Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza (Nkandziyiso Wa Vandlha)  |  November 2012

 Tolo A Nga Ha Vuyi

‘A Ku Ri Rungula Lerinene Ngopfu Leri Tshameke Ri Twiwa’

‘A Ku Ri Rungula Lerinene Ngopfu Leri Tshameke Ri Twiwa’

LOKO a kombetela eka nhulu ya mintsandza leyi leheke timitara ta 18 leyi a yi ri endhawini leyi a ku hlayiseriwa kona swilo le Saskatoon, eSaskatchewan, le Canada, George Naish, u vutise a ku: “Timhandzi leti hinkwato i ta yini?” U byeriwe leswaku mintsandza leyi a yi tirhisiwe ku aka ndhawu leyi switimela a swi lawuriwa eka yona hi nkarhi wa Nyimpi yo Sungula ya Misava. Endzhakunyana Makwerhu Naish u te: “Mina a ndzi vona onge hi nga tirhisa mintsandza yoleyo leswaku hi aka swihondzo swo koka magandlati ya xiya-ni-moya, naswona a ku ri ro sungula hi anakanya hi ku va ni xitichi xa hina xa xiya-ni-moya xa ntirho wa hina wo chumayela.” Endzhaku ka lembe—hi 1924—CHUC yi sungule ku haxa. A ku ri xin’wana xa switichi swo sungula swa xiya-ni-moya swo haxa timhaka ta vukhongeri le Canada.

(1) Xitichi xa le Edmonton, le Alberta (2) Makwerhu wa xinuna a ri karhi a tirha eka muchini wo haxa ha wona le Toronto, eOntario

Tiko ra Canada leri laveke ku ringana ni tiko ra Yuropa, a ri ri ndhawu leyinene yo chumayela hi xiya-ni-moya. Florence Johnson, loyi a tirheke exitichini xa le Saskatoon u te: “Hikwalaho ka ku haxa ka hina hi xiya-ni-moya, ntiyiso wu fikelele vanhu vo tala lava a hi nga ta kota ku va fikelela. Naswona leswi xiya-ni-moya a xi ri xintshwa hi nkarhi wolowo, vanhu a va lava ku twa xin’wana ni xin’wana lexi a xi haxiwa.” Hi 1926, Swichudeni swa Bibele (hilaha Timbhoni ta Yehovha a ti vitaniwa hakona hi nkarhi wolowo) a swi ri ni switichi swa swona swa xiya-ni-moya emadorobeni ya mune ya le Canada. *

Ndhawu yo haxela eka yona le xitichini xa CHUC le Saskatoon, eSaskatchewan

Xana a wu ta va u twe yini loko a wu lo pfulela xin’wana xa switichi leswi? Vayimbeleri lava humaka emavandlheni ya kwalaho hakanyingi a va yimbelela tinsimu naswona a ku ri ni ntlawa lowutsongo wa vayimbeleri lava tlangaka swichayachayana swo hambana-hambana. Vamakwerhu a va nyikela tinkulumo va tlhela va va ni mabulo lama sekeriweke eBibeleni. Amy Jones, loyi a hlanganyeleke eka mabulo wolawo, u ri: “Loko ndzi ri ensin’wini, a ndzi titivisa kutani minkarhi yin’wana n’wini wa muti a ku, ‘Ndzi tshame ndzi ku twa eka xiya-ni-moya.’”

“A hi nga swi koti ku hlamula vanhu hinkwavo lava baka tinqingho hikuva a va tele ngopfu”

Swichudeni swa Bibele swa le Halifax, eNova Scotia, swi haxe nongonoko wa swona eka xiya-ni-moya hi ndlela leyi nga tolovelekangiki—a swi ta vulavula hi mhaka yo karhi kutani swi rhamba vayingiseri leswaku va ba tinqingho va vutisa swivutiso leswi sekeriweke  eBibeleni hi nkarhi wa nongonoko. Makwerhu un’wana wa xinuna u tsarile a ku: “Vanhu va angule hi ndlela leyi hlamarisaka eka nongonoko lowu. A hi nga swi koti ku hlamula vanhu hinkwavo lava baka tinqingho hikuva a va tele ngopfu.”

Ku fana ni vanhu va le nkarhini wa muapostola Pawulo, vanhu va angule hi tindlela to hambana-hambana eka rungula ra Swichudeni swa Bibele. (Mint. 17:1-5) Vayingiseri van’wana va ri amukerile rungula leri. Hi xikombiso, loko Hector Marshall a twe Swichudeni swa Bibele swi vulavula hi Studies in the Scriptures eka xiya-ni-moya, u ode tivholumo ta tsevu. Endzhakunyana u tsarile a ku: “A ndzi anakanya leswaku tibuku leti ti ta ndzi pfuna ku dyondzisa vana exikolweni xa Sonto.” Hambiswiritano, loko Hector a heta ku hlaya Vholumo I, u tshike kereke ya yena. U ve muhuweleri la hisekaka naswona u tirhele Yehovha hi ku tshembeka ku fikela loko a fa hi 1998. Le vuxeni bya Nova Scotia, hi siku ra le ndzhaku ka loko ku haxiwe nkulumo leyi nge, “Mfumo, Ntshembo Wa Misava,” Kolonele J. A. MacDonald u byele makwerhu wa kwalaho a ku: “Tolo vanhu va le Xihlaleni xa Cape Breton va twe rungula lerinene ngopfu leri tshameke ri twiwa exiphen’wini lexi xa misava.”

Hi hala tlhelo, vafundhisi a va hlundzukile. Makhatoliki man’wana le Halifax ma xungete hileswaku ma ta xi hlasela hi tibomo xitichi lexi a xi ta haxa minongonoko ya Swichudeni swa Bibele. Hi xihatla, hi 1928 hulumendhe yi tivise leswaku a yi nge ti pfuxeti tilayisense to haxa ta switichi leswi a swi ri swa Swichudeni swa Bibele, hikwalaho ka leswi a yi kuceteriwa hi vafundhisi. Endzhaku ka sweswo, vamakwerhu va xinuna ni va xisati va fambise xiphephana lexi nge, Who Owns the Air?—ku nga rungula leri kandziyisiweke leri a ri kanetana ni xiendlo xolexo xo biha. Nilokoswiritano, valawuri va arile ku pfuxeta tilayisense to haxa ta Swichudeni swa Bibele.

Xana leswi swi wu hete matimba ntlawa lowu lowutsongo wa malandza ya Yehovha eCanada? Isabel Wainwright u te: “Eku sunguleni, a swi tikomba onge nala u hi hlurile. Kambe a ndzi swi tiva leswaku Yehovha a a ta va a swi siverile loko a swi fambisana ni xikongomelo xa yena. Kutani a swi vula leswaku a hi fanele hi tirhisa ndlela yin’wana ya nkoka swinene yo chumayela mahungu lamanene ya Mfumo.” Ematshan’weni yo titshega swinene hi ku chumayela eka xiya-ni-moya, Swichudeni swa Bibele swa le Canada swi sungule ku endzela vanhu emakaya ya vona. Hambiswiritano, ku haxa hi xiya-ni-moya ku tirhe swinene eku haxeni ka ‘rungula lerinene ngopfu leri tshameke ri twiwa’ hi nkarhi wa kona.—Tolo a nga ha vuyi eCanada.

^ ndzim. 4 Leswaku va kota ku haxa, vamakwerhu va le Canada va tlhele va hakela switichi swin’wana swa xiya-ni-moya.