Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza (Nkandziyiso Wa Vandlha)  |  August 2013

Xana Wa Ma Vona Makalichi Ya Ndzilo Lama Voniweke Hi Elixa?

Xana Wa Ma Vona Makalichi Ya Ndzilo Lama Voniweke Hi Elixa?

Hosi ya le Siriya a yi hlota Elixa muprofeta wa Xikwembu naswona yi twe leswaku u le mutini wa Dotani lowu a wu ri ehenhla ka ntshava lowu a wu sirheleriwe hi rirhangu. Nivusiku hosi ya le Siriya yi rhumele tihanci, makalichi ya nyimpi ni masocha eDotani. Loko ri xa masocha ya yona se a ma rhendzele muti hinkwawo.—2 Tih. 6:13, 14.

Loko nandza wa Elixa a pfuka kutani a humela ehandle, u vone vuthu ra valala. Kutani u huwelerile a ku: “Oho n’wini wanga! Hi ta endla yini?” Kambe Elixa u te: “U nga chavi, hikuva va tele lava va nga na hina ku tlula lava va nga na vona.” Kutani muprofeta yoloye u khongerile a ku: “Oho Yehovha, ndzi kombela u pfula mahlo yakwe leswaku a vona.” Rungula rolero ri ya emahlweni ri ku: “Hi ku hatlisa Yehovha a pfula mahlo ya mutirhi loyi, a vona; kutani waswivo, ndhawu leyi ya tintshava a yi tele hi tihanci ni makalichi ya nyimpi ya ndzilo matlhelo hinkwawo ya Elixa.” (2 Tih. 6:15-17) Hi nga dyondza yini emhakeni leyi ni le ka swiendlakalo swin’wana leswi humeleleke Elixa?

Elixa a nga khomiwanga hi rhumbyana loko a rhendzeriwe hi mavuthu ya Vasiriya hikuva a a tshemba Yehovha naswona u swi vonile leswaku wa n’wi sirhelela. A hi langutelanga masingita namuntlha kambe ha swi xiya leswaku Yehovha u sirhelela vanhu vakwe tanihi ntlawa. Na hina, hi ndlela yo karhi hi rhendzeriwe hi tihanci ni makalichi ya ndzilo. Loko hi swi “vona” hi mahlo ya ripfumelo niloko minkarhi hinkwayo hi titshega hi Yehovha, hi ta “tshama [hi] sirhelelekile” naswona u ta hi katekisa. (Ps. 4:8) A hi voneni ndlela leyi hi nga vuyeriwaka ha yona eka swiendlakalo swin’wana leswi humeleleke evuton’wini bya Elixa.

ELIXA A SUNGULA KU TIRHELA ELIYA

Siku rin’wana, loko Elixa a ri eku rimeni emasin’wini, muprofeta Eliya u ye eka yena kutani a fika a lahlela nguvu yakwe ya ximfumo ehenhla ka yena. Elixa a a swi tiva leswaku sweswo a swi vula yini. U endle nkhuvo, a lela vatswari vakwe kutani a famba a ya tirhela Eliya. (1 Tih. 19:16, 19-21) Leswi Elixa a a tiyimisele ku endla xin’wana ni xin’wana lexi Xikwembu a xi lava a xi endla, Yehovha u n’wi tirhise hi tindlela to tala kutani hi ku famba ka nkarhi u n’wi hlawule leswaku a va muprofeta a siva Eliya.

Kumbexana Elixa u tirhele Eliya malembe ya tsevu. Hi nkarhi wolowo, Elixa a ku ri yena loyi a a “chela mati  emavokweni ya Eliya.” (2 Tih. 3:11) Enkarhini wolowo, vanhu a va tolovele ku dya hi mavoko, a va nga ri na tiforoko, mikwana kumbe swilo swin’wana swo dya ha swona. Nandza a a hlambisa n’wini wakwe mavoko loko a heta ku dya. Kutani mintirho yin’wana leyi a yi endliwa hi Elixa a yi tikomba yi ri ya xiyimo xa le hansi. Nilokoswiritano, a a swi teka ku ri lunghelo ku va nandza wa Eliya.

Ninamuntlha, Vakreste vo tala va nghenela mintirho yo hambana-hambana ya nkarhi hinkwawo. Va endla tano hikwalaho ka ripfumelo ni leswi va navelaka ku tirhisa matimba ya vona hilaha va nga kotaka hakona leswaku va tirhela Yehovha. Yin’wana ya mintirho yoleyo yi lava leswaku va sukela makaya ya vona kutani va ya tirha eBethele, eka matsima yo aka ni ku endla mintirho yin’wana yo fana na yona, leyi vanhu vo tala va nga ha yi tekaka yi ri ya xiyimo xa le hansi. A ku na Mukreste loyi a faneleke a teka mintirho yo tano yi ri ya xiyimo xa le hansi hikuva eka Yehovha i ya nkoka swinene.—Hev. 6:10.

