Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) APRIL 2013

“Tiyiseka Hi Swilo Swa Nkoka Swinene”

“Tiyiseka Hi Swilo Swa Nkoka Swinene”

“Tiyiseka hi swilo swa nkoka swinene.” —FILP. 1:10.

1, 2. I vuprofeta byihi malunghana ni masiku ya makumu lebyi faneleke byi tsakise vadyondzisiwa va Yesu, naswona ha yini?

EKU heteleleni Petro, Yakobe, Yohane na Andriya a va ri voxe ni N’wini wa vona. Leswi Yesu a swi vuleke emahlweni ka kwalaho malunghana ni ku lovisiwa ka tempele a swi va karhata swinene. (Mar. 13:1-4) Hikwalaho, va n’wi vutisile va ku: “Hi byele, Xana swilo leswi swi ta endleka rini, naswona xi ta va xihi xikombiso xa vukona bya wena ni xa makumu ya mafambiselo ya swilo?” (Mat. 24:1-3) Yesu u sungule ku va byela hi swiendlakalo kumbe hi swiyimo, leswi a swi nga ta cinca vutomi bya vona hi ndlela leyikulu ntsena kambe leswi a swi ta humelela emasikwini ya makumu ya mafambiselo ya swilo yo homboloka ya Sathana. Ku ni xiendlakalo xin’we lexi faneleke xi tsakise vadyondzisiwa va Yesu. Endzhaku ko va byela hi swilo leswi chavisaka swo tanihi tinyimpi, ku pfumaleka ka swakudya ni ku andza ka ku kala nawu, Yesu u profete leswaku a ku ta endleka mhaka yin’wana yo tsakisa leyi na yona a yi ta fungha masiku ya makumu. U te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Mat. 24:7-14.

2 Vadyondzisiwa va Yesu va tsakele ku chumayela mahungu lamanene ya Mfumo swin’we na Kreste. (Luka 8:1; 9:1, 2) Swi nga ha endleka va swi tsundzukile leswaku u te: “Hakunene, ntshovelo i wukulu, kambe vatirhi a hi vangani. Hikokwalaho kombelani N’wini wa ntshovelo leswaku a rhumela vatirhi entshovelweni wa yena.” (Luka 10:2) Kambe a va ta chumayela njhani “emisaveni hinkwayo leyi akiweke” ni ku nyikela “vumbhoni ematikweni hinkwawo”? Xana vatirhi a va ta huma kwihi? Loko a va lo languta enkarhini lowu taka loko va tshame na Yesu hi siku rero! A swi kanakanisi leswaku a va ta hlamala loko va vona ku hetiseka ka marito wolawo ma nga ri mangani lawa sweswi ma kumekaka eka Matewu 24:14.

3. Luka 21:34 yi hetiseka njhani namuntlha, naswona i ku tikambela kwihi loku hi faneleke hi ku endla?

 3 Hi hanya enkarhini lowu ku hetisekaka vuprofeta bya Yesu. Vanhu va timiliyoni va chumayela mahungu lamanene ya Mfumo emisaveni hinkwayo. (Esa. 60:22) Kambe, Yesu u kombise leswaku van’wana a swi ta va tikela ku rhangisa ntirho wo chumayela evuton’wini bya vona emasikwini lawa ya makumu. A va ta hambukisiwa ni ku “tshikileriwa.” (Hlaya Luka 21:34.) Na hina ha ku vona ku hetiseka ka marito wolawo. Vanhu van’wana va Xikwembu a va rhangisi swilo swa nkoka swinene evuton’wini. Leswi swi nga ha vonaka eka swiboho leswi va swi endlaka malunghana ni ntirho wa ku tihanyisa, dyondzo leyi tlakukeke, swilo leswi vonakaka leswi va tihlengeletelaka swona ku katsa ni nkarhi lowu va wu hetaka eka mintlangu ni le ka vuhungasi. Van’wana va hela matimba hikwalaho ka mintshikilelo ni ku vilela ka vutomi. Tivutise: ‘Ku vuriwa yini hi mina? Swiboho swa mina swi kombisa yini hileswi ndzi swi rhangisaka evuton’wini bya mina?’

4. (a) Pawulo u va khongelele yini Vakreste va le Filipiya naswona ha yini? (b) Hi ta kambisisa yini exihlokweni lexi ni lexi landzelaka, naswona swihloko leswi swi ta hi pfuna njhani?

