Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) JUNE 2013

Wa Tsundzuka Xana?

Wa Tsundzuka Xana?

Xana u yi hlaye hi vukheta minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

I yini ku vhumbha vumundzuku hi ku tirhisa Bibele, naswona Vakreste va fanele va swi languta njhani?

I ku pfula Bibele eka tluka rin’wana ni rin’wana kutani u hlaya ndzimana leyi mahlo ya wena ma yi vonaka ku sungula hi ntshembo wa leswaku marito wolawo ma ta nyika munhu mpfuno lowu a wu lavaka. Vakreste va ntiyiso a va lavi ku endla mihlolo. Ku ri na sweswo, va dyondza Bibele leswaku va ta kuma vutivi lebyi kongomeke ni nkongomiso wa Xikwembu.12/15, tluka 3.

I yini “misava” leyi nga ta hundza?

“Misava” leyi nga ta hundza i vanhu lava nga endliki ku rhandza ka Xikwembu. (1 Yoh. 2:17) Misava ni vanhu vo tshembeka va ta pona.1/1, matluka 5-7.

Avele u vulavula na hina hi ndlela yihi hambiloko a file? (Hev. 11:4)

Sweswo u swi endla hi ku tirhisa ripfumelo. Hi nga dyondza eka yena naswona hi tikarhatela ku tekelela ripfumelo ra yena. Xikombiso xa yena xa ha xiyeka.1/1, tluka 12.

Hi le ka swiyimo swihi laha hi faneleke hi tivonela leswaku hi nga pfumeli ku hambanisiwa ni Xikwembu?

Swin’wana swa swona i: ntirho wa hina wo tihanyisa, vuhungasi lebyi hi byi hlawulaka, vuxaka bya ndyangu ni munhu la susiweke, ku tirhisa ka hina thekinoloji ya manguva lawa, ku karhateka hi rihanyo ra hina, ku va ni langutelo ro biha hi mali ni ku teka mavonelo ya hina kumbe malunghelo ya hina ma ri ya nkoka swinene.1/15, matluka 12-21.

Hi nga dyondza yini eka ku titsongahata ka Muxe?

Ematshan’weni ya ku va Muxe a tikukumuxa loko a nyikiwe vulawuri, u titshege hi Xikwembu ku nga ri hi yena n’wini. A hi swi lavi ku va lava tikukumuxaka hileswi hi nyikiweke vulawuri kumbe hileswi hi nga ni vuswikoti; ku ri na sweswo, hi lava ku tshemba Yehovha. (Swiv. 3:5, 6)2/1, tluka 5.

Lava pfuxiweke eku feni va ta hanya kwihi?

Vanhu va 144 000 va ta ya hanya etilweni. Kambe vo tala lava nga ta pfuxiwa va ta pfuxeriwa laha emisaveni, va ri ni ntshembo wo hanya hilaha ku nga heriki eka yona.—3/1, tluka 6.

A swi vula yini leswaku Vaisrayele a va nga “yimbanga embilwini”? (Yer. 9:26)

A va xandzukile naswona a va fanele va susa leswi a swi endla timbilu ta vona ti nga yingisi—mianakanyo ya vona, ku navela ka vona kumbe swikongomelo leswi a swi endla va honisa swileriso swa Xikwembu. (Yer. 5:23, 24)3/15, matluka 9-10.

Yesu a a ri xikombiso xa munhu loyi a hanyeke vutomi lebyi nga ni xikongomelo hi ndlela yihi?

A a ri ni xikongomelo evuton’wini, xa ku endla ku rhandza ka Xikwembu. A a n’wi rhandza swinene Tata wa yena naswona a a rhandza vanhu. Hikwalaho, Yesu a a swi tiva leswaku Tata wa yena wa n’wi rhandza naswona wa amukeleka eka yena. Sweswo hi swona swi endlaka munhu a va ni xikongomelo evuton’wini.4/1, matluka 4-5.

Xiphemu xa laha misaveni xa nhlengeletano ya Xikwembu xi katsa vamani?

Xi katsa Huvo leyi Fumaka, tikomiti ta marhavi, valanguteri lava famba-fambaka, tihuvo ta vakulu, mavandlha ni Mbhoni yin’wana ni yin’wana.—4/15, tluka 29.

Ha yini hi nga vulaka leswaku Xikwembu a xi nga ri na tihanyi loko xi hetisisa vuavanyisi bya xona?

Yehovha a nga ri tsakeli rifu ra lavo homboloka. (Ezek. 33:11) Swiendlo swa Xikwembu swa nkarhi lowu hundzeke swi kombisa leswaku hi rirhandzu xi lemukisa vanhu xi nga si tisa vuavanyisi. Leswi swi nga hi nyika ntshembo wo pona eka vuavanyisi bya le nkarhini lowu taka.5/1, matluka 5-6.

Xana Vaisrayele a va dlaya swigevenga hi ku swi hayeka etimhandzini?

E-e. Matiko man’wana ya khale a ma swi endla sweswo kambe Vaisrayele a va nga swi endli. Enkarhini wa ku tsariwa ka Matsalwa ya Xiheveru, lava endleke leswo biha a va rhanga va dlayiwa hi ku khandliwa hi maribye. (Lev. 20:2, 27) Endzhaku ka sweswo ntsumbu wa kona a wu hayekiwa emhandzini tanihi xitsundzuxo eka van’wana.5/15, tluka 13.

Ha yini vanhu va tsandzeka ku tisa ku rhula emisaveni?

Hambileswi vanhu va koteke ku endla swilo swo tala, a va na byona vuswikoti byo kongomisa mikondzo ya vona. (Yer. 10:23) Sathana u lawula misava, hikwalaho vanhu a va nge swi koti ku tisa ku rhula. (1 Yoh. 5:19)6/1, tluka 16.