Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) MAY 2014

‘Swakudya Swa Mina I Ku Endla Ku Rhandza Ka Xikwembu’

‘Swakudya Swa Mina I Ku Endla Ku Rhandza Ka Xikwembu’

I yini lexi ku endlaka u tsaka swinene? Xana i vuxaka lebyi vanhu va vaka na byona byo tanihi ku nghenela vukati, ku va ni ndyangu kumbe ku endla xinghana? A swi kanakanisi leswaku swa ku tsakisa ku dya swakudya ni vanhu lava u va rhandzaka. Kambe, tanihi nandza wa Yehovha, xana ku endla ku rhandza ka Xikwembu, ku dyondza Rito ra xona ni ku chumayela mahungu lamanene a swi ku endli u tsaka ngopfu?

Eka risimu leri dzunisaka Muvumbi, Hosi Davhida wa le Israyele wa khale u yimbelele a ku: “Oho Xikwembu xanga, ndzi tsakisiwe hi ku endla ku rhandza ka wena, ni nawu wa wena wu le ndzeni ka swirho swa mina swa le ndzeni.” (Ps. 40:8) Ku endla ku rhandza ka Xikwembu a swi n’wi tsakisa swinene Davhida ku nga khathariseki swiyimo swo tika ni mintshikilelo leyi a langutaneke na yona evuton’wini. Entiyisweni, Davhida a ku nga ri yena ntsena mugandzeri wa Yehovha loyi a tsakisiweke hi ku tirhela Xikwembu xa ntiyiso.

Loko muapostola Pawulo a tirhisa marito ya Pisalema 40:8 eka Mesiya kumbe Kreste, u tsarile: “Loko [Yesu] a fika emisaveni u ri: ‘“Xitlhavelo ni gandzelo a wu swi lavanga, kambe u ndzi lunghiselele miri. A wu ma amukelanga magandzelo yo hisiwa lama heleleke ni gandzelo ra xidyoho.” Kutani ndzi te, “Waswivo! Ndza ta (ebukwini leyi songiwaka, swi tsariwile malunghana na mina) ku ta endla ku rhandza ka wena, Wena Xikwembu.”’”—Hev. 10:5-7.

Loko Yesu a ha ri laha misaveni, a a swi tsakela ku hlalela ntumbuluko, ku va swin’we ni vanghana ni ku dya swakudya ni van’wana. (Mat. 6:26-29; Yoh. 2:1, 2; 12:1, 2) Kambe leswi a a swi tsakela swinene ni leswi a swi n’wi tsakisa ngopfu a ku ri ku endla ku rhandza ka Tata wakwe wa le tilweni. Entiyisweni Yesu u te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yoh. 4:34; 6:38) Vadyondzisiwa va Yesu va dyondze xihundla xo va ni ntsako wa xiviri eka N’wini wa vona. Va chumayele van’wana rungula ra Mfumo hi ntsako lowukulu, hi ku swi rhandza ni hi ku hiseka.—Luka 10:1, 8, 9, 17.

‘FAMBANI MI YA ENDLA VADYONDZISIWA’

Yesu u lerise valandzeri vakwe a ku: “Fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona. Kutani, maswivo, ndzi na n’wina masiku hinkwawo ku fikela emakumu ka mafambiselo ya swilo.” (Mat. 28:19, 20) Ku endla ntirho lowu swi katsa ku chumayela vanhu kun’wana ni kun’wana laha va kumekaka kona, ku endla maendzo yo vuyela eka lava kombiseke ku  tsakela ni ku fambisa tidyondzo ta Bibele ni vanhu volavo. Ku endla ntirho lowu swi nga tisa ntsako lowukulu.

Rirhandzu ri hi susumetela ku ya emahlweni hi chumayela hambiloko hi hlangana ni vanhu lava nga ri tsakeliki rungula ra hina

Ku nga khathariseki leswaku vanhu va ri tsakela rungula ra hina kumbe a va ri tsakeli, langutelo ra hina hi rona ri endlaka hi tsakela ntirho wa nsimu. Ha yini hi ya emahlweni hi chumayela mahungu lamanene hambiloko vanhu van’wana va nga ri tsakeli rungula ra hina? Hikuva ha swi xiya leswaku ku endla ntirho wo chumayela hi Mfumo ni wo endla vadyondzisiwa i xikombiso xa leswaku hi rhandza Xikwembu ni vaakelani va hina. Vutomi bya hina ni bya vaakelani va hina byi le khombyeni. (Ezek. 3:17-21; 1 Tim. 4:16) A hi kambisiseni tinhla tin’wana leti pfuneke vatirhi-kulorhi vo tala leswaku va tshama va ri karhi va hiseka kumbe va tlhela va sungula ku hisekela ku tirha nsimu leyi swi tikaka ku tirha eka yona.

