikweni ni le tindhawini ta 85. Hi tlhele hi endzeriwa hi vanhu va kwalomu ka 750 000 enkhubyeni wolowo, ku katsa ni Hosi ya Xisati Elizabeth wa le Nghilandhi. Eka mina a va fana ni vamakwerhu va le misaveni hinkwayo. A ndzi nga swi tivi hi nkarhi wolowo leswaku ku nga ri khale a ndzi ta tolovelana ni vamakwerhu lava tsakisaka swinene—va moya.

NDZI HLANGANA RO SUNGULA NI MBHONI YA YEHOVHA

Rudi Tschiggerl, loyi a ri ni vuswikoti byo baka, hi yena munhu wo sungula ku ndzi chumayela

Hi ximun’wana xa 1958, a ndzi ri kusuhi ni ku heta ku dyondzela ku tirha ku tisela vanhu swakudya ni swakunwa eGrand Hotel Wiesler le Graz, eAustria. Rudolf Tschiggerl, mutirhi-kulorhi tlhelo munhu la nga ni  vuswikoti byo baka, u ndzi chumayele hi xitshuketa. A ndzi nga si tshama ndzi twa nchumu hi ntiyiso. U rhange a vulavula hi dyondzo ya Vunharhu-un’we ivi a vula leswaku a yi sekeriwanga eBibeleni. A ndzi seketela Vunharhu-un’we naswona a ndzi lava ku n’wi kombisa leswaku a a nga vulavuli ntiyiso. A ndzi n’wi rhandza mutirhi-kulorhi loyi naswona a ndzi lava ku n’wi khorwisa leswaku a tlhelela eKerekeni ya Khatoliki.

Rudolf, loyi a hi n’wi vitana Rudi, u ndzi kumele Bibele. A ndzi lava leswaku yi va yi ri vuhundzuluxeri bya Khatoliki. Ndzi sungule ku yi hlaya naswona swi nga si ya kwihi ndzi kume leswaku Rudi u hoxe xiphephana eBibeleni lexi a xi kandziyisiwe hi Sosayiti ya Watchtower. A ndzi nga xi tsakeli hikuva a ndzi vona onge xi nga ha va xi ri ni marito lama twalaka ma ri ntiyiso kasi a hi ntiyiso. Hambiswiritano, a ndzi tiyimiserile ku burisana na yena hi Bibele. Rudi a a twisisa naswona a a nga ndzi nyiki nchumu lexi kandziyisiweke. Ku ringana kwalomu ka tin’hweti tinharhu, a hi bula nkarhi na nkarhi hi Bibele laha hakanyingi a hi bula ku ya fikela nivusiku.

Endzhaku ka loko ndzi hete ku dyondzela ntirho wo tisela vanhu swakudya ehotela ya le dorobeni ra le ndhawini ya ka hina le Graz, manana u ndzi hakelerile leswaku ndzi ya emahlweni ni dyondzo ya mina exikolweni xo dyondzela ku fambisa hotela. Kutani, ndzi rhurhele eBad Hofgastein laha xikolo lexi a xi ri kona, ku nga doroba leri nga le nkoveni wa tintshava ta Alps. A xi ri ekusuhi ni Grand Hotel le Bad Hofgastein naswona minkarhi yin’wana a ndzi tirha kona leswaku ndzi kuma ntokoto wo tlula leswi ndzi swi dyondzeke etlilasini.

