Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) SEPTEMBER 2012

“A Mi Ri Tivi Siku Hambi Ku Ri Nkarhi Wa Kona”

“A Mi Ri Tivi Siku Hambi Ku Ri Nkarhi Wa Kona”

“Hikokwalaho, tshamani mi rindzile, hikuva a mi ri tivi siku hambi ku ri nkarhi wa kona.”—MAT. 25:13.

1-3. (a) Hi swihi swiyimo leswi nga hi pfunaka ku twisisa leswi hi nga swi dyondzaka eka swifaniso swimbirhi swa Yesu? (b) Hi swihi swivutiso leswi hi faneleke hi swi hlamula?

AHI nge mutirhela-mfumo u ku kombela leswaku u n’wi yisa eka nhlangano wo hlawuleka hi movha ya wena. Kambe loko ku sele timinete ti nga ri tingani leswaku u ya n’wi teka u n’wi yisa enhlanganweni wolowo, u xiya leswaku petirolo leyi nga emovheni ya wena i yitsongo. Hi ku hatlisa wa famba u ya yi tatisa. Loko wa ha fambile, mutirhela-mfumo u sala a fika. Wa ku lava kambe a nga ku kumi. Leswi a nga ta kala a nga swi koti ku ku rindza, u kombela un’wana leswaku a n’wi fambisa. Loko u vuya u kuma leswaku mutirhela-mfumo se u fambile. A wu ta titwa njhani?

2 Sweswi tianakanye u ri mutirhela-mfumo naswona loko u nga si teka riendzo u hlawula vavanuna vanharhu lava fanelekaka leswaku va ku endlela ntirho wun’wana wa nkoka. U va hlamusela leswi va faneleke va swi endla naswona havanharhu va pfumela ku endla ntirho. Kambe, loko u vuya endzhaku ka nkarhi, u kuma leswaku ko va vambirhi ntsena lava endleke ntirho wa vona. Ku tlula kwalaho, loyi a nga wu endlangiki ntirho wa tiyimelela. Entiyisweni, a nga ringetanga hambi ku wu endla. A wu ta titwa njhani?

3 Eka xifaniso xa yena xa vanhwanyana va khume ni xa titalenta, Yesu u tirhise swiyimo leswi fanaka leswaku a kombisa leswaku ha yini enkarhini wa makumu Vakreste van’wana lava totiweke a va ta tshembeka va tlhela va tlhariha kambe van’wana va nga endli tano. * (Mat. 25:1-30) U kandziyise yinhla ya yena hi ku vula a ku: “Hikokwalaho, tshamani mi rindzile, hikuva a mi ri tivi siku hambi ku ri nkarhi wa kona”—hileswaku nkarhi lowu Yesu a nga ta lovisa misava ya Sathana ha wona. (Mat. 25:13) Hi nga yi tirhisa ndzayo yoleyo namuntlha. Hi nga vuyeriwa njhani hi ku tshama hi rindzile, hilaha Yesu a hi khutazeke hakona? I vamani lava tshameke va rindzile?  Naswona hi fanele hi endla yini sweswi leswaku hi tshama hi rindzile?

LEXI ENDLAKA SWI VA SWA NKOKA KU TSHAMA HI RINDZILE

4. Leswaku hi tshama hi rindzile, ha yini swi nga bohi leswaku hi tiva siku leri makumu ma nga ta fika ha rona?

4 Mintirho yin’wana, yo tanihi ku tirha efektri, ku ya eka dokodela kumbe ku famba hi xo famba xa mani na mani yi lava hi xixima nkarhi. Kambe, mintirho yin’wana yo tanihi ku timela ndzilo kumbe ku phalala laha ku veke ni mhangu a yi lavi leswaku munhu a tshamela ku languta nkarhi hikuva sweswo swi nga ha kavanyeta kumbe swi va ni khombo. Eka swiyimo swoleswo, i swa nkoka swinene ku dzikisa mianakanyo ya wena eka ntirho lowu nga kona ematshan’weni ya ku languta nkarhi. Leswi makumu ya mafambiselo lawa ma tshineleke swinene, ntirho wa hina wo chumayela wu pfuna vanhu leswaku va dyondza hileswi Yehovha a swi endleke leswaku a ponisa vanhu naswona ntirho lowu i wa nkoka swinene sweswi. Leswaku hi tshama hi rindzile naswona hi endla leswi Yehovha a languteleke leswaku hi swi endla, a swi lavi leswaku hi tiva nkarhi lowu makumu ma nga ta fika ha wona. Entiyisweni, ku ni tindlela ta ntlhanu leti endlaka hi vuyeriwa hi ku va hi nga tivi siku kumbe nkarhi lowu makumu ma nga ta fika ha wona.

