Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) DECEMBER 2012

Wa Tsundzuka Xana?

Wa Tsundzuka Xana?

Xana u yi hlaye hi vukheta minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

Hi nga wu timela njhani ndzilo lowu vangiwaka hi mavulavulelo lama tlhavaka?

Hi fanele hi kambela mbilu ya hina. Ematshan’weni yo sola makwerhu, ha yini hi nga kambisisi leswaku ha yini hi n’wi anakanyela swo biha? Xana ha n’wi sola leswaku van’wana va ta n’wi tekela ehansi kutani va teka hina hi antswa? Ku tlula kwalaho, ku rhandza ku sola van’wana swi nga nyanyisa xiyimo.—8/15, tluka 21.

Xana Nawu wu ri kombise njhani langutelo ra Xikwembu hi vavasati?

Vavasati va Vaisrayele a va ri ni ntshunxeko lowukulu naswona a va ri ni mfanelo yo kuma dyondzo. A va fanele va xiximiwa naswona timfanelo ta vona a ti fanele ti sirheleriwa.—9/1, matluka 5-7.

Leswi siku ra Yehovha ri tshinelaka, hi swihi swiendlakalo leswi nga ta humelela?

Ku ta vuriwa marito lama nge, “Ku rhula ni nsirhelelo.” Matiko ma ta hlasela ma tlhela ma lovisa Babilona Lonkulu. Vanhu va Xikwembu va ta hlaseriwa. Ku ta va ni nyimpi ya Armagedoni, endzhaku ka yona Sathana ni madimona ya yena va ta lahleriwa ekheleni ro enta.—9/15, tluka 4.

Hi vuyeriwa njhani hileswi hi nga tiviki nkarhi lowu makumu ma nga ta fika ha wona?

Leswi hi nga tiviki siku kumbe nkarhi swi endla leswaku hi kombisa leswi nga etimbilwini ta hina hakunene. Hi kuma nkarhi wo tsakisa mbilu ya Xikwembu. Swi hi khutaza ku hanya vutomi bya ku tinyiketela ni ku tirhisa vutomi bya hina leswaku hi tirhela Xikwembu ni ku pfuna van’wana, swi tlhela swi hi pfuna leswaku hi tshemba Xikwembu hi ku helela ni Rito ra xona. Ku tlula kwalaho, swi hi pfuna leswaku hi dyondza eka miringo leyi hi welaka ni ku tiyisa ripfumelo ra hina.—9/15, matluka 24-25.

Hi nga yi tirhisa njhani Genesa 3:19 ku hlamulana ni munhu loyi a pfumelaka leswaku tihele ti kona?

Ndzimana leyi yi vula leswaku loko Adamu a fa a a ta tlhelela entshurini wa misava hayi leswaku a a ta ya etiheleni.—10/1, tluka 13.

“Tinyeleti ta nkombo” leti nga le vokweni ra Yesu ra xinene leti ku vulavuriwaka ha tona eka Nhlavutelo 1:16, 20 ti fanekisela vamani?

Ti fanekisela vakulu lava totiweke kambe leswi vuriwaka ha vona swi nga tlhela swi kombetela eka vakulu hinkwavo emavandlheni.—10/15, tluka 14.

Xana wanuna ni wansati va nga endla yini loko va ri ni swikweleti?

Mpatswa lowu tekaneke wu fanele wu vulavula hi ku ntshunxeka ni hi ku rhula malunghana ni xikweleti xa wona. Swi ta wu pfuna loko wo hlela mali leyi wu nga na yona sweswi. Xana wu nga engetela muholo wa wona kumbe wu hunguta swilo leswi wu swi xavaka kumbe ku swi hakelela? Wu fanele wu kambisisa ndlela leyi wu nga ta swi hakela ha yona swikweleti swa wona, kumbexana wu vulavurisana ni lava va wu lombeke mali malunghana ni ndlela leyintshwa leyi wu nga hakelaka ha yona. Kambe wu fanele wu amukela xiyimo lexi nga ha vaka kona loko wu ri karhi wu hlela mali ya wona naswona wu fanele wu yi tirhisa hi ndlela leyi faneleke. (1 Tim. 6:8)—11/1, matluka 19-21.

Yesu u wu kombise njhani moya wo titsongahata lowu ku vulavuriwaka ha wona eka Esaya 50:4, 5?

Tindzimana toleto ti vula leswaku loyi a nga ni “ririmi ra lava dyondzisiweke” a a nga ta “[hundzulukela] eka tlhelo lerin’wana.” Yesu u kombise moya wo titsongahata, a yingiserisisa loko Tata wa yena a n’wi dyondzisa. Yesu a a tiyimiserile ku dyondza eka Yehovha, a languta ndlela leyi Xikwembu xi va kombiseke musa ha yona hi ku titsongahata vanhu lava nga ni xidyoho.—11/15, tluka 11.

Xitempe xa poso xa xitsundzuxo xa le Estonia xi nyikela vumbhoni njhani eka ku tshembeka ka Timbhoni ta Yehovha?

Hi 2007 Hofisi ya Poso ya le Estonia yi humese xitempe lexi vulavulaka hi ku yayarheriwa ka vanhu va le Estonia hi Stalin. A xi ri ni nhlayo ya 382, leyi kombetelaka eka nhlayo ya Timbhoni ni vana va tona lava hlongoriweke hi 1951 va yisiwa etikampeni ta nxaniso etikweni ra Rhaxiya leri a ri ri ekule swinene ni makaya ya vona.—12/1, matluka 27-28.