Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) AUGUST 2013

Swivutiso Swa Vahlayi

Swivutiso Swa Vahlayi

Xana swi ta va swi fanerile leswaku vatswari lava nga Vakreste va tshama ni n’wana wa vona la susiweke loko va ri eminhlanganweni ya vandlha?

Magazini lowu wu ringete hi matimba hinkwawo ku khutaza vatswari lava nga Vakreste leswaku va va pfuna hi tlhelo ra moya vana va vona lava susiweke, lava va ha tshamaka na vona ekaya, loko va vona swi fanerile ku endla tano. Hilaha swi kombisiweke hakona eka matluka 19 na 20 eka Xihondzo xo Rindza xa November 15, 1988, vatswari va nga dyondza Bibele ni n’wana wa vona la susiweke loyi a ha tshamaka na vona ekaya. Hi tshemba leswaku sweswo swi ta endla leswaku n’wana a kuma xikhutazo lexi faneleke leswaku a lulamisa xihoxo xakwe.

Loko swi ta emhakeni yo tshama eHolweni ya Mfumo, swi ta va swi nga bihanga loko n’wana la susiweke a tshama ni vatswari vakwe a miyerile. Tanihi leswi swi nga bohiki leswaku munhu la susiweke a tshama le ndzhaku eholweni, swi ta va swi nga hoxanga loko n’wana la susiweke a tshama ni vatswari vakwe kun’wana ni kun’wana laha va tshameke kona eholweni. Leswi vatswari va khathalelaka vumoya bya n’wana wa vona, va ta lava ku tiyiseka leswaku wa vuyeriwa eminhlanganweni. Ku tshama ni n’wana wa vona ematshan’weni yo n’wi tshika a tshama a ri yexe swi nga ha pfuna emhakeni leyi.

Kambe, ku vuriwa yini loko n’wana la susiweke a nga ha tshami ni vatswari vakwe? Xana leswi swi vula leswaku a nge tshami na vona eHolweni ya Mfumo? Enkarhini lowu hundzeke, magazini lowu wu ri hlamusele kahle langutelo leri faneleke leri Mukreste a faneleke a tikarhatela ku va na rona loko swi ta emhakeni yo tihlanganisa ni xaka leri susiweke leri a nga tshamiki na rona ekaya. * Hambiswiritano, ku va munhu la susiweke a tshama ekusuhi ni maxaka yakwe a miyerile hi nkarhi wa minhlangano swi hambane swinene ni ku va maxaka ma tihlanganisa na yena hambiloko swi nga bohi. Loko swirho swa ndyangu leswi tshembekaka swi ri ni langutelo lerinene hi xaka ra swona leri susiweke naswona swi tiyimisele ku yingisa ndzayo ya le Matsalweni leyi vulaka leswaku swi nga tihlanganisi na rona, a ku nge vi na xivangelo xo karhateka.—1 Kor. 5:11, 13; 2 Yoh. 11.

Loko munhu la susiweke a tikhoma kahle, a hi fanelanga hi karhateka loko a tshama ekusuhi ni xaka rakwe kumbe ekusuhi ni xirho xin’wana ni xin’wana xa vandlha. Ku vekela munhu swipimelo swa leswaku u fanele a tshama kwihi swi nga ha vanga swiphiqo swo hambana-hambana, swi titshege hi swiyimo swa kona. Loko hinkwavo, ku katsa ni maxaka lama tshembekaka, va tiyimisele ku xixima milawu ya Bibele leyi vulavulaka hi ku susiwa evandlheni naswona sweswo swi nga khunguvanyisi vamakwerhu, a ku na xivangelo xo karhateka malunghana ni leswaku vanhu lava susiweke lava taka eminhlanganweni ya Vukreste va tshama kwihi. *

^ ndzim. 5 Hlaya Xihondzo xo Rindza, (xa Xinghezi) xa September 15, 1981, matluka 29 na 30.

^ ndzim. 6 Leswi swi antswisa leswi swi vuriweke eka Xihondzo xo Rindza (xa Xinghezi) xa April 1, 1953, tluka 223.