Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) FEBRUARY 2014

“Vona Ku Tsakisa Ka Yehovha”

“Vona Ku Tsakisa Ka Yehovha”

Swiyimo leswi tshikilelaka swi nga hi khumba hi ndlela yo biha. Hi nga tshamela ku anakanya ha swona, swi hi tsanisa swi tlhela swi khumba ndlela leyi hi byi tekaka ha yona vutomi. Hosi Davhida wa le Israyele wa khale u hlaseriwe hi maxangu yo tala. U langutane njhani na wona? Eka pisalema leyi khumbaka mbilu, Davhida u hlamurile a ku: “Ndzi huwelele hi rito ra mina eka Yehovha, ndzi kombela mpfuno; ndzi kombele Yehovha hi rito ra mina leswaku a ndzi komba tintswalo. Ndzi hambete ndzi phofula mhaka leyi ndzi karhataka emahlweni ka yena; ndzi ye emahlweni ndzi n’wi byela hi maxangu ya mina, loko moya wa mina wu tsana endzeni ka mina. Kutani wena u yi tivile ndlela ya mina.” Davhida hi ku titsongahata u khongele eka Xikwembu a kombela mpfuno.—Ps. 142:1-3.

Eminkarhini yo tika, Davhida hi ku titsongahata u khongele eka Yehovha a kombela mpfuno

Eka pisalema yin’wana, Davhida u yimbelerile a ku: “Nchumu wun’we lowu ndzi wu kombeleke eka Yehovha—hi lowu ndzi nga ta wu rindzela, leswaku ndzi tshama endlwini ya Yehovha masiku hinkwawo ya vutomi bya mina, ndzi vona ku tsakisa ka Yehovha ni ku languta tempele yakwe hi ku tlangela.” (Ps. 27:4) Davhida a a nga ri Mulevhi, kambe n’wi anakanye a yime ehandle ka xivava xo kwetsima ekusuhi ni tabernakela laha vugandzeri bya ntiyiso a byi endleriwa kona hi nkarhi wolowo. Mbilu ya Davhida a yi tele ku nkhensa lerova a a lava ku heta masiku yakwe hinkwawo a ri kwalaho kutani a “vona ku tsakisa ka Yehovha.”

Marito lama nge “ku tsakisa” ma hlanganisiwa ni xiyimo kumbe mfanelo ya ku va “la amukelekaka kumbe la tsakisaka mianakanyo, matitwelo kumbe switwi.” Minkarhi hinkwayo Davhida a a ri tlangela lunghiselelo ra vugandzeri ra Xikwembu. Hi nga ha tivutisa hi ku, ‘Xana ndzi titwa hi ndlela leyi Davhida a a titwa ha yona?’

‘KU LANGUTA HI KU TLANGELA’ EKA LUNGHISELELO RA XIKWEMBU

Enkarhini wa hina, lunghiselelo ra Yehovha ro n’wi tshinelela a ri endleriwi emuakweni wo karhi. Ku ri na sweswo, ri katsa tempele leyikulu ya moya ya Xikwembu—lunghiselelo ro kwetsima ra vugandzeri bya ntiyiso. * Loko hi ri ‘languta hi ku tlangela’ lunghiselelo leri, na hina hi nga “vona ku tsakisa ka Yehovha.”

Anakanya hi alitari ya koporo ya gandzelo ro hisiwa leyi a yi ri emahlweni ka nyangwa ya tabernakela. (Eks. 38:1, 2; 40:6) Alitari yoleyo a a yi yimela ku tiyimisela ka Xikwembu ku amukela miri wa Yesu wa nyama leswaku wu va gandzelo. (Hev. 10:5-10) Anakanya hi leswi sweswo swi vulaka swona eka hina! Muapostola Pawulo u tsarile: “Hi vuyelelane ni Xikwembu hi rifu ra N’wana wa xona enkarhini lowu a hi ri valala.” (Rhom. 5:10) Loko hi kombisa ripfumelo eka ngati leyi halatiweke ya Yesu, hi nga amukeleka hi tlhela hi tshembiwa hikwalaho ko va vanghana va Xikwembu. Hikwalaho, hi va ni “xinakulobye na Yehovha.”—Ps. 25:14.

Leswi ‘swidyoho swa hina swi hlanguriwaka,’ hi va ni ‘tinguva ta ku phyuphyisiwa leti humaka eka Yehovha.’ (Mint. 3:19) Xiyimo xa hina xi fana ni xa mubohiwa loyi a tisolaka hikwalaho ka swilo leswi a swi endleke enkarhini lowu hundzeke kutani a hundzuka loko a ha rindzele ku dlayiwa. Loko muavanyisi la nga ni ntwela-vusiwana a vona leswi, u susumeteleka ku sula xigwevo xa mubohiwa yoloye—a herisa xigwevo xakwe xa rifu. Mubohiwa yoloye u ta titwa a ntshunxekile a tlhela a tsaka. Ku fana ni muavanyisi yoloye, Yehovha u va kombisa tintswalo vanhu lava hundzukaka kutani a sula xigwevo xa vona xa rifu.