NDZI ENDZERIWA HI VAMAKWERHU VAMBIRHI VA XISATI VA VARHUMIWA

Ilse Unterdörfer na Elfriede Löhr va sungule ku dyondza na mina Bibele hi 1958

Rudi u rhumele adirese ya mina leyintshwa erhavini ra Vienna, kasi rhavi rona ri yi rhumele eka vamakwerhu vambirhi va xisati lava a va ri varhumiwa, ku nga Ilse Unterdörfer na Elfriede Löhr. * Siku rin’wana mutirhi wa le ndhawini yo amukela vaendzi ehotela u ndzi vitanile kutani a ndzi byela leswaku ku ni vavasati vambirhi hala handle emovheni naswona a va lava ku vulavula na mina. A ndzi pfilunganyekile hikuva a ndzi nga va tivi. Kambe ndzi yile eka vona. Endzhakunyana, ndzi kume leswaku a va ri Timbhoni leti a ti ngungumerisa minkandziyiso hi nkarhi wa mfumo wa Manazi eJarimani loko ntirho wa ha yirisiwile emahlweni ka Nyimpi ya Vumbirhi ya Misava. Ni le mahlweni ko va nyimpi yi sungula, va khomiwile hi maphorisa ya le Jarimani ya le xihundleni (Magestapo) kutani va yisiwa ekampeni ya nxaniso eLichtenburg. Kutani, hi nkarhi wa nyimpi, va rhurhiseriwe ekampeni ya le Ravensbrück ekusuhi ni le Berlin.

Vamakwerhu volavo va xisati a va lave ku ringana na manana hi malembe, kutani a ndzi va xixima. Hi yona mhaka a ndzi nga lavi ku va dyela nkarhi ndzi burisana na vona ivi kumbexana endzhaku ka mavhiki kumbe tin’hweti ndzi va byela leswaku a ndza ha swi lavi ku ya emahlweni ndzi burisana na vona. Kutani ndzi va komberile leswaku va ndzi tsalela matsalwa lama vulavulaka hi dyondzo ya Khatoliki ya ntlhandlamano wa vaapostola. Ndzi va byele leswaku ndzi ta ya na wona eka mufundhisi wa kwalaho kutani ndzi ya burisana na yena hi wona. A ndzi anakanya leswaku hi nkarhi wolowo ndzi ta swi vona leswaku ntiyiso hi wihi.

NDZI DYONDZA HI TATANA WA XIVIRI LA KWETSIMAKA WA LE TILWENI

Dyondzo ya Rhoma Khatoliki ya ntlhandlamano wa vaapostola yi vula leswaku vapapa va tshama va ri karhi  va tlhandlamana ku sukela eka muapostola Petro. (Kereke leyi yi hlamusela marito ya Yesu lama tshahiweke eka Matewu 16:18, 19 hi ndlela leyi hoxeke.) Kereke ya Khatoliki yi tlhela yi vula leswaku mupapa a nga hoxisi etimhakeni ta dyondzo loko a vulavula a ri eka xikhundlha xa yena. A ndzi swi tshemba leswi naswona a ndzi ehleketa leswaku loko mupapa, loyi Makhatoliki ma n’wi vitanaka Tatana wo Kwetsima, a nga hoxisi etimhakeni ta dyondzo ni leswi a vuleke leswaku dyondzo ya Vunharhu-un’we i ntiyiso, yi fanele yi ri ntiyiso. Kambe loko a hoxisa, dyondzo yoleyo yi nga ha va yi ri mavunwa. A swi hlamarisi leswi Makhatoliki yo tala ma tekaka dyondzo ya ntlhandlamano wa vaapostola yi ri ya nkoka swinene, tanihi leswi ntiyiso kumbe mavunwa ya tidyondzo tin’wana ta Khatoliki wu titshegeke hi dyondzo yoleyo.

Loko ndzi ye eka mufundhisi, a nga swi hlamulanga swivutiso swa mina, kambe u humese buku exelufini yakwe leyi vulavulaka hi dyondzo ya Khatoliki ya ntlhandlamano wa vaapostola. Ndzi fambe na yona ekaya hilaha a ringanyeteke hakona, ndzi fika ndzi yi hlaya kutani ndzi tlhelela eka yena ndzi ri ni swivutiso swo tala. Eku heteleleni leswi mufundhisi loyi a a tsandzeka ku hlamula swivutiso swa mina u te: “A ndzi nge ku khorwisi na wena a wu nge ndzi khorwisi. . . . Swi helela kwala!” A a nga ha swi lavi ku tlhela a burisana na mina.