5. Ku nga tivi leswaku makumu ma ta fika rini swi hi pfuna njhani ku kombisa leswi nga etimbilwini ta hina?

5 Xo sungula, leswi hi nga swi tiviki leswaku makumu ma ta fika rini swi endla leswaku hi kombisa leswi nga etimbilwini ta hina hakunene. Yehovha u hi kombisa xichavo hi ku hi pfumelela leswaku hi hlawula ku tshembeka eka yena. Hi tirhela Yehovha hileswi hi n’wi rhandzaka, ku nga ri hileswi hi lavaka ku pona loko ku lovisiwa mafambiselo lawa kutani hi kuma vutomi lebyi nga heriki. (Hlaya Pisalema 37:4.) Ha tsaka loko hi endla ku rhandza ka Xikwembu naswona ha swi xiya leswaku xi hi dyondzisela ku hi pfuna. (Esa. 48:17) Swileriso swa xona a swi hi tikeli.—1 Yoh. 5:3.

6. Loko hi tirhela Xikwembu hileswi hi xi rhandzaka, xi titwa njhani naswona ha yini?

6 Vuyelo bya vumbirhi bya ku va hi nga tivi siku kumbe nkarhi hileswaku hi kuma nkarhi wo tsakisa mbilu ya Yehovha. Loko hi n’wi tirhela hileswi hi n’wi rhandzaka—ku nga ri hileswi makumu ma nga tshinela kumbe hi ku lava ku hakeriwa—hi endla leswaku Yehovha a kombisa leswaku nala wa yena Sathana, i muhembi. (Yobo 2:4, 5; hlaya Swivuriso 27:11.) Ha swi tiva leswaku Diyavulosi u vange ku xaniseka lokukulu, hikwalaho hi tsakela ku seketela vuhosi bya Yehovha kutani hi fularhela bya Sathana.

7. Ha yini u lava ku tirhisa vutomi bya wena leswaku u tirhela Xikwembu ni ku pfuna van’wana?

7 Xa vunharhu, leswi hi nga ri tiviki siku ra makumu swi endla leswaku swi hi olovela ku hanya vutomi bya ku tinyiketela ni ku tirhisa vutomi bya hina leswaku hi tirhela Xikwembu ni ku pfuna van’wana. Van’wana namuntlha lava nga xi tiviki Xikwembu na vona va tshemba leswaku misava yi ta herisiwa. Leswi va chavaka leswaku nkarhi wun’wana ni wun’wana mhangu yo karhi yi nga ha herisa misava, va ni langutelo ra leswaku: “A hi dyeni hi nwa, hikuva mundzuku hi ta fa.” (1 Kor. 15:32) Kambe hina a hi chavi. Naswona a hi khathali hi timhaka ta hina ntsena. (Swiv. 18:1) Kambe, hi rhangisa ku rhandza ka Yehovha evuton’wini bya hina naswona hi ku tirhandzela hi tirhisa nkarhi, matimba ni swilo swin’wana swa hina leswaku hi chumayela mahungu lamanene ya Mfumo wa Xikwembu. (Hlaya Matewu 16:24.) Hi kuma ntsako loko hi tirhela Xikwembu, ngopfu-ngopfu loko hi pfuna van’wana leswaku va xi tiva.

8. Hi xihi xikombiso xa le Bibeleni lexi kombisaka leswaku hi fanele hi tshemba Yehovha hi ku helela ni Rito ra yena?

8 Vuyelo bya vumune bya ku va hi nga tivi siku kumbe nkarhi hileswaku swi hi pfuna leswaku hi tshemba Yehovha hi ku helela ni ku endla hilaha hi nga kotaka hakona leswaku hi yingisa Rito ra yena evuton’wini bya hina. Leswi hi nga hetisekangiki swa olova leswaku hi titshemba. Pawulo u tsundzuxe Vakreste hinkwavo a ku: “Loyi a ehleketaka leswaku u yimile a a tivonele leswaku a nga wi.” Vanhu va 23 000 va lovisiwe hi Yehovha emahlweninyana ka ku va Yoxuwa a va rhangela  va nghena eTikweni leri Tshembisiweke. Pawulo u te: “Swilo leswi . . . swi tsaleriwe leswaku swi va xilemukiso eka hina lava hi fikeriweke hi makumu ya mafambiselo ya swilo.”—1 Kor. 10:8, 11, 12.