4 Vakreste lava a va hanya hi lembe-xidzana ro sungula a va fanele va endla matshalatshala leswaku va rhangisa ntirho wa Xikwembu evuton’wini bya vona. Muapostola Pawulo u vone ku ri ni xilaveko xo khongelela leswaku lava nga le Filipiya va “tiyiseka hi swilo swa nkoka swinene.” (Hlaya Vafilipiya 1:9-11.) Ku fana na muapostola Pawulo, vo tala enkarhini wolowo a va “kombisa xivindzi lexikulu xo vulavula rito ra Xikwembu handle ka ku chava.” (Filp. 1:12-14) Hilaha ku fanaka, vo tala va hina namuntlha hi chumayela Rito ra Xikwembu hi xivindzi. Nilokoswiritano, xana ku kambisisa leswi nhlengeletano ya Yehovha yi swi hetisisaka sweswi swi nga hi pfuna ku hisekela ntirho wa nkoka swinene wa ku chumayela? Ina swi nga hi pfuna! Exihlokweni lexi, hi ta kambisisa lunghiselelo leri Yehovha a ri tirhisaka leswaku a hetisisa marito ya Matewu 24:14. Nhlengeletano ya Yehovha yi endla yini naswona ku tiva sweswo swi hi pfuna njhani hina ni mindyangu ya hina? Exihlokweni lexi landzelaka, hi ta kambisisa leswi nga hi pfunaka ku tiyisela nileswaku hi tshama hi fambisana ni nhlengeletano ya Yehovha.

XIPHEMU XA LE TILWENI XA NHLENGELETANO YA YEHOVHA XI YA EMAHLWENI

5, 6. (a) Ha yini Yehovha a kombise malandza ya yena swivono swa xiphemu xa le tilweni xa nhlengeletano ya yena? (b) Ezekiyele u vone yini exivonweni?

5 Ku ni swilo swo tala leswi Yehovha a hlawuleke ku nga swi tsali eRitweni ra yena. Hi xikombiso, a nga hlamuselanga vuxokoxoko bya ndlela leyi byongo byi tirhaka ha yona kumbe ndlela leyi vuako hinkwabyo byi tirhaka ha yona, hambileswi rungula rero a ri ta tsakisa swinene! Ku ri na sweswo, Yehovha u hi nyike rungula leri hi ri lavaka leswaku hi ta twisisa swikongomelo swa yena ni ku hanya vutomi bya hina hi ku pfumelelana na swona. (2 Tim. 3:16, 17) Kambe, swa tsakisa leswi Bibele yi hi hlamuselaka hi xiphemu xa nhlengeletano ya Yehovha lexi nga vonakiki! Ha tsaka loko hi hlaya hi tinhlamuselo ta lunghiselelo ra Yehovha ra le tilweni leti tsariweke hi Esaya, Ezekiyele, Daniyele na Yohane eka buku ya Nhlavutelo. (Esa. 6:1-4; Ezek. 1:4-14, 22-24; Dan. 7:9-14; Nhlav. 4:1-11) Onge hiloko Yehovha a pfule nguvu kutani a hi pfumelela ku languta etilweni. Ha yini a hi nyike rungula leri?

6 Yehovha u lava hi nga rivali leswaku hi xiphemu xa nhlengeletano ya vuako hinkwabyo. Xiphemu xa nhlengeletano ya Yehovha lexi nga vonakiki xi tirha hi matimba leswaku xi hetisisa swikongomelo swa yena. Hi xikombiso, Ezekiyele u vone xiphemu xa nhlengeletano ya Yehovha lexi nga vonakiki xi yimeriwa hi kalichi leyikulu ya le tilweni. Kalichi leyi a yi famba hi rivilo lerikulu naswona a yi hundzulukela kun’wana ni kun’wana hi xihatla. (Ezek. 1:15-21) Kalichi leyi a yi famba mpfhuka wo leha swinene  hi ku va mavhilwa ya yona ma hundzuluke kan’we ntsena. Exivonweni, Ezekiyele u tlhele a vona Mugadi wa kalichi. U te: “Hiloko ndzi vona nchumu lowu fanaka ni ku hatima ka mpfangano wa nsuku ni silivhere, ku fana ni ku languteka ka ndzilo hinkwako . . . A ku ri ku languteka ka xivumbeko xa ku vangama ka Yehovha.” (Ezek. 1:25-28) Ezekiyele u fanele a hlamarisiwe swinene hi xivono lexi! U vone Yehovha a ri karhi a lawula nhlengeletano ya yena hi ku helela, a yi kongomisa hi ku tirhisa moya wa yena wo kwetsima. Kalichi ya le xivonweni i xikombiso xo hlamarisa xa xiphemu xa le tilweni xa nhlengeletano ya Yehovha leyi yaka emahlweni!