Hi nkarhi wolowo, a ndzi tiyimiserile ku dyondza Bibele na Ilse na Elfriede. Va ndzi dyondzise swo tala hi Yehovha Xikwembu, Tatana wa xiviri la Kwetsimaka wa le tilweni. (Yoh. 17:11) A ku nga si va ni vandlha endhawini yoleyo, kutani vamakwerhu lavambirhi va xisati a va fambisa minhlangano emutini wun’wana lowu ndyangu wa kona a wu tsakela. A ku ta vanhu vatsongo. Vamakwerhu volavo va xisati a va cincana ku fambisa minhlangano yoleyo tanihi leswi a ku nga ri na makwerhu wa xinuna la khuvuriweke loyi a a ta rhangela. Minkarhi yin’wana makwerhu wa xinuna wa le ndhawini yin’wana a a ta a ta nyikela nkulumo ya le rivaleni endhawini leyi hirhiweke.

NDZI SUNGULA KU CHUMAYELA

Ilse na Elfriede va sungule ku dyondza na mina Bibele hi October 1958 naswona ndzi khuvuriwe endzhaku ka tin’hweti tinharhu hi January 1959. Loko ndzi nga si khuvuriwa, ndzi kombele ku famba na vona hi yindlu ni yindlu leswaku ndzi vona ndlela leyi ntirho wo chumayela a wu endliwa ha yona. (Mint. 20:20) Endzhaku ka loko ndzi fambe na vona kan’we, ndzi kombele nsimu ya mina leyi a ndzi ta tirha eka yona. Va ndzi avele ximutana lexi a ndzi ta ya eka xona ndzi ya chumayela hi yindlu ni yindlu ndzi ri ndzexe ndzi tlhela ndzi endla maendzo yo vuyela eka lava tsakelaka. Makwerhu wa xinuna wo sungula loyi ndzi fambeke na yena hi ya chumayela hi yindlu ni yindlu a ku ri mulanguteri wa xifundzha loyi endzhaku ka nkarhi a hi endzeleke.

Hi 1960, endzhaku ka loko ndzi hete ku dyondzela ku tirha ehotela, ndzi tlhelele edorobeni leri a ndzi huma eka rona leswaku ndzi ya ringeta ku pfuna maxaka ya mina leswaku ma dyondza ntiyiso wa le Bibeleni. Ku ta fikela ni sweswi, a nga kona loyi a amukeleke ntiyiso, kambe van’wana va kombisa ku tsakela.

NDZI NGHENELA NTIRHO WA NKARHI HINKWAWO

Loko ndzi ri ni malembe ya va-20

Hi 1961 emavandlheni ku hlayiwe mapapila lama humaka ehofisini ya rhavi lawa a ma khutaza vamakwerhu ku phayona. A ndzi nga si teka naswona a ndzi hanye kahle, kutani ndzi swi vonile leswaku a ndzi nga ri na xivangelo xa ku nga phayoni. Ndzi vulavule na Kurt Kuhn, mulanguteri wa muganga leswaku u swi vona njhani leswaku ndzi tirha tin’hweti ti nga ri tingani leswaku ndzi ta kota ku xava movha, lowu nga ta ndzi pfuna loko ndzi phayona. U te yini? U te: “Xana Yesu ni vaapostola a va lava movha leswaku va nghenela ntirho wa nkarhi hinkwawo?” Sweswo swi ndzi pfunile. Ndzi kunguhate ku sungula ku phayona hi ku hatlisa. Kambe leswi a ndzi tirha tiawara ta 72 vhiki rin’wana ni rin’wana erhesiturente ya le hotela, a ndzi fanele ndzi rhanga ndzi endla ku cinca ko karhi.

 Ndzi kombele muthori wa mina loko a ta ndzi pfumelela ku tirha tiawara ta 60. U amukele xikombelo xa mina a tlhela a ndzi hakela muholo lowu fanaka. Endzhakunyana, ndzi n’wi komberile loko swi ta koteka ku va ndzi tirha tiawara ta 48 hi vhiki. U tlhele a amukela xikombelo xa mina naswona a nga wu hungutanga muholo wa mina. Ndzi tlhele ndzi kombela leswaku a ndzi pfumelela ku tirha 36 wa tiawara hi vhiki kumbe tiawara ta tsevu hi masiku ya tsevu, kutani na xona xikombelo lexi u xi amukerile. Lexi hlamarisaka a ndza ha hola muholo lowu fanaka! Swi tikomba onge muthori wa mina a a nga swi lavi leswaku ndzi famba. Ndzi sungule ku va phayona ra nkarhi hinkwawo hikwalaho ka sweswo. Hi nkarhi wolowo, maphayona a ma fanele ma vika tiawara ta 100 hi n’hweti.