ELIXA A NGA WU TSHIKANGA NTIRHO WAKWE

Loko Xikwembu xi nga si “teka Eliya hi xidzedze a tlhandlukela ematilweni,” xi n’wi lerise ku suka eGiligala a ya eBethele. Eliya u byele Elixa leswaku a nga fambi na yena, kambe Elixa u te: “A ndzi nge ku siyi.” Loko va ri karhi va famba, Eliya u kombele Elixa kambirhi leswaku a sala kambe u arile. (2 Tih. 2:1-6) Elixa u namarhele Eliya hi ku tshembeka hilaha Rhuti a endleke hakona eka Nawomi. (Rhu. 1:8, 16, 17) Ha yini? Swi le rivaleni leswaku Elixa a a ri tlangela swinene lunghelo leri Xikwembu a xi n’wi nyike rona ro tirhela Eliya.

Elixa u hi vekele xikombiso lexinene. Loko hi kuma lunghelo ro karhi enhlengeletanweni ya Xikwembu, hi ta ri teka ri ri ra risima loko hi tsundzuka leswaku hi tirhela Yehovha. A ku na lunghelo ra risima ku tlula leri.—Ps. 65:4; 84:10.

“KOMBELA LESWI NDZI FANELEKE NDZI KU ENDLELA SWONA”

Loko vavanuna lavambirhi va ri karhi va famba, Eliya u byele Elixa a ku: “Kombela leswi ndzi faneleke ndzi ku endlela swona ndzi nga si susiwa eka wena.” Ku fana na Solomoni, Elixa na yena u kombele nchumu lowu a wu ta n’wi pfuna ku tirhela Yehovha. U kombele leswaku ‘swiphemu swimbirhi swa moya wa Eliya swi ta eka yena.’ (1 Tih. 3:5, 9; 2 Tih. 2:9) Le Israyele, n’wana wa jaha wa mativula hi yena loyi a a fanele a kuma swiphemu swimbirhi swa ndzhaka ya tata wakwe. (Det. 21:15-17) Kutani, entiyisweni Elixa u kombele ku va mudyandzhaka wa Eliya hi tlhelo ra moya. Ku tlula kwalaho, swi le rivaleni leswaku Elixa a a lava ku va ni xivindzi lexi fanaka ni lexi Eliya a a ri na xona, xa ku va ni “rilaveta lerikulu hikwalaho ka Yehovha.”—1 Tih. 19:13, 14.

Eliya u xi hlamule njhani xikombelo xa nandza wakwe? Muprofeta yoloye u te: “U kombele nchumu wo nonon’hwa. Loko wo ndzi vona loko ndzi susiwa eka wena, swi ta endleka hi ndlela yoleyo eka wena; kambe loko u nga ndzi voni, a swi nge endleki.” (2 Tih. 2:10) Nhlamulo ya Eliya a yi ri ni tinhlamuselo timbirhi ta nkoka swinene. Yo sungula, i Xikwembu ntsena lexi a xi ta vona loko swi fanerile leswaku Elixa a kuma leswi a swi kombeleke. Ya vumbirhi, loko Elixa a ta kuma leswi a swi kombeleke a a fanele a tiyimisela ku hambeta a tshama na Eliya, hambi ko ba lexi dumaka.

LESWI ELIXA A SWI VONEKE

Xikwembu xi xi langute njhani xikombelo xa Elixa xa swiphemu swimbirhi swa moya wa Eliya? Rungula ra kona ri ri: “Kuteloko va ha famba swin’we, va famba va ri karhi va vulavula, waswivo, ku humelela kalichi ya nyimpi leyi pfurhaka ndzilo, yi ri ni tihanci leti pfurhaka ndzilo, swi va hambanisa havambirhi; kutani Eliya a tlhandlukela ematilweni hi xidzedze. Nkarhi wolowo hinkwawo Elixa a a swi vona.” * Yoleyo a ku ri ndlela leyi Yehovha a a hlamula xikombelo xa Elixa ha yona. Elixa u vone Eliya loko a tekiwa eka yena, u kume swiphemu swimbirhi swa moya wa Eliya kutani a va mudyandzhaka wa muprofeta yoloye hi tlhelo ra moya.—2 Tih. 2:11-14.

