Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) DECEMBER 2012

Tivonele Eka Ku Tirhisa Bibele Hi Ndlela Ya Vukholwa-hava

Tivonele Eka Ku Tirhisa Bibele Hi Ndlela Ya Vukholwa-hava

“RITO ra Xikwembu ra hanya naswona ri ni matimba.” (Hev. 4:12) Hi marito lawa muapostola Pawulo u kandziyise matimba lawa rito ra Xikwembu ri nga na wona yo khumba timbilu ni ku hundzula vutomi.

Hambiswiritano, langutelo rero ra matimba ya rungula ra Bibele ri hetelele ri nga ha twisiseki loko vugwinehi lebyi ku profetiweke ha byona byi dzime timitsu endzhaku ka ku fa ka vaapostola. (2 Pet. 2:1-3) Hi ku famba ka nkarhi, vafundhisi va sungule ku vula leswaku Rito ra Xikwembu ri ni masalamusi. Profesa Harry Y. Gamble u tsale hi “ku tirhisiwa ka masalamusi ka matsalwa ya Vukreste.” U vule leswaku hi lembe-xidzana ra vunharhu, Mufundhisi Origen u ringanyete leswaku “ku va munhu a twa mpfumawulo ntsena wa marito yo kwetsima swa pfuna hi ndlela yo karhi: loko marito ma ri ni matimba eka masalamusi ya vuhedeni, hakunene marito ya Xikwembu lama nga ematsalweni ma ni matimba swinene.” John Chrysostom loyi a hanyeke eku heleni ka lembe-xidzana ra vumune u tsale leswaku “diyavulosi a nge vi na xitiya-nhlana xo tshinela endlwini leyi nga ni Evhangeli.” U tlhele a vula leswaku van’wana va tsimba tindzimana ta Tievhangeli etinhan’wini ta vona va tshemba leswaku ti ta va sirhelela. Profesa Gamble u tlhele a vula leswaku Augustine mufundhisi wa Khatoliki “u swi teke swi pfumeleriwa leswaku munhu a etlela ni kopi ya Evhangeli ya Yohane ehansi ka xikhigelo loko a pandziwa hi nhloko”! Xisweswo tindzimana ta le Bibeleni a a ti tirhiseriwa swikongomelo swa masalamusi. Xana u fanele u teka Bibele tanihi xitshungulo, lexi nga ku sirhelelaka eka swilo swo biha?

Kumbexana ku tirhisiwa ka Bibele hi ndlela yo biha loku tolovelekeke i mukhuva wa ku vhumbha vumundzuku hi ku tirhisa yona. Sweswo swi vula ku pfula buku hakanyingi Bibele, eka tluka rin’wana ni rin’wana, kutani u hlaya ndzimana leyi mahlo ya wena ma yi vonaka ku sungula hi ntshembo wa leswaku marito wolawo ma ta ku nyika nkongomiso lowu u wu lavaka. Hi xikombiso, hi ku ya hi Profesa Gamble, loko Augustine siku rin’wana a twe rito ra n’wana wa muakelani a huwelela a ku: “Teka u hlaya, teka u hlaya,” Augustine u swi teke tanihi xileriso lexi humaka eka Xikwembu xa leswaku a pfula Bibele a hlaya ndzimana yo sungula leyi mahlo ya yena ma nga ta hlangana na yona.

Xana u tshame u twa hi vanhu lava loko va langutane ni xiyimo xo tika va khongelaka eka Xikwembu kutani endzhaku va pfula tluka rin’wana ni rin’wana ra Bibele, va ri ni ntshembo wa leswaku ndzimana yo sungula leyi va nga ta yi vona yi ta va pfuna leswaku va langutana ni xiphiqo xa vona? Hambileswi xikongomelo xa vona xi nga ha vaka xi ri xinene, kambe yoleyo a hi yona ndlela leyi Vakreste va faneleke va lava nkongomiso ha yona eMatsalweni.

Yesu u tiyisekise vadyondzisiwa va yena leswaku u ta va rhumela “mupfuni, la nga moya lowo kwetsima.” U ye emahlweni a ku: “U ta mi dyondzisa swilo hinkwaswo ni ku mi tsundzuxa swilo hinkwaswo leswi ndzi mi byeleke swona.” (Yoh. 14:26) Ku hambana ni sweswo, ku vhumbha vumundzuku hi ku tirhisa buku a swi lavi u va u tiva Matsalwa.

Mukhuva wa ku vhumbha vumundzuku hi ku tirhisa buku ni ku tirhisiwa kun’wana ka Bibele hi ndlela ya vukholwa-hava swi tolovelekile. Hambiswiritano, Rito ra Xikwembu ra ku sola ku lava ku endla mihlolo. (Lev. 19:26; Det. 18:9-12; Mint. 19:19) “Rito ra Xikwembu ra hanya naswona ri ni matimba,” kambe hi fanele hi va ni vutshila byo ri tirhisa. Vutivi lebyi kongomeke bya Bibele hi byona byi antswisaka vutomi bya vanhu, ku nga ri ku tirhisa buku leyi hi ndlela ya vukholwa-hava. Ku va ni vutivi byolebyo swi pfune vanhu vo tala leswaku va hlakulela mahanyelo lamanene, va tshika mahanyelo lama nga ni khombo, va tiyisa vutomi bya mindyangu ya vona ni ku va ni vuxaka ni Mutsari wa Bibele.