Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) JUNE 2014

Swivutiso Swa Vahlayi

Swivutiso Swa Vahlayi

Xana swi fanerile leswaku Vakreste va hisa ntsumbu?

Matsalwa a ma nyikeli vumbhoni lebyi lwisanaka ni ku hisa ntsumbu.

Ku ni marungula man’wana ya le Bibeleni lama hlamuselaka leswaku ku ni mintsumbu kumbe marhambu ya vanhu lava feke lama hisiweke. (Yox. 7:25; 2 Tikr. 34:4, 5) Leswi swi nga ha va swi kombise leswaku vanhu volavo a va nga faneriwi hi ku lahliwa hi ndlela yo xiximeka. Kambe loko ntsumbu wu hisiwa, a hi minkarhi hinkwayo a swi vula leswaku a wu nga faneriwi hi ku lahliwa hi ndlela leyi xiximekaka.

Leswi hi nga swi vona emhakeni ya ku fa ka Hosi Sawulo ni majaha yakwe manharhu. Hi mune ka vona va fe va ri karhi va lwa ni Vafilista. Un’wana wa majaha yakwe a ku ri Yonathani, loyi a a ri munghana lonkulu tlhelo museketeri wo tshembeka wa Davhida. Loko Vaisrayele lava nga ni vurhena lava a va tshama eYabexe-giliyadi va twa leswi humeleleke, va ye va ya teka mintsumbu yoleyo ya mune, va yi hisa, kutani va celela marhambu ya kona. Hi ku famba ka nkarhi Davhida u bumabumele Vaisrayele volavo hi leswi va swi endleke.—1 Sam. 31:2, 8-13; 2 Sam. 2:4-6.

Ntshembo wa le Matsalweni wa vafi i ku pfuxiwa eku feni—ku va Xikwembu xi endla leswaku munhu a tlhela a hanya. Ku nga khathariseki leswaku munhu la feke wa hisiwa kumbe a nga hisiwi, Yehovha a nga tsandzeki ku pfuxa munhu eku feni a ri ni miri lowuntshwa. Vaheveru vanharhu vo tshembeka lava a va fanele va dlayiwa hi ku hoxiwa ekheleni ra ndzilo hilaha Hosi Nebukadnetsara a a lerise hakona, a va kalanga va chava ku dlayiwa hi ndzilo hikuva Xikwembu a xi ta va pfuxa. (Dan. 3:16-18) Sweswo swi ve tano ni le ka malandza yo tshembeka ya Yehovha lawa a ma fanele ma dlayiwa ivi endzhaku ma hisiwa etikampeni ta nxaniso ta Manazi. Malandza yo tshembeka ya Xikwembu yo hambana-hambana ma fe loko ku ve ni ku buluka ko karhi kumbe hi tindlela tin’wana leti endleke leswaku ku lahleka vuthala bya lomu mintsumbu kumbe marhambu ya vona swi nga kona. Kambe ma ta pfuxiwa.—Nhlav. 20:13.

Yehovha a nga boheki ku tlhela a hlanganisa miri wa khale wa munhu leswaku a ta kota ku n’wi pfuxa eku feni. Leswi swi kombisiwa hi ndlela leyi Xikwembu xi va pfuxaka ha yona Vakreste lava totiweke leswaku va ya hanya etilweni. Ku fana na Yesu, loyi a “hanyisiweke a ri wa moya,” Vakreste lava totiweke na vona va pfuxiwa va ri vanhu lava fanaka kambe va ri ni mimiri ya moya. A xi kona xirho xa miri wa vona wa nyama lexi xi fambaka na vona etilweni.—1 Pet. 3:18; 1 Kor. 15:42-53; 1 Yoh. 3:2.

Ntshembo wa hina wa ku pfuxiwa eku feni, a wu titsheganga hi leswi nga ha endliwaka hi ntsumbu, kambe wu titshege hi ku va ni ripfumelo eka vuswikoti bya Xikwembu byo hetisisa switshembiso swa xona. (Mint. 24:15) I ntiyiso leswaku hi nga ha va hi nga yi twisisi hi ku helela ndlela leyi Xikwembu xi ri endleke ha yona singita ra ku pfuxa vanhu eku feni enkarhini lowu hundzeke kumbe ndlela leyi xi nga ta va pfuxa ha yona enkarhini lowu taka. Nilokoswiritano, hi veka ntshembo wa hina eka Yehovha. U hi nyike “xitiyisekiso” hi ku pfuxa Yesu.—Mint. 17:31; Luka 24:2, 3.

Vakreste va fanele va yi tekela enhlokweni mikhuva, langutelo ra vanhu va le ndhawini ya ka vona ni swilaveko swa nawu loko swi ta emhakeni yo lahla vanhu lava feke. (2 Kor. 6:3, 4) Kutani, i xiboho xa munhu hi yexe kumbe xa ndyangu xa leswaku ntsumbu wu ta hisiwa kumbe wu ta lahliwa kunene.