9. Miringo yi nga ri tiyisa njhani ripfumelo ra hina ni vunghana bya hina na Xikwembu?

9 Ndlela ya vuntlhanu leyi hi vuyeriwaka ha yona hi ku va hi nga tivi leswaku makumu ma ta fika rini, hileswaku swi hi pfuna leswaku hi dyondza eka miringo leyi hi welaka ni ku tiyisa ripfumelo ra hina. (Hlaya Pisalema 119:71.) Masiku yo hetelela ya mafambiselo lawa hakunene i “minkarhi ya mangava leyi swi nonon’hwaka ku langutana na yona.” (2 Tim. 3:1-5) Vo tala emisaveni ya Sathana va hi venga, hikwalaho hi nga ha xanisiwa hikwalaho ka ripfumelo ra hina. (Yoh. 15:19; 16:2) Loko hi titsongahata naswona hi lava nkongomiso wa Xikwembu loko hi langutane ni miringo, ripfumelo ra hina ri ta tengisiwa onge hiloko ri hundze endzilweni. A hi nge lan’wi. Ku ri na sweswo, vunghana bya hina na Yehovha byi ta tiya ku tlula hilaha hi nga tshama hi swi ehleketa hakona.—Yak. 1:2-4; 4:8.

10. I yini lexi endlaka nkarhi wu tikomba wu famba hi ku hatlisa?

10 Nkarhi wu nga ha vonaka wu famba hi ku hatlisa kumbe katsongo. Loko hi khomekile naswona hi nga tshameli ku languta nkarhi, nkarhi wu tikomba wu famba hi ku hatlisa. Hilaha ku fanaka, loko hi khomekile hi ntirho wo tsakisa lowu Yehovha a hi nyikeke wona, makumu ma nga ha fika hi nga swi xiyanga. Emhakeni leyi, vatotiwa vo tala va hi vekele xikombiso lexinene ngopfu. Hi ku komisa, a hi kambisiseni leswi endlekeke endzhaku ka loko Yesu a ve Hosi hi 1914, kutani hi vona ndlela leyi van’wana va tikombiseke va rindzile ha yona loko van’wana va nga endlanga tano.

VATOTIWA VA KOMBISA LESWAKU VA LUNGHEKILE

11. Endzhaku ka 1914, ha yini vatotiwa van’wana va anakanye leswaku Hosi ya hlwela?

11 Anakanya hi xikombiso xa Yesu xa vanhwanyana va khume ni xa titalenta. Loko vanhwanyana kumbe mahlonga va le swifanisweni leswi a va tiva siku leri muteki kumbe n’wini wa vona a a ta vuya ha rona, a ku ta va ku nga vanga ni xilaveko xa leswaku va tshama va rindzile. Kambe a va nga ri tivi, hikwalaho a va fanele va tshama va lunghekile. Hambileswi ku ringana makume ya malembe vatotiwa a va teka lembe ra 1914 tanihi lembe ro hlawuleka swinene, a va nga swi twisisi kahle leswaku ku ta endleka yini. Loko swilo swi nga endleki hilaha a va langutele hakona, van’wana va vona va anakanye leswaku Muteki wa hlwela. Makwerhu un’wana endzhakunyana u te: “Van’wana va hina a hi anakanya leswaku hi ta ya etilweni eka vhiki ro sungula ra October [1914].”

12. Vatotiwa va swi kombise njhani leswaku va tshembekile ni ku tlhariha?

12 Anakanya ndlela leyi a swi heta matimba ha yona ku langutela leswaku makumu ma ta fika kambe ma nga fiki! Ku tlula kwalaho, vamakwerhu va langutane ni nkaneto hi nkarhi wa Nyimpi yo Sungula ya Misava. Ntirho wo chumayela a wu yimile onge hiloko vatotiwa va lo etlela. Kambe hi 1919, ku na leswi nga va pfuxa! Yesu u tile etempeleni ya Xikwembu ya moya naswona nkarhi wo kambela a wu fikile. Kambe, van’wana va kumeke va nga faneleki loko va kamberiwa xisweswo va lahlekeriwe hi lunghelo ra vona ro tirhela N’wini wa vona, Yesu. (Mat. 25:16) A va nga xalamukanga; a va fana ni vanhwanyana va swiphukuphuku lava va nga chelangiki mafurha eka mavoni ya vona. Naswona ku fana ni hlonga ro loloha, a va nga swi lavi ku titsona swo karhi hikwalaho ka Mfumo. Kambe vatotiwa vo tala va tikombise va tshembekile hi ndlela leyi hlamarisaka, naswona va kombise leswaku va swi lava ku tirhela N’wini wa vona ni le malembeni wolawo yo tika ya nyimpi.