7. Xivono lexi voniweke hi Daniyele xi hi nyika ntshembo hi ndlela yihi?

7 Daniyele na yena u vone xivono lexi hi nyikaka ntshembo. U pfumeleriwe ku vona Yehovha a kombisiwe tanihi “Nkulukumba wa Masiku,” a tshame exiluvelweni lexi nga malangavi ya ndzilo. Xiluvelo xexo a xi ri ni mavhilwa. (Dan. 7:9) Yehovha a a lava leswaku Daniyele a vona leswaku nhlengeletano ya Yena yi le ku fambeni, yi hetisisa xikongomelo xa Yena. Daniyele u tlhele a vona “loyi a fanaka ni n’wana wa munhu,” ku nga Yesu, a nyikiwa ntirho wo langutela xiphemu xa laha misaveni xa nhlengeletano ya Yehovha. Mfumo wa Kreste lowu hetisekeke a wu nge vi kona malembe ma nga ri mangani ntsena. Kambe, “i ku fuma loku tshamaka hilaha ku nga heriki loku ku nga ta ka ku nga hundzi, mfumo wakwe a wu nge lovisiwi.” (Dan. 7:13, 14) Hi susumeteleka ku tshemba Yehovha ni ku tiva leswi a swi hetisisaka. “Ku fuma ni xindzhuti ni mfumo” u swi nyike Yesu, N’wana wa yena loyi a ringiweke a tlhela a kombisa leswaku wa faneleka. Yehovha wa n’wi tshemba N’wana wa yena. Hikwalaho, na hina hi nga byi tshemba vurhangeri bya Yesu.

8. Swivono swa nhlengeletano ya Yehovha swi endle leswaku Ezekiyele na Esaya va titwa njhani naswona swi fanele swi endla hi titwa njhani?

 8 Swivono leswi swa xiphemu lexi nga vonakiki xa nhlengeletano ya Yehovha swi fanele swi endla hi titwa njhani? Ku fana na Ezekiyele, hi tsakisiwa hileswi Yehovha a swi endlaka. (Ezek. 1:28) Ku anakanyisisa hi nhlengeletano ya Yehovha swi nga hi pfuna leswaku hi teka goza, hilaha swi endleke hakona eka Esaya. Loko a nyikiwe nkarhi wo ya byela van’wana hileswi Yehovha a swi endlaka, a nga kanakananga ku ya. (Hlaya Esaya 6:5, 8.) Esaya a a tiyiseka leswaku hi ku pfuniwa hi Yehovha, a a ta kota ku hlula swiphiqo swin’wana ni swin’wana. Hilaha ku fanaka, swivono leswi swa xiphemu lexi nga vonakiki xa nhlengeletano ya Yehovha swi fanele swi hi susumetela ku yi seketela hi ku endla swo tala entirhweni wa yena. Hakunene swa khutaza ku tiva leswaku hi xiphemu xa nhlengeletano leyi tshamaka yi ri eku endleni ka ku rhandza ka Yehovha!

XIPHEMU XA LAHA MISAVENI XA NHLENGELETANO YA YEHOVHA

9, 10. Ha yini ku laveka xiphemu lexi vonakaka xa nhlengeletano ya Yehovha?

9 Hi ku tirhisa N’wana wa yena, Yehovha u simeke lunghiselelo laha misaveni leri tirhisanaka ni xiphemu lexi nga vonakiki xa nhlengeletano leyi. Ha yini a ku laveka lunghiselelo leri vonakaka leswaku ku hetisisiwa ntirho lowu hlamuseriweke eka Matewu 24:14? Xiya swivangelo swinharhu.

