Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) JANUARY 2014

Xiboho Lexi Ndzi Xi Endleke Loko Ndza Ha Ri Ntsongo

Xiboho Lexi Ndzi Xi Endleke Loko Ndza Ha Ri Ntsongo

Loko ndza ha ri mufana

A ndzi ri ni malembe ya khume ntsena hi 1985 loko vana lava humaka eCambodia va fika exikolweni xa hina le Columbus, eOhio, le U.S.A. Mufana un’wana a a tiva marito ma nga ri mangani ya Xinghezi. U sungule ku ndzi byela switori swo chavisa swa ku xanisiwa ka vanhu, va dlayiwa ni ndlela leyi va balekeke ha yona, a tirhisa swifaniso. Nivusiku a ndzi rila loko ndzi ehleketa hi vana lava. A ndzi lava ku va byela hi ntshembo wa Paradeyisi ni ku pfuxiwa ka vafi, kambe a va nga ri twisisi ririmi ra mina. Hambileswi a ndza ha ri mufana, ndzi endle xiboho xo dyondza Xicambodia leswaku ndzi ta kota ku byela vadyondzi-kulorhi malunghana na Yehovha. Hi nkarhi wolowo a ndzi nga swi xiyi leswaku leswi ndzi swi hlawuleke swi ta cinca vutomi bya mina.

A swi tika ku dyondza Xicambodia. Ndzi lan’wile ku ringana kambirhi, kambe Yehovha u ndzi khutazile hi ku tirhisa vatswari va mina. Hi ku famba ka nkarhi, vadyondzisi va mina ni vadyondzi-kulorhi va sungule ku ndzi khutaza ku lava ntirho lowu holelaka. Kambe a ndzi lava ku phayona naswona loko ndzi ri exikolweni xa le henhla ndzi hlawule tidyondzo leti a ti ta ndzi pfuna ku kuma ntirho lowu a ndzi nga ta tirha nkarhi hinkwawo leswaku ndzi ta kota ku fikelela pakani ya mina. Loko xikolo xi huma, a ndzi tala ku hlangana ni maphayona yo karhi kutani ndzi tirha na wona nsimu. Nakambe ndzi tirhe hi ku tirhandzela ndzi dyondzisa swichudeni leswi a swi lava ku tiva Xinghezi, ku nga nchumu lowu ndzi pfuneke swinene hi ku famba ka nkarhi.

Loko ndzi ri ni malembe ya 16, ndzi twe leswaku a ku ri ni ntlawa wa Xicambodia le Long Beach, eCalifornia, le U.S.A. Ndzi wu endzerile kutani ndzi tlhela ndzi dyondza ku hlaya Xicambodia. Loko ndzi heta xikolo, ndzi teke vuphayona naswona ndzi ye emahlweni ndzi chumayela vanhu lava vulavulaka Xicambodia lava a va tshama ekusuhi ni le kaya. Loko ndzi ri ni malembe ya 18, a ndzi anakanya hi ku rhurhela eCambodia. Ndhawu yoleyo a ya ha ri ni khombo, kambe a ndzi swi tiva leswaku a va nga talanga vanhu lava tweke mahungu lamanene ya Mfumo eka vanhu lava endlaka khume ra timiliyoni lava tshamaka eCambodia. Hi nkarhi wolowo, etikweni rolero hinkwaro a ku ri ni vandlha rin’we ntsena leri a ri ri ni vahuweleri va 13. Ndzi endzele eCambodia ro sungula loko ndzi ri ni malembe ya 19. Endzhaku ka malembe mambirhi, ndzi rhurhele kwalaho. Ndzi kume ntirho wo hundzuluxela ni wo dyondzisa Xinghezi lowu a ndzi nga tirhi nkarhi hinkwawo lowu a wu ta ndzi pfuna ku tihanyisa loko ndzi phayona. Hi ku famba ka nkarhi ndzi kume nsati loyi a a ri ni tipakani to fana ni ta mina. Havumbirhi bya hina hi tsakele ku pfuna vanhu vo tala va le Cambodia leswaku va nyiketela vutomi bya vona eka Xikwembu.

Yehovha u ndzi nyike ‘leswi a swi naveriwa hi mbilu ya mina.’ (Ps. 37:4) Ku endla vanhu vadyondzisiwa i ntirho lowu enerisaka swinene ku tlula mintirho hinkwayo. Eka malembe ya 16 lawa ndzi ma heteke eCambodia, ntlawa lowutsongo wa malandza ya Yehovha lowu a wu ri ni vahuweleri va 13, wu andzile wu va mavandlha ya 12 ni mintlawa ya mune leyi nga yoxe!—Hi ku vula ka Jason Blackwell.