TIRHISA NKARHI WUN’WANA NI WUN’WANA LOWU KU PFULEKELAKA

Ku tirhisa swivutiso leswi faneleke loko hi ri ensin’wini hakanyingi swi endla leswaku ku va ni vuyelo lebyinene. Siku rin’wana nimixo, Amalia u vone wanuna un’wana a ri eku hlayeni ka phepha-hungu ephakeni. U ye eka yena ivi a n’wi vutisa loko a tshame a hlaya mahungu lamanene. Loko a vule leswaku a a nga si tshama a ma hlaya, Amalia u te: “Ndzi ku tisele mahungu lamanene ya Mfumo wa Xikwembu.” Leswi swi koke rinoko ra wanuna loyi naswona u pfumele ku dyondzeriwa Bibele. Entiyisweni, Amalia u kote ku sungula tidyondzo tinharhu ta Bibele ephakeni yoleyo.

Janice u endle leswaku ndhawu leyi a tirhaka eka yona yi va nsimu ya yena. Loko murindzi ni mutirhi un’wana va tsakele xihloko xo karhi lexi a xi ri eka Xihondzo xo Rindza, Janice u va byele leswaku u ta va tisela timagazini nkarhi na nkarhi. U endle leswi fanaka eka munhu un’wana loyi a tirhaka na yena, loyi a tsakisiweke hi swihloko swo hambana-hambana leswi a swi ri eka Xihondzo xo Rindza ni Xalamuka! Leswi swi endle leswaku mutirhi un’wana a tikombelela timagazini. Janice u te: “Lowu i nkateko lowu humaka eka Yehovha hakunene!” Eku heteleleni a a ri ni vanhu va 11 lava a a va yisela timagazini nkarhi na nkarhi entirhweni.

TSHAMA U RI NI LANGUTELO LERINENE

Mulanguteri un’wana wa xifundzha u khutaze vahuweleri leswaku loko va gimeta bulo ra vona ni n’wini wa muti loko va chumayela hi yindlu ni yindlu, va nga vuli ntsena leswaku va ta tlhela va vuya siku rin’wana. Ematshan’weni ya sweswo, va nga ha n’wi vutisa va ku: “Xana u nga swi tsakela leswaku ndzi ku komba ndlela leyi dyondzo ya Bibele yi fambisiwaka ha yona?” kumbe “Hi rihi siku ni nkarhi lowu u nga lavaka leswaku ndzi vuya ha wona leswaku hi ta ya emahlweni ni bulo ra hina?” Mulanguteri loyi wa xifundzha u vule leswaku vamakwerhu va xinuna ni va xisati va le vandlheni rin’wana leri a tshameke a ri endzela, va sungule tidyondzo ta le kaya ta Bibele ta 44 hi vhiki rin’we, hi ku tirhisa endlelo leri.

Ku endla maendzo yo vuyela hi ku hatlisa—hambi ku ri endzhaku ka masiku ma nga ri mangani—swi nga va ni vuyelo lebyinene. Ha yini? Hikuva loko hi endla tano hi kombisa leswaku hi lava ku pfuna vanhu lava  nga ni timbilu letinene leswaku va twisisa Bibele. Wansati un’wana loko a vutisiwile leswaku ha yini a pfumele ku dyondzeriwa Bibele hi Timbhoni ta Yehovha u te: “Ndzi sungule ku dyondza hikuva ti ndzi kombise musa ni rirhandzu.”

U nga ha vutisa n’wini wa muti u ku: “Xana u nga swi tsakela leswaku ndzi ku komba ndlela leyi dyondzo ya Bibele yi fambisiwaka ha yona?”

Endzhakunyana ka loko Madaí a ye eXikolweni xa Ntirho wa Vuphayona, a a fambisa tidyondzo ta Bibele ta 15 naswona tin’wana ta ntlhanu u ti nyike vahuweleri van’wana. Swichudeni swa yena swo hlayanyana swa Bibele swi sungule ku va kona eminhlanganweni ya hina nkarhi na nkarhi. I yini leswi pfuneke Madaí ku sungula tidyondzo to tarisa xileswi? Exikolweni va khutaziwe hi xilaveko xo hambeta va tlhelela eka vanhu kukondza va kuma munhu wo sungula la kombiseke ku tsakela. Mbhoni yin’wana leyi pfuneke vanhu vo tala leswaku va dyondza ntiyiso wa le Bibeleni yi ri: “Ndzi dyondze leswaku ku tiyimisela ku endla maendzo yo vuyela i swa nkoka leswaku hi pfuna vanhu lava lavaka ku tiva Yehovha.”

Loko hi hatla hi endla maendzo yo vuyela hi kombisa leswaku ha khathala swinene hi vanhu lava lavaka ku twisisa Bibele

Ku endla maendzo yo vuyela ni ku fambisa tidyondzo ta Bibele swi lava matshalatshala lamakulu. Hambiswiritano, vuyelo bya kona byi tlula matshalatshala hinkwawo lama lavekaka. Loko hi tinyiketela entirhweni wo chumayela hi Mfumo, hi nga pfuna van’wana leswaku va “fikelela vutivi lebyi kongomeke bya ntiyiso,” naswona sweswo swi nga endla leswaku va ponisiwa. (1 Tim. 2:3, 4) Eka hina swi nga endla leswaku hi eneriseka hi tlhela hi tsaka hi ndlela leyi nga pimanisiwiki na nchumu.