Endzhaku ka tin’hweti ta mune, ndzi hlawuriwe ku va phayona ro hlawuleka ni ku va nandza wa vandlha evandlheni leritsongo exifundzheni xa Carinthia, edorobeni ra Spittal an der Drau. Hi nkarhi wolowo, maphayona yo hlawuleka a ma fanele ma vika tiawara ta 150 hi n’hweti. A ndzi nga ri na munhu wo phayona na yena, kambe a ndzi yi teka yi ri ya nkoka swinene ndlela leyi Gertrude Lobner, makwerhu wa xisati loyi a a ri xandla xa nandza wa vandlha a ndzi seketeleke ha yona ensin’wini. *

KU CINCA SWIAVELO HI KU HATLISA

Hi 1963, ndzi hlawuriwe ku va mulanguteri wa muganga. Minkarhi yin’wana a ndzi famba hi xitimela ndzi suka eka vandlha leri ndzi ya eka rin’wana, ndzi rhwale tibege to tika. Vamakwerhu vo tala a va nga ri na timovha, kutani a ku nga ri na munhu loyi a ta ndzi landza exitichini xa xitimela. Leswaku ndzi nga tikokeli mahlo ya vanhu, a ndzi nga swi lavi ku khandziya thekisi loko ndzi ya emutini lowu a ndzi ta tshama eka wona, kutani a ndzi famba hi milenge.

Hi 1965, ndzi rhambiwe ku ya eka ntlawa wa vu-41 wa Xikolo xa Giliyadi, ndzi nga si teka. Vo tala lava a ndzi ri na vona eka ntlawa wolowo a va nga si nghenela vukati. Lexi ndzi hlamariseke swinene, loko ndzi thwasile ndzi averiwe ku tlhelela eAustria leswaku ndzi ya emahlweni ni ntirho wo endzela mavandlha. Hambiswiritano, loko ndzi nga si suka eUnited States, ndzi komberiwe ku famba ni mulanguteri un’wana wa muganga mavhiki ya mune. Ndzi swi tsakele swinene ku tirha na Anthony Conte, makwerhu la rhandzekaka loyi na yena a a rhandza nsimu naswona a a ri ni vuswikoti swinene ensin’wini. Hi tirhe swin’we en’walungwini wa New York endhawini leyi vuriwaka Cornwall.

Hi siku ra hina ra mucato

Loko ndzi tlhelela eAustria, ndzi averiwe ku endzela xifundzha lexi eka xona ndzi hlanganeke na Tove Merete, makwerhu wa xisati wo saseka loyi a a nga si tekiwa. U kuriseriwe entiyisweni ku sukela loko a ri ni malembe ya ntlhanu. Loko vamakwerhu va hi vutisa leswaku hi hlangane njhani, hi va hlamula hi ndlela ya misavu hi ku, “Rhavi hi rona ri nga hlela leswaku hi hlangana.” Hi tekane endzhaku ka lembe, hi April 1967 naswona hi pfumeleriwe ku ya emahlweni hi tirha swin’we entirhweni wo endzela mavandlha.

Haxawa xa kona, ndzi xiye leswaku Yehovha hi musa wakwe lowu nga faneriwiki, u ndzi amukele tanihi n’wana wakwe wa moya. Xisweswo ndzi sungule ku va ni vuxaka byo hlawuleka ni Tata wa mina wa le tilweni swin’we ni hinkwavo lava hi ku ya hi Varhoma 8:15, va ‘huwelelaka va ku: “Abba, Tatana!”’