13. Hi rihi langutelo leri vatotiwa a va ri na rona endzhaku ka 1914 naswona hi rihi langutelo leri va nga na rona namuntlha?

13 Endzhaku ka 1914, Xihondzo xo Rindza xi vule mhaka leyi ya nkoka: “Vamakwerhu, lava nga ni langutelo lerinene hi Xikwembu exikarhi ka hina a va heli matimba hi malunghiselelo hinkwawo ya xona. A hi nga lavi leswaku ku endliwa ku  rhandza ka hina; kutani loko hi kume leswaku a hi langutele leswi hoxeke hi October, 1914, xisweswo hi tsakile leswi Hosi yi nga cincangiki Kungu ra Yona hikwalaho ka hina. A hi nga lavi Yi endla sweswo. A hi navela ku twisisa makungu ni swikongomelo swa Yona ntsena.” Ninamuntlha vatotiwa va ha kombisa langutelo leri fanaka ra ku titsongahata ni ku navela loku fanaka ko endla ku rhandza ka Xikwembu. A va vuli leswaku va huhuteriwile kambe va lava ku endla ntirho lowu Yesu a va nyikeke leswaku va wu endla laha misaveni. Naswona sweswi “ntshungu lowukulu” wa “tinyimpfu tin’wana,” ku nga Vakreste lava nga ni ntshembo wa ku hanya laha misaveni hilaha ku nga heriki, va tekelela xikombiso xa vona.—Nhlav. 7:9; Yoh. 10:16.

HI KOMBISA LESWAKU HI LUNGHEKILE

Hambiloko swiyimo swi tika, lava swakudya swa moya

14. Ha yini swi fanerile leswaku hi yingisa leswi hlonga ro tshembeka ni ro tlhariha ri hi dyondzisaka swona?

14 Hilaha Vakreste lava totiweke va endlaka hakona, swirho leswi xalamukeke swa ntshungu lowukulu swi namarhela hlonga ro tshembeka ni ro tlhariha leri hlawuriweke hi Xikwembu leswaku ri nyika vanhu va xona swakudya swa moya kumbe ku va dyondzisa leswaku va nga vuyeriwa njhani eka Rito ra xona ni moya wa xona. Lava va ntshungu lowukulu lava kombisaka leswaku va lunghekile, va yingisa leswi hlonga ri swi dyondzisaka naswona swi fana niloko va tatisa mafurha eka mavoni ya vona. (Hlaya Pisalema 119:130; Yohane 16:13.) Hi ndlela yoleyo, na vona va nga tshama va lunghekele makumu loko Kreste a vuya, nakambe va ni matimba yo tshama va tshembekile ni le ka swiyimo swo tika swinene. Hi xikombiso, eka kampa yin’wana ya khotso ya Manazi, eku sunguleni vamakwerhu a va ri ni Bibele yin’we ntsena. Kutani va khongelele ku kuma swakudya swa moya leswi engetelekeke. Endzhakunyana ka sweswo va twe leswaku makwerhu la ha ku khomiwaka u swi kotile ku nghena ni minkandziyiso yi nga ri yingani leyintshwa ya Xihondzo xo Rindza ekampeni a yi tumbete eka nenge wa yena wa mhandzi. Un’wana wa lava poneke a ku ri makwerhu la totiweke la vuriwaka Ernst Wauer, loyi endzhakunyana a nga te: “Yehovha u hi pfune hi ndlela yo hlamarisa leswaku hi nhlokohata rungula leri khutazaka leri nga eka swihloko sweswo.” U tlhele a ku: “Masiku lawa, swi olova swinene ku kuma swakudya swa moya, kambe xana minkarhi hinkwayo ha swi tlangela? Ndza tiyiseka leswaku Yehovha u ni mikateko yo tala leyi a yi hlayiseleke lava n’wi tshembaka naswona va tshamaka va tshembekile va tlhela va dyela etafuleni ra yena.”

15, 16. Mpatswa wun’wana wu katekisiwe njhani hi ku hiseka ka wona entirhweni wa nsimu naswona u nga dyondza yini eka mintokoto yo tano?