10 Xo sungula, Yesu u vule leswaku vadyondzisiwa va yena va ta chumayela ni le “[ndhawini] ya le kule swinene ya misava.” (Mint. 1:8) Xa vumbirhi, a ku laveka malunghiselelo ya leswaku ku kumeka swakudya swa moya nileswaku ku khathaleriwa lava hlanganyelaka entirhweni lowu. (Yoh. 21:15-17) Xa vunharhu, a ku fanele ku endliwa malunghiselelo leswaku lava va chumayelaka mahungu lamanene va ta hlengeletana swin’we leswaku va gandzela Yehovha ni ku dyondzisiwa ndlela ya ku hetisisa ntirho lowu. (Hev. 10:24, 25) Tipakani leti a ti nga ta hetisisiwa hi xiwelo. Leswaku valandzeri va Kreste va ti hetisisa hi ku helela, ntirho lowu a wu fanele wu hleriwa kahle.

11. Hi swi kombisa njhani leswaku ha ma seketela malunghiselelo lama endliwaka hi nhlengeletano ya Yehovha?

11 Hi swi kombisa njhani leswaku ha ma seketela malunghiselelo lama endliwaka hi nhlengeletano ya Yehovha? Ndlela yin’wana ya nkoka i ku va minkarhi hinkwayo hi veka ntshembo wa hina eka lava Yehovha na Yesu va va vekeke leswaku va hi rhangela entirhweni wo chumayela. Vamakwerhu lava a va ta va va tirhisa matimba ya vona ni ntamu wa vona va lulamisa swiphiqo leswi nga kona emisaveni kambe a va endli swona sweswo. Kambe, xiphemu lexi vonakaka xa nhlengeletano ya Yehovha a xi tshama xi dzikise mianakanyo ya xona eka yini?

VA RHANGISA “SWILO SWA NKOKA SWINENE”

12, 13. Vakulu lava nga Vakreste va xi hetisisa njhani xiavelo xa vona, naswona ha yini sweswo swi ku khutaza?

12 Vakulu lava nga Vakreste lava nga ni ntokoto emisaveni hinkwayo va nyikiwe vutihlamuleri bya ku hlela ni ku rhangela entirhweni wo chumayela hi Mfumo ematikweni lawa va nga eka wona. Hikwalaho, loko vamakwerhu lava va endla swiboho, va lava nkongomiso eRitweni ra Xikwembu, va ri endla ‘rivoni emilengeni ya vona ni ku vonakala endleleni ya vona,’ va tlhela va khongelela nkongomiso wa Yehovha.—Ps. 119:105; Mat. 7:7, 8.

13 Ku fana ni lava a va rhangela hi lembe-xidzana ro sungula, vakulu lava nga Vakreste lava langutelaka ntirho wo chumayela namuntlha va tinyiketele “ni le vutirhelini bya rito.” (Mint. 6:4) Va tsaka swinene hi nhluvuko lowu endliwaka entirhweni wo chumayela mahungu lamanene laha va tshamaka kona ni le misaveni hinkwayo. (Mint. 21:19, 20) A va veki milawu yo tala ni maendlelo ya kona. Ku ri na sweswo, va landzela Matsalwa ni nkongomiso wa moya lowo kwetsima wa Xikwembu loko va endla malunghiselelo  lama lavekaka leswaku ntirho wo chumayela wu ya emahlweni. (Hlaya Mintirho 15:28.) Hi ku endla tano, vamakwerhu lava lava nga ni vutihlamuleri va veka xikombiso lexinene eka hinkwavo lava nga emavandlheni lawa va nga eka wona.—Efe. 4:11, 12.

14, 15. (a) Hi wahi malunghiselelo lama endliweke leswaku ku seketeriwa ntirho wo chumayela emisaveni hinkwayo? (b) U titwa njhani hi xiphemu lexi u nga na xona eku seketeleni ka ntirho wo chumayela hi Mfumo?