Mina na Merete hi ye emahlweni hi tirha swin’we entirhweni wo endzela mavandlha ni swifundzha ku fikela hi 1976. Minkarhi yin’wana hi xixika, a hi boheka ku etlela emakamareni lama titimelaka swinene. Siku rin’wana loko hi pfuka hi kume leswaku emakumu ka  nkumba wa hina wa le henhla a ku tiyile ku tlhela ku va ko basa hikwalaho ka moya wa hina lowu a hi wu hefemula! Hi hetelele hi endle xiboho xo famba ni hitara leyitsongo ya gezi leswaku hi ta kota ku kufumeta kamara nivusiku. Etindhawini tin’wana, loko hi lava ku tirhisa xihambukelo nivusiku, a hi fanele hi famba egambokweni hi ya eka xihambukelo xa le handle lexi hi ntolovelo a xi nghenisa moya wo titimela. Nakambe leswi a hi nga ri na ndhawu ya hina, hakanyingi hi Musumbhunuku a hi tshama ekaya leri a hi amukeriwe eka rona hi vhiki ro hlawuleka. Kutani hi Ravumbirhi nimixo a hi ya eka vandlha leri landzelaka.

Swa ndzi tsakisa ku vula leswaku nkatanga la rhandzekaka u ndzi seketele swinene malembe wolawo hinkwawo. U rhandza nsimu naswona a ndzi si tshama ndzi boheka ku n’wi khutaza ku ya ensin’wini. Nakambe u rhandza vamakwerhu naswona wa khathala swinene hi vanhu van’wana. Sweswo swi ndzi pfune swinene.

Hi 1976 hi rhambiwile leswaku hi ya tirha erhavini ra le Austria eVienna naswona ndzi hlawuriwe ku va xirho xa Komiti ya Rhavi. Hi nkarhi wolowo, rhavi ra le Austria a ri langutela ntirho wa le matikweni yo hlayanyana ya le Yuropa Vuxa ri tlhela ri hlela leswaku ku rhumeriwa minkandziyiso hi vutlhari ematikweni wolawo. Makwerhu Jürgen Rundel hi yena loyi a a rhangela entirhweni lowu, a rhandza ku teka goza ku sungula. Ndzi ve ni lunghelo ro tirha na yena naswona endzhakunyana ndzi komberiwe ku langutela ntirho wa vuhundzuluxeri wa tindzimi ta khume ta le Yuropa Vuxa. Jürgen ni nsati wakwe, Gertrude va ha tirha hi ku tshembeka va ri maphayona yo hlawuleka eJarimani. Ku sukela hi 1978, rhavi ra le Austria a ri andlala rungula ra timagazini eka khompyuta onge hiloko ri lo kandziyisiwa kutani ri ti kandziyisa hi tindzimi ta tsevu eka muchini lowutsongo. Hi tlhele hi rhumela swikhokhelo ematikweni yo hambana-hambana lawa a ma swi kombela. Otto Kuglitsch, loyi sweswi a tirhaka ni nsati wakwe, Ingrid, erhavini ra le Jarimani, a ku ri yena loyi a tirhana ni sweswo.

ILe Austria, ndzi kote ku chumayela hi tindlela to hambana-hambana, ku katsa ni ku chumayela exitarateni

Vamakwerhu va le Yuropa Vuxa va tlhele va humesa minkandziyiso ematikweni ya vona hi ku tirhisa michini yo endla tikopi kumbe hi ku tlhela va kandziyisa rungula leri a ri kumeka eka tifilimi. Hambiswiritano, a va ha wu lava mpfuno wa le matikweni man’wana. Yehovha u sirhelele ntirho lowu naswona erhavini, a hi va rhandza vamakwerhu lava va bohekeke ku tirha ehansi ka swiyimo swo tika ni loko va yirisiwile ku ringana malembe yo tala.

RIENDZO RO HLAWULEKA RO YA EROMANIA

Hi 1989, ndzi ve ni lunghelo ro ya eRomania na Makwerhu Theodore Jaracz, xirho xa Huvo leyi Fumaka. Xikongomelo xa riendzo rero a ku ri ku ya pfuna  vamakwerhu vo tala leswaku va tlhelela enhlengeletanweni. Ku sukela hi 1949, va tshike ku tihlanganisa ni nhlengeletano hikwalaho ka swivangelo swo hambana-hambana naswona a va vumbe mavandlha ya vona. Kambe, va ye emahlweni va chumayela ni ku khuvula vanhu. Va tlhele va yisiwa ekhotsweni hikwalaho ko ala ku hlanganyela eka tipolitiki, ku fana ni vamakwerhu lava a va ri xiphemu xa nhlengeletano leyi a yi amukeleka entsindza wa misava hinkwayo. Ntirho wa hina a wa ha yirisiwile eRomania, kutani hi hlangane exihundleni ekaya ka Makwerhu Pamfil Albu swin’we ni vakulu va mune ni swirho swa Komiti ya Tiko ra Romania leyi amukelekaka. Hi tlhele hi ta na Rolf Kellner wo huma eAustria leswaku a ta hi tolokela.

