Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) APRIL 2013

Va Tinyikele Hi Ku Tirhandzela—Le Mexico

Va Tinyikele Hi Ku Tirhandzela—Le Mexico

SWA tsakisa ku vona nhlayo leyi engetelekaka ya vantshwa lava nga Timbhoni va olovisa vutomi bya vona leswaku va ta kota ku endla leswi engetelekeke entirhweni wa Vukreste. (Mat. 6:22) I ku cinca kwihi loku va ku endlaka? I swihinga swihi leswi va langutanaka na swona? Leswaku hi kuma tinhlamulo, a hi tweni eka van’wana lava sweswi va tirhaka eMexico.

“A HI FANELE HI ENDLA KU CINCA”

Dustin na Jassa lava humaka eUnited States va tekane hi January 2007. Endzhakunyana ka sweswo, va kote ku kuma nchumu lowu ku nga khale va navela ku va na wona—ku va ni byatso kutani va tshama eka byona lembe hinkwaro. Byatso bya vona a byi bohiwe ekusuhi ni le Astoria, eOregon, le U.S.A., ku nga doroba ro saseka leri rhendzeriweke hi switsunga leswi nga ni makhwati ni tintshava leti funengetiweke hi gamboko, ku nga mpfhuka wutsongo ku suka eLwandle ra Pacific. Dustin u ri: “Kun’wana ni kun’wana laha a wu languta kona a ku sasekile!” Mpatswa lowu a wu anakanya leswaku a wu hanya vutomi byo olova naswona wu titshege hi Yehovha. Wu te, ‘Phela, hi tshama eka byatso lebyi leheke timitara ta nhungu, a hi tirhi nkarhi hinkwawo, hi hlanganyela ni vandlha ra ririmi rimbe naswona minkarhi yin’wana hi teka vuphayona bya nkarhinyana.’ Kambe endzhaku ka nkarhi, wu swi xiyile leswaku a wu tikanganyisa. Dustin u ri: “Ematshan’weni yo seketela vandlha, minkarhi yo tala a hi khomekile hi ku lunghisa byatso bya hina. A hi swi tiva leswaku  loko hakunene hi lava ku rhangisa Yehovha evuton’wini bya hina, a hi fanele hi endla ku cinca.”

Jassa wa engetela: “Loko ndzi nga si tekiwa, a ndzi tshama eMexico, laha a ndzi hlanganyela evandlheni ra Xinghezi. A ndzi swi tsakela ku va kwalaho naswona a ndzi tiyimisele ku tlhelela kona.” Hi nkarhi wa vugandzeri bya ndyangu, leswaku va kurisa ku navela ka vona ku ya tirha ematikweni man’wana, Dustin na Jassa va sungule ku hlaya timhaka ta vutomi ta vamakwerhu va xinuna ni va xisati lava rhurheleke ematikweni man’wana laha masimu a ma lunghekele ku tshoveriwa. (Yoh. 4:35) Dustin u te: “Na hina a hi lava ku va ni ntsako lowu fanaka.” Loko vanghana va vona va le Mexico va va byele leswaku ku ni ntlawa lowu wa ha ku simekiwaka lowu lavaka mpfuno, Dustin na Jassa va endle xiboho. Va tshike mintirho ya vona, va xavisa byatso bya vona kutani va rhurhela eMexico.

“MHAKA YO TSAKISA SWINENE LEYI TSHAMEKE YI HI HUMELELA”

Dustin na Jassa va fike va tshama edorobeni ra Tecomán—a va ha ri ekusuhi ni Lwandle ra Pacific kambe a ku ri tikhilomitara ta kwalomu ka 4 300 edzongeni wa Astoria. Dustin u ri: “Ematshan’weni yo va ni moya wo hola ni ku vona tintshava, ndhawu leyi ya hisa swinene naswona ku ni mirhi ya maswiri yo tala.” Eku sunguleni, a va nga yi kumi mintirho. Leswi a va nga ri na mali, a va dya rhayisi ni tinyawa kambirhi hi siku, vhiki na vhiki. Jassa u ri: “Kambe loko swakudya sweswo swa hina swi sungule ku hi karharisa, swichudeni swa hina swa Bibele swi sungule ku hi nyika mimango, mabanana, mapopo ni minkwama leyi teleke hi maswiri!” Hi ku famba ka nkarhi, mpatswa lowu wu kume ntirho exikolweni xo dyondzisa ririmi rimbe xa le Taiwan lexi a va dyondzisa hi ku tirhisa Internet. Mali leyi va yi holaka eka ntirho wolowo yi kota ku khathalela swilaveko swa vona hinkwaswo swa siku ni siku.

