Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) APRIL 2013

Xana A Wu Swi Tiva?

Xana A Wu Swi Tiva?

Xana tempele ya le Yerusalema yi pfuxiwile endzhaku ka 70 C.E.?

YESU u vule leswaku a ku na ribye leri a ri ta siyiwa ri yimile ehenhla ka rin’wana etempeleni ya Yehovha—vuprofeta byebyo byi hetiseke loko mavuthu ya Rhoma lawa a ma rhangeriwe hi Titus ma lovisa Yerusalema hi 70 C.E. (Mat. 24:2) Endzhakunyana, Mufumi Julian u kunguhate ku pfuxa tempele.

Julian u vuriwe mufumi wa Rhoma wo hetelela la nga muhedeni. N’wana loyi wa jaha wa makwavo wa Constantine Lonkulu u dyondzisiwe leswi vuriwaka Vukreste. Kambe, endzhaku ka loko a vekiwe ku va mufumi hi 361 C.E., u yi ale hi ku helela dyondzo yoleyo ni Vukreste lebyi gwineheke bya le nkarhini wa yena, a seketela vuhedeni. Tibuku ta matimu ti n’wi vitana “Mugwinehi.”

Julian a a byi venga Vukreste. Xivangelo xin’wana ku nga ha va hileswi loko a ha ri ni malembe ya tsevu, a voneke vayimeri va byona va dlaya tata wa yena ni maxaka ya yena ya xinuna. Hi ku ya hi van’wamatimu va vukhongeri, Julian u khutaze Vayuda ku pfuxa tempele ya vona, a ri ni ntshembo wa leswaku leswi swi ta kombisa leswaku Yesu a a ri muprofeta wa mavunwa. *

A swi kanakanisi leswaku Julian a a kunguhate ku pfuxa tempele. Van’wamatimu va phikizana hi loko hakunene a tlhele a sungula ntirho wo aka nileswaku loko a wu sungurile, i yini lexi endleke leswaku ntirho wolowo wu tshikiwa. Kambe, ku ni nchumu wun’we lowu ku tiyisekiwaka ha wona. Julian u dlayiwe a nga si heta malembe mambirhi a sungule ku fuma naswona tsima ra yena ri fe na yena.

Xifaniso xa ndlela leyi swi nga ha endlekaka tempele a yi languteka ha yona enkarhini wa Yesu, xi vekiwile namuntlha endhawini leyi tempele a yi akiwe eka yona

^ ndzim. 5 Yesu a nga vulanga leswaku tempele a yi nge pfuxiwi kambe u vule leswaku yi ta lovisiwa, leswi endlekeke hi 70 C.E.