15 Tinyimpfu tin’wana na tona ti pfuna vamakwavo va Kreste hi ku tshama ti khomekile hi ntirho  wo chumayela. (Mat. 25:40) A ti fani ni hlonga ro homboloka ni ra vulolo ra le xifanisweni xa Yesu, ti tirha hi matimba ni ku titsona swo karhi leswaku ti rhangisa Mfumo evuton’wini bya tona. Hi xikombiso, loko Jon na Masako va komberiwe leswaku va ya eKenya va ya pfuneta ku chumayela vanhu lava vulavulaka Xichayina, eku sunguleni a va kanakana ku ya. Kambe endzhaku ka loko va anakanyisise hi xiyimo xa vona naswona va khongerile hi mhaka yoleyo, va kunguhate ku rhurhela kona.

16 Va katekisiwe swinene hikwalaho ka matshalatshala ya vona. Va te: “Nsimu ya laha ya tsakisa.” Va sungule tidyondzo ta Bibele ta nkombo. Va ve ni mintokoto yo tala leyi tsakisaka swinene. Va gimete hi ku: “Hi nkhensa Yehovha leswi a hi pfumeleleke leswaku hi ta laha.” Ku ni vamakwerhu van’wana vo tala va xinuna ni va xisati lava kombisaka leswaku va lava leswaku loko makumu ma fika ma va kuma va khomekile hi ku tirhela Xikwembu ku nga khathariseki leswaku ma fika rini. Anakanya hi magidi lawa ma thwaseke eXikolweni xa Giliyadi naswona ma nga varhumiwa. U nga twa swo tala hi ntirho wa vurhumiwa eka xihloko lexi nge, “Hi Endla Leswi Nga eMatimbeni Ya Hina!” lexi nga eka Xihondzo xo Rindza xa October 15, 2001. Loko u ri karhi u hlaya xihloko xexo lexi tsakisaka lexi vulavulaka hi ntirho wa vurhumiwa, anakanya hi tindlela leti u nga endlaka swo tala entirhweni wa Xikwembu ha tona, naswona ntirho wa wena wu ta yisa ku dzuneka eka xona ni ku endla leswaku u tsaka swinene.

NA N’WINA TSHAMANI MI RINDZILE

Nkarhi wu famba hi ku hatlisa loko hi dzikisa mianakanyo ya hina eka mintirho ya Vukreste

17. Leswi hi nga tiviki siku kumbe nkarhi wa makumu swi ve nkateko hi ndlela yihi eka hina?

17 Swi le rivaleni leswaku ku va hi nga tivi siku kumbe nkarhi lowu mafambiselo lawa ma nga ta herisiwa ha wona i nkateko eka hina. Ematshan’weni yo hi heta matimba, swi hi pfuna leswaku hi tshama hi khomekile hi ku endla ku rhandza ka Xikwembu, naswona vuxaka bya hina ni Tata wa hina la nga ni rirhandzu, Yehovha byi tiyile. Leswi hi dzikiseke mianakanyo ya hina eka ntirho lowu Yesu a hi nyikeke wona naswona hi papalateke swikavanyeto, hi tsakile leswi hi tirhelaka Yehovha.—Luka 9:62.

18. Ha yini hi lava ku tshama hi tshembekile eka ntirho lowu hi wu endlelaka Xikwembu?

18 Hi tshinela swinene eka siku ra Xikwembu ra ku avanyisa. A nga kona eka hina la lavaka ku khomisa Yehovha kumbe Yesu tingana. Va hi nyike ntirho wa nkoka swinene leswaku hi wu endla emasikwini lawa yo hetelela. Ha yi tlangela ndlela leyi va hi tshembaka ha yona!—Hlaya 1 Timotiya 1:12.

19. Hi nga swi kombisa njhani leswaku hi lunghekile?

19 Ku nga khathariseki leswaku ntshembo wa hina i wa ku hanya etilweni kumbe eParadeyisini laha misaveni, hi ta hambeta hi yingisa xileriso xa Xikwembu xo chumayela ni ku endla vadyondzisiwa. A swi bohi leswaku hi tiva siku kumbe nkarhi lowu siku ra Yehovha ri nga ta fika ha wona. Hi nga tshama hi lunghekile naswona hi ta tshama hi lunghekile! (Mat. 24:36, 44) Ha tiyiseka leswaku loko ntsena hi tshemba Yehovha hi ku helela hi tlhela hi rhangisa Mfumo wa yena a hi nge khomisiwi tingana.—Rhom. 10:11.

^ ndzim. 3 Hlaya Xihondzo xo Rindza xa March 1, 2004, matluka 14-18.