Dustin na Jassa va titwa njhani hi vutomi bya vona lebyintshwa? Va ri: “Ku rhurha loku i mhaka yo tsakisa swinene leyi tshameke yi hi humelela. Vuxaka bya hina na Yehovha ni bya hina hi hexe byi tiye ngopfu ku tlula eku sunguleni. Siku ni siku hi endla swilo swo tala swin’we—hi ya ensin’wini, hi bula hi ndlela leyi hi nga swi pfunaka ha yona swichudeni swa hina swa Bibele, hi lunghiselela minhlangano. Nakambe, mintshikilelo leyi a hi ri na yona enkarhini lowu hundzeke a ha ha ri na yona.” Va tlhele va ku: “Sweswi hi tiva swilo leswi a hi nga swi twisisi kahle eku sunguleni—ntiyiso wa xitshembiso lexi kumekaka eka Pisalema 34:8 lexi nge, ‘N’wina nantswani mi vona leswaku Yehovha hi lonene.’”

I YINI LEXI KHUTAZAKA MAGIDI YA VATIRHI VO TIRHANDZELA?

Vamakwerhu va xinuna ni va xisati vo tlula 2 900—lava ngheneleke vukati ni lava nga byi nghenelangiki, lava vo tala va vona va nga emalembeni ya va-20 na va-30—va rhurhele etindhawini to karhi eMexico laha ka ha riki ni xilaveko lexikulu xa vahuweleri va Mfumo. Ha yini Timbhoni  leti hinkwato ti nghenele ntirho lowu wo tika? Loko ntlawa wa vona va vutisiwe xivutiso lexi, va vule swivangelo swinharhu swa nkoka. Hi swihi swivangelo swa kona?

Leticia na Hermilo

Ku kombisa Yehovha ni vanhu rirhandzu. Leticia u khuvuriwe a ri ni malembe ya 18. U ri: “Loko ndzi tinyiketela eka Yehovha, a ndzi swi twisisa leswaku leswi swi vula ku n’wi tirhela hi mbilu ya mina hinkwayo ni hi moya-xiviri wa mina hinkwawo. A ndzi lava ku tirhisa nkarhi ni matimba ya mina hilaha ku engetelekeke entirhweni wa Yehovha leswaku ndzi kombisa leswaku ndza n’wi rhandza hi mbilu ya mina hinkwayo.” (Mar. 12:30) Hermilo, loyi sweswi a tekaneke na Leticia, u ye a ya tirha laha a ku ri ni xilaveko xa vahuweleri va Mfumo lava engetelekeke loko a ri emalembeni ya va-20. U ri: “Ndzi swi xiyile leswaku ku pfuna vanhu leswaku va enerisa xilaveko xa vona xa moya i ndlela ya nkoka yo kombisa leswaku ndza va rhandza varikwerhu.” (Mar. 12:31) Hikwalaho u suke edorobeni ra Monterrey leri fuweke laha a a tirha ebangi naswona a a hanya emafurheni, a rhurhela edorobeni leritsongo.

Essly

Ku kuma ntsako wa xiviri lowu tshamaka hilaha ku nga heriki. Endzhakunyana ka loko a khuvuriwile, Leticia u fambe ni makwerhu un’wana wa xisati la nga phayona leri nga ni ntokoto edorobeni leri nga roxe, laha va chumayeleke n’hweti hinkwayo. Leticia u ri: “A ndzi hlamarile. Swi ndzi tsakise swinene ku vona ndlela leyi vanhu va ri amukeleke ha yona rungula ra Mfumo leri a hi va byela rona. Eku heleni ka n’hweti yoleyo, ndzi tibyele ndzi ku, ‘Leswi hi leswi ndzi lavaka ku swi endla hi vutomi bya mina!’” Hilaha ku fanaka, lexi endleke Essly, makwerhu wa xisati la nga tekiwangiki loyi sweswi a nga emalembeni ya va-20, a lava ku ya tirha laha ku nga ni xilaveko a ku ri ntsako lowu a wu voneke eka vanhu lava tirhaka laha ku nga ni xilaveko lexikulu. Loko a ha ri exikolweni xa sekondari, u hlangane ni Timbhoni to hlayanyana leti hisekaka leti a ti tirha laha a ku ri ni xilaveko lexikulu. U ri: “Loko ndzi vona swikandza leswi tsakeke swa vamakwerhu lava va xinuna ni va xisati swi ndzi endle ndzi lava ku hanya vutomi lebyi fanaka ni bya vona.” Vamakwerhu vo tala va xisati va endle hilaha Essly a endleke hakona. Entiyisweni, eMexico vamakwerhu va xisati lava nga tekiwangiki vo tlula 680 va tirha laha ku nga ni xilaveko lexikulu. Mayana xikombiso lexinene lexi va xi vekelaka vantshwa ni lavakulu!