Hi vusiku bya vumbirhi bya nhlangano lowu a hi ri na wona, Makwerhu Albu u khorwise vakulu-kulobye va mune leswaku va tihlanganisa na hina, a ku, “Loko hi nga swi endli sweswi, swi nga endleka hi nga ha kumi nkarhi wun’wana.” Endzhaku ka sweswo, vamakwerhu va kwalomu ka 5 000 va tlhelele enhlengeletanweni. Hakunene Yehovha u hlurile kasi Sathana u khomisiwe tingana!

Loko lembe ra 1989 ri ya eku heleni, loko Vukhomunisi byi nga si hela eYuropa Vuxa, mina ni nsati wa mina hi kume xirhambo lexi humaka eka Huvo leyi Fumaka xo ya tirha entsindza wa misava hinkwayo le New York. Sweswo swi hi hlamarisile swinene. Hi sungule ku tirha eBethele ya le Brooklyn hi July 1990. Hi 1992, ndzi hlawuriwile leswaku ndzi pfuneta eka Komiti ya Ntirho ya Huvo leyi Fumaka, naswona ku sukela hi July 1994, ndzi ve ni lunghelo ro va xirho xa Huvo leyi Fumaka.

NDZI ANAKANYA HI SWILO LESWI HUNDZEKE NI KU LANGUTELA VUMUNDZUKU

Ndzi ri ni nsati wa mina eBrooklyn le New York

Minkarhi leyi ndzi nga tshama ndzi tirha ku tisela vanhu swakudya ni swakunwa ehotela yi hundze khale. Sweswi ndzi ni lunghelo ro hlanganyela eku lunghiseleleni ni le ku phameleni ka swakudya swa moya eka vamakwerhu va le misaveni hinkwayo. (Mat. 24:45-47) Loko ndzi anakanya hi malembe yo tlula 50 lawa ndzi ma heteke ndzi ri eka ntirho wa nkarhi hinkwawo, ndzi tlangela swinene ndzi tlhela ndzi tsaka hikwalaho ka leswi Yehovha a katekisaka vamakwerhu va hina emisaveni hinkwayo. Ndzi rhandza ku va kona emintsombanweni ya hina ya matiko, laha ku kandziyisiwaka mhaka yo dyondza hi Yehovha, Tata wa hina wa le tilweni ni ntiyiso wa Bibele.

Ndzi khongelela leswaku vanhu va timiliyoni va dyondza Bibele, va amukela ntiyiso naswona va tirhela Yehovha hi vun’we swin’we ni vamakwerhu lava nga Vakreste emisaveni hinkwayo. (1 Pet. 2:17) Ndzi swi langutele hi mahlo-ngati ku vona vafi va pfuxiwa laha misaveni, ndzi ri le tilweni kutani eku heteleleni ndzi kuma tata wa mina wa nyama. Ndzi tshemba leswaku yena na manana ni maxaka ya mina man’wana lama rhandzekaka va ta lava ku gandzela Yehovha eParadeyisini.

Ndzi swi langutele hi mahlo-ngati ku vona vafi va pfuxiwa laha misaveni, ndzi ri le tilweni kutani eku heteleleni ndzi kuma tata wa mina wa nyama

^ ndzim. 15 Vona mhaka ya vutomi ya vona eka Xihondzo xo Rindza (xa Xinghezi) xa November 1, 1979.

^ ndzim. 27 Sweswi, ematshan’weni ya nandza wa vandlha ni xandla xa nandza wa vandlha, ku ni muhlanganisi wa huvo ya vakulu ni matsalana.