Elixa u teke nguvu ya ximfumo leyi weke eka Eliya kutani a yi ambala. Nguvu yoleyo a yi kombisa leswaku Elixa se i muprofeta wa Xikwembu. Vumbhoni byin’wana lebyi kombisaka ku hlawuriwa ka yena byi vonake loko a avanyisa mati eNambyeni wa Yordani hi singita.

Handle ko kanakana, leswi Elixa a swi voneke loko Eliya a tlhandlukela etilweni hi xidzedze a nga swi rivalanga. Phela, munhu a nga voni kalichi ra nyimpi ni tihanci leti pfurhaka ndzilo siku ni siku! Sweswo a swi swi kombisa kahle leswaku Yehovha u xi hlamurile xikombelo xa Elixa. Loko Xikwembu xi hlamula swikhongelo swa hina, a swi kali swi lava leswaku hi vona kalichi ra nyimpi ni tihanci leti pfurhaka ndzilo. Kambe hi nga swi twisisa leswaku Xikwembu xi tirhisa matimba ya xona lamakulu ku tiyisekisa leswaku ku rhandza ka xona ka endliwa. Naswona loko hi xiya leswaku Yehovha u katekisa xiphemu xa laha misaveni xa nhlengeletano yakwe,  entiyisweni hi “vona” kalichi yakwe ya le tilweni yi ya emahlweni.—Ezek. 10:9-13.

Elixa u vone swilo swo tala leswi n’wi khorwiseke leswaku Yehovha u ni matimba lamakulu swinene. Entiyisweni, moya lowo kwetsima wa Xikwembu wu pfune muprofeta yoloye leswaku a endla masingita ya 16—lama tlulaka lama endliweke hi Eliya kambirhi. * Ra vumbirhi laha Elixa a voneke tihanci ni makalichi ya nyimpi lama pfurhaka ndzilo a ku ri eka xiendlakalo xa le Dotani lexi hlamuseriweke eku sunguleni ka xihloko lexi.

ELIXA U TSHEMBE YEHOVHA

Hambileswi Elixa a a rhendzeriwe hi valala eDotani, a nga khomiwanga hi rhumbyana. Ha yini? Hikuva a a ri ni ripfumelo leri tiyeke eka Yehovha. Na hina hi fanele hi va ni ripfumelo ro tano. Hikwalaho, a hi khongeleleni moya lowo kwetsima wa Xikwembu leswaku hi ta kota ku kombisa ripfumelo ni timfanelo tin’wana ta mbhandzu wa moya.—Luka 11:13; Gal. 5:22, 23.

Leswi endlekeke eDotani swi tlhele swi nyika Elixa xivangelo lexi twalaka xo va a tshemba Yehovha ni mavuthu yakwe lama nga vonakiki lama sirhelelaka. Muprofeta loyi u swi xiyile leswaku Xikwembu xi rhumele tintsumi ta xona leswaku ti ya rhendzela muti ni ku n’wi sirhelela eka valala. Xikwembu xi ponise Elixa ni nandza wakwe hi singita hi ku va xi pfala mahlo ya valala va vona. (2 Tih. 6:17-23) Hi nkarhi wolowo wa khombo, ku fana ni le swiyin’weni swin’wana, Elixa u kombise ripfumelo a tlhela a tshemba Yehovha hi mbilu yakwe hinkwayo.

Ku fana na Elixa, a hi tshembeni Yehovha Xikwembu. (Swiv. 3:5, 6) Loko hi endla tano, “Xikwembu xi ta hi komba tintswalo kutani xi hi katekisa.” (Ps. 67:1) I ntiyiso leswaku a hi rhendzeriwanga hi makalichi ni tihanci ta xiviri leti pfurhaka ndzilo. Hambiswiritano, hi nkarhi wa “nhlomulo lowukulu” lowu taka, Yehovha u ta hi sirhelela tanihi vamakwerhu va misava hinkwayo. (Mat. 24:21; Nhlav. 7:9, 14) Loko nkarhi wolowo wu nga si fika, minkarhi hinkwayo a hi tsundzukeni leswaku “Xikwembu i vutumbelo bya hina.”—Ps. 62:8.

^ ndzim. 16 Eliya a nga yanga ematilweni endhawini ya moya leyi Yehovha ni tintsumi takwe va tshamaka eka yona. Hlaya Xihondzo xo Rindza xa September 15, 1997, tluka 15.

^ ndzim. 19 Hlaya Xihondzo xo Rindza xa August 1, 2005, tluka 10.