14 Vamakwerhu vo tala va tirha siku ni siku leswaku va lunghiselela minkandziyiso, minhlangano ni mintsombano ya hina. Magidi ya vatirhi vo tirhandzela va tirha hi matimba leswaku va hundzuluxela minkandziyiso hi tindzimi leti tlulaka 600, leswaku vanhu vo tala va kota ku dyondza “swilo leswikulu ngopfu swa Xikwembu” hi ririmi ra vona. (Mint. 2:7-11) Vamakwerhu va xinuna ni va xisati lava ha riki vantshwa va tirha hi matimba laha ku endliwaka kona minkandziyiso eka michini leyi nga ni rivilo swinene ni laha ku endliwaka tibuku. Endzhaku minkandziyiso leyi yi rhumeriwa ni le mavandlheni ya le tindhawini leti nga ekule swinene.

15 Ku endliwe malunghiselelo yo tala leswaku hi ta kota ku dzikisa mianakanyo ya hina eka ntirho wo chumayela mahungu lamanene ni mavandlha ya hina. Hi xikombiso, magidi ya vatirhi va ku tirhandzela va pfuneta eku akiweni ka Tiholo ta Mfumo ni Tiholo ta Tinhlengeletano, va pfuna lava hlaseriweke hi timhangu ta ntumbuluko kumbe lava lavaka vutshunguri bya xihatla, va hlela tinhlengeletano ni mintsombano ya hina ni ku dyondzisa eswikolweni swa vutirheli bya mfumo, loko hi boxa swilo swi nga ri swingani ntsena. Hi xihi xikongomelo xa ntirho lowu hinkwawo? Wu endleriwa ku hi pfuna ku chumayela mahungu lamanene, hi endla nhluvuko entiyisweni ni ku pfuna vanhu vo tala leswaku va va vagandzeri va Yehovha. Xana xiphemu xa laha misaveni xa nhlengeletano ya Yehovha xi rhangise swilo swa nkoka swinene? Ina xi swi rhangisile!

LANDZELA XIKOMBISO XA NHLENGELETANO YA YEHOVHA

16. I yini leswi mi nga endlaka ndzavisiso ha swona eka vugandzeri bya n’wina bya ndyangu kumbe eka dyondzo ya wena ya munhu hi yexe?

16 Xana hi pfa hi tinyika nkarhi wa ku anakanyisisa hi leswi nhlengeletano ya Yehovha yi swi endleke? Van’wana va hlawule ku tinyika nkarhi eka vugandzeri bya vona bya ndyangu kumbe eka dyondzo ya munhu hi yexe va endla ndzavisiso hi timhaka leti va tlhela va anakanyisisa ha tona. Swivono leswi kombiweke Esaya, Ezekiyele, Daniyele na Yohane swi nga endla leswaku dyondzo yi tsakisa. Buku leyi nge, Timbhoni Ta Yehovha I Vahuweleri Va Mfumo Wa Xikwembu ni minkandziyiso yin’wana kumbe ti-DVD leti nga kona hi ririmi ra wena swi nga ku dyondzisa swilo swo tala leswi tsakisaka malunghana ni nhlengeletano leyi.

17, 18. (a) Dyondzo leyi yi ku pfune njhani? (b) I swivutiso swihi leswi hi faneleke hi tivutisa swona?

17 I swinene ku anakanyisisa hi ndlela leyi Yehovha a yi tirhisaka ha yona nhlengeletano ya yena leswaku a seketela ntirho wo chumayela. A hi tiyimiseleni ku rhangisa swilo swa nkoka swinene hi ri karhi hi fambisana ni nhlengeletano leyi leyi hlamarisaka. Loko hi endla tano swi ta hi tiyisa leswaku hi tiyimisela ku fana na Pawulo, loyi a tsaleke a ku: “Leswi hi nga ni vutirheli lebyi hi ku ya hi tintswalo leti hi kombisiweke tona [a hi tshiki].” (2 Kor. 4:1) U tlhele a khutaza vatirhi-kulobye a ku: “Hi nga tshiki ku endla leswi nga swinene, hikuva hi nguva leyi faneleke hi ta tshovela loko hi nga karhali.”—Gal. 6:9.

18 Xana wena kumbe ndyangu wa wena mi fanele mi endla ku cinca ko karhi leswaku mi kota ku rhangisa swilo swa nkoka swinene? Xana u nga olovisa vutomi bya wena leswaku u kota ku endla leswi engetelekeke entirhweni wa nkoka swinene wo chumayela? Exihlokweni lexi landzelaka, hi ta kambisisa swilo swa ntlhanu leswi nga ta hi pfuna leswaku hi fambisana ni nhlengeletano ya Yehovha.