Ku hanya vutomi lebyi nga ni xikongomelo ni lebyi enerisaka. Loko a heta ku dyondza exikolweni xa sekondari, Essly u nyikiwe bazari leswaku a ya eyunivhesiti. Tintangha ta yena ti n’wi khutaze leswaku a yi amukela leswaku a ta “hanya vutomi lebyinene”—a va ni digri, a tirha kahle, a va ni movha naswona a tiphina hi vutomi. Kambe, a nga swi amukelanga switsundzuxo swa vona. Essly u ri: “Vanghana va mina vo hlayanyana lava nga Vakreste va swi endlile swilo leswi naswona ndzi swi xiyile leswaku eka vona tipakani ta moya a ti nga ha ri ta nkoka. Ndzi tlhele ndzi xiya leswaku va hetelele va pfilunganyekile hikwalaho ka swiphiqo leswi va langutaneke na swona loko va ya va tinghenisa swinene etimhakeni ta  misava leyi. A ndzi lava ku tirhisa vuntshwa bya mina ndzi tirhela Yehovha hi xitalo.”

Racquel na Phillip

Essly u endle tikhoso leti engetelekeke leti a ti ta endla leswaku a kota ku kuma ntirho leswaku a ta tihanyisa loko a ri karhi a phayona naswona u rhurhele endhawini leyi nga ni xilaveko xa xihatla xa vahuweleri va Mfumo. U tlhele a dyondza tindzimi ta kwalaho, ku nga Xiotomi ni Xitlapaneco. Sweswi, loko a anakanyisisa hi malembe manharhu lawa a ma heteke a ri karhi a chumayela etindhawini leti nga toxe, u ri: “Ku tirha laha ku nga ni xilaveko lexikulu swi ndzi endle ndzi eneriseka ni ku endla leswaku vutomi bya mina byi va ni xikongomelo xa xiviri. Xa nkoka swinene, swi kurise vuxaka bya mina na Yehovha.” Phillip na Racquel, mpatswa lowu nga emalembeni ya va-30 lowu humaka eUnited States wu pfumelelana na yona mhaka yoleyo. “Misava yi cinca hi ku hatlisa lerova vo tala va anakanya leswaku vutomi bya vona a byi sirhelelekanga. Kambe ku tirha laha ha ha kumaka vanhu vo tala lava yingisaka rungula ra le Bibeleni swi endla leswaku vutomi bya hina byi va ni xikongomelo. Swa hi enerisa swinene!”

NDLELA YO TLHANTLHA SWIPHIQO

Verónica

I ntiyiso, ku tirha laha ku nga ni xilaveko lexikulu xa vahuweleri va Mfumo ku ni swiphiqo swa kona. Xiphiqo xin’wana i ndlela leyi u faneleke u tihanyisa ha yona. Leswaku u kota ku tihanyisa, u fanele u tiyimisela ku pfumelelana ni swiyimo swa ndhawu leyi u tirhaka eka yona. Verónica phayona leri nga ni ntokoto wa hlamusela: “Endhawini yin’wana leyi a ndzi tirha eka yona, a ndzi xavisa swakudya leswi swekiweke swo chipa. Eka yin’wana a ndzi xavisa swiambalo ni ku tsemeta vanhu misisi. Sweswi ndzi basisa yindlu yo karhi ni ku dyondzisa vatswari lavantshwa ku vulavurisana ni vana va vona.”

Ku dyondza ndhavuko wun’wana ni mikhuva yo hambana-hambana swi nga ha va xiphiqo loko u tshama endhawini leyi nga yoxe exikarhi ka vanhu va le ndhawini yoleyo. A swi ri tano hi Phillip na Racquel loko va tirha ensin’wini ya Xinahuatl. Phillip u ri: “Ndhavuko wa hina ni wa vona a yi hambane swinene.” I yini lexi va pfuneke ku pfumelelana ni swiyimo? “A hi languta ngopfu swilo leswinene swa vanhu lava vulavulaka Xinahuatl—vun’we lebyi va nga na byona emindyangwini ya vona, ku tshembeka ka vona loko va tirhisana ni malwandla lawa va ma kombisaka.” Racquel yena u ri: “Hi dyondze swo tala hi ku tshama endhawini yoleyo ni hi ku tirha swin’we ni vamakwerhu va xinuna ni va xisati lava tshamaka kwalaho.”

NDLELA YO TILUNGHISELELA

Loko u ta tsakela ku tirha etindhawini leti nga toxe laha ku lavekaka mpfuno, u nga endla yini sweswi leswaku u tilunghiselela? Vamakwerhu va xinuna ni va xisati lava nga ni ntokoto entirhweni lowu va ri: Loko u nga si rhurha, rhanga u olovisa vutomi bya wena naswona u dyondza ku eneriseka. (Filp. 4:11, 12) I yini swin’wana leswi u nga swi endlaka? Leticia u ri: “Ndzi papalate mintirho leyi a yi ta ndzi endla ndzi tshama endhawini yin’we ku ringana nkarhi wo leha. A ndzi lava lowu a wu ta endla ndzi kota ku rhurha nkarhi wihi na wihi—rini na rini naswona ndzi ya kun’wana ni kun’wana laha a ndzi lava kona.” Hermilo u ri: “Ndzi dyondze ku sweka, ku hlantswa ni ku ayina.” Verónica wa hlamusela: “Loko ndza ha tshama ni vatswari va mina ni vamakwerhu, a ndzi pfuneta hi ku basisa naswona ndzi dyondze ku sweka swakudya swa nxavo wa le hansi kambe swo nandziha. Ndzi tlhele ndzi dyondza ni ku hlayisa mali.”

Amelia na Levi

Levi na Amelia lava humaka eUnited States naswona va nga ni malembe ya nhungu va tekanile, va hlamusela ndlela leyi swikhongelo leswi kongomeke swi va pfuneke ha yona ku kota ku lunghekela ku ya tirha eMexico. Levi u ri: “Hi hlayele mali leyi a hi ta lava ku yi tirhisa lembe hinkwaro loko hi tirha etikweni rin’wana kutani hi kombela Yehovha leswaku a hi pfuna hi kuma mali yoleyo.” Ku nga si hela tinh’weti ti nga ri tingani, va swi kotile ku hlengeleta mali leyi va yi khongeleleke kutani va nambe va rhurha. Levi u tlhela a ku: “Yehovha u hlamule xikombelo xa hina lexi kongomeke kutani sweswi a ku ri nkarhi wa hina wo endla leswi hi swi khongeleleke.” Amelia yena u ri: “A hi anakanya leswaku hi ta tshama lembe rin’we ntsena kambe sweswi hi ni malembe ya nkombo hi ri laha naswona a hi ehleketi hi ku suka! Ku tshama laha swi endla leswaku hi vona ndlela leyi Yehovha a hi pfunaka ha yona. Masiku hinkwawo, hi vona vunene bya yena.”

Adam na Jennifer

Adam na Jennifer, mpatswa lowu humaka eUnited States lowu tirhaka ensin’wini leyi ku vulavuriwaka Xinghezi le Mexico, na vona va pfuniwe swinene hi xikhongelo. Va ri: “U nga yimeli leswaku swilo swi kala swi famba kahle. Khongela hi mhaka yo tirha ematikweni man’wana kutani u endla hilaha u khongeleke hakona. Olovisa vutomi bya wena, tsalela rhavi ra le tikweni leri u lavaka ku ya tirha eka rona naswona endzhaku ko kunguhata kahle, rhurha!” * Loko u endla tano, u ta va ni vutomi lebyi tsakisaka ni lebyi fuweke hi tlhelo ra moya.

^ ndzim. 21 Leswaku u kuma rungula leri engetelekeke vona xihloko lexi nge, “Xana U Nga ‘Pelela eMakedoniya’?” eka Vutirheli Bya Hina Bya Mfumo bya August 2011.

DYONDZA SWO TALA

Hi Yihi Dyondzo Leyi Lunghiseleriwaka Maphayona?

Hi wihi ndzetelo wo hlawuleka lowu lunghiseleriwaka lava tirhisaka nkarhi wa vona wo tala entirhweni wo chumayela hi Mfumo?