TSAKELA VUGANDZERI BYA NTIYISO

Swilo swin’wana leswi a swi endliwa eka vugandzeri bya ntiyiso leswi Davhida a a swi vona endlwini ya Yehovha a ku ri ku hlengeletana ka mintshungu ya Vaisrayele-kulobye, ku hlayiwa erivaleni ni ku hlamuseriwa ka Nawu, ku hisiwa ka murhi wa risuna ni ku endliwa ka ntirho wo kwetsima hi vaprista ni Valevhi. (Eks. 30:34-38; Tinhl. 3:5-8; Det. 31:9-12) Eminkarhini  ya hina ku ni swilo leswi yelanaka ni leswi a swi endliwa evugandzerini bya ntiyiso le Israyele wa khale.

“Mawaku ndlela leyi swi nga swinene ha yona ni ku tsakisa ha yona loko vamakwavo va tshama swin’we hi vun’we” namuntlha ku fana ni le minkarhini ya khale! (Ps. 133:1) Ku ve ni ku andza lokukulu eka ‘nhlengeletano ya vamakwerhu’ ya le misaveni hinkwayo. (1 Pet. 2:17) Rito ra Xikwembu ra hlayiwa ri tlhela ri hlamuseriwa erivaleni eminhlanganweni ya hina. Yehovha u lunghiselele nongonoko lowu fuweke laha a hi letelaka kona, hi ku tirhisa nhlengeletano yakwe. Nakambe ku ni swakudya swo tala swa moya leswi kandziyisiweke leswi hi nga swi tirhisaka eka dyondzo ya munhu hi yexe kumbe ya ndyangu. Xirho xin’wana xa Huvo leyi Fumaka xi tshame xi ku: “Siku ni siku a ndzi tshama ndzi ri karhi ndzi anakanyisisa hi Rito ra Yehovha ni leswi ri vulaka swona ivi ndzi lavisisa vutivi ni ku twisisa kutani sweswo swi endle leswaku ndzi va ni rifuwo ra moya naswona ndzi eneriseka.” ‘Vutlhari byi nga tsakisa moya-xiviri wa hina.’—Swiv. 2:10.

Namuntlha, malandza ya Yehovha ma endla swikhongelo leswi amukelekaka eka yena siku ni siku. Eka Yehovha, swikhongelo swo tano swi fana ni nun’hwelo wo tsakisa wa murhi wa risuna. (Ps. 141:2) Moya-xiviri wa hina wa tsaka loko wu xiya leswaku Yehovha Xikwembu u hi tsakela swinene loko hi n’wi tshinelela hi xikhongelo xo titsongahata!

Muxe u khongerile a ku: “Ku tsakisa ka Yehovha Xikwembu xa hina a ku ve ehenhla ka hina, ni ntirho wa mavoko ya hina wu simeke wu tiya ehenhla ka hina.” (Ps. 90:17) Loko hi ri karhi hi endla ntirho wa hina wo chumayela hi ku hiseka, Yehovha wa wu katekisa. (Swiv. 10:22) Hi nga ha va hi pfune van’wana leswaku va dyondza ntiyiso. Kumbexana se hi ni malembe yo tala hi ri karhi hi tiyisela entirhweni wa nsimu hambiloko vanhu va nga ri tsakeli rungula ra hina, hi nga ri na rihanyo lerinene, hi twa ku vava emintlhavekweni kumbe hi xanisiwa. (1 Tes. 2:2) Nilokoswiritano, xana a hi ku vonanga “ku tsakisa ka Yehovha” hi tlhela hi xiya leswaku Tata wa hina wa le tilweni u tsakisiwa swinene hi matshalatshala ya hina?

Davhida u yimbelelele Yehovha a ku: “U vutumbelo bya mina, xiavelo xa mina [kumbe ndzhaka] etikweni ra lava va hanyaka.” (Ps. 142:5) Davhida a a xi tlangela swinene “xiavelo” xakwe, hileswaku, ku va ni vuxaka lebyi amukelekaka na Yehovha ni lunghelo ra ku n’wi tirhela. Ku fana na Davhida, hi nga ha weriwa hi maxangu, kambe hi ni mikateko yo tala swinene ya moya! Hikwalaho a hi yeni emahlweni hi tsakela vugandzeri bya ntiyiso naswona minkarhi hinkwayo hi ‘languta hi ku tlangela’ eka tempele ya moya ya Yehovha.

^ ndzim. 6 Vona Xihondzo xo Rindza xa July 1, 1996, matluka 14-24.