Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) MARCH 2013

Mi Chaveleleka Na N’wina Mi Chavelela Van’wana

Mi Chaveleleka Na N’wina Mi Chavelela Van’wana

Leswi hi nga vanhu lava nga hetisekangiki, hinkwerhu ka hina hi langutane ni mavabyi, van’wana va langutane ni mavabyi lamakulu. Loko hi langutane ni swiyimo swo tano swo tika, i yini leswi nga hi pfunaka leswaku hi nga vi ni gome?

Nchumu wun’wana wa nkoka lowu nga hi pfunaka i nchavelelo lowu hi wu kumaka eka vandyangu, vanghana ni le ka vapfumeri-kulorhi.

Marito ya musa ni ya rirhandzu lama vuriweke hi munghana ma nga fana ni mafurha lama hi horisaka ni ku hi phyuphyisa. (Swiv. 16:24; 18:24; 25:11) Kambe Vakreste va ntiyiso a va anakanyi ntsena hi xilaveko xa vona xo chaveleriwa. Va teka goza ra ku “chavelela lava nga emahlomulweni ya mixaka-xaka hi nchavelelo lowu Xikwembu xi [va] chavelelaka ha wona.” (2 Kor. 1:4; Luka 6:31) Antonio, mulanguteri wa muganga wa le Mexico, i un’wana la tokoteke mhaka leyi.

Loko a khomiwe hi lymphoma, ku nga muxaka wo karhi wa khensa ya ngati, Antonio a a tshikileleke swinene. Nilokoswiritano, u ringete hi matimba leswaku a lawula mintlhaveko ya yena yo biha. Njhani? U ringete ku tsundzuka tinsimu ta Mfumo ni ku ti yimbelela leswaku a ta twa ni ku anakanyisisa hi marito ya tona. Ku khongela hi rito leri twalaka swin’we ni ku hlaya Bibele na swona swi ve nchavelelo lowukulu eka yena.

Hambiswiritano, Antonio sweswi wa swi xiya leswaku mpfuno wun’wana lowukulu u wu kume eka vapfumeri-kulobye. U ri: “Loko mina ni nsati wa mina hi titwa hi tshikilelekile, a hi kombela xaka ra hina leri nga nkulu evandlheni leswaku ri ta khongela na hina. Leswi swi hi chavelerile ni ku rhurisa timbilu ta hina.” U tlhela a ku, “Kahle-kahle hikwalaho ka nseketelo wa ndyangu wa hina ni wa vapfumeri-kulorhi, hi swi kotile ku hlula mintlhaveko yo biha hi nkarhi wutsongo.” U swi tlangele swinene leswi a a ri ni vanghana volavo lava nga ni rirhandzu ni lava khathalaka!

Mpfuno wun’wana hi nkarhi wa maxangu i moya lowo kwetsima lowu hi tshembisiweke wona. Muapostola Petro u vule leswaku moya lowo kwetsima wa Xikwembu i “nyiko ya mahala.” (Mint. 2:38) Sweswo swi kombisiwe swi ri ntiyiso loko vo tala va totiwa hi Pentekosta ya 33 C.E. Kambe hinkwerhu ka hina hi nga wu kuma moya lowo kwetsima. Nyiko leyi hi nga yi kuma hilaha ku nga pimiwangiki, hikwalaho ha yini u nga yi kombeli nkarhi na karhi?—Esa. 40:28-31.

KOMBISA LESWAKU U VA TSAKELA SWINENE LAVA XANISEKAKA

Muapostola Pawulo u tiyisele maxangu yo tala, minkarhi yin’wana u langutane ni rifu. (2 Kor. 1:8-10) Kambe, Pawulo a a nga ku chavi ku fa. U chavelelekile hi ku tiva leswaku Xikwembu xa n’wi seketela. U tsale a ku: “A ku dzunisiwe Xikwembu tlhelo Tata wa Hosi ya hina Yesu Kreste, Tatana la nga ni tintswalo letikulu tlhelo Xikwembu xa nchavelelo hinkwawo, lexi hi chavelelaka enhlomulweni wa hina hinkwawo.” (2 Kor. 1:3, 4) Pawulo a nga swi pfumelelanga swiphiqo swa yena leswaku swi n’wi heta matimba. Ku ri na sweswo, maxangu lawa a ma tiyiseleleke ma n’wi pfune leswaku a va ni ntwela-vusiwana, leswaku a ta faneleka ku chavelela van’wana hi nkarhi lowu va lavaka ku chaveleriwa.

Endzhaku ka loko a horile eka vuvabyi bya yena, Antonio u swi kotile ku tlhela a va mulanguteri wa muganga. Nkarhi na nkarhi a a kombisa leswaku wa va rhandza vapfumeri-kulobye, kambe yena ni nsati wa yena va endle matshalatshala yo hlawuleka leswaku va endzela lava vabyaka ni ku va khutaza. Hi xikombiso, endzhaku ko endzela Mukreste un’wana loyi a a khomiwe hi vuvabyi lebyikulu, Antonio u xiye leswaku makwerhu loyi a a nga swi lavi ku ya eminhlanganweni. Antonio u ri: “A ku nga ri hi leswi a nga n’wi rhandzi Yehovha kumbe vamakwerhu, kambe vuvabyi bya yena a byi endle leswaku a titwa a nga ha pfuni nchumu.”

Xin’wana lexi Antonio a xi endleke leswaku a khutaza makwerhu loyi la vabyaka a ku ri ku n’wi kombela leswaku a va khongelela eka xinkhubyana xin’wana lexi xi veke kona ku nga ri khale. Hambileswi makwerhu loyi a a titwa a nga faneleki, u pfumerile ku khongela. Antonio u ri: “U khongele kahle swinene naswona hi ku famba ka nkarhi u cincile. U tlhele a titwa a faneleka.”

Ina, hinkwerhu hi tshame hi tiyisela mixaka yo karhi ya maxangu, hi mpimo lowukulu kumbe lowutsongo. Kambe hilaha Pawulo a vuleke hakona, leswi swi nga hi hlomisa leswaku hi kota ku chavelela van’wana loko va lava ku chaveleriwa. Hikokwalaho, a hi kombiseni ntwela-vusiwana loko Vakreste-kulorhi va xaniseka naswona hi tekelela Xikwembu xa hina, Yehovha, hi ku